Hch 8

Jesúre yiꞌyurãte baꞌiaja Saulote baariyaᵽaeka

1-3Estebanre najããeka ĩatirã, “Jia sime”, Saulore ãrĩka. Toᵽi mae, jia Tuᵽarãre yiꞌyurã imaekarã judíotatarã ĩꞌrã Estebanre yayekarã. Ñajoabaraka jimarĩ kire norika. Iꞌsirĩmijioka Jesúre yiꞌyurãre baꞌiaja nabaaũꞌmueka Jerusalékarã. Suᵽa imarĩ Judea kaꞌiarã, Samaria kaꞌiarã naruꞌriwaꞌrika. Imakoꞌomakaja aᵽóstolrãka ᵽuri Jerusalénrãja tuikarã. Saulo, “Estebanre najããᵽarũ”, ãrĩᵽuᵽajoaekaki imarĩ, ĩꞌrãwiꞌi jariwaꞌririmarĩaja moꞌabaraka Jesúre yiꞌyurãre tõᵽotirã ĩmirĩja, rõmijãreoka wẽkomaka imariwiꞌiarã nare kitaroyika.

Samaria kaꞌiarã Jesúrika bojariroka Feliᵽete wãrõeka

4Jerusalénrõꞌõᵽi ruꞌriwaꞌrikarã imakoꞌomakaja aᵽerõꞌõrã eyatirã Jesúrika bojariroka nawãrõeka. 5Feliᵽe Jerusalénᵽi ruꞌriwaꞌritirã, Samariakaꞌiarã imawejearã eyaekaki. Torã eyatirã, “Ᵽoꞌimajare tããokoroꞌsi suᵽabaatirã nare jãꞌmerimaji kimaokoroꞌsi Tuᵽarãte kire ᵽũataeka”, ãrĩwaꞌri Jesúrikakaka Feliᵽere nare bojaeka. 6Torãjĩrã mae, rĩkimarãja ᵽoꞌimajare kiᵽõꞌirã rẽrĩka kire ãꞌmitiririyaᵽawaꞌri. Suᵽabaatirã, maikoribeyua kibaabeamakaoka ĩawaꞌri kibojaeka jiaᵽi naꞌmitirika. 7Iꞌsuᵽaka maikoribeyua baabeabaraka rĩkimarã ᵽoꞌimaja ᵽuᵽakarã Satanárika ima ñaꞌrĩjãikarãreka Feliᵽete ᵽoataeka. Iꞌsuᵽaka kibaamaka nareka imaeka akaserebaraka ᵽorika. Suᵽabaatirãoka rĩkimarãja bitamajareoka kijieka. 8Suᵽa imarĩ iꞌsia wejeakarãre jĩjimaarika.

9-11Iꞌsia wejearã Simónre imaeka. Ĩꞌrãkuri wejejẽꞌrãmarĩa yeꞌoiki imarĩ, kiᵽuᵽakaᵽi baabeabaraka kimaroyika. Iꞌsuᵽaka baarijaᵽaraka, “Yiꞌi imaki imatiyaiki”, tokarãre kẽrĩroyika. Iꞌsuᵽaka nare kibaamaka rĩkimarãja imatiyairã, imatiyabeyurã ᵽariji kire nayiꞌrika. “Tuᵽarãte kire jeyobaamaka tẽrĩtaki kime”, ãrĩwaꞌri jiyiᵽuᵽaka noñuka kimaeka. 12Iꞌsuᵽaka nimakoꞌomakaja Feliᵽe ᵽuri Jesucristorika bojariroka nare wãrõekaki. “Tuᵽarãte ᵽũataekaki kime Jesús. Suᵽabaatirãoka kire yiꞌyurã ᵽuri jia Tuᵽarãte nare imaruᵽutarãñu”, ãrĩwaꞌri nare kibojaeka. Iꞌsia ãꞌmitiritirã Jesúre ĩmirĩja, rõmijãoka kire nayiꞌrika. Iꞌsuᵽaka imawaꞌri Feliᵽete naruᵽukoꞌa najũjerũjeka, “Koᵽakaja Jesúre yiꞌyurã yija ime”, ãrĩwaꞌri. 13Simónoka, yeꞌoiki imakoꞌomakaja, Jesúrika bojariroka yiꞌritirã ruᵽukoꞌa kijũjerũjeka. Torãjiteᵽi mae Feliᵽeka kijeyoariũꞌmueka. Kika imarijaᵽaraka Tuᵽarãrikaᵽi maikoribeyua Feliᵽere baabeamaka ĩatirã, marãkãꞌã mabaaberijĩkarõꞌõjĩrã Simónre jarika iꞌsuᵽaka ima ĩakoriberikaki imarĩ.

14“Samariakaꞌiakarã rĩkimarãja Tuᵽarãrika naꞌmitiriᵽẽayu”, ãrĩka majaroka naꞌmitirika Aᵽóstolrãka Jerusalénrã imatirã. Suᵽa imarĩ Samariarã naᵽũataeka Ᵽedrore, Juanka. 15-16Samariakaꞌiarã eyatirã tokarã Jesúre ãꞌmitiriᵽẽairã ruᵽukoꞌa jũjekarã imakoꞌomakaja, “Tuᵽarãre ᵽũataekaki Esᵽíritu Santore nareka imabeyurã nime ruᵽu”, narĩwãrũika. “Esᵽíritu Santore nare ñaꞌrĩjãirũ”, ãrĩwaꞌri Tuᵽarãre naroꞌsi najẽñeka. 17Suᵽabaatirã Jesúre ãꞌmitiriᵽẽairãte ĩꞌrĩka jariwaꞌririmarĩa naruᵽukoꞌa narabemaka Esᵽíritu Santore nare ñaꞌrĩjãika.

18-19Ᵽedrorãkare nare rabemaka Esᵽíritu Santore nare ñaꞌrĩjãimaka Simónre ĩaeka. Iꞌsia ĩatirã niñerũ nare ĩjirika yaᵽawaꞌri ikuᵽaka nare kẽrĩka:

—Mija baaika uᵽaka yibaamaka Esᵽíritu Santore nare ñaꞌrĩjãirika yiyaᵽayu yiꞌioka. Ika sime suᵽa yire mija baarũjerũki waᵽa,== nare kẽrĩka.

20Toᵽi ikuᵽaka Ᵽedrore kire yiꞌrika:

—Waᵽamarĩaja Tuᵽarãte jaꞌataika ᵽuri, waruarirũkimarĩa sime. Iꞌsuᵽaka miᵽuᵽajoaika simamaka, miniñerũᵽitiyika baꞌiaja imarika tiyibeyurõꞌõrã meꞌrirũ ãrĩwaꞌri. 21Baꞌiaja miᵽuᵽajoaika õñuka Tuᵽarã. Suᵽa imarĩ, yijaka aᵽerãte Esᵽíritu Santore ñaꞌajããrimajimarĩka mime. 22-24Koᵽakaja mae baꞌiaja miᵽuᵽaka mireka ñiawãrũyu. Mia, Tuᵽarãte tẽrĩrika imakakaᵽi yija baarijayua mioakiyu. Suᵽabaatirã baꞌitakaja baarimaji imarĩ, marãkãꞌã baatirã aᵽe uᵽaka imarimajimarĩka mime. Baꞌitakaja miᵽuᵽajoaika jaꞌatatirã Tuᵽarãte mijẽñebe, “Baꞌiaja yiᵽuᵽajoaika yireka miyeꞌkariabe”, ãrĩwaꞌri,== Ᵽedrore kire ãrĩka imarĩ, ikuᵽaka Simónre kire terika:

—Maĩᵽamaki Tuᵽarãka yiroꞌsi mija jaibe. “Iꞌsuᵽaka mijũarãñu”, yire meñua jũarika yaᵽabeyuka yiꞌi ᵽuri,== Ᵽedrorãkare kẽrĩka.

25Iꞌsia beꞌerõꞌõ Jesúre baaroyika niaeka mirãka, suᵽabaatirã nare kibojaroyikakaka tokarãre nabojaeka. Ᵽoꞌimajare wãrõweatirã, Jerusalénrã ᵽeꞌriwaꞌrikõrĩ Samariakaꞌiarã wejerakakaja Jesúrika nawãrõrijarika.

Etioᵽíakaꞌiakakire Feliᵽete ruᵽukoꞌa jũjeka

26Iꞌsia beꞌerõꞌõ Tuᵽarã Feliᵽe ᵽõꞌirã ángelte ᵽũataekaki ikuᵽaka kire kẽñaokoroꞌsi:

—Jerusalénrã meꞌᵽe. Torã meyarãka ᵽoto, Gaza wãmeika wejearã aꞌyu maꞌarã meꞌᵽe. Yaᵽumatoᵽi oꞌyumaꞌa sime iꞌsimaꞌa,== Feliᵽete kẽrĩka.

27Suᵽa imarĩ kire kẽrĩka uᵽakaja Feliᵽete aꞌrika mae. Toᵽi aꞌririjaᵽaraka Etioᵽíakaꞌiakakire kĩaeka. Etioᵽíakaꞌiakarã ĩᵽamakore niñerũ ĩarĩrĩrijeyobaarimaji imatiyaiki kimaeka. Jerusalénrã Tuᵽarãte jiyiᵽuᵽayeerĩ turikaki, torãjite kiᵽeꞌrieyawaꞌrika. 28Kawarure tũrũrũkiaᵽi kire yierijayukãꞌãja Tuᵽarãroꞌsi bojarimaji Isaías wãsare oꞌoekakaka kĩarijarika.

29Torãjĩrã mae, ikuᵽaka Esᵽíritu Santore ãrĩka Feliᵽete:

—Kire eyatirã, kiwãtaᵽiji meꞌririjaᵽe==.

30Suᵽa imarĩ kire rĩrĩeyatirã, Tuᵽarãte bojaĩjirimaji Isaíare oꞌoekakaka ĩabaraka kijaiᵽatemaka, kiãꞌmitirika. Toᵽi mae,

—Torã mijaiᵽateika ¿yaje miõrĩwãrũyu?== Feliᵽete kire ãrĩka.

31Iꞌsuᵽaka kẽᵽakãꞌã,

—“Iꞌsuᵽaka sãñu”, ãrĩwãrũbeyuka yiꞌi, maki yire sabojabeyua simamaka,== kire kẽrĩka.

Toᵽi mae,

—Yiᵽõꞌirã mimarĩjãibe yire samiwãrõkaroꞌsi,== Etioᵽíakakire kire ãrĩka.

32Isaías Tuᵽarãrika oꞌoeka kijaiᵽatekarõꞌõ ikuᵽaka bojaeka:

“Oveja jããokoroꞌsi neꞌewaꞌyu uᵽakaja ĩꞌrĩkate neꞌewaꞌrirãñu. Kiᵽoya nataꞌamaka oveja akaserebeyua sima uᵽakaja baꞌiaja kire nabaakoꞌomakaja kiakaserebesarãñu.

33Rĩkimarãja ᵽoꞌimajare ĩarãka wãjitãji baꞌiaja kire nabaarãñu. ‘Baꞌiaja baaiki kime’, kireka naᵽakãꞌã kiꞌyoᵽiꞌrirãñu baꞌiaja baabesarãki imarĩ. Suᵽabaatirã ᵽoꞌimajare kire jããmaka, kiriᵽarãmerã imabesarãñurã”, ãrĩwaꞌri oꞌoekarõꞌõ Etioᵽíakakire jaiᵽateka.

34Suᵽa imarĩ kiᵽõꞌirã Feliᵽete marĩjãika.

—Tuᵽarãroꞌsi bojaĩjirimajite oꞌoekakaka ĩatirã yire mibojabe. ¿Yaje kirikakakaja kioꞌoeka bai? ¿Aᵽikareka ᵽuᵽajoawaꞌri iꞌsuᵽaka kioꞌoeka kãꞌã?== Feliᵽete kẽrĩka.

35Toᵽi mae, Isaíare oꞌoekakaka ãꞌmitiritirã, ikuᵽaka Feliᵽete kire ãrĩka:

—Isaías ikuᵽaka oꞌoekaki Jesúre baꞌiaja jũarũkiakaka ᵽuᵽajoawaꞌri.==

Suᵽabaatirã jía Jesúmajaroka kire kibojaeka. 36Aꞌririjari maꞌarijerã ᵽaꞌwa imaekarõꞌõrã neyaeka.

—Ĩakõrĩ, õꞌõrã sime okoa. Maekaka ruᵽukoꞌa yire mijũjebe ñarĩjĩka ¿yaje rukuya jia simajĩñu?== Etioᵽíakakire kire ãrĩka.

37Toᵽiji kire kiyiꞌrika:

—Yiꞌritiyarĩji Jesucristore miyiꞌrijĩkareka, miruᵽukoꞌa mire yijũjejĩñu.==

Iꞌsuᵽaka kẽᵽakãꞌã,

—Ãꞌã, Tuᵽarã Makiji kime Jesucristo,== Etioᵽíakakire ãrĩka.#8.37 La mayoría de las traducciones de la Biblia no incluyen el versículo 37 porque no aparece en las copias de la Biblia más antiguas.

38Suᵽa imarĩ, “Õꞌõrã mituibe”, tũrũrũkia tuarimajite ãrĩtirã, saᵽi merĩrĩkatirã ᵽaꞌwarã natuꞌarĩkaeka Feliᵽete Etioᵽíakaki ruᵽukoꞌa jũjeokaroꞌsi. 39Ᵽaꞌwaᵽi namarĩrĩkaeka ᵽoto, ikuᵽarõꞌõᵽiji Feliᵽete Esᵽíritu Santore eꞌewaꞌrika. Sabeꞌerõꞌõ ᵽuri Etioᵽíakakire kire ĩaberika ate. Iꞌsuᵽaka simakoꞌomakaja jĩjimakaᵽi Etioᵽíakakire oꞌrika. 40Aᵽewejearã Esᵽíritu Santore kire eꞌewaꞌrika beꞌerõꞌõ, “Azotowejearã ñimekãꞌã mae”, Feliᵽete ãrĩᵽuᵽajoaeka. Toᵽi oꞌriwaꞌrikõrĩ wejerakakaja Jesúrika wãrõrijaᵽaraka Cesareawejearã keyaeka.

Currently Selected:

Hch 8: TNC

Highlight

Copy