Wəza net Masləŋɗe 19

Pol arbanək wənna Maŋgəlva a Efesus

1Adan Apollos taya Korintus, Pol ambatək dəket massorgoɗe ha gap a Efesus. Adaki arih ɗii na Maŋgəlva meɓɓeti. 2Assohotike: Səza kətafaŋ na kərəhaŋgək Əmpəs Salala* sa? Azlanənka, məpprəm ɗaah wənna Əmpəs Salala ɓa. 3Pol assohetike: Ya baptem awani kərəhaŋ di? Aɓɗaŋ na baptem na Zaŋ mərahə. 4Pol apsit na, baptem na Zaŋ tay viyit məzu tubiyaŋ vi mambray neti. Zaŋ apsit ɗii na Israyel na say dətafən gən ɗəf məs dədazan dərɓagani, ndəni Zezu. 5Adan apprəmən vaska, atafənək baptem də iya na Zezu Ɗəfdaya namə. 6Pol aɗiyək van aketi, Əmpəs Salala adek aketi, apeleŋgək də ma maɓɓani, yaŋ arbanən wənna Maŋgəlva. 7Wəŋɗa net ɗii net wasan va klaw kiyit sula.

8Təla hoku Pol adambat adəv gəla nawpel wənnet Yahudiyenɗe, tay pel sit ɗii məza də geslne ɓa, tay bay ma dənɗaŋ. Tay gay wərban sit wənna məlĩ na Maŋgəlva. 9Amma ɗii meɓɓet kiyit ɓəlli, dəŋgereŋ wətaf wənnan ɓa, apeleŋgək mbrayen aka wənna tive na Ɗəfdaya amaret ɗii diiɗa. Vini Pol agil git ɗii na Maŋgəlva ambataŋ. Pay pak tayə bay ma dit ɗii a lekol na Tirannus. 10Asbanək wəɗɗan vaska ha gap wəsva sula, ha ɗii naka dələv na Asiya daga Yahudiyenɗe dit ɗii məza Yahudiyenɗeŋ ɓa pakə, apprəmənək wənna Ɗəfdaya.

Wən net kirtin Sikewas

11Maŋgəlva agəɗək sokoneɗ diiɗa nagət aket də Pol. 12Akan sitinik kesekese net lukutɗe na Pol sit məs gbəgbaɗe, gbəgba' neti də witem net pak agilke. 13Yaŋ Yahudiyenɗe meɓɓet adoŋ atəki maɓɓani, wəgil git witemɗe, tahəŋ wənahaŋ na: Də iya na Zezu məs Pol adarban wənnani, ndəni mədaw nah sukum. 14Kirtin daya net məs dəlveŋge məs adawyaŋ na: Sikewas dədaɗanən wənnəska. Kirin vet buhuləŋ. 15Amma witem apsit na: Nəsənək Zezu, Pol bo nəsənək wənnani, ya nokum may nawa kənanaŋ kandi? 16Ɗəf mitemin nak azlahək aket də sembe, ha adayək kiti, agəɗsitik vamviya, angaretik lukutɗe neti, anzuwaŋgək siŋgil ananda zit mekeleŋ. 17Yahudiyenɗe dit ɗii məza Yahudiyenɗeŋ ɓa na Efesus pakə, apprəmənək wənnani. Makret azlaka, yaŋ ɗii diiɗa tahəŋ wəgakdakanən iya na Ɗəfdaya. 18Ɗii diiɗa sə waleŋgit ɗii dətafaŋ azoŋko atubiyaŋka də wərban wənnet abet ɗii pakə. 19Ɗii məɗɗaŋ sokeneɗ də wəska helik pak akiyənik ɗerewelɗe neti, azleninik keret ɗii pakə. Aŋɗanənək deleɗ məs məlbəh ɗerewelɗe veti, waɗɗaŋ deleɗ na təbəs gabal kaklaw sle (50,000). 20Vaski wəpel na Ɗəfdaya atray də sembe, arbanək gakdak na Maŋgəlva.

Wən agəɗək a Efesus

21Dərɓaga wənnəska, Pol aŋgələk wətoŋ kla Makedoniya də Akaya vi kambat a Zerusalem. Amna: An nəmbatək adak na, wanəmbat a Roma'e. 22Aslinik məza baahaŋ nan sula a Makedoniya, ndəɗaŋgəŋ Timote də Erastus, amma nan anziyək aka dələv na Asiya suɗike.

23Dəpas bo wən metiŋgin asilik a Efesus aka wənna tive na Ɗəfdaya. 24Ɗəf taya daka, iya nan na Demetriyus, dədawbay təbəs net deleɗ məs dəgil va gəla na maŋgəlva Artemis. Atərək wəray sit məɗɗaŋ wəza nan sawɓa. 25Ayek pakə, akkeletik dit ɗii məɗɗaŋ wəza zemvin net pakə, apsit na: Haaya! Kəsəŋgənək wəza naməŋ tayə tər səm wəray sawɓa. 26Munokum sən kikum munokum tatulanəni, munokum tatəpprəmən an məs Pol adaɗɗaŋka. Tay nah na maŋgəlva məɗɗan də vet ɗii na, nan maŋgəlvayi ɓa, ha ɗii na Efesus diiɗa dit ɗii naka dələv na Asiya vadaysa net atafənək wənnani. 27Ya an ɗii məs dədasbanən azelenənək wəza namə, wəza nami kaaka' ɓa, ɗii wapanən wə gakdakan gəla nat Artemis maŋgəlvak nam matəŋgəta. Ɗii wapanən wəɗi kiyit maŋgəlvak məs ɗii na Asiya dit ɗii namba dələv pak adawzuliyaŋ sətəni, watəkpaŋ zəga ɗarə.

28Adan ɗii pak apprəmən wənnan vaska, gidivit adək sawɓa, atəŋgaŋgək wəɗi geŋgere, aɓɗaŋ na: Artemis na Efesus matəŋgətə! 29Wən nan atrayək awalaŋ gəla pakə, wənnan atapetik ɗii, armeninik may Gayus də Aristarkus ɗii məs dəzoŋ də Pol sula sə Makedoniya, anzuwaŋgək dənɗaŋ akeninik atəki nasmaya. 30Pol bo manaka wəmbat azet ɗii veti, amma ɗii na Maŋgəlva atakənka. 31Ɗii gugiriɗ na dələv na Asiya dit bayneŋgiɗin, asləŋgaŋgək azani, akkamanənka adawtoŋ atəki nasmay ɓa. 32Dəpas bo wəkkal nan attapək sawɓa. Ko naway pak tayənzla vamvəl də wənnan temme, vi ɗii vadaysa dəsənən wən məkkelet akan ɓa. 33Ɗii suweleŋgit ɗii məs dəkkalaŋ neki, adoŋguk wənahsən Aleksandər, Yahudiyenɗe ayanənək dəziw gən abet ɗiiyi. Yaŋ Aleksandər aslan van a disiŋ karban wən məs ɗii akkalaŋ sənənni. 34Amma adan asəŋgən na Yahudiyenni, atəŋgaŋgək wənzla vamvəl aka wən taka ha gap ler sula Artemis na Efesus də gakdaktə!

35Saha saha məzu ver na walaŋ gəla nan aɓətgit ɗiiyi, apsit ɗii na: Haaya munokum ɗii na Efesus! Ko naway asənək gəla nat Artemis məs də gakdaka, də gərəm məs dəbət sə disiŋ pak taya Efesus. 36Ɗəf tay nawzelen wənnan ɓa. Vini say məɓət ɗa, məzi zukum aza an məs kədaɗɗaŋ. 37Ɗiiyiŋ məs kəkiyeŋ aŋkiŋ na, dəhalaŋ zəga sə dəv gəla salala ɓa, dəpeleŋ mbrayen akat maŋgəlvak nam ɓa. 38An Demetriyus dit məɗɗaŋ wəza nan tahəŋ də wənna wəli aka ɗəffa, ɗəɗaah say də pay nawtaw kita azet ɗii gugiriɗ nokum. Adak na, waɓapən wətawən kita nani. 39Amma an kəŋglaŋgək wənnan dayki aska, say məka wənnan aba wəkkal net ɗii pakə. 40Amma an məs dəgəɗ dəpaŋkəŋka, kuzuŋ kaw hayyami akani, wanahaŋ na mənamtə məɓoŋmə, vi mənam tat də wən gala nakkal vaŋ akan ɓa.

41Adan agrak wəpel siti, atray gitike.

Currently Selected:

Wəza net Masləŋɗe 19: GDRNT85

Highlight

Copy