Lucas 13

Sa Paghinulsul

1Duun taena ha panahun amin mga etaw ha nanunultul diyà ki Jesus hu nahitabù duun hu mga taga-Galilea ha pinahimatayan hi Pilato su kamulu pa ngaay sidan taghalad. 2Ba tuminubag si Jesus, “Abi nuy gid ha adagi gayed sa salà dan dì hu mga kadumahan dan ha taga-Galilea tumenged hu naul-ulahan dan. 3Ba saena kenà laus ta ikagiyen ku inyu ha ku harì kaw maghinulsul mangamatay kaw daan iling kandan. 4Henhenaa nuy daan su sampulù daw walu ha etaw ha napilayan hu matangkaw ha balay diyà ta Siloe. Abi nuy gid ha makasasalà sidan dì hu duma ha mga etaw ha tagtimà diyà ta Jerusalem. 5Ba saena kenà laus ta ikagiyen ku inyu ha ku harì kaw maghinulsul matay kaw daan iling kandan.”

Sa Kayu Ha Igira

6Minikagi si Jesus hu sabuwa ha pananglitan ha tagyanaen, “Amin etaw ha namula hu kayu ha igira. Su tingpamunga en inelegan din haena ba hurà man diay pamunga. 7Aman inikagiyan din sa tag-alima taena ha mga kayu, ‘Ahaa haini sa impamula ku ha kayu ta ikatulu en iman ha tuig ha hurà pamunga. Maayad pa ha pilayen nud ta bà dà haini pakahanung hu duma ha pamulahen.’

8“Ba huminangyù su sinaligan, ‘Angatan ta enà sa nangkatuig ta aghilamunan ku pa haini daw ag-abunuhan ku pa daan. 9Ku mamunga en asem ku sunud ha tuig maayad gayed, ba ku harì en human ku pilaya.’”

Sa Pagbulunga Hu Nabalukù Ha Bahi

10Amin aldaw hu Sabadu ha tagpanudlù si Jesus duun hu sabuwa ha simbahan hu mga Judio. 11Amin daan bahi diyà ha tinaguan hu busaw hu sampulù en daw walu ha tuig aman nabalukù en. 12Ba su maahà hi Jesus su bahi inikagiyan din haena, “Maulian kad en hu dalu nu.” 13Dayun dinampà din daw sagunà natul-idan aman pigdayè ku bahi sa Dios.

14Ba sa agalen duun taena ha simbahan napauk gayed ta namulung si Jesus duun hu Aldaw hu Paghimlay, aman inikagiyan din sa mga etaw, “Haenem ha aldaw sa intugut hu etaw ha magtrabahu. Dumini kaw taini ha mga aldaw hu pagpabulung kenà duun hu Aldaw hu Paghimlay.”

15Tuminubag si Jesus, “Sinyu sa mga tagpasibù-sibù, ku amin inyu magtagkes hu baka daw kabayu harì nuy ba haena hukaden daw ipainum diyà ta wahig duun hu Aldaw hu Paghimlay? 16Saini ha bahi ha kaliwat hi Abraham binakus hi Satanas seled hu sampulù en daw walu ha tuig, aman harì ba diay mahimu ha hukaden haini duun hu Aldaw hu Paghimlay?”

17Su maikagi haena hi Jesus nagayhaan su mga pakigkuntra kandin, ba sa duma ha mga etaw nangabayà-bayà taena ha belenganen ha binuhat hi Jesus.

Sa Pananglitan Mahitenged Hu Pag-adagi Hu Tagharian Hu Dios

(Lucas 13:18-21; Mateo 13:31-33; Marcos 4:30-32)

18Minikagi si Jesus, “Inu sa agpailingan ku hu pag-adagi hu tagharian hu Dios? 19Agkailing haena hu atiyuay gayed tungkay ha lisu ha impamegas duun hu uma. Tuminubù haena dayun nabuhat ha kayu daw sa mga panga din nabuhat ha salagà hu mga tagbis.”

20Minikagi pa daan si Jesus, “Inu pa sa agpailingan ku hu tagharian hu Dios? 21Agkailing haena hu igpatulin ha iglamud duun hu madakel ha harina dayun su harina agtulin.”

Sa Harì Makalagkes Duun Hu Tagharian Hu Dios

(Lucas 13:22-30; Mateo 7:13-14, 21-23)

22Duminayun si Jesus hu paghipanaw payanaen ta Jerusalem, ba su diyà pa ta dalan huminapit duun hu mga banuwa ta migtudlù. 23Amin nanginginsà kandin, “Ginuu, atiyuay dà ba sa mailahan hu kinabuhì ha hurà din katapusan?”

Tinubag haena hi Jesus, 24“Paniguruwi nuy sa pag-agi duun hu malig-et ha pultahan ta ikagiyen ku inyu ha madakel ngaay sa ag-agi duun ba harì pakahimu. 25Amin panahun ha sa tag-iya taena ha balay sirahan din dayun magpangumawà kaw diyà ta guwà, ‘Ginuu, puwai kay man ikaw.’

“Ba umikagi haena, ‘Harì ku inyu agkakilala daw harì ku daan agkatun-an ku hindu kaw duun nangapuun.’

26“Dayun tumubag kaw, ‘Agkakilala kay ikaw ta migsalu kuy daw tinudluan kay ikaw.’

27“Ba ikagiyan kaw kandin, ‘Harì ku gayed inyu agkakilala daw harì ku daan agkatun-an ku hindu kaw duun nangapuun. Aman awà kaw dini ta kanak sinyu sa alan ha mga madaet sa buhat dan.’

28“Duun taena ku maahà nuy diyà ta seled sa mga gin-apuan nuy ha si Abraham daw si Isaac, si Jacob daw sa mga prupita makag-ulahuay kaw daw magkakangget sa mga ngipen nuy hu kalugul ta abugen kaw diyà ta guwà. 29Mangaamul-amul sa mga etaw ha mapuun dini ta tibuuk ha kalibutan ha makigsalu kandan duun taena ha kaamulan ha tagharian hu Dios. 30Laus gayed ha madakel iman ha mga etaw sa tagkahudiyan ba iyan diay mauna, daw amin daan etaw ha tagkauna iman ba iyan diay mahudiyan.”

Sa Kahid-u Hi Jesus Hu Mga Taga-Jerusalem

(Lucas 13:31-35; Mateo 23:37-39)

31Duun taena ha panahun amin mga Parisiyu ha duminiyà ki Jesus ha minikagi, “Umawà ka dini ta aghimatayan ka hi Herodes.”

32Ba tuminubag si Jesus, “Ikagiyi si Herodes sa mangingilad ha agbulungen ku pa sa mga dalu daw agbugawen ku pa sa mga busaw ha tuminagù hu mga etaw ta tatulu pa iman ha aldaw daw human ku haini kapengahi. 33Aman agdayunen ku pa haini duun hu tatulu ha aldaw ta sa prupita diyà dà agpatay ta Jerusalem.

34“Sinyu sa mga taga-Jerusalem ha agpangimatay hu mga prupita daw tagbatu daan hu mga etaw ha agsuguen diyan, agtanulen ku ngaay inyu iling hu manuk ha ag-amulen din sa mga piyak din diyà ta pakpak din ba harì kaw man agkabayà. 35Aman awaan hu Dios sa banuwa nuy, daw ikagiyen ku inyu ha harì ad inyu maahà hangtud asem ha makaikagi kaw en, ‘Panalanginan gayed haini sa pakauma ha sinugù hu Dios.’”

Currently Selected:

Lucas 13: bkd

Highlight

Copy