Lucas 23

Sa Pagbistiga Ki Jesus Hi Pilato

(Lucas 23:1-5; Mateo 27:1-2, 11-14; Marcos 15:1-5; Juan 18:28-38)

1Inuwit si Jesus hu alan ha mga labaw ha agalen diyà ki Pilato. 2Insumbung haena hu kagi dan, “Binistiga day en haini sa etaw aman natun-an day ha migtudlù hu pagsupak hu gubirnu ta harì din agtugutan sa mga etaw ha magbayad hu buhis diyà ki Cesar daw kagi din pa daan ha iyan en su Misiyas ha Harì.”

3Aman ininsaan haena hi Pilato, “Iyan ka ba Harì hu mga Judio?”

Tuminubag si Jesus, “Iyan ad en su inikagi nu.”

4Inikagiyan dayun hi Pilato sa mga labaw ha sinaligan hu paghalad daw sa kaet-etawan, “Hurà ku naahà ha salà taini ha etaw.”

5Ba bà dà sidan nasì nangatarengan ha tagyanaen, “Iyan haini migsinamuk duun hu mga etaw pinaagi hu pagtudlù din kandan sugud ta Galilea dayun duun hu mga banuwa ta Judea daw bisan iman dini ta Jerusalem.”

Sa Pagbistiga Ki Jesus Hi Herodes

6Su mapaliman haena hi Pilato nanginginsà ku taga-Galilea si Jesus. 7Su matun-an din ha si Jesus sakup diay hi Herodes impauwit din diyà ki Herodes ta diyà daan ta Jerusalem taena ha panahun.

8Su maahà hi Herodes si Jesus nalipay gayed ta nalugay en ha agkabayaan din haena ag-ahaa. Napaliman din sa binuhat hi Jesus aman agkabayà daan ag-ahà hu belenganen. 9Siniguru din haena bistigaha ba hurà en gayed magtubag si Jesus. 10Saena ha mga labaw ha sinaligan hu paghalad daw sa manunudlù hu Kasuguan tagtiyadeg diyà ha tagsumbung kandin ha agkangapauk daan. 11Dayun si Herodes daw sa mga sundalu din migtameyes en daan ki Jesus daw pinagagayhaan dan. Pininaksuyan dan hu bisti hu harì daw ipalikù diyà ki Pilato. 12Duun taena ha aldaw nakag-amigu en si Herodes daw si Pilato ta su anay migkuntra sidan.

Sa Paghukum Ki Jesus Hu Kamatayen

(Lucas 23:13-25; Mateo 27:15-26; Marcos 15:6-15; Juan 18:39—19:16)

13Inamul-amul hi Pilato sa mga labaw ha sinaligan hu paghalad daw sa duma ha mga agalen daw sa kaet-etawan 14daw inikagiyan din sidan, “Inuwit nuy haini sa etaw dini ta kanak ta kagi nuy ha agdasigen din sa mga etaw hu pagsupak hu gubirnu. Binistiga ku haini duun hu atubangan nuy ba hurà ku naahà ha salà din, 15daw inlikù dà haini hi Herodes dini ta kanak ta hurà din daan naahà ha salà din ha angayan ha hukuman hu kamatayen. 16Aman agpalagkutan ku iman daw ipaguwà.”

17Inikagi haena hi Pilato ta sa naanadan ku agsaulugen sa Aldaw hu Paglabay iyan sa amin din aglibriyen ha sabuwa ha prisu.

18Ba nangulahì sa mga etaw hu kagi dan, “Pahimatayi hayana ha etaw daw iyan ipaguwà si Barabas.” 19Si Barabas naprisu ta sabuwa haena duun hu migbuhat hu kagubut diyà ta banuwa dayun nakapatay.

20Iyan ngaay aglibriyen hi Pilato si Jesus aman ininsaan din dà sa mga etaw ku inu sa kandan ha agkabayaan. 21Ba bà dà sidan nasì migkulahiay ha tagyanaen, “Ilansang hayana duun hu krus.”

22Dayun ininsaan din sidan hu ikatulu, “Imbà nuy igpalansang hayana? Inu diay sa nabuhat din ha madaet? Ta hurà ku gayed naahà ha salà din ha angayan ha silutan hu kamatayen. Aman bà ku dà hayana agpalagkuti daw ipaguwà.”

23Ba bà dà nasì migkulahiay sa mga etaw ha ilansang gayed si Jesus duun hu krus hangtud ha nakaghagteng si Pilato. 24Aman in-ila din kandan sa pinanayù dan. 25Impaguwà hi Pilato si Barabas sa naprisu ta migbuhat hu kagubut diyà ta banuwa daw nakapatay, dayun si Jesus intugyan din duun hu mga etaw.

Sa Paglansanga Ki Jesus Duun Hu Krus

(Lucas 23:26-43; Mateo 27:32-44; Marcos 15:21-32; Juan 19:17-27)

26Su tag-uwiten dan en si Jesus diyà ta guwà taena ha banuwa nasal-aw dan sa etaw ha taga-Cirene ha tagngaranan ki Simon, dayun pineges dan ha tiangen din su krus daw lupug ki Jesus. 27Madakel ha mga etaw sa namanduma kandan daw amin daan mga bahi ha tag-agalà hu paglugul tumenged kandin. 28Ba si Jesus luminingì diyà ta kandan daw minikagi, “Sinyu sa mga bahi diyan ta Jerusalem, harì a inyu ag-agalai ba iyan nuy agalaan sa inyu ha kaugalingen daw sa mga batà nuy. 29Ta makauma sa adagi ha kasamuk ha makaikagi kaw, ‘Maayad pa haena sa bahi ha hurà din batà ha tag-alimahan.’ 30Duun asem taena ha panahun ikagiyan hu mga etaw sa mga bubungan, ‘Kalunawi kay en.’ 31Ku binuhat dan haini dini ta kanak ha hurà ku salà iyan kaw pa kan harì dan buhatan taini.”

32Amin daan daruwa ha masinupaken ha inuwit dan ta daw mahimatayan duma ki Jesus. 33Su makauma sidan duun hu lugar ha tagngaranan hu Tul-an hu Ulu hu Etaw inlansang dan si Jesus duun hu krus duma ku daruwa ha masinupaken, sa sabuwa diyà dapit ta kawanan din daw sa sabuwa diyà ta gibang din. 34Dayun mig-ampù si Jesus, kagi din, “Amay ku, pasayluwa sidan ta hurà dan katun-i sa tagbuhaten dan.” Binahin taena ha mga sundalu sa pinaksuy hi Jesus pinaagi hu ripa.

35Madakel ha mga etaw sa tag-ahà ki Jesus ba sa mga agalen migtameyes kandin hu kagi dan, “Aglibriyen din man gid sa duma ha mga etaw aman ahaen taw ku malibri din ba sa kaugalingen din ta iyan en man gid su Misiyas sa Harì ha pinilì hu Dios.”

36Su mga sundalu migtameyes daan kandin. Impainum dan haena hu sukà 37daw ikagiyi, “Ku Harì ka man hu mga Judio libriya sa kaugalingen nu.”

38Sa sampaw ta ulu hi Jesus sinulatan, “Iyan haini Harì hu mga Judio.”

39Su sabuwa duun taena ha masinupaken ha inlansang duma kandin migtameyes daan ha tagyanaen, “Kenà ka ba iyan su Misiyas? Aman libriya en sa kaugalingen nu daw sikay.”

40Ba binaldeng haena ku duma din ha masinupaken, “Harì ka ba diay agkahaldek hu Dios sa alan kuy man hinukuman hu kamatayen? 41Sikit sa daruwa angayan ha silutan ta laus ha nakasalà ki ba hurà gayed salà taini ha duma ta.”

42Dayun inikagiyan din si Jesus, “Ginuu, henhenaa a ikaw asem ku magharì ka.”

43Tuminubag si Jesus, “Laus gayed sa ag-ikagiyen ku ikaw ha iman taini ha aldaw makagduma-duma kid en duun hu madagway ha banuwa hu Dios.”

Sa Pagpatay Hi Jesus

(Lucas 23:44-49; Mateo 27:45-56; Marcos 15:33-41; Juan 19:28-30)

44Su maugtu en sa aldaw suminukilem sa tibuuk ha kalibutan hu tatulu ha uras 45ta hurà en siga sa aldaw. Su makepal ha manggad ha in-elang diyà ta Timplu naliwarà nayahà. 46Nangulahì si Jesus, “Amay ku, igtugyan ku ikaw sa ispiritu ku.” Su maikagi din haena nabugtuan dayun.

47Su maahà ku kapitan hu mga sundalu sa nahitabù dinayè din sa Dios, “Laus gayed ha saini ha etaw hurà din salà.”

48Sa nangaamul-amul diyà su maahà dan sa naul-ulahan naman-ulì sidan ha miglugul. 49Sa mga kadumahan hi Jesus daw su mga bahi ha duminuma kandin ha diyà napuun ta Galilea nakaahà daan taini ha mga hitabù, ba diyà dà sidan ta madiyù.

Sa Paglebeng Ki Jesus

(Lucas 23:50-56; Mateo 27:57-61; Marcos 15:42-47; Juan 19:38-42)

50-51Amin etaw ha tagngaranan ki Jose ha taga-Arimatea ha sakup ta Judea. Saena matareng gayed ha etaw ha tagsalap hu pagharì hu Dios daw sabuwa daan duun taena ha labaw ha agalen ba hurà hu kandin uyun ha himatayan si Jesus. 52Duminiyà haena ki Pilato daw panayua sa lawa hi Jesus. 53Dayun tinimù din haena daw bungkusi hu maputì ha manggad daw itagù duun hu bag-u din pa binangbangi ha dampiyas. 54Hapun haena hu Birnis na ku sumalep sa aldaw agsugud en sa Aldaw hu Paghimlay.

55Sa mga bahi ha namanduma ki Jesus ha napuun diyà ta Galilea luminupug ki Jose aman naahà dan sa lebeng daw ku pig-inu-inu sa kalebenga ki Jesus. 56Dayun naman-ulì sidan daw nangandam hu mga pahumut para hu lawa hi Jesus. Ba duun hu Aldaw hu Paghimlay huminimlay sidan sumalà hu Kasuguan.

Currently Selected:

Lucas 23: bkd

Highlight

Copy