Hch 12

Santiagore najããeka, suᵽabaatirã wẽkomaka imariwiꞌiaᵽi Ᵽedrote ᵽorika

1Iꞌsia ᵽoto ritaja Jesúre yiꞌyurã uᵽatireje baꞌiaja Herodere kisurararãkare baarũjeũꞌmueka. Suᵽa imarĩ ĩꞌrãrimarã nare imaruᵽutarimajare wẽkomaka imariwiꞌiarã nataaeka. 2Suᵽabaatirã, Juan maꞌmi Santiagore nañiꞌaᵽakãꞌã, “Kiwãmua mija toataꞌtabe”, nare kẽrĩka. 3-4Iꞌsuᵽaka kẽrĩka ãꞌmitiritirã, jĩjimaka judíorãka ĩᵽarimarãre jarika. Toᵽi jĩjimaka nimamaka ĩawaꞌri ᵽan levadura rukeberika nabaꞌaroyikarĩmi Ᵽedroteoka kiñiꞌarũjeka wẽkomaka imariwiꞌiarã kire tayaokaroꞌsi. Ᵽedrote ruꞌrikoreka jia kisurararãkare kĩarĩrĩrũjeka Herodes. Botarakatata imatirã rakaka tatareka botarakarimarã nimaeka. Iꞌsirakamarã imarĩ,

—Kire tuerikareka botarakamaki oyiaja mija oꞌarijarirãñu,== nare kẽrĩka.

Suᵽabaatirã, “Ᵽascua baya oꞌrirãka ᵽoto, ᵽoꞌimajare ĩarãka wãjitãji Ᵽedrote baꞌiaja jaiwãꞌimarĩtirã, kire yijããrũjerãñu”, Herodes ᵽuᵽaka imaeka. 5Suᵽa imarĩ ĩꞌrãrĩmi uᵽakaja jiibaji Ᵽedrore natueka. Sãꞌmitiritirã, kijeyomarã Jesúre yiꞌyurã jimarĩ Tuᵽarãre kiroꞌsi najaiĩjika.

6Torã kimaeka ñami simakoᵽeka Herodete kire jããrũjerũkirĩmi. Mia, wẽkomaka imariwiꞌiarã ĩꞌᵽarã surararãka kire tuerimaja watoᵽekarã ĩꞌᵽamiji ᵽerumijiaᵽi ᵽiꞌᵽekaki kikãrĩᵽañaeka. Ĩarĩrĩtiyarũkirõꞌõ simamaka aᵽerã surararãka koᵽerekarã tuekarã. 7Ikuᵽarõꞌõᵽiji, ángelte kiᵽõꞌirã etaeka. Suᵽabaatirã kimaeka kurara yaaboaeka jãjia jãtaꞌairõꞌõ sajarika. Toᵽi mae, kãrĩka Ᵽedrote imaeka ᵽoto ángelte kire rabetõrõtaeka. Kitũrũeka ᵽoto,

—Wãrũaja mimiꞌmibe,== kire kẽrĩka.

Iꞌsuᵽaka kire kẽrĩka ᵽotojo ᵽerumijiaᵽi kiᵽita arikaka naᵽiꞌᵽekoᵽeka kutueka. 8Iꞌsuᵽaka kijarika ᵽoto,

—Mijariroaka mijããũꞌmube, miũꞌᵽukoꞌaoka,== Ᵽedrote kẽrĩka.

Toᵽi ikuᵽaka kire kẽrĩka ate:

—Mijariroaka ᵽemakatooka mijããbe. Suᵽabaatirã yibeꞌerõꞌõ miꞌtabe,== ángelte kire ãrĩka.

9Iꞌsuᵽaka kire kẽᵽakãꞌã, Ᵽedrote kibeꞌerõꞌõ aꞌrika. Iꞌsuᵽaka baariᵽotojo, “Suᵽa sime”, marĩwãrũberijĩka simaeka kiroꞌsi. “¿Yaje ritaitaka sime jeꞌe?”, ãrĩriᵽotojo, “Makãrãrũñuroka uᵽaka yiroꞌsi sime jeꞌe”, kẽrĩᵽuᵽajoaeka. 10Aꞌririjariji mamarĩkaki surarate tueirõꞌõ oꞌritirã, aᵽikate imarõꞌõoka noꞌrika. Saꞌriwaꞌri jiyia ᵽeruakakaᵽi baaeka wejekuraraka koᵽerekarã neyaeka ᵽoto sõñu uᵽakaja sawiritaeka. Toᵽi ᵽoritirã naꞌririjayukãꞌãja ikuᵽarõꞌõᵽiji ángelte ririwaꞌrika. Iꞌsuᵽaka simamaka ĩꞌrĩkaja Ᵽedrote tuika.

11Toᵽi mae, “Rita sime. Kãrãrũrĩbeyuka yiꞌi. Herodete yire jããkoreka yire kiᵽoaerã ángelte kiᵽũatayu Tuᵽarã. Iꞌsuᵽaka simamaka judíorãka ĩᵽamarã baꞌiaja yire nabaariᵽakatayuareka, yiwaᵽuꞌyu mae”, Ᵽedrore ãrĩᵽuᵽajoaeka.

12-13Toᵽi Juan Marcos ᵽako, María wiꞌiarã keꞌrika. Torã rĩkimarãja Tuᵽarãka jaibaraka ᵽoꞌimajare imaeka. Torã eyatirã, koᵽereka kiᵽoꞌaeka,

—¿Yaje mija ime?== ãrĩwaꞌri. Ĩꞌrãko torã baꞌiraberirõmo, Rode, sãꞌmitiritirã koᵽerekarã koeyarĩkarika, “¿Maki kime?”, ãrĩwaꞌri. 14Sawierã baaeka, Ᵽedro oka koãꞌmitiriwãrũeka, jĩjimaka jariwaꞌri koᵽereka wiebekaja,

—Ᵽẽterã Ᵽedrote imakoyu,== ãrĩwaꞌri torã imaekarãte bojarĩ koꞌrika.

15Iꞌsuᵽaka nare kõᵽakãꞌã,

—Miwejabiyu jeꞌe,== kore narĩka.

Toᵽi,

—Ritama ñañu,== nare kõrĩka.

Iꞌsuᵽaka nare kõᵽakãꞌã,

—Kire ĩarĩrĩka mirãki ángel kime jeꞌe aᵽeyari,== kore narĩka.#12.15 Algunos judíos creían que Dios enviaba ángeles para cuidar a su gente. Creían que el ángel podía aparecer en una forma similar a la persona que cuidaba. Posiblemente la gente en la casa pensaron que un ángel llegó para avisarles que ya habían matado a Pedro.

16Iꞌsuᵽaka narĩkoꞌomakaja,

—¿Yaje mija ime?== ᵽẽteᵽi Ᵽedrote ãrĩrĩkamarika.

Iꞌsuᵽaka simamaka koᵽereka wiwatatirã kire ĩawaꞌri koᵽakaja naᵽuᵽataeka. 17Kiᵽitaka mimatatirã, “Mija okataꞌᵽe ruᵽu”, ãrĩwaꞌri. Toᵽi mae, “Wẽkomaka imariwiꞌiarã ñimakoꞌorõꞌõᵽi ikuᵽaka Tuᵽarãre yire baakoꞌo”, nare kẽrĩka ᵽoto,

—Majeyomarã Jesúre yiꞌyurãte samija bojabe. Suᵽabaatirã iꞌsuᵽakajaoka mija ãᵽe Santiagoreoka,#12.17 Se refiere a Santiago, el hermano de Jesús que era un líder de los creyentes en Jerusalén. El otro Santiago (el apóstol) había muerto. Véase 12.2.== nare kẽrĩka beꞌrõ aᵽerõꞌõrã keꞌrika.

18Kiruꞌrika ñamibikitojo torã ĩarĩrĩrimaja imaekarã surararãkare jimarĩ baꞌiaja ᵽuᵽarika Ᵽedrote imabeᵽakãꞌã ĩatirã. “¿Marãkãꞌã Ᵽedrote baatiyakoꞌo jeꞌe? Baꞌitakajama sime”, narĩka. 19Toᵽi Herodes kire moꞌarũjekaki. Kire natõᵽobeᵽakãꞌã nare kijẽrĩaᵽeatiyaeka imarĩ, marãkãꞌã nayiꞌriwãrũberijĩka simaeka naroꞌsi. Suᵽa imarĩ nare kijããrũjeka mae. Iꞌsuᵽaka nare baatirã Judeaᵽi keꞌrika Cesarearã imarĩ.

Tuᵽarã reyarũjekaki Herodete

20Tirowejeakarãka Sidónwejeakarãka jiamarĩa imawaꞌri boebaka Herodere naka imaeka. Suᵽa imarĩ niñerũ eꞌetoyaokaroꞌsi baꞌarika nare ᵽũatarika kikaꞌiakarãre kijãjibaaeka. Herodes kaꞌiaᵽi nabaꞌarika eꞌetoyurã nimaeka Tirowejeakarãka suᵽabaatirã Sidónwejeakarãkaoka. Suᵽa imarĩ ĩꞌrĩka uᵽaka ᵽuᵽajoawaꞌri Herodes ᵽõꞌirã okajierĩ ᵽoꞌimajare naᵽũataeka. Herodeka najairã baaeka ruᵽu, kijeyomaki imatiyaiki, Blastoka najaika. Jiaᵽi kire najaiẽjeka, “Jia mika imariyaᵽairã nime”, ãrĩwaꞌri Blastore kika jaika. Iꞌsuᵽaka kẽᵽakãꞌã, “Ĩꞌrãrĩmi naka yijairãñu ruᵽu”, Herodere kire ãrĩka. 21Naka kijairã baaekarĩmi, ĩᵽi imarĩ, jía jariroaka ĩᵽarimarãre jããroyika uᵽakakaka kijããeka. Suᵽabaatirã ĩᵽire ruᵽaroyikarõꞌõrã imatirã, torã rẽrĩkarãre kijaika. 22Torãjĩrã mae, sãꞌmitiritirã,

—Mia, majiyiᵽuᵽayeeroyikite#12.22 Un dios. mare jaiyu, ĩmirĩji uᵽakamarĩa kime,== ãrĩwaꞌri ᵽoꞌimajare akasereka jĩjimaka jariwaꞌri.

23Suᵽa nabaayukãꞌãja, Tuᵽarãre ᵽũataekaki ángel, jimarĩ baꞌiaja Herodere kibaaeka. “Iꞌsuᵽaka yireka ãrĩbekaja. Tuᵽarãre mija jiyiᵽuᵽayeebe”, kẽrĩbeririᵽareareka, wãjua Herodere baꞌariataeka.

24Suᵽa simaeka beꞌerõꞌõ Jesúre yiꞌyurãre Jesúrika bojamaka rĩkimabaji sayiꞌyurãre ᵽubueka.

25Iꞌtojĩtejeoka Bernabé, Sauloᵽitiyika Jerusalénkarãre niñerũ ĩjirĩ naꞌrika. Nare ĩjiweatirã Juanre Antioquíarã neꞌewaꞌrika. Juanrejeoka nawãmeyeeka Marcos.

Currently Selected:

Hch 12: TNC

Highlight

Copy