Juan 18

Sa Kadakepa Ki Jesus

(Juan 18:15-18; Mateo 26:69-70; Marcos 14:66-68; Lucas 22:55-57)

1Su makapenga si Jesus mag-ampù uminawà diyà duma hu mga tinun-an din daw luminayon sidan diyà ta Kidron. Diyà ta layun amin pinamulahan hu mga kayu ha ulibu dayun duminiyà sidan.

2Si Judas ha iyan maglimbung ki Jesus natulen din en haena ta mahies sidan mag-amul-amul duun. 3Aman inuwit hi Judas diyà sa mga sundalu daw sa mga bantay hu Timplu ha sinugù hu labaw ha mga sinaligan hu paghalad daw hu mga Parisiyu ha tag-uuwit hu mga sulù daw hinagiban.

4Ba natun-an en hi Jesus sa maul-ulahan din aman tinalagbù din sidan daw insai, “Sin-u sa tagpan-ahaen nuy?”

5Tuminubag sidan, “Iyan si Jesus ha taga-Nazareth.”

Inikagiyan sidan hi Jesus, “Iyan ad en su tagpan-ahaen nuy.” Si Judas ha iyan taglimbung kandin duma en daan kandan.

6Su maikagi hi Jesus, “Iyan ad en” nangakaundud daw nangabantang su agdakep kandin.

7Aman inisaban sidan ininsaan hi Jesus, “Sin-u man diay sa tagpan-ahaen nuy?”

Tuminubag gihapun sidan, “Iyan labi si Jesus ha taga-Nazareth.”

8Minikagi si Jesus, “Inikagiyan kud inyu ha iyan ad en. Ku iyan ad tagpan-ahaen nuy harì nuy ilagkes sa mga duma ku.” 9Inikagi din haena ta daw matuman sa in-ampù din ha hurà bisan sabuwa ha malaag duun hu mga etaw ha in-ila kandin hu Dios ha Amay din.

10Dayun si Simon Pedro duminagtù hu ispada din daw tigbasa sa suluguen hu tungkay labaw ha sinaligan hu paghalad, aman nalapung sa kawanan ha talinga ku suluguen ha tagngaranan ki Malco.

11Ba inikagiyan hi Jesus si Pedro, “Isakeb hayan sa ispada nu ta kinahanglan ha dawaten ku sa igpaantus kanak hu Amay ku.”

Sa Pag-uwit Ki Jesus Diyà Ki Anas

12Dinakep si Jesus hu mga sundalu duma hu kapitan daw mga bantay. Binakus dan 13daw uwita diyà ki Anas ha ugang hi Caifas sa tungkay labaw ha sinaligan hu paghalad duun taena ha tuiga. 14Si Caifas iyan mig-ikagi su anay duun hu mga agalen hu mga Judio ha maayad pa ha sabuwa dà sa matay para hu alan.

Sa Una Ha Paglimud Hi Pedro

(Juan 18:15-18; Mateo 26:69-70; Marcos 14:66-68; Lucas 22:56-57)

15Si Simon Pedro daw sa duma din ha tinun-an luminupug ki Jesus. Tumenged ta sa duma din nakilala hu tungkay labaw ha sinaligan hu paghalad nakaduma haena ki Jesus duun ku balay hu tungkay labaw ha sinaligan hu paghalad. 16Ba si Pedro diyà dà nataman ta pultahan. Su tinun-an ha nakilala hu tungkay labaw ha sinaligan hu paghalad nakiglalang duun ku bahi ha tagbantay diyà ta pultahan dayun impaseled din daan si Pedro.

17Su bahi nanginginsà diyà ki Pedro, “Tinun-an ka ba daan tayana ha etaw?”

Ba si Pedro tuminubag, “Kenà a.”

18Tungkay matinù duun taena ha panahun aman sa mga suluguen daw sa mga bantay hu Timplu migtim-un daw pamanhidadang sidan. Uminamul si Pedro kandan ta aghidadang daan.

Sa Pagbistiga Ki Jesus Hu Tungkay Labaw Ha Sinaligan Hu Paghalad

(Juan 18:19-24; Mateo 26:59-66; Marcos 14:55-64; Lucas 22:66-71)

19Duun taena ha balay binistiga si Jesus hu nauna ha tungkay labaw ha sinaligan hu paghalad mahitenged hu mga tinun-an din daw hu katudluanan din.

20Tuminubag si Jesus, “Impapaliman ku hu kaet-etawan sa katudluanan ku ta duun a man ganì migtudlù hu mga simbahan daw hu Timplu ha duun daan tagkaamul-amul sa kaet-etawan aman hurà gayed nakaheles ha mga lalang ku. 21Imbà a inyu tagbistigaha? Iyan nuy ngaay insaan sa nakapaliman kanak ta natun-an dan sa mga intudlù ku.”

22Su maikagi haena hi Jesus sagunà pigsampayù hu sabuwa ha bantay daw ikagiyi, “Imbà ka tagtubag-tubag hu iling tayan duun hu tungkay labaw ha sinaligan hu paghalad?”

23Ba tuminubag si Jesus, “Ku nasayep man ugaling sa inikagi ku ikagiyi sa mga etaw dini ku inu sa nasayep duun. Ba ku hurà imbà a man ikaw sampayua?”

24Dayun si Jesus sa binakus en impauwit hi Anas diyà ki Caifas ha iyan tungkay labaw ha sinaligan hu paghalad duun taena ha tuiga.

Sa Ikaduwa Daw Sa Hudiyan Ha Paglimud Hi Pedro

(Juan 18:25-27; Mateo 26:71-75; Marcos 14:69-72; Lucas 22:58-62)

25Su taghidadang pa si Simon Pedro diyà ta guwà ininsaan hu mga etaw, “Tinun-an kad ba daan tayana ha etaw?”

Ba si Pedro miglimud, “Kenà a man.”

26Su suluguen hu tungkay labaw ha sinaligan hu paghalad daw kadumahan taena ha tinigbas hi Pedro minikagi, “Bà su naahà ku gan ikaw duun hu pigdakepan taena ha etaw.”

27Ba migbidù, en paman si Pedro dayun tuminagauk sa manuk.

Sa Pagbistiga Ki Jesus Hi Pilato

(Juan 18:28-38; Mateo 27:1-2, 11-14; Marcos 15:1-5; Lucas 23:1-5)

28Su maselem pa si Jesus inuwit en ku mga agalen hu Judio duun ku balay hu gubirnadur ha napuun ta balay hi Caifas. Ba sa mga agalen diyà dà nataman ta guwà taena ha balay ta daw harì dan malapas sa tulumanen hu mga Judio hu pagsaulug taena ha Aldaw hu Paglabay. 29Tumenged taena guminuwà si Pilato daw insai sidan, “Inu man sa salà taini ha igsumbung nuy?”

30Tuminubag sidan, “Masinupaken haini ha etaw aman igpaatubang day ikaw.”

31Saena ha mga agalen hu Judio bà dà inikagiyi hi Pilato, “Uwita nuy dà diyan daw iyan kaw en maghukum kandin sumalà hu inyu ha Kasuguan.”

Ba tuminubag sidan, “Hurà itugut kanay ha hukuman day sa etaw hu kamatayen.” 32Nahitabù haena ta daw matuman sa inikagi su anay hi Jesus ku agkainu-inu sa kamatayen din.

33Sumineled si Pilato diyà ta balay din daw ipaatubang kandin si Jesus dayun ininsaan din, “Iyan ka ba Harì hu mga Judio?”

34Si Jesus tuminubag, “Sayan ha inikagi nu ikaw en ba ha henà-henà daw ku tinultulan ka ba hu mga etaw mahitenged kanak?”

35Minikagi si Pilato, “Judio a ba daan? Iyan sa mga duma nu ha Judio daw sa mga labaw ha sinaligan hu paghalad migtugyan ikaw dini ta kanak. Inu man sa salà nu?”

36Tuminubag si Jesus, “Sa pagkaharì ku kenà dini ta kalibutan. Ku harì a pa ngaay dini suminukul en gan sa mga suluguen ku ta daw harì a madakep taini ha mga Judio. Ba sa pagkaharì ku kenà dini dà ta kalibutan.”

37Minikagi si Pilato, “Ku iyan hayan harì ka gayed diay.”

Si Jesus tuminubag, “Laus sa inikagi nu ta siak Harì a gayed. Iyan hayana indini ku ta kalibutan ha migpakaetaw a ta daw matun-an hu kaet-etawan sa kamatuuran. Bisan sin-u sa agkabayà ha makatuen hu kamatuuran tagpaliliman kanak.”

38Ba minikagi si Pilato, “Inu en paman hayana ha kamatuuran?”

Dayun sagunà guminuwà si Pilato daw inikagiyan din sa mga Judio, “Hurà ku naahà ha salà din ha angay hukuman. 39Ba sumalà hu inyu ha naanadan ku agsaulugen sa Aldaw hu Paglabay amin prisu ha aglibriyen ku. Agkabayaan nuy ba ha ipaguwà ku haini sa Harì hu mga Judio?”

40Ba tuminubag sidan hu madaging, “Harì day hayana agkabayaan ba sa ipaguwà nu iyan si Barabas.” Si Barabas sabuwa ha tulisan.

Currently Selected:

Juan 18: bkd

Highlight

Copy