Matthew 22

Te: 22:1-14 Yi Te Ambu Liimbaliinga Langi Nuring Ung-Ekale (21:28–22:14 pali kanui)

1Yesos-ni kelepa ung mare [Juda yi-aulimandu nimbándu] ung-eku te wasie topa kene nimba mele:

2“Pulu Yili yi nuim kingele molupa yambuma nokulemú akili i-sipa mele:

“Yi nuim king te-ni yunga málale ambu liimbaliinga langi pulele kalunjurum. 3Kórunga “Yi ambu liimba langi wasie namili sukundu wangi.” nirim yambuma yunga kendemande-yimandu “ “Ekupu langi namili wai.” ni-pai.” nimba liipa mundurum, akiliinga-pe puku aku-siku niring kene

enini “Naa omulú.” niring.

4Alsupa kendemande-yi mare lupa liipa mundupa kene nimba mele: “ “Langi wasie namili wangi.” nirindu yambumandu puku niku mele: “Langi tepa mimi tepa pora símu. Yunga kung-kao pelama kene kung-kao walú wami tílima kene tum. Langi pali tepa mimi tepa nosilimáliinga yi ambu liimbaliinga langi wasie namili wai.” ni-pai.” nirim.

5Akiliinga-pe puku niring kene naa piliiku munduku kelku, te yunga puniena purum, te yunga méle taropu túlina purum, 6mare-ni kingeliinga kendemande-yima ambolku liiku teku kis-siku kene toku kunjuring.

7[Aku tiringeliinga] kingele arerembi kolupa kene yunga ami-yimandu nimba mele: “Yima molemelena puku toku konjuku eninga koleale tepi leku to-pai.” nimba enini liipa mundurum kene puku kene, nirim mele tiring.

8Kanu-kene kingele-ni yunga kendemande-yimandu nimba mele: “Yi ambu liimbaliinga langi nosuliumulu akiliinga-pe “Wasie namili wangi.” nirindu yambuma nungí kapula naa temba akiliinga 9eni puku kene kupulanum lupa-lupa lelemúmanga pali puku yambu kanungíma “Yi ambu liimbaliinga langi wasie namili wai.” ni-pai.” nirim. 10Piliiku kene kendemande-yi kanuma kupulanumumanga pali puku yambu kanuringma pali liiku máku turing. Yambu kaíma kene yambu kísima kene wasie liiku máku turing. Kanu-kene yi ambu liimbaliinga koleana yambuma aima oku si siku muluring.

11Oku muluring kene kingele “Yambu máku toku molemelema kanu-pambu.” nimba enini muluringna omba kene, yambuma yi ambu liimba [mákuna ungéliinga wale-pakuli kam-kamuma ‘pakuku sukundu wangi.’ niku siring] wale-pakulimanga yi te wale-pakuli akumanga te naa pakupa mulurum kanupa kene 12yunundu nimba mele: “Kangale, nu yi ambu liimba wale-pakuli kamu te naa pakukunu we únu kanokur akiliinga nu kupulanum téliinga sukundu únuye?” nirim kene yi kanili-ni ung te naa nirim.

13Kanu-kene kingele-ni langi nukuring kendemande-yimandu nimba mele: “Yi ili kimbu-kima ka toku kene pena kolea súmbulu mulúlina toku pena mundai!” nirim. Akuna yambuma aima mindili noku kene kola teku mindili siku mulungí.” [nimba Yesos-ni nirim.]

14[Aku nimba kene Yesos-ni ung-ekaliinga pulele kamu nimba mele:] “Sika [Pulu Yili-ni] yambu pulelendu “Wai.” nilimú akiliinga-pe yambu koltale mindi makó topa “Sukundu wai.” nilimú.” nirim.

22:15-22 “Gapman Ku-Moni-Takis Tamili Mola Móluye?” Niku Yesos Walsiku Piliiring Temanele

15[Yesos-ni aku-sipa nirim]-na [piliiku kene] Perisi-yima ulsu puku eni-enini liiku máku toku kene niku mele: “‘Yesos-ni ung te nimba kis-sipili. Nimba kis-simba kene yunu tepu kis-samili.’ nimbu nambi teamiliye?” niku tombulku niku kene, 16enini lumbili andúlima kene yi nuim king Erot-nga talapena-yi mare kene liiku Yesos mulurumna liiku munduring, enini puku Yesos-ndu niku mele:

“Ung-Bo Tunjuliele, oliu piliilimulu, ‘Nu-ni ung-sikama mindi niku, Pulu Yili-ni “Teai.” nilimú uluma aima sika-ungma mani siku ung-bo tonjukunu, nu yambu tiluringa kepe numanu kimbu naa sikunu, yambuma-kene mundu-mong naa tenjiku eninindu pali ung tilu-siku kapula-kapula nikunu sillu.’ nimbu piliilimulu. 17Aku-siku nikunu molláliinga nu nambulka niku piliikunuye? Oliu-ni Rom-Gapman-Yi Aima Auli Kumbina Sisale ku-moni-takis túmulu lem kapula mola móluye? Pulu Yili-ni akilindu ung-mani sirim ung-manele nambulkale nimba pelemúye? Nikunu si.” niring.

18Akiliinga-pe Yesos-ni yu-kene numanu kis panjiku yu teku kis-singí tiring piliipa kene eninindu nimba mele: “Eni gólu toku topele-mapele tuli yima, ‘Yu-ni nimba kis-sipili.’ niku nambimuna na manda leku gólu toku walsikimiliye? 19Ku-moni-takis tolemele ku-mong te na liiku ora sai.” nirim. Enini yu mulurumna ku-mong te meku oku yu siring.

20Kanu-kene Yesos-ni eninindu nimba mele: “Ku-moni ilinga naenga kumbi-kerale kene bili kene molemúye?” nirim. 21Enini yunundu niku mele: “Rom-Gapman-Yi Aima Auli Kumbina Sisale-nga kumbi-kerale kene bili kene molemú.” niring.

Kanu-kene yu-ni eninindu nimba mele: “[Ku-monele Sisale-nga] akiliinga Sisale-nga mélema Sisale yunu siku, Pulu Yili-nga mélema Pulu Yili yunu sai.” nirim.

22Yu-ni aku-sipa [aima sumbi-sipa] nirim mele piliiku kene [‘Yu aima piliipa kungnjuli pelemú yili lam.’ niku piliiku] numanu pulele liiku munduku kene yu munduku kelku enini puring.

22:23-33 “Kolemele Yambuma Lomburuku Ola Molku Kene Alsuku Nambi Tingínje?” Niku Yesos Walsiku Piliiring Temanele

23[Yi kanuma Yesos kene ku-moni-takis tuli ungele niku pora siring kene] penga ena akiliinga Sadusi-yi mare Yesos mulurumna uring. Sadusi-yima enini ‘Pulu Yili-ni kolemele yambuma topa naa makinjimba, lomburuku ola naa mulungí.’ niku piliiku muluring talapele. Sadusi-yi akuma oku Yesos walsiku piliiku kene niku mele: 24“Ung-Bo Tunjuliele, [Pulu Yili-nga ung-manima oliu sirim yi] Moses-ni ung-mani sipa kene nimba mele:

“Ambu liimba yi te kangambula naa memba kolumba kene

yi kanili yunga angin molumbále-ni

yunga ambu-wayele liipa angin liipa tapunjupa

kangambula minjipili.” Ung-Manima 25:5

nirim aku-sipa bukna molemú kanili. 25[Ung-mani kaniliinga ulu te oliunga yi mare-kene wendu urum mele nu walsipu piliamili.]

“Anginipili angere yupuku-guli muluring. Yi-komale ambu liipa kene kulurum. Kangambula te naa mulupili yunu kulurumeliinga yunga bulkundu anginele-ni [yunga angin kulurumeliinga] kangambula ‘menjambu.’ nimba ambu-wayele kelepa yunu liirim. 26Akiliinga-pe kangambula te naa-ko menjipa kene yunu we kulurumko. Yunga bulkundele-ni ambu kanili liirimko akiliinga-pe yunu kepe we kulurumko. Aku telsiliiku puku kene yi angere yupuku-guli pali kangambula tilu kepe naa meku kene kolku pora siring kene akeleale kamu we kulurumko. 27Penga ambale yunu kulurumko. 28Akiliinga, kolemele yambuma penga lomburuku ola mulungí kene ambu kanili yi angere yupuku-guli pali ya mana liiringeliinga ambale yu yi naenga min molumbaye?” niring.

29Yesos-ni eninindu pundu topa nimba mele: “Eni Pulu Yili-nga bukna ung molemúma kene, Pulu Yili-kene tondulu pelemú mele kene, naa piliiku lu liilimeláliinga [yambuma penga tengélendu nikimili mele piliiku sunduku gólu tokomele]. 30Lomburuku ola mulungí yambumanga yima ambu naa liiku, ambuma yi naa puku, aku aima naa tingí. Mulú-koleana angkellama molemele mele aku-siku mulungí. [Angkellama-ni mana-yambuma telemele mele naa telemele kanili.] Aku tingéliinga [‘Eni Pulu Yili-nga ungele piliiku sunduku lawa telemele.’ niker.]

31-32“Akiliinga-pe [eni Sadusima-ni] ‘Kolemele yambuma lomburuku ola naa mulungí.’ niku piliilimeláliinga ung te Pulu Yili-ni enindu nirimele eni naa kanuku piliilimiliye? Yunu-ni i-sipa mele nimba mele:

“Na Eprayam kene Aisak kene Jekop kene

eninga Pulu Yili moliu.” nirim. Wendu Uring 3:6

Pulu Yili-nga bukna ung molemú akili naa kanuku piliilimiliye? [‘Eninga Pulu Yili mulurundu.’ naa nirim. ‘Eninga Pulu Yili moliu.’ nirim kanili.] Pulu Yili yu kululi yambumanga Pulu Yili mólu; yu kona mululi yambumanga Pulu Yili.” nirim.

33Yesos yu-ni aku nirim mele yambu máku toku muluringma-ni piliiku kene yunga ung-mani sipa ung-bo tunjurum ungma piliiku kene pung-pungu niku aima numanu pulele liiku munduring.

22:34-40 Pulu Yili-ni “Teai!” Nimba Ung-Mani Sirim Ung-Manimanga Tale Olandupaliinga Temanele

34Akiliinga-pe Yesos-ni ung nirim akili-ni Sadusi-yimanga ungele pipi sinjirim, enini ung te naa pirim-na Perisi-yima-ni piliiku kene enini liiku máku toku [Yesos mulurumna] uring. 35[Uring kene] eninga yi te, yu Pulu Yili-nga ung-manimanga puluma piliipa kunjurum yili-ni ‘Yunu-ni nimba kis-simbanje manda lepu piliambu.’ nimba Yesos-ndu walsipa piliipa kene nimba mele: 36“Ung-Bo Tunjuliele, Pulu Yili-ni ung-mani sirim pelemúmanga nambulka ung-manele olandupaye?” nirim.

37Yesos-ni yunundu nimba mele: “Ung-mani olandupale i-sipa mele:

‘Eninga numanuma kene,

eninga minima kene,

eninga piliipa kungnjúlima kene,

akuma-ni Auliele eninga Pulu Yili mendepulu

tondulu munduku numanu monjai.’ Ung-Manima 6:5

aku nimba pelemú. 38Ung-mani akili yunu aima tondulu, olandupale.

39Tale-sipa ung-manele yu-kene tilu-sipa mele. Akili i-sipa:

‘Eni-enini lupa-lupa numanu monjuku

eninga kangiele eni-enini

kondu kolku nokolemele mele

aku-sikuko pulu lelemú yambuma

numanu monjuku nokuku molai.’ LLipai 19:18

nimba pelemú. 40Pulu Yili-nga ung-mani Moses-ni sirim-ma pali kene, Pulu Yili-ni “Ninjai!” nimba ung nimba sirimuma piliiku yambuma niku siring yima-ni bukna turing ungma pali kene, ung kanumanga pulele ung-mani akusele mindi.” nirim.

22:41-46 Yesos-ni “Yi-Nuim Kraisele Naenga Málaleye?” Nimba Walsurum Temanele

41Kanu-kene Perisi-yima aku-siku we máku toku molangi Yesos-ni eninindu i-sipa walsipa nimba mele: 42“Pulu Yili-ni “Enini nokupa konjumba yi te liipu mundumbu.” nimba ui makó turum yi-nuim Kraisele-ndu eni nambulka niku piliikimiliye? Yu nae? Yu nae-ni kalupa liimba niku piliilimiliye?” nirim kene enini niku mele: “[Yi-nuim Kraisele yu yi nuim king] Depit-ni kalupa liimba yi te.” niring.

43Yu-ni alsupa enini walsipa nimba mele: “Aku lem [Pulu Yili-nga] Minéle Depit-nga numanuna molupa kene ung te nirim kene Depit-ni piliipaliinga yi-nuim Kraisele-ndu “Auliele” nirim akili nambimuna nirim niku piliikimiliye? Depit yu-ni [yi-nuim Kraisele molumba mele] i-sipa nirim:

44“Auli [Pulu Yi Yawe-ni]

nanga Auliele-ndu nimba mele:

“‘Nunga ele-túma nu-ni nokani.’ nimbu,

penga enini topu mania mundunjumbu akiliinga

isili-ui nu [na-kene wasie tapú topulu

yi-nuimsele molupulu mélema nokambili]

nanga ki-bokundu oku mului.”

nirim.” Konana 110:1

nimba Depit-ni nirim kanili. 45Depit-ni [yi-nuim Kraisele] yunundu “Nu nanga Auliele.” nirim lem yu penga nambi-sipa Depit-ni kalupa liimba yi te [mindi] molumbaye?” nirim.

46[Yesos-ni aku-sipa walsurum mele piliiku kene] yi akuna muluringmanga te-ni ung tilu kepe pundu toku kapula naa niring. [Enini yu walsiku piliiring ungma pali yunu-ni pundu topa anju nimba kunjurum piliiku kene] pe alsuku yu ung te walsiku piliingíndu pipili kolku mundu-mong tenjikuliinga naa walsiring.

Currently Selected:

Matthew 22: mux

Highlight

Copy