Luke 23
23
23:1-5 Rom-Gapman Yi-Nuim Paillet-ni Yesos-nga Kotele Piliirim Temanele
1Aku-siku nikuliinga Juda-yambumanga yi-aulima pali ola angiliiku Yesos liiku meku puku [Rom-gapman yi-nuim] Paillet mulurumna meku puku kot tinjiring. 2Yu kot tenjiku kene Paillet-ndu niku mele: “Yi ili-ni nimba mele: “Rom-gapmanale-ni oliu Juda-yambuma naa nukupili.” nimba, “Rom-Gapman-Yi Aima Auli Kumbina Sisale ku-moni-takis naa tai.” nimba, “Yu-yunu “Pulu Yili-ni oliu nokupa konjumba yi te liipu mundumbu.” nimba ui makó turum yi-nuim Kraisele, yi nuim kingele moliu.” nimba molemále oliu piliipu kanolemulu.” niring.
3Yi-aulima-ni aku-siku niring-na piliipa kene Paillet-ni [Yesos-nga kotele] yu walsipa piliipa kene nimba mele: “Nu Juda-yambumanga yi nuim kingele mola móluye?” nirim. Yesos-ni pundu topa kene nimba mele: “Sika nikinu. Akili na.” nirim.
4Aku nirim kene piliipaliinga Paillet-ni Pulu Yili popu tunjuring yi-aulima kene, we-yambu akuna liiku máku turingima kene, eninindu nimba mele: “Yi ili ulu te naa tepa kis-sim.” nirim.
5Akiliinga-pe enini karaye teku tondulu munduku niku mele: “Yu-ni ung-mani sipa kene “We-yambuma ulu teku kis-siku, mong liiku teangi.” nimba mani sirim. Yu-ni ui-pulu-pulu kolea Gallalli distrik ung akili mani sipa, penga yandupa kolea Judia distrik koleamanga pali ung-mani silsiliipa andupa kene, penga kamu ya kolea-auli Jerusallem omba ung akili mani sipa molemú.” niring.
23:6-12 Yi Nuim King Erot Mulurumna Yesos Meku Puring Temanele
6“Kolea Gallalli” niring kene piliipaliinga Paillet-ni eninindu walsipa piliipa kene nimba mele: “Yi ili yu Gallalli-yi ténje?” nirim kene 7enini “O.” niring kene piliipaliinga Paillet-ni nimba mele: “[Yi nuim king] Erot, Gallalli distrik nokulemú yili, Yesos-nga kotele yu-ni piliipili yu molemúna meku pai.” nirim. Ena kaniliinga [yi nuim king] Erot kanili yu Jerusallem omba mulurum kilia piliipaliinga, “Yu molemúna meku pai.” nirim. [Paillet yu kolea Judia distrik, Jerusallem lirim, nukurum yili.]
8Erot [mulurumna meku puring kene] yu-ni Yesos kanupa kene numanu sirim. Yu Yesos-ni ulu-pulu tirim mele ung pulele piliipaliinga, ‘Yi akili na kanulkanje kapula!’ nimba piliipa molupa, ‘Yu-ni ulu-tondulu te tipili kanambuka!’ nimba piliipa mulurumeliinga yu urum kene kanupa numanu sirim.
9Akiliinga, Erot-ni Yesos ung pulele walsipa piliirim akiliinga-pe Yesos-ni ung te pundu topa naa nimba we mulurum. 10Pulu Yili popu tunjuring yi-aulima kene, Pulu Yili-nga ung-manimanga puluma piliiku ung-bo tunjuring yima kene, akuna angiliiku kene enini Erot-ndu niku mele: “Yesos-ni i-sipa mele ung nimba kis-sipa, i-sipa ulu pulele tepa kis-sipa molemú.” niku tondulu munduku niring. 11Kanu-kene Erot kene yunga ami-yima kene enini ‘Yesos yu yi-nuim móluko, yu we-yi te.’ niku yi-nuimima-ni pakolemele mulumbale kaí te liiku pakunjuku, yunga ung-taka tonjuku tae tinjiring. Kanu-kene Paillet mulurumna Erot-ni Yesos liipa yandu mundurum.
12Paillet-ni Erot mulurumna Yesos ui naa liipa mundupili Paillet kene Erot-sele ui elsele ele-tu yisele muluringli. Akiliinga-pe Yesos-kene aku-siku tiringli enaliinga penga elsele anginingli mele-sele muluringli.
23:13-25 Paillet-ni Yesos-nga Kotele Piliipa Kene “Yu Unji-Perana Ola Pepa Kene Kulupili.” Nirim Temanele
13Yesos Paillet mulurumna yandu meku uring kene Paillet-ni Pulu Yili popu tunjuring yi-aulima kene, Juda-yambumanga tápu-yima kene, we-yambuma kene, “Enini wai.” nimba kene 14nimba mele: “Yi ili na moliuna meku oku kene “Yu-ni yambumandu ‘Rom-gapmanale-ni oliu naa nukupili.’ nimba ‘Enini mong liiku teangi.’ nimba molemú.” níngi. Kanu-kene eni kanuku molangi na-ni kotele piliipuliinga eni ‘Yu tepa kis-sirim.’ níngi akili na ulu te naa piliiker. 15[Gallalli distrik yi nuim king] Erot, yu-kene yi ili-ni ulu te tepa kis-sirim te naa-ko piliipa kene yu alsupa yandu liipa mundum. Piliikimiliye? Yu ulu te tepa kis naa sim. Yu we nambimuna topu konjumulúye? 16Ulu te tepa kis naa símaliinga na-ni yu we kimbulú-ni topu kene “Kelku pui.” niambu.” nirim.
17-19(Kolea-auli Jerusallem sukundu yi te, yunga bili Barapas, [yu kene yi mare kene] ‘Rom-gapmanale-ni oliu Juda-yambuma naa nukupili.’ niku ui Rom-gapmanale kene ele tekuliinga yambu mare toku kunjuringeliinga yu ka siring. [Rom-gapmanaliinga ka-lkuna yi Barapas akili we pípili Juda yi-aulima-ni Yesos kot tinjiring]. Juda-yambuma-ni puniemanga taki-taki kolea-auli Jerusallem oku akuna sukundu Pulu Yili-ni eninga anda-kolepalima Naa Topa Ola We Omba Purum akili piliiring enama wendu urum kene Rom-gapman yi-auliele-ni ka-yi te ka-lkuna wendu liipa mundupa “Pui.” nirim.) [Aku-sipa tirim mele piliiringeliinga Paillet-ni “Yesos-ndu “Pui.” niambu.” nirim kene piliikuliinga] yambuma-ni pali yundu tondulu munduku kene niku mele: “Yi ili mólu. Yu [kulupili] meku pukunu kene, Barapas, [ka-lkuna] wendu liiku si.” niring.
20Paillet-ni ‘Yesos we pupili.’ nimbaliinga eninindu ung te wasie nirim 21akiliinga-pe enini yundu wale pulele tondulu munduku niku mele: “Yesos kulupili unji-perana [toku] ku tokunu panjui!” niku muluring.
22Aku-siku niring kene yu-ni eninindu alsupa wale yupuku-tenjipa walsipaliinga nimba mele: “Akili nambimunaye? Yu mong nambulka mong te líímuye? Yu ulu te tepa kis naa sim. Yu we nambimuna topu konjumulúye? Na-ni yu we kimbulú-ni topu kene “Kelku pui.” niambu.” nirim.
23Akiliinga-pe enini karaye teku tondulu munduku kene niku mele: “Yi ili kulupili unji-perana [toku] ku tokunu panjui!” niring kene enini tondulu munduku niring mele piliipaliinga Paillet-ni enini niring akili mele temba tirim.
24Kanu-kene Paillet-ni kotele piliipaliinga enini Yesos-kene “Aima ti.” niku karaye teku mawa tiring mele ‘Aku-sipa tipili.’ nirim kene 25[yi Barapas,] ‘Rom-gapmanale-ni oliu Juda-yambuma naa nukupili.’ nimba ui Rom-gapmanale kene ele tepaliinga yambu mare topa kunjurum akiliinga ka-lkuna pirim yi kanili, wendu liipa enini sipaliinga, penga enini ‘Yesos unji-perana kulupili.’ niring mele piliipaliinga “Yu-kene aku-sipa wendu upili.” nimba ami-yima sirim.
23:26-56 Yesos Toku Kunjuring Kulurum Kene Ónu Tiring Temanele
23:26-43 Yesos Unji-Perana Ola Ku Toku Panjiring. Unji-Perana Pípili Juda-Yambuma-ni Yunga Ung-Taka Tunjuring Temanele
26[Rom ami-yima-ni] Yesos meku pungí puku kene, kolea Sairini yi te, yunga bili Saimon, yu Jerusallem pumba urum kene kanuku kene yunu ambolku liiku ka mele siku kene Yesos kolumba unji-perale liiku pendekuna ola nosunjukuliinga “Ili menjikunu yunu lumbili aelekunu pui.” niring.
27Yambu pulele yu lumbili puring. Ambu mare yu toku kunjingí akiliinga kola telsiliiku puring. 28Kanu-kene Yesos-ni topele topa ambu kanumandu nimba mele: “Jerusallem ambuma, eni na kolumbaliinga piliiku kene kola naa teai. Eni-enini kene eninga kangambulama kene ulu penga wendu ombáliinga piliiku kene kola teai. 29Aku-sipu nikerele, nambimuna nikerye? Niambu: Walse eni Jerusallem yambuma [teku kis-siku mong liilimeláliinga buni singí] enale wendu ombá kene eni kene eninga kangambulama kene mindili nungí kene yambuma-ni niku mele: “Ambu kangambula te naa meku, kangambula ame naa siku, wangnu molemele ambuma, eninga kangambula te mindili nombá enini naa kanungí akiliinga enini maluya.” ningí. 30Pe
‘yambuma-ni kelku mulú-komunga auli polemúmandu
“Ma angke toku oliu tupili.” niku,
ma-pangímandu
“Ma angke toku oliu panda tupili.” ningí.’”
[nirim.] Osia 10:8, Asaya 2:19
31[Aku-sipa nimbaliinga penga kamu ung-eku te topa kene eninindu nimba mele:] “Unji kona angiliimále peki tokomele. Aku lem pe unji kululiele nambi tingíye? Akiliinga [enini eni aku-siku buni singí, mindili nungí].” nirim.
32Yi tale kene wasie ‘Yesos kene kolangi.’ niku unji-perana ola [toku] ku toku panjingíndu meku puring. Yi akusele mong liiringli yisele.
33Kolea ‘Pengí Ombele’ nílina puring kene yu kene mong liiringli yisele kene unji-pera yupukunga ola [toku] ku toku panjiring. Mong liiringli yiselenga te Yesos yunga ki-bokundu [toku] ku toku, te Yesos yunga ki-tarukundu [toku] ku toku panjiring. 34Aku-siku tiring kene Yesos-ni nimba mele: “Tata, na-kene tekemele mele akili yambuma-ni naa piliiku tekemele akiliinga nu-ni tekemelaliinga “Mindili nangi.” naa nikunu kanokunu konde tenji.” nirim. [Aku-siku tekuliinga, ui unji-perana ola [toku] ku toku naa panjiku kene] ui kumbi-leku yunga mulumbale [posuku wendu liiku nusuringma] moke tingíndu enini lupa-lupa liingíndu ku-kas teku piliiku kene penga mulumbalema liiring.
35We-yambuma enini yu-kene tiring akili mele kanuku we angiliiringeliinga-pe eninga yi-aulima-ni yundu ung-taka tonjuku niku mele: “Yu yambu wema ‘Naa kolku kona pai.’ nimba tepa liirim mele ekupu yu-ni ‘Naa kolupu unji-perana omba wendu pambu.’ nimba yu-yunu tepa liipa unji-perana omba wendu pupili. Yu sika Pulu Yili-ni makó topa oliu ‘Nokupa kunjupili.’ nimba liipa mundurum yi nuim Kraisele omba mulúm lem ekupu yu-ni yunu aku-sipa tepa liipili.” niring.
36Ami-yima kene wasie yunga ung-taka tonjuku molkuliinga no-waen kumbili tili te ‘Nupili samili.’ niku singí tekuliinga 37yunundu niku mele: “Nu Juda-yambumanga yi nuim kingele mollu lem ‘Naa kolupu unji-perana wendu wambu.’ nikunu nu-ni nunu tekunu lii.” niring.
38‘Yu mong liirim mele yambuma-ni kanangi.’ niku
YI ILI JUDA-YAMBUMANGA YI NUIM KINGELE
niku bi toku unji-perana olakundu munjuring.
39Mong liiringli yisele unji-perana ola [toku] ku toku panjiring yiselenga te-ni Yesos-ndu ung-taka tonjupa kene nimba mele: “Nu “Pulu Yili-ni makó topa oliu ‘Nokupa kunjupili.’ nimba liipa mundurum yi-nuim Kraisele [moliu.” nillu akili sika mola móluye? Sika aku-sikunu] mollu lem nu kene olsu kene pali ‘Naa kolamili.’ nikunu teku liikunu unji-perana wendu lii.” nirim.
40Akiliinga-pe mong liiringli yiselenga yi te-ni kumbi-lepa yi te-ni nirim mele piliipaliinga yu ung-mura sipa kene nimba mele: “Nu kene yu kene tilu-siku mele mindili noku kolangli niku tíngeliinga nu Pulu Yili-kene mundu-mong naa tenjikunuye? 41Olsu tepu kis-sirimbulaliinga mindili kapula sikimili. Akiliinga-pe yi ili yunu mong te naa liirim.” nirim.
42Aku-sipa nimbaliinga yu-ni [Yesos-ndu] nimba mele: “Yesos, nu yi nuim kingele molkunu mélema nukuni kene na pilíí.” nirim kene 43Yesos-ni pundu topa kene yundu nimba mele: “Na-ni nundu aima sika nimbu siker: “Ekupu nu na-kene wasie Yambuma Molku Konjulemele Kolea Kaína pupu molumbulú.” niker.” nirim.
23:44-49 Yesos Kulurum Temanele
44-45Yesos unji-perana ola we pípili ai-tangili ena tuwallup killok tirim kene kolea pali sumbulú topa kene penga ipinjali ena tre killok tirim kene ena alsupa topa kolea tangurum. [Ulu auli te walsekale wendu urumko. Pulu Yili popu toku kaluring] lku-temboll [Jerusallem sukundu angiliirim akuna sukundu Pulu Yili mulurum] Sulumina Aima Kake Tili akuna keri-puluna [‘Yambuma sukundu naa pangi.’ nikuliinga ui taki-taki] mulumbale auli te-ni pipi siku panjiring angiliirim. Mulumbale kanili ai-suku-singina olá topa ulsu purum.
46Yesos-ni ung te tondulu mundupa nimba mele: “Tata, nanga mulungale ‘Nu molluna upili.’ nimbu nu siker.” nirim. Aku-sipa nimba kene yu kulurum.
47[Rom] ami-yi wan-andret nukurum yi te Yesos turing ami-yima nokupa mulurum yi kanili-ni Yesos ung te nimba kulurum mele piliipa kanupa kene yu-ni Pulu Yili kape nimba kene nimba mele: “Yi ili yu aima sika yi numanu sumbi-nili te lam.” nirim.
48Kanu-kene ‘Yunu unji-perana [toku] ku toku panjingí kanomulú.’ niku ui liiku máku turing yambuma yunu tirim mele kanuku bulu-bale niku ung pulele numanu liiku munduku kondu kolulsiliiku eninga mundu-mongma mi lirim kilia kondu nilsiliiku lkundu puring. 49Yu-kene ui tapú-toku anduring yima kene, kolea Gallalli distrik munduku kelku yu lumbili anduku [Jerusallem] wasie uring ambuma kene enini [yu-kene tiring kulurum mele] sulu-teku kanuku angiliiring.
23:50-56 Yesos Ónu Tiring Temanele
50-51Yesos kulurum kene yi te, yunga bili Josep, yu Juda-yambumanga kanjoll yi-auli te molupa, ulu-kaíma mendepulu tepa mulurum. Yu numanu sumbi-nili yi te, kolea Judia distrik Arimatia taon yili. Yu ‘Pulu Yili yi nuim kingele molupa oliu nokumba enale wendu upili.’ nimba nokupa mulurum yili. Yu Juda-yambumanga kanjollale sika mulurum, akiliinga-pe kanjoll-yima-ni [ui eni-enini kot piliikuliinga] “Yesos kulupili.” niring kene yu-ni “O.” naa nimba we mulurum. 52Yi kanili-ni [Rom-gapman yi-nuim] Paillet mulurumna pupa, “Yesos-nga ónale na si.” nimba mawa tirim.
53Paillet-ni “Kapula.” nirim kene Josep pupa ónale mania liipa, mulumbale kona te-ni liipa kumu topa kene, ku-muru te ukuku nusiringina memba pupa suku nusurum. Ku-muru kanuna yambu-ónu te ui naa nusiring, yu mindi pulu-pulu nusurum. 54Yesos ónu tirim ena akili ekupu mele, ulsulam-ukundu mele [kóru muluring] ena Sambatele nondupa wendu ombá tirim. Sambat enale wendu ombá kene kóru mulungíndu ekupu mele, mélema liiku undu-undu siring enale wendu urum, ena kaniliinga Yesos ónu tiring.
55Ui Yesos kene kolea Gallalli distrik munduku kelku yunu kene wasie [Jerusallem] uring ambuma Josep-ni Yesos ónu tirim ku-murele kanuku akuna sukundu ónale nusurum mele nem-nemi niku kanuku kene, 56penga kanuku pora siku kene yandu oku, ‘Yunga ónuna kopungu-wel-ma kene méle lupa mura túlima kene kanjimulú.’ niku teku mimi tiring. Akiliinga-pe Sambat enale wendu urum kene Pulu Yili-nga ung-manele-ni
‘Sambat enale-kene kóru molai.’ Ui-Pulu-Pulu 2:3, Wendu Uring 20:10, Ung-Manima 5:14
nirim mele akili piliiku liikuliinga méle teku mimi tiring mélema liiku sumbi-siku ónu-koleana naa meku puku kene we nosuku kóru muluring.
Currently Selected:
Luke 23: mux
Highlight
Share
Copy
Want to have your highlights saved across all your devices? Sign up or sign in
© 2004, Wycliffe Bible Translators, Inc. All rights reserved.
