ᒉᓂᓯᔅ 17

ᑭᑭᓇᐙᑕᔕᑫᔓᑰᐎᓐ ᒋᐋᐸᑕᒃ ᒋᑭᑭᓇᐙᓯᓈᑾᒃ ᐊᔓᑕᒫᑫᐎᓐ

1ᐁᐸᕒᐊᒻ Abram ᔖᑲᓯᒥᑕᓇᔑᔖᑲᓱ 99 ᑮᑕᓱ ᐱᐴᓉ ᑮᓈᑯᓰᑖᑯᒡ ᑳᑎᐯᒋᑫᓂᒡ ᐅᐅ ᐁᑮᐃᑯᒡ, ᓃᓐ ᑳᒫᐗᒋ ᒪᔥᑲᐎᓰᔮᓐ ᑭᔐᒪᓂᑑ; ᐃᔑ ᐱᒫᑎᓯᓐ ᐃᓇᑫ ᐁᔑ ᐊᑕᐌᓂᒥᓈᓐ, ᑫᑯ ᑫᑰᓐ ᐃᔑ ᐊᓈᒣᑖᑯᓯᑫᓐ᙮ 2ᓂᑲ ᐋᔩᑕᑑᓐ ᐃᑕᔥ ᑳᔑ ᐊᔓᑕᒫᐎᓈᓐ, ᑭᑲ ᐃᔑᐃᓐ ᓴ ᒋᐊᓂ ᐹᑏᓄᔭᓐ, ᐅᑮᐃᑰᓐ᙮ 3ᐁᐸᕒᐊᒻ ᑮᐅᒋᒌᑾᓇᐲᑖ ᒥᑕᑲᒥᑳᕽ᙮ ᑭᔐᒪᓂᑑᓐ ᐅᑮ ᑲᑲᓅᓂᑰᓐ ᐁᑮᐃᑯᒡ, 4ᒦᑕᔥ ᓃᓐ ᐅᐅ ᓇᑫ ᐁᔑᐊᔓᑕᒫᐎᓈᓐ, ᑮᓐ ᓴ ᑭᑲ ᐅᑌᑌᒥᑰᒃ ᓃᐱᐗᐞ ᑳᑕᓶᐙᓇᑭᓯᐙᒡ ᐊᐎᔭᒃ ᐯᒫᑎᓯᐙᒡ᙮ 5#Rom 4.17. ᑳᐐᓐ ᑕᔥ ᐊᐗᔑᒣ ᐁᐸᕒᐊᒻ ᑭᑲ ᐃᔑᓂᑳᓱᓰ, ᐁᐸᕒᐊᐋᒻ#17.5 ᐁᐸᕒᐊᐋᒻ: ᐃᐃᐌ ᐃᔑᓂᑳᓱᐎᓐ ᐁᐸᕒᐊᐋᒻ ᑳᐃᒋᑳᑌᒃ ᓃᐱᐗᐞ ᐊᐎᔭᐞ ᒋᐅᑌᑌᒥᑯᒡ, ᒦ ᐃᐌ ᐁᓂᑖᑾᓂᓂᒃ ᑳᐃᔑᑮᔗᐙᒡ᙮ Abraham ᓴ ᑭᑲ ᐃᔑᓂᑳᔅ᙮ ᑮᓐ ᐋᓃᔥ ᑭᑲ ᐅᑌᑌᒥᑰᒃ ᓃᐱᐗᐞ ᑳᑕᓶᐙᓇᑭᓯᐙᒡ ᐊᐎᔭᒃ ᐯᒫᑎᓯᐙᒡ᙮ 6ᑭᑲ ᐃᔑᐃᓐ ᓴ ᐐᑫ ᒋᓂ ᐹᑏᓄᐙᒡ ᑭᐲᐌᓰᒪᒃ, ᑭᑲ ᐃᔑᐃᓐ ᑲᔦ ᒋᐊᓂ ᐹᑏᓉᐙᓇᑭᓯᔭᓐ᙮ ᑭᐲᐌᓰᒥᕽ ᑕᔥ ᑕᐅᒌᐗᒃ ᑫᓂ ᑭᒋᐅᑭᒫᐎᐙᒡ᙮

7 # Luk 1.55. ᓂᑲ ᐃᔑᒋᑫ ᑕᔥ ᐃᐃ ᑳᔑ ᐊᔓᑕᒪᐎᓈᓐ, ᐃᑭ ᑲᔦ ᑭᐲᐌᓰᒪᒃ ᑫᓂ ᐊᔮᐙᒡ ᒌᓇᑌᒃ ᐐᑳ ᑫᐴᓂᓭᓯᓄᒃ ᓂᑕᔓᑕᒫᑫᐎᓐ᙮ ᑭᑲ ᐅᑭᔐᒪᓂᑑᒥᒻ ᐃᑕᔥ, ᑭᐲᐌᓰᒪᒃ ᑲᔦ ᓂᑲ ᐅᑭᔐᒪᓂᑑᒥᒥᑰᒃ᙮ 8#Act 7.5. ᐅᐅ ᓴ ᑲᑭᓇ ᑫᓇᓐ Canaan ᐊᑭ ᓅᑯᒻ ᑳᔑ ᐲᐎᑌᐌᑖᑯᓯᔭᓐ, ᒦ ᐃᐌ ᑫᒦᓂᓈᓐ ᓀᐱᒡ ᒋᑎᐱᓇᐌᐎᓯᔭᓐ, ᐃᑭ ᑲᔦ ᑭᐲᐌᓰᒪᒃ, ᑫᓂ ᐊᔮᐙᒡ ᑮᐃᔥᒀ ᐊᔮᔭᓐ; ᓃᓐ ᑕᔥ ᓂᑲ ᐅᑭᔐᒪᓂᑑᒥᒥᑰᒃ, ᐅᑮᐃᑰᓐ᙮

9ᑭᔐᒪᓂᑑᓐ ᑕᔥ ᐁᐸᕒᐊᐋᒻ ᐅᑮᐃᑰᓐ, ᒦᑕᔥ ᑫᑮᓐ ᓅᑯᒻ ᐁᔑᓈᑾᒃ ᒋᑲᓇᐌᑕᒪᓐ ᓂᑕᔓᑕᒫᑫᐎᓐ, ᐃᑭ ᑲᔦ ᑭᐲᐌᓰᒪᒃ, ᐃᑭ ᑲᔦ ᑫᓂ ᐊᔮᐙᒡ ᑮᐃᔥᒀ ᐊᔮᔭᓐ ᑫᓂ ᐊᔮᓂᑫ ᓂᑖᐎᑭᐙᒡ᙮ 10#Act 7.8; Rom 4.11. ᒦᑕᔥ ᐅᐅ ᓂᑕᔓᑕᒫᑫᐎᓐ ᑫᑲᓇᐌᑕᒪᓐ, ᑳᑮ ᐃᔑ ᐊᔓᑕᒫᐗᒀ ᑲᔦ ᐃᑭ ᑭᐲᐌᓰᒪᒃ ᑫᓂ ᐊᔮᐙᒡ ᑮᐃᔥᒀ ᐊᔮᔭᓐ; ᑲᑭᓇ ᓴ ᐊᐎᔭ ᐁᓂᓃᐎᒡ ᐁᔮᒡ ᑳᔑ ᐊᔮᔦᒃ ᑕᑭᑭᓇᐙᑕᔕᑫᔣ᙮#17.10 ᑕᑭᑭᓇᐙᑕᔕᑫᔣ: ᒦ ᓴ ᑳᐃᒋᑳᑌᒃ ᐊᐎᔭ ᑳᒪᓂᔓᒥᓐᒡ ᐅᔕᑲᔭᓐ ᐅᑎᓂᓃᐎᐎᓂᕽ ᐃᓇᑫ᙮ ᐊᐱᓅᒌᔕᒃ ᑕᔥ ᒦ ᐃ ᑳᑑᑕᐎᑣ ᑮᓂᔣᓱᑯᓇᑭᓯᐙᒡ᙮ 11ᑮᓐ ᑕᔥ ᑭᑲ ᑭᑭᓇᐙᑕᔕᑫᔓᑰ ᑭᑎᓂᓃᐎᐎᓂᕽ; ᒦᑕᔥ ᐃᐃ ᓇᑫ ᐁᔑ ᑭᑭᓇᐙᒋᒋᑳᑌᒃ ᐋᓃᓐ ᑳᔑ ᐊᔓᑕᒫᐎᓈᓐ᙮ 12ᑭᐲᐌᓰᒪᒃ ᓴ ᑫᓂ ᐊᔮᐙᒡ ᑳᔑ ᐊᔮᔦᒃ, ᑲᑭᓇ ᐊᐎᔭ ᑳᐃᓂᓃᐎᒡ ᓂᔣᓱᑯᓇᑭᓯᒡ 8 ᑕᑭᑭᓇᐙᑕᔕᑫᔣ᙮ ᐃᑭ ᑲᔦ ᐊᓄᑮᐋᑲᓇᒃ ᑳᓂᑖᐎᑭᐙᒡ ᑭᐙᑳᐃᑲᓂᕽ, ᐃᑭ ᑲᔦ ᑳᑮ ᐊᑖᐙᑳᓱᐙᒡ ᔔᓂᔮᓐ ᐁᐋᐸᑎᓯᓂᒡ᙮ 13ᐊᐊ ᓴ ᑯ ᑭᑖᐎᓂᕽ ᑳᑕᔑ ᓂᑖᐎᑭᒡ, ᑯᒫ ᑲᔦ ᐊᐎᔭ ᑳᐊᑖᐙᓱᒡ ᔔᓂᔮᕽ ᐅᒋ ᐅᒋᑕᑯ ᐃᔑᓈᑾᓂᓂ ᒋᑭᑭᓇᐙᑕᔕᑫᔓᓐᒡ᙮ ᒦᑕᔥ ᐃᐃᒫ ᓂᑕᔓᑕᒫᑫᐎᓐ ᐐᑳ ᑫᐴᓂᓭᓯᓄᒃ ᑫᔑ ᑭᑭᓇᐙᓯᓈᑾᒃ ᑭᐐᔭᐎᐙᕽ᙮ 14ᐊᐌᓀᓐ ᑕᔥ ᐃᑯ ᐃᓂᓂ ᑫᑭᑭᓇᐙᑕᔕᑫᔣᓯᐎᓐᒡ ᐅᐐᔭᐎᕽ ᐅᑎᓂᓃᐎᐎᓂᕽ, ᒦ ᐃ ᑫᐃᓇᑭᒥᓐᒡ ᐁᐅᒋ ᑎᐯᑖᑯᓯᓯᒃ ᐁᔑᐊᔮᓂᒡ ᓂᐱᒫᑎᓰᒪᐞ, ᐋᓃᔥ ᐅᓵᒻ ᐅᐲᑯᓈᓐ ᓂᑕᔓᑕᒫᑫᐎᓐ, ᐅᑮᐃᑰᓐ᙮

ᐁᑮᐊᔓᑕᒫᑲᓂᐎᒡ ᐋᐃᓯᒃ ᒋᓂᑖᐎᑭᒡ

15ᑭᔐᒪᓂᑑᓐ ᑕᔥ ᐅᑮ ᐊᓂᐃᑰᓐ, ᐊᐊ ᑕᔥ ᐐᓐ ᑭᐐᐤ ᓭᕒᐊᐄ, ᑳᐐᓐ ᐊᐗᔑᒣ ᓭᕒᐊᐄ ᑭᑲ ᐃᔑᓂᑳᓈᓰ; ᓭᕒᐊ#17.15 ᓭᕒᐊ: ᐃᐃᐌ ᐃᔑᓂᑳᓱᐎᓐ ᓭᕒᐊ ᑳᐃᒋᑳᑌᒃ ᑳᑭᒋ ᐃᓀᑖᑯᓯᒡ ᐃᑴ, ᒦ ᐃᐌ ᐁᓂᑖᑾᓂᓂᒃ ᑳᐃᔑᑮᔗᐙᒡ ᐄᐸᕒᐆᐗᒃ᙮ Sarah ᓴ ᑕᐃᔑᓂᑳᓱ᙮ 16ᓂᑲ ᔕᐌᓂᒫ ᓴ, ᒦᑕᔥ ᐃᐃᒫ ᐐᓐ ᑫᐅᒋ ᒦᓂᓈᓐ ᑭᑯᓯᔅ᙮ ᓂᑲᔑ ᔕᐌᓂᒫ ᑕᔥ ᐐᓐ ᒋᐊᓂ ᐅᒫᒫᒥᑯᒡ ᑳᑕᓶᐙᓇᑭᓯᓂᒡ ᐯᒫᑎᓯᓂᒡ, ᑕᓂ ᑭᒋᐅᑭᒫᐎᐗᐞ ᓴ ᐅᐲᐌᓰᒪᐞ᙮

17ᐁᐸᕒᐊᐋᒻ ᑮᐊᓂᒥᑯᑖ ᒥᑕᑲᒥᒃ᙮ ᒦᑕᔥ ᑳᐃᔑ ᐹᐱᒡ ᐁᑮ ᐃᑭᑐᒡ, ᑰᓂᑫ ᐃᓂᓂ ᓂᑯᑣᒃ 100 ᑕᓱ ᐱᐴᓉᒡ ᐅᑖ ᑲᔥᑭᑑᓐ ᒋᐊᔮᐙᐸᓐ ᐊᐱᓅᒌᔕᓐ? ᑰᓂᑫ ᑲᔦ ᓭᕒᐊ ᔖᑲᓯᒥᑕᓇ 90 ᐁᑕᓱ ᐱᐴᓉᒡ ᐅᑖ ᑲᔥᑭᑑᓐ ᒋᐊᔮᐙᐸᓐ ᐊᐱᓅᒌᔕᓐ? 18ᐁᐸᕒᐊᐋᒻ ᑕᔥ ᐅᑮ ᐃᔑ ᑲᑴᒋᒫᓐ ᑭᔐᒪᓂᑑᓐ, ᓇᐗᒡ ᐄᑐᒃ ᑕᐅᓂᔑᔑᓐ ᐃᔥᒣᔭᓬ Ishmael ᒋᐊᓂ ᑎᐯᑕᑭᐸᓐ ᓂᑕᔭᐄᒪᓐ᙮

19ᑭᔐᒪᓂᑑᓐ ᑕᔥ ᐅᑮ ᐃᔑ ᓇᑴᑖᑰᓐ, ᑳᐐᓐ ᐃᐃ ᑕᐃᔑᓈᑾᓯᓅᓐ᙮ ᑭᐐᐤ ᓭᕒᐊ ᐅᔕ ᐅᑲ ᐊᔮᐙᓐ ᑫᐅᑯᓯᓯᐗᒡ᙮ ᐋᐃᓯᒃ ᓴ ᑭᑲ ᐃᔑᓂᑳᓈ ᑭᑯᓯᔅ᙮ ᒦ ᓴ ᐊᐊ ᐋᐃᓯᒃ ᑫᓀᐱᒋ ᐅᓇᑕᒪᐗᒃ ᓂᑕᔓᑕᒫᑫᐎᓐ, ᐃᐃ ᑲᔦ ᑫᓂ ᐅᐲᐌᓰᒥᒡ᙮ ᑳᐐᓐ ᐐᑳ ᑕᐴᓂᓭᓯᓅᓐ ᐃᐃ ᐊᔓᑕᒫᑫᐎᓐ᙮ 20ᑭᓅᑕᐎᓐ ᓴ ᐋᓃᓐ ᐁᔑ ᑲᑴᒋᒥᔭᓐ, ᐊᐊ ᐅᒋ ᐃᔥᒣᔭᓬ᙮ ᓂᑲᔑ ᔕᐌᓂᒫ ᓴ ᑲᔦ ᓃᐱᐗᐞ ᒋᐊᔮᐙᒡ ᐊᐱᓅᒌᔕᐞ, ᐋᐱᒋ ᑲᔦ ᑕᐹᑏᓄᐗᐞ ᐅᐲᐌᓰᒪᐞ᙮ ᑕᒥᑖᔑᓃᔑᐗᐞ ᑲᔦ ᑫᐅᑯᓯᓯᒡ ᑫᐊᓂ ᐅᑭᒫᑲᑖᑫᓂᒡ᙮ ᓂᑲ ᐃᔑᐃᒫᐞ ᑲᔦ ᑫᐅᐲᐌᓰᒥᒡ ᒋᐊᓂ ᐹᑏᓄᓂᒡ᙮ 21ᐊᐊ ᑕᔥ ᐐᓐ ᑫᐅᑯᓯᓯᔭᓐ ᐋᐃᓯᒃ ᓂᑲ ᑲᓇᐌᑕᒧᐙᓐ ᐃᐃ ᓂᑕᔓᑕᒫᑫᐎᓐ ᑫᒦᓇᒃ᙮ ᓭᕒᐊᐗᓐ ᑕᔥ ᐅᑲ ᓂᑖᐎᑭᐃᑰᓐ ᐅᐅ ᐊᐲ ᒦᓇᐙ ᑫᐊᑮᐗᕽ᙮ 22ᐁᐸᕒᐊᐋᒻ ᑕᔥ ᑳᐃᔥᒀ ᑲᑲᓅᓂᑯᒡ ᑭᔐᒪᓂᑑᓐ, ᒦ ᐃ ᑳᐊᓂᔑ ᓇᑲᓂᑯᒡ᙮

23ᒦᑕᔥ ᐃᐃ ᐊᐲ ᐯᔑᑾᓐ ᐁᑮᔑᑲᓂᓂᒃ, ᐁᐸᕒᐊᐋᒻ ᐅᑮ ᑭᑭᓇᐙᑕᔕᑫᔣᓐ ᐅᑯᓯᓴᓐ ᐃᔥᒣᔭᓬᐗᓐ ᐁᑮ ᒪᓂᔕᒪᐙᒡ ᐅᔕᑲᔨᓂ᙮ ᒦ ᑲᔦ ᑳᑑᑕᐙᒡ ᑲᑭᓇ ᐅᑕᓄᑮᐋᑲᓇᐞ, ᐃᐃ ᑲᔦ ᑳᓂᑖᐎᑭᓂᒡ ᐅᐙᑳᐃᑲᓂᕽ, ᐃᐃ ᑲᔦ ᑳᑮ ᐊᑖᐌᒡ ᐅᐸᒦᑖᑫᐞ᙮ ᑲᑭᓇ ᓴ ᑯ ᑳᑮ ᐃᓂᓃᐎᓂᒡ ᐃᐃᒫ ᐅᑖᐎᓂᕽ ᒦ ᐃ ᑳᑑᑕᐙᒡ ᐋᓃᔥ ᑭᔐᒪᓂᑑᓐ ᐅᑮᐃᑰᓐ ᐃᐃ ᒌᔑᒋᑫᒡ᙮ 24ᐁᐸᕒᐊᐋᒻ ᑕᔥ ᔖᑲᓯᒥᑕᓇᔑᔖᑲᓱ 99 ᑮᑕᓱ ᐱᐴᓉ ᑮᑭᑭᓇᐙᑕᔕᑫᔓᓐᒡ᙮ 25ᐃᓂ ᑕᔥ ᐅᑯᓯᓴᓐ ᐃᔥᒣᔭᓬᐗᓐ, ᒥᑖᔑᓂᓯᓐ 13 ᑮᑕᓱ ᐱᐴᓉᐗᓐ ᑮᑭᑭᓇᐙᑕᔕᑫᔓᒥᓐᒡ᙮ 26ᐯᔑᑾᓐ ᑕᔥ ᐁᑮᔑᑲᓂᓂᒃ ᐁᐸᕒᐊᐋᒻ, ᐃᓂ ᑲᔦ ᐅᑯᓯᓴᓐ ᐃᔥᒣᔭᓬᐗᓐ ᑮᑭᑭᓇᐙᑕᔕᑫᔣᐗᒃ᙮ 27ᑲᑭᓇ ᓴ ᑯ ᑳᑮ ᐃᓂᓃᐎᒡ ᐃᐃᒫ ᐅᐙᑳᐃᑲᓂᕽ, ᐃᐃ ᑲᔦ ᑳᑮ ᓂᑖᐎᑭᓂᒡ ᐅᐙᑳᐃᑲᓂᕽ, ᐃᐃ ᑲᔦ ᑳᑮ ᐊᑖᐌᒡ ᐅᐸᒦᑖᑫᐞ ᒦ ᐃ ᑕᑯ ᑳᑮ ᑭᑭᓇᐙᑕᔕᑫᔓᒥᓐᒡ᙮

Currently Selected:

ᒉᓂᓯᔅ 17: OJBS

Highlight

Copy