Lucas 11

Sa Katudluanan Mahitenged Hu Pag-ampù

(Lucas 11:1-13; Mateo 6:9-13; 7:7-11)

1Amin aldaw ha mig-ampù si Jesus duun hu sabuwa ha lugar. Su makapenga en haena inikagiyan hu sabuwa ha tinun-an din, “Ginuu, tudlui kay hu pag-ampù iling ki Juan Ha Tagpamautismu ha tinudluan din sa mga sumusunud din.”

2Aman minikagi si Jesus, “Ku mag-ampù kaw ilingen nuy taini,

‘Amay day, tahuren gayed sa ngaran nu. Harii kay ikaw 3daw aldaw-aldaw ilahi kay hu kalan-enen. 4Pasayluwa kay hu mga salà day ta pinasaylu day daan sa nakasalà dini ta kanay, daw ipadiyù kay ikaw hu panulay.’”

5Dayun inikagiyan sidan hi Jesus, “Pananglitan amin mamukaw duun hu amigu din ku liwarà en sa daleman daw ikagi, ‘Ipasambay a hu tatulu ha buuk ha supas 6ta amin ku manahu ha daw pa nakauma na hurà ku igpakaen kandin.’

7“Ba tuminubag haena, ‘Harì a ikaw agsamuka ta nasirahan en sa balay daw tuminiduga en daan sa mga batà ku aman harì ad en makabangun hu pag-ila ikaw.’ 8Ikagiyen ku inyu ha bisan harì en ngaay haena agbangun ba ku sigi dà tagpangumawà su amigu din makabangun gayed haena daw ilahi su agpanayù hu agkinahanglanen din.

9“Aman ikagiyen ku inyu ha panayù kaw duun hu Dios ta ilahan kaw gayed kandin, pan-ahà daw makaahà kaw, pangumaw daw puwaan kaw kandin. 10Ta bisan sin-u sa agpanayù ag-ilahan daw saena ha agpan-ahà makaahà daw sa agpangumaw agpuwaan.

11“Ku amin inyu agpanayù sa batà nuy hu supas ag-ilahan nuy ba diay hu batu? Daw ku manayù hu sedà, bunsalagan ba diay sa ig-ila nuy? 12Daw ku manayù hu impis, banayaw ba sa ig-ila nuy? 13Ku sinyu sa mga etaw ha makasasalà agkatuen kaw tag-ila hu maayad duun hu mga batà nuy, labaw pa gayed sa Amay nuy diyà ta langit ta ku panayuen nuy ha ulinan kaw hu Balaan ha Ispiritu saena ig-ila din gayed.”

Sa Labaw Dì Ki Satanas

(Lucas 11:14-23; Mateo 12:22-30; Marcos 3:20-27)

14Amin panahun ha binugaw hi Jesus sa busaw ha pakapaemaw hu etaw. Su umawà en haena sa busaw nakaikagi dayun su etaw aman nangabeleng sa kaet-etawan. 15Ba sa duma minikagi, “Agkabugaw din sa mga busaw pinaagi hu gahem hi Beelsebul sa agalen hu mga busaw.” 16Sa duma ha mga etaw agsulayen dan ngaay si Jesus aman hinangyù dan ha ipaahà din kandan sa belenganen ha iyan timaan ha sinugù haena hu Dios. 17Ba natun-an hi Jesus sa henà-henà dan aman inikagiyan din sidan, “Sa ginharian ha tagsasabà sa mga etaw duun agkabengkag gayed, daw sa pamilya ha magsasabà mabengkag daan haena. 18Aman ku sabaen hi Satanas sa mga sakup din sa ginharian din mabengkag gayed. Kagi nuy ha sa gahem ku hu pagbugaw taena ha mga busaw in-ila kanak hi Beelsebul. 19Ku iyan haena sin-u diay sa mig-ila hu gahem taena ha mga duma nuy ha tagpang-abug daan hu mga busaw? Pinaagi hu mga buhat dan natun-an taw ha sayep sa tag-ikagiyen nuy. 20Saini ha gahem ku duun gayed napuun hu Dios. Iyan haini ikatun-i taw ha iman tagharì en sa Dios dini ta kanuy.

21“Ku amin etaw ha mabalaw ha nasangkap hu hinagiban daw bantayan sa balay din harì gayed maagaw sa mga butang din. 22Ba ku maumahan haena hu mabis-ay pa dì kandin daw sabaa maagaw sa tagsaligan din ha mga hinagiban daw sa mga butang din bahin-bahinen ku nakaagaw duun.

23“Bisan sin-u sa kenà ku duma iyan gayed agsupak kanak, daw saena ha harì agbulig kanak iyan ag-abug hu mga etaw.

Sa Busaw Ha Agpan-ahà Hu Ag-ulian Din

(Lucas 11:24-26; Mateo 12:43-45)

24“Ku umawà en sa busaw duun hu etaw ha tinaguan din aghipanaw haena ta agpan-ahà hu agtimaan din. Ba ku harì en makaahà agkahenhenaan din ha lumikù dà duun taena ha pigtimaan din su anay. 25Ku maahà din dà haena ha limpyu en 26agpangembang su busaw hu pitu ha duma din ha ayuwà pa madaet dì kandin daw taguan dan dà paman haena sa etaw. Aman ayuwà pa malegen sa kahimtang taena ha etaw dì su anay.”

Sa Laus Ha Kalipay

27Su tag-ikagi pa si Jesus duun hu mga etaw amin bahi ha minikagi, “Malipayen gayed haena sa bahi ha iyan migbatà ikaw daw mig-alima ikaw.”

28Ba tuminubag si Jesus, “Tungkay pa gayed adagi sa kalipay taena ha tagpaliliman hu lalang hu Dios daw tagtuman daan taena.”

Sa Tagpan-ahà Hu Belenganen

(Lucas 11:29-32; Mateo 12:38-42)

29Su tagdakel en sa mga etaw ha duminiyà ki Jesus inikagiyan din sidan, “Sa mga etaw iman ha madaet sa mga buhat dan daw nakadiyù en duun hu Dios tagpan-ahà hu mga belenganen. Ba iyan dà makapaahà ku inyu ha timaan sa naul-ulahan su anay hi Jonas ha prupita, 30ta sa naul-ulahan hi Jonas iyan nabuhat ha timaan duun hu mga taga-Ninive. Iling daan ha sa maul-ulahan ku asem siak sa Batà hu Etaw iyan mabuhat ha timaan diyan ta inyu. 31Asem ku Aldaw hu Paghukum hukuman kaw hu silut taena ha rayna ta Sheba ta saena madiyù sa hinipanawan din hu pagpaliliman hu katudluanan hi Harì Solomon. Ba iman dini en sa matatau pa dì ki Solomon ba harì nuy agdawaten. 32Daw hukuman kaw daan asem hu silut taena ha mga taga-Ninive ta mighinulsul sidan hu mga salà dan su mapaliman dan sa intultul hi Jonas. Ba iman dini en sa labaw pa dì ki Jonas ba harì nuy agtuuwan.

Sa Sulù

(Lucas 11:33-36; Mateo 5:15; 6:22-23)

33“Hurà etaw ha tagtutud hu sulù ha bà din dà igheles daw agpalangkebi hu bakag, ba saena iluntud din gayed duun hu ugsakà ha matangkaw ta daw mailawan sa seled taena ha balay. 34Sa mata iyan sulù hu lawa nuy. Ku maayad sa mata nuy duun kaw gayed taghipanaw hu mapawà, ba ku peyeng kaw duun kaw taghipanaw hu kasukileman. 35Aman magbantay kaw ha sa maayad diyan ta inyu harì madaeg hu madaet, 36ta ku sa henà-henà nuy pulus gayed maayad sa taghipanawan nuy daan iyan sa kapawaan ta agkailing haena hu sulù ha tag-anlag diyan ta inyu.”

Sa Mga Tagpasibù-sibù Ha Mga Etaw

(Lucas 11:37-54; Mateo 23:1-36; Marcos 12:38-40)

37Su makapenga si Jesus mag-ikagi inimbita hu sabuwa ha Parisiyu hu pagkaen diyà ta balay din aman duminuma si Jesus daw pinuu ta agkaen. 38Ba nabeleng gayed su Parisiyu ta hurà pangenaw si Jesus ta alima din daw human kaen.

39Dayun minikagi si Jesus, “Sinyu sa mga Parisiyu, agkailing kaw hu baung daw lampay ha hinenawan sa guwà ba mahugaw sa seled, ta tagtuman kaw gayed hu mga tulumanen ba sa henà-henà nuy madaet ta limbungan daw agapan kaw. 40Mga buang-buang kaw gayed. Kenà iyan dà agkaahà hu Dios sa lawa nuy ta natun-an din daan sa henà-henà nuy. 41Sumalà hu mahimu nuy ilahi sa mga makaluluuy ha etaw dayun malimpyu kaw gayed.

42“Kahid-u nuy gayed sinyu sa mga Parisiyu, ta ig-ulì nuy duun hu Dios sa ikasampulù hu bisan mga atiyuay ha pamulahen nuy ba iyan nuy agbay-anan sa labaw pa ha iling hu pagkamatareng daw hu pagpalanggà nuy hu Dios. Kinahanglan ha iila nuy sa ikasampulù ba buhaten nuy gayed daan sa duma ha kasuguan.

43“Kahid-u nuy gayed sinyu sa mga Parisiyu, ta ku diyà kaw ta simbahan iyan nuy agkabayaan sa madagway ha pinun-ayà daw agkalipay kaw daan ku tahuran kaw hu mga etaw duun hu baligyaanan.

44“Kahid-u nuy gayed ta iling kaw hu lebeng ha hurà katun-i aman sigi en tagkagik-an hu mga etaw.”

45Amin manunudlù hu Kasuguan ha uminikagi diyà ki Jesus, “Manunudlù, pigpagagayhaan kay gayed ikaw taena ha inikagi nu.”

46Ba tuminubag si Jesus, “Kahid-u nuy daan sinyu sa mga manunudlù hu Kasuguan, ta mabegat gayed sa mga tulumanen ha igpabuhat nuy hu mga etaw ba sinyu harì nuy man daan agkatuman haena.

47“Kahid-u nuy gayed ta tagbuhat kaw hu mga madagway ha lebeng para hu mga prupita ha pinanhimatayan hu mga gin-apuan nuy. 48Aman laus diay ha nabayà-bayaan nuy sa binuhat hu mga gin-apuan nuy ta pinanhimatayan dan sa mga prupita ba iyan kaw migbuhat hu madagway ha lebeng. 49Tumenged taena sa Dios mig-ikagi, ‘Agsuguen ku sa mga prupita daw mga apustulis ba himatayan dan sa duma taena daw sa duma pasipalahan dan.’ 50Aman makapanubag kaw gayed hu Dios tumenged taena ha kamatayen hu alan ha mga prupita sugud dà su tanghagaen sa kalibutan 51sugud ki Abel payanaen en ki Zacarias ha duun dà pighimatayi hu pigtaliwaraan ku Timplu daw ku halaran. Ikagiyen ku inyu ha manubag kaw gayed taena.

52“Kahid-u nuy gayed sinyu sa mga manunudlù hu Kasuguan, ta harì kaw agkabayà ha matun-an nuy sa kamatuuran daw agbaldengen nuy haena sa tagtuen ngaay.”

53Su umawà en si Jesus duun taena ha balay su mga manunudlù hu Kasuguan daw sa mga Parisiyu nakigsawalà gayed kandin daw nanginginsà sidan 54ta tag-angat sidan ku amin din maikagi ha makasumbung dan.

Currently Selected:

Lucas 11: bkd

Highlight

Copy