ᒉᓂᓯᔅ 19

ᒪᒋᐃᔑᐌᐱᓯᐎᓐ ᑳᑮᐊᔮᒃ ᔂᑕᒥᕽ

1ᐃᑭ ᑕᔥ ᓃᔑᓐ 2 ᐁᒐᓬᐊᒃ ᑮᑕᑯᔑᓅᒃ ᔂᑕᒻ Sodom ᐆᑌᓈᕽ ᐁᐅᓈᑯᔑᓂᓂᒃ᙮ ᓬᐋᑦ Lot ᑕᔥ ᑮᓇᒪᑕᐱ ᐃᐃᒫ ᐁᔑ ᑭᒋ ᐃᔥᒀᑌᒥᐗᓂᓂᒃ ᐃᐃ ᑭᒋ ᐆᑌᓇ᙮ ᐊᐲ ᑕᔥ ᐁᐙᐸᒫᒡ ᐁᐱᓈᑯᓯᓂᒡ ᑮᐸᓯᑸ ᐁᑮ ᐊᑕ ᓇᑭᔥᑲᐙᒡ, ᒥᑕᑲᒥᒃ ᐁᑮ ᐃᔑ ᐊᓂᒥᑯᑖᒡ᙮ 2ᒦᑕᔥ ᐅᐅ ᑳᐃᓈᒡ, ᓂᑑᑭᒫᒪᒃ, ᑕᑲ ᐲᑎᑫᒃ ᑳᐸᒦᑕᐎᓀᒃ ᐅᐙᑳᐃᑲᓂᕽ! ᒋᑭᓰᐲᑭᓯᑌᔦᒃ, ᐯᔑᑯ ᑎᐱᒃ ᒋᑲᐯᔑᔦᒃ ᑲᔦ, ᐐᐸ ᑕᔥ ᑭᑭᔐᑉ ᑭᑲᓂ ᒫᒑᒻ, ᐅᑮᐃᓈᐞ᙮

ᒦᔥ ᐅᐅ ᑳᐃᑯᒡ, ᑳᐐᓐ, ᐃᐃᒫ ᓴ ᒣᑴ ᐆᑌᓇ ᐊᑾᒌᕽ ᓂᑲ ᐊᔮᒥᓐ, ᐅᑮᐃᑰᐞ᙮

3ᐐᑫ ᑕᔥ ᐅᑮ ᑲᑳᓱᒫᐞ, ᒦᑕᔥ ᑳᐃᔑ ᓈᓯᑳᑯᒡ ᐁᑮ ᐲᑎᑫᓂᒡ ᐅᐙᑳᐃᑲᓂᕽ᙮ ᐅᑮ ᑮᔑᑌᐴᓈᐞ ᐃᑕᔥ ᒋᑭᒋ ᐐᓯᓂᓂᒡ, ᐁᑮ ᑮᔑᔂᒡ ᐸᑴᔑᑲᓇᓐ ᑳᐅᐱᓯᑲᓂᐎᓯᓂᒃ, ᒦᔥ ᑳᐃᔑ ᐐᓯᓂᓂᒡ᙮

4ᒋᑆ ᑲᐎᔑᒧᓂᒡ ᑕᔥ ᑳᑮ ᐅᑎᓯᓐᒡ, ᐅᐙᑳᐃᑲᓐ ᑮᐙᑳᔥᑭᑳᑌᓂ᙮ ᑲᑭᓇ ᐃᓂᓂᐗᐞ ᒥᓯᐌ ᐃᐃᒫ ᔂᑕᒻ ᐆᑌᓈᕽ ᑳᑮ ᐅᒌᓂᒡ, ᐅᔥᑭᓃᑭᐗᐞ, ᐊᑭᐌᓯᐗᐞ ᑲᔦ ᐁᑮ ᐙᑳᔥᑲᒥᓂᒡ᙮ 5#Jdg 19.22-24. ᒦᑕᔥ ᓬᐋᑦ ᑳᐃᑯᒡ, ᐋᓃᑎ ᑕᔥ ᐃᑭ ᐃᓂᓂᐗᒃ ᑳᑮ ᐅᑎᓯᒀ ᓅᑯᒻ ᑳᐅᓈᑯᔑᓂᓂᒃ? ᐱᓵᑭᒋᐎᔥ, ᐲᑕᒪᐎᔑᓈᒻ, ᒋᐐᐯᒪᑭᑣ, ᐅᑮᐃᑰᐞ᙮

6ᓬᐋᑦ ᓴ ᑕᔥ ᑮᓵᑲᐊᒻ ᐁᔑᐊᔮᓂᒡ ᒦᔥ ᑳᐃᔑ ᑭᐸᐊᕽ ᐃᔥᒀᑌᒻ ᐅᑑᑖᓈᒥᕽ᙮ 7ᐅᐅ ᑕᔥ ᐅᑮᐃᓈᐞ, ᓂᐐᒌᐙᑲᓇᒃ, ᑕᑲ ᑫᑯ ᓅᒋᑯ ᐃᔑᒋᑫᑫᒃ᙮ 8ᐃᓇᔥᑫ ᓈ, ᓃᔑᓐ ᐅᔕ ᓂᑖᓂᓴᒃ ᓂᑕᔮᐙᒃ ᒪᔑ ᐐᑳ ᐁᐸᐹᒣᓂᒥᑯᓯᒀ ᐃᓂᓂᐗᐞ᙮ ᑕᑲ ᒦᐗᒃ ᐃᑭ ᑫᐱ ᓵᑭᓯᐊᒀ ᐙᑑᑕᐌᒀ ᑯ ᒋᑑᑕᐌᒀ᙮ ᑫᑯ ᑕᔥ ᐐᓐ ᑫᑰᓐ ᑑᑕᐙᑫᒀᓂᒃ ᐅᑯ ᐃᓂᓂᐗᒃ ᑳᐅᑎᔑᐙᒡ, ᓂᐙᑳᐃᑲᓂᕽ ᐅᔕ ᓂᑎᔑ ᒪᐗᑎᓯᑰᒃ ᐌᐌᓂ ᒋᓈᑲᒋᐊᒀ, ᐅᑮᐃᓈᐞ᙮

9ᑕᐎᔥᑲᐎᔑᓈᒻ ᑕᔥ, ᐅᑮᐃᑰᐞ᙮ ᒦᑕᔥ ᑲᔦ ᑳᐃᑭᑐᓂᒡ, ᐗᐊ ᓴ ᐃᓂᓂ ᑮᐱᑕᑯᔑᓐ ᐁᑮ ᒪᔭᑭᓯᒡ, ᐃᓇᔥᑫ ᑕᔥ ᐋᔕ ᑭᑲᑴ ᐅᓈᑯᓂᑯᓈᓐ! ᐊᐗᔑᒣ ᑮᓐ ᑭᑲ ᑑᑖᑰ ᐊᐲᒡ ᐅᑯ ᑫᑑᑕᐙᑭᑣ, ᑮᐃᑭᑐᐗᐞ᙮ ᐋᐱᒋ ᑕᔥ ᐁᓂᑯᒃ ᐅᑮ ᐊᔐ ᑳᒋᔥᑳᑰᐞ ᐁᐐ ᑲᑴ ᐲᑯᐱᑑᓂᒡ ᐃᔥᒀᑌᒻ᙮ 10ᐃᓂ ᑕᔥ ᓃᔑᓐ 2 ᐃᓂᓂᐗᐞ ᐲᑎᒃ ᑳᑮ ᐊᔮᓂᒡ ᐅᑮ ᐲᑎᑫ ᐐᑯᐱᓂᑰᐞ ᐁᑮ ᑭᐸᐊᒥᓂᒡ ᐃᔥᒀᑌᒻ᙮ 11#2Ki 6.18. ᒦᑕᔥ ᑳᐃᔑ ᐃᔑᐋᓂᒡ ᑲᑭᓇ ᐊᑾᒌᕽ ᐁᔮᓂᒡ ᐃᓂᓂᐗᐞ ᒋᐙᐱᓯᓂᒃ, ᒋᒥᑲᓯᓂᒃ ᐃᔥᒀᑌᒻ᙮

ᓬᐋᑦ ᑮᓇᑲᑕᕽ ᔂᑕᒻ

12ᓬᐋᑦ Lot ᑕᔥ ᐅᑮᐃᑰᐞ ᐃᐃ ᓃᔑᓐ 2 ᐃᓂᓂᐗᐞ, ᐊᐌᓀᓇᒃ ᐃᑕᔥ ᑫᔮᐱ ᐁᔮᐗᑣ ᐅᐅᒫ? ᑭᓂᑾᓇᒃ ᐃᓇ, ᑯᒫ ᑲᔦ ᑭᑯᓯᓴᒃ, ᑯᒫ ᑲᔦ ᑭᑖᓂᓴᒃ᙮ ᐊᐌᓀᓐ ᓴ ᐱᑯ ᐁᔮᐙᐗᑗᓐ ᐅᐅᒫ ᐆᑌᓈᕽ, ᑕᑲ ᐅᐅᒫ ᐅᒋ ᓵᑭᓯᐞ; 13ᐋᔕ ᐅᔕ ᑫᑳ ᓂᐐ ᓂᔑᐗᓈᒋᑑᒥᓐ ᐅᐅ ᐆᑌᓇ᙮ ᐅᓵᒻ ᐋᓃᔥ ᑳᑎᐯᒋᑫᒡ ᐅᓅᑖᓐ ᑳᔑ ᐊᓈᒥᒥᒥᓐᒡ ᐃᐃ ᐯᒫᑎᓯᓂᒡ ᐁᑭᒋ ᐃᔑᓈᑾᓂᓂᒃ, ᓂᑮ ᐱ ᐃᔑᓂᔕᐅᑯᓈᓐ ᒋᓂᔑᐗᓈᒋᑑᔮᕽ ᐅᐅ ᔂᑕᒻ Sodom ᐆᑌᓇ᙮

14ᓬᐋᑦ ᑕᔥ ᑮᐃᔖ ᐁᑮ ᐊᑕ ᐙᐸᒫᒡ ᑫᐅᓂᑾᓂᒡ, ᑳᑮ ᐊᔓᑕᒥᓂᒡ ᐁᐐ ᐐᐎᓂᒡ ᐅᑖᓂᓴᐞ, ᒦᔥ ᑳᐃᓈᒡ, ᐌᔩᑉ ᓂᑯᒋ ᐅᐅᒫ ᐅᒋ ᐃᔖᒃ, ᐋᓃᔥ ᑳᑎᐯᒋᑫᒡ ᐅᐐ ᓂᔑᐗᓈᒋᑑᓐ ᐅᐅ ᐆᑌᓈᓂ, ᐅᑮᐃᓈᐞ᙮ ᒦᑕᔥ ᑳᐃᓂᑖᑯᒡ ᑖᐱᔥᑰ ᐁᒥᒋ ᐸᐹᐱᔑᒥᐌᒡ᙮

15ᐁᐊᓂ ᐲᑖᐸᓂᓂᒃ ᑕᔥ, ᐁᒐᓬᐊᐞ ᐅᑮ ᑲᑳᓱᒥᑰᐞ ᓬᐋᑦ ᐁᑮᐃᑯᒡ, ᐌᔩᑉ, ᒫᒌᔥ ᑭᐐᐤ, ᐃᑭ ᑲᔦ ᑭᑖᓂᓴᒃ ᑳᓃᔑᐙᒡ ᐅᐅᒫ ᑳᐊᔮᐙᒡ, ᒋᑕᑯ ᓂᐳᓯᐌᒃ ᐊᐲ ᓂᔑᐗᓈᒋᒋᑳᑌᒃ ᐅᐅ ᐆᑌᓇ, ᐅᑮᐃᑰᐞ᙮ 16#2Pe 2.7. ᓬᐋᑦ ᑕᔥ ᑮᑆᑕᐎ᙮ ᔖᑰᒡ ᑕᔥ ᑳᑎᐯᒋᑫᓂᒡ ᐅᑮ ᑰᐹᑌᓂᒥᑰᓐ᙮ ᒦᑕᔥ ᑳᑮ ᑌᐱᐱᓂᑯᒡ ᐃᐃ ᐃᓂᓂᐗᐞ ᐅᓂᒌᕽ, ᐐᐗᓐ ᑲᔦ ᐅᓂᒌᓃᕽ, ᐃᐃ ᑲᔦ ᐅᑖᓂᓴᐞ ᐅᓂᒌᓃᕽ ᐁᑮ ᐅᒋ ᓵᑭᒋᐎᓂᑯᐙᒡ ᐃᐃᒫ ᐆᑌᓈᕽ᙮ 17ᐊᐲ ᑕᔥ ᐌᑎ ᐊᑾᒌᕽ ᐁᐊᔮᐙᒡ, ᔐᒫᒃ ᐯᔑᒃ ᐃᓂ ᐁᑮᐃᑯᐙᒡ, ᒫᒌᐸᐃᐌᒃ ᒋᐱᒫᑎᓯᔦᒃ! ᑫᑯ ᐋᐸᓈᐱᑫᒃ, ᑫᑯ ᑲᔦ ᑭᐱᒌᑫᒃ ᑳᔑ ᐸᓴᑎᓈᒃ᙮ ᑳᔑ ᐱᑾᑎᓈᒃ ᐊᐸᐃᐌᒃ ᒋᑕᑯ ᓂᓯᑰᓯᐌᒃ, ᐅᑮᐃᑯᐙᓐ᙮

18ᓬᐋᑦ ᑕᔥ ᑮᐃᔑ ᓇᑴᑕᒻ, ᓂᑑᑭᒫᒪᒃ, ᑳᐐᓐ ᐃᐃ ᓂᑖ ᐃᔑᒋᑫᓰ! 19ᑭᒥᓍᐸᒫᐙ ᓴ ᑭᑕᓄᑮᐋᑲᓂᐙ, ᐋᐱᒋ ᑲᔦ ᑭᑭᒋ ᒥᓄᑑᑕᐎᒻ ᐁᐱᒫᒋᑑᔦᒃ ᓂᐱᒫᑎᓯᐎᓐ᙮ ᑳᐐᓐ ᑕᔥ ᓂᑖ ᑲᔥᑭᑑᓰᓐ ᑳᔑ ᐸᐲᑾᑎᓈᒃ ᒋᐊᐸᐃᐌᔮᓐ, ᒫᑭᔖ ᓂᑖ ᐊᑎᒥᑯᓐ ᓀᔑᐗᓈᒋᐃᐌᒪᑲᒃ, ᓂᑖ ᓂᓯᑯᓐ ᐃᑕᔥ᙮ 20ᐃᓇᔥᑫ ᓴ ᐯᔓ ᐅᐅᒫ ᐊᔮ ᐁᐊᑳᓯᕽ ᐆᑌᓇ ᑫᐊᐸᐃᐌᓈᓂᐗᑭᐸᓐ᙮ ᑕᑲ ᐸᑭᑎᓂᔑᓐ ᐌᑎ ᒋᐊᐸᐃᐌᔮᓐ ᒋᐱᒫᑎᓯᔮᓐ, ᐊᑳᓯᓐ ᐅᔕ ᐃ ᐆᑌᓇ, ᑮᐃᑭᑐ᙮

21ᐅᐅ ᑕᔥ ᐅᑮᐃᑰᓐ, ᐊᐤ, ᓂᑲ ᐃᔑᒋᑫ ᑲᔦᐃ ᑳᔑ ᑲᑴᒋᒥᔭᓐ, ᑳᐐᓐ ᑕᔥ ᓂᑲ ᐸᐹᒣᑕᓰᓐ ᐃᐃ ᐆᑌᓇ ᑳᑕᔑᑕᒪᓐ᙮ 22ᐌᔩᑉ ᑕᔥ ᐊᐸᐃᐌᓐ, ᐋᓃᔥ ᑳᐐᓐ ᑫᑰᓐ ᓂᑲ ᑲᔥᑭᑑᓰᓐ ᒌᔑᒋᑫᔮᓐ ᐹᓂᒫ ᐌᑎ ᑮᐅᑎᑕᒪᓐ, ᐅᑮᐃᑰᓐ᙮

ᒦᑕᔥ ᐃᐃ ᐆᑌᓇ ᐌᒋ ᐃᔑᓂᑳᑌᒃ ᔂᕒ Zoar᙮

ᑮᓂᔑᐗᓈᒋᒋᑳᑌᒃ ᔂᑕᒻ, ᐃᐃ ᑲᔦ ᑲᒸᕒᐊ

23ᓬᐋᑦ Lot ᑕᔥ ᑮᐅᑎᑕᕽ ᐃᐃ ᔂᕒ ᐆᑌᓇ, ᐋᔕ ᑮᓯᓲᓐ ᑮᐃᔥᐸᑰᒋᓅᓐ᙮ 24#Mat 10.15; 11.23,24; Luk 10.12; 17.29; 2Pe 2.6. ᑳᑎᐯᒋᑫᒡ ᑕᔥ ᑴᑕᑐ ᑮᐃᔑᒋᑫ ᒋᐸᑭᔑᓂᓂᒡ ᑳᐐᓴᑳᐸᓱᐌᓂᒡ ᐊᓯᓃᓐ ᑮᔑᑯᕽ ᑲᔦ ᑮᐅᒋ ᐸᑭᓯᓂᓂ ᐃᔥᑯᑌ ᐃᐃᒫ ᔂᑕᒻ Sodom ᐆᑌᓈᕽ, ᐃᐃᒫ ᑲᔦ ᑲᒸᕒᐊ Gomorrah ᐆᑌᓈᕽ᙮ 25ᒦᑕᔥ ᐃᐃ ᓇᑫ ᑳᐃᔑ ᓂᔑᐗᓈᒋᑑᒡ ᐃᓂ ᐆᑌᓇᐗᓐ, ᐃᐃ ᑲᔦ ᒥᓯᐌ ᑳᑮ ᐸᓴᑎᓈᓂᒃ᙮ ᐁᑮ ᑕᑯ ᓂᓵᒡ ᑲᔦ ᑲᑭᓇ ᐃᐃᒫ ᐆᑌᓈᑳᕽ ᑳᑮ ᐊᔮᓂᒡ, ᑲᑭᓇ ᑲᔦ ᑫᑰᓐ ᑳᑮ ᓂᑖᐎᑭᕽ ᐃᐃᒫ ᐊᑮᕽ᙮ 26#Luk 17.32. ᓬᐋᑦ ᑕᔥ ᐐᐗᓐ ᑮᐋᐸᓈᐱᐗᓐ, ᒦᔥ ᑳᐃᔑ ᔒᐎᑖᑲᓂᐎᓭᓂᒡ᙮

27ᐐᐸ ᑕᔥ ᑭᑭᔐᑉ ᐁᐸᕒᐊᐋᒻ Abraham ᑮᐃᔖ ᑳᑮ ᐃᔑ ᓃᐸᐎᑯᐸᓀᓐ ᐁᓈᓴᒦᓂᒡ ᑳᑎᐯᒋᑫᓂᒡ᙮ 28ᑮᐃᓈᐱ ᑕᔥ ᐃᓇᑫ ᑳᑮ ᐃᔑᐊᔮᓂᑭᓐ ᔂᑕᒻ, ᑲᒸᕒᐊ ᐆᑌᓇᐗᓐ, ᒥᓯᐌ ᑲᔦ ᐸᓴᑎᓈᕽ᙮ ᒦᑕᔥ ᑳᑮ ᐙᐸᑕᕽ ᐃᐃᒫ ᐊᑮᕽ ᐁᐅᒋ ᐅᐹᐸᑌᓂᒃ ᐁᑮ ᐃᔑᓈᑾᓂᓂᒃ ᑖᐱᔥᑰ ᑭᒋ ᐴᑕᐙᓈᐱᒃ ᑳᐅᐹᐸᓯᑫᒪᑲᒃ᙮ 29ᐊᐲ ᑕᔥ ᑭᔐᒪᓂᑑ ᑮᓂᔑᐗᓈᒋᑑᒡ ᐆᑌᓇᐗᓐ ᐃᐃᒫ ᑳᔑ ᐸᓴᑎᓈᓂᒃ, ᐁᐸᕒᐊᐋᒪᓐ ᓴ ᐅᑮ ᒫᒥᑴᓂᒫᓐ᙮ ᒦᑕᔥ ᑳᑮ ᐸᑭᑎᓈᒡ ᓬᐋᑕᓐ ᒋᔖᐾᓂᒡ᙮

ᐁᑕᔑᓱᐙᒡ ᒨᐗᐸᑮᕽ, ᐊᒪᓃ ᐌᒌᐙᒡ ᐋᑎ ᐌᑕᑳᓀᓯᐙᒡ

30ᓬᐋᑦ Lot ᑕᔥ ᑮᑯᑖᒋ ᒋᐊᔮᒡ ᐃᐃᒫ ᔂᕒ ᐆᑌᓈᕽ᙮ ᒦᑕᔥ ᑳᑮ ᓇᑲᑕᕽ ᐁᑮ ᐐᒌᐙᒡ ᓃᔑᓐ ᐅᑖᓂᓴᐞ, ᑳᔑ ᐱᑾᑎᓈᓂᒃ ᐁᑮ ᐃᔑ ᑲᐯᔑᐙᒡ᙮ ᐐᐹᐱᑳᕽ ᐁᑮ ᐃᔑᑖᐙᒡ᙮ 31ᐊᐊ ᑕᔥ ᓭᓰᑭᓯᒡ ᐅᑖᓂᓯᒫ ᐅᑮᐃᓈᓐ ᐅᔒᒣᔕᓐ, ᑭᑌᑌᓈᓐ ᓴ ᐋᔕ ᐊᑭᐌᓰᐎ, ᑳᐐᓐ ᐃᓂᓂ ᐅᐅᒫ ᐊᔮᓰ ᒋᐐᐯᒥᓇᑭᐸᓐ ᑳᐃᔑᒋᑫᓈᓂᐗᕽ ᒥᓯᐌ ᐊᑮᕽ, ᒋᐐᑎᑫᒥᑯᔭᕽ ᒋᐅᑎᓇᒀᐸᓐ ᐊᐱᓅᒌᔕᒃ᙮ 32ᑕᑲ ᓴ ᒥᓇᐋᑖ ᑭᑌᑌᓈᓐ ᔔᒥᓈᐴᓂ ᒋᑮᐗᔥᑴᐲᒡ ᒋᐐᐯᒪᕽ᙮ ᒦᑕᔥ ᐃᐃᒫ ᑭᑌᑌᓈᓂᕽ ᑫᐅᑑᔐᔭᕽ ᒋᐊᓂ ᐊᔮᓂᑫ ᐊᔮᔭᕽ, ᐅᑮᐃᓈᓐ᙮ 33ᐁᐊᓂ ᑎᐱᑲᓂᓂᒃ ᑕᔥ ᔔᒥᓈᐴᓂ ᐅᑮ ᒥᓇᐋᐙᓐ ᐅᑌᑌᐙᓐ ᒋᑮᐗᔥᑴᐲᓂᒡ᙮ ᒦᑕᔥ ᐊᐊ ᑳᓴᓰᑭᓯᒡ ᑳᐃᔑ ᐲᑎᑲᐙᒡ ᐁᑮ ᐐᐯᒫᒡ᙮ ᑳᐐᓐ ᑕᔥ ᐅᑮ ᑭᑫᑕᓰᓂ ᐁᑮ ᐐᐯᒫᒡ, ᐊᐲ ᑲᔦ ᑳᐗᓂᔥᑳᒡ᙮

34ᐁᐊᓂ ᐙᐸᓂᓂᒃ ᑕᔥ ᑳᓴᓰᑭᓯᒡ ᐅᑮᐃᓈᓐ ᐅᔒᒣᔕᓐ, ᑎᐱᑯᕽ ᓴ ᓃᓐ ᓂᑮ ᐐᐯᒫ ᓂᑌᑌ᙮ ᑕᑲ ᓴ ᒦᓇᐙ ᒥᓇᐋᑖ ᔔᒥᓈᐴᓂ ᒋᑮᐗᔥᑴᐲᒡ, ᑮᓐ ᑕᔥ ᒋᐲᑎᑲᐗᒡ ᒋᐐᐯᒪᒡ, ᑭᑌᑌᓈᓂᕽ ᒋᐅᑑᔐᔭᕽ ᒋᐴᓂ ᐅᑕᑳᓀᓯᓯᐗᕽ, ᐅᑮᐃᓈᓐ᙮ 35ᐁᐊᓂ ᑎᐱᑲᓂᓂᒃ ᑕᔥ ᒦᓇᐙ ᐅᑮ ᒥᓇᐋᐙᓐ ᔔᒥᓈᐴᓂ ᒋᑮᐗᔥᑴᐲᓂᒡ᙮ ᐅᔒᒣᔑᒫ ᑕᔥ ᑮᐃᔖ ᐁᑮ ᐐᐯᒫᒡ ᐅᑌᑌᓐ᙮ ᑳᐐᓐ ᐃᑕᔥ ᐊᐙᒡ ᐸᑮ ᐅᑮ ᑭᑫᑕᓰᓂ ᐊᐲ ᑳᒫᒌ ᐐᐯᒫᒡ, ᐊᐲ ᑲᔦ ᑳᐗᓂᔥᑳᒡ᙮ 36ᒦᑕᔥ ᐃᐃ ᒥᒋᓃᔥ ᐅᑖᓂᓴᐞ ᓬᐋᑦ ᑳᑮ ᑭᑭᔥᑲᐙᐗᓱᓂᒡ ᐅᑌᑌᓃᕽ ᐃᓇᑫ ᐁᑮ ᐅᑑᔐᓂᒡ᙮ 37ᑳᓴᓰᑭᓯᒡ ᑕᔥ ᐊᐊ ᐅᑖᓂᓯᒫ ᑮᐅᑯᓯᓯ, ᒨᐗᑉ Moab ᑕᔥ ᐅᑮ ᐃᔑᓂᑳᓈᓐ᙮ ᒦᑕᔥ ᐃᐃᒫ ᐃᑭ ᒨᐗᐲ ᑳᑎᓄᐎᐙᒡ ᐌᑕᑳᓀᓯᐙᒡ᙮ 38ᐊᐊ ᑕᔥ ᐅᔒᒣᔑᒫ ᑫᐐᓐ ᑮᐅᑯᓯᓯ᙮ ᐱᓈᒥ Benammi ᑕᔥ ᐅᑮ ᐃᔑᓂᑳᓈᓐ᙮ ᒦᑕᔥ ᐃᐃᒫ ᐌᑕᑳᓀᓯᐙᒡ ᐃᑭ ᐊᒪᓃ ᑳᐃᓂᑣ ᓅᑯᒻ ᑳᑮᔑᑲᓂᓂᒃ᙮

Currently Selected:

ᒉᓂᓯᔅ 19: OJBS

Highlight

Copy