Metiu 15

Batanau ta Kindrei sakalawi sahou ta tubu taha iri

(Mak 7:1-13)

1Na len ari oro Parasi hawe oro lau ta leheya kandriyen tiri Juwis, ruwani Jerusalem ma oro ame atou Jises, ma oro ndremenyani iy i buku doh, 2“Buku sah handru oro lau tam ba-en hamon ta sahou batanau mene iri tubu taha ndrasihidiy ndrame tataha bwena bwe? Buku none oro anya kaimon nyamon oro basikine mine oro bwe.”

3Jises asumon oro i buku doh, “Buku sah handru ado an hamon ta budon ma kandriyen tado amwenen, ya ado ba-en hamon ta batanau ta Kindrei bwe? 4Kindrei anya,

‘Ou a-en bahandra tamam uru tinem, ma ou anuhun sahou turu,’ Eksodus 20:12; Dutoronomi 5:16

ma,

‘Are lau aluhe taman uru tinen, iy kimek ta aliy.’ Eksodus 21:17; Lebitikus 20:9

5Arile, ado Parasi ma ado lau ta leheya kandriyen tiri Juwis tiye i buku doh, ‘I buku none ari ndramak tan luk ta aseben taman uru tinen, arile iy tiye turu, “Luk jo anya kaseben ah na aliy jo ndraleheyani ta edeu i ta Kindrei.”’ 6Ya, ta san doh ado aseken ndramak doh sabudon taman ma samekes mwasin sala tan, ndri-iy. Ta kandriyen doh ado atehei i andri labai sahou ta Kindrei, ya ado bwese-ei eme loken iri kandriyen ado akohok ta tubu aha iri. 7Ado lau ta wasai, amwenen handru i buku none propet Aisaya leheyani kandriyen tado handru kala iy tiye i buku doh,

8‘Iri lau mwan ma badih dah bwese nyarak eme loken na boho iri le, arile ndrine iri ereu len labai. 9Iri asehek sahou batanau ta lau le, arile iri anya, “Idah sahou ta Kindrei.” Idoh ya iri asolom laleyah eme tek.’ ” Aisaya 29:13

Jises asehek nyala lakou amekes oda lau i ndraka-an

(Mak 7:14-23)

10Eme Jises aloh iri lau mwan ma badih a hawen ma iy tiye tiri i buku doh, “Ado kanuhun ma kabudon kamwenen. 11Saba lakou i bolo boho ari ndramak, idoh babwidi iy bandra-i bwe. Arile, lakou bohon asehek, idoh mesekei ndramak andra-i.”

12Hamon ta aliy oro lau ta Jises ame tiye tan i buku doh, “Sebwe ou ndratanam oro Parasi ndranuhun sahou tam ma ndrine oro ndrandra-i labai tam.”

13Eme Jises asumon i buku doh, “Tama udu kandrah tan bilin udu aliy. Ya iri lakou mari ale iy batah bwe-en, idoh kameh iy asoh ma kandron iu. 14Ado sabudon oro lau doh, oro badeh buku lau mada iri bwe, arile oro anya kaleheya san ki ta ndramak ari ja. Arile, buku none ari ndramak madan bwe anya kaleheya san ki ta ndramak ari ja madan bwe, uru ma la-uh kameh taku a bolo lek.”

15Eme Pita tiye ta Jises buku doh, “Winiyan ou asehek keme lewan moson ta sahou sokek ou asehek i tiri lau mwan ma badih nane, ya aso kanuhun.”

16Eme Jises tiye toro, “Buku sah? Ado ale budon tado baleu bwe le? 17Sebwe ado tana ado bwe; saba lakou i bolo boho ndramak, badeh iu ili bolo ndrine ndramak ano ndramak iu akeh ili sareu. 18Arile, saba lakou bohon asehek badeh, asahan ta budon ta ndramak, ya lakou doh mesekei ndramak andra-i. 19Iri lakou mari ale asahan ta budon ta ndramak badeh, lolowa ndramak amekes lomondra ndra-in. Lakou buku none, budon ndra-in, kandriyen ta adai ndramak imek, ya iri kandriyen mari ta karei, ma kandriyen ta amekes tasou andra-i, kandriyen ta bahana, kandriyen ta amekes sahou wasai ereu mada iri lau ta anuhun sahou, ma kandriyen ta amekes sahou ndra-in i bada ndramak ari ja. 20Iri kandriyen mari doh mesekei ndramak andra-i adeh. Arile buku none ndramak aimon nyamon bwena ya iy basikine minen bwe, kandriyen doh bamesekei iy bandra-i bwe.”

Badih badu Kenan atehei budon tan in ta Jises

(Mak 7:24-30)

21Eme Jises ruwani kon doh ma iy iu ili loboho kon tinan Tair ma Saidon. 22Badih ari badu kon Kenan iy ereu mirihik ta kon tinan Tair hawe Saidon, iy eme ma iy aloh i buku doh, “Laban, ou nadu Debit, ou tikisi jo. Malawin ndra-in ndrabwidi naduk badih ndrandra-i labai.” 23Arile Jises basumon iy bwe. Eme oro lau tan ame tiye tan i buku doh, “Iy badih doh arah, arah in hamon ta to eme. Ou suni iy ki-iu.”

24Eme Jises asumon oro i buku doh, “Kindrei suni jo eme ta aseben le iri sipsip badu Isra-el ale ndranyon.”

25Arile iy badih nane eme mirihik ta Jises ma iy atehei bwili ndru-un i andri, ma iy anya, “Laban, jo aso-ok ou sebenei jo handru.”

26Eme Jises asumon iy i buku doh, “Bamwenen ta ari lakou bwe, i buku none iri andrei nyamon tiri nah ma iri akahei i na nadu mwi.”#(15:26) Jises bwalen ta atehei badih doh i andri. Arile, iy aso-ok sahou mwasin ki tiri Isra-el bwena, ya udu hamon iri lau badu leheleh baranuhun. Eme ma, Jises asehek sahou sokek doh. Iri nadu nah leheya buku iri Isra-el, ya iri mwi badeh, leheya iri lau badu leheleh. Arile, Jises ndratou badih doh atehei budon handru in tan, ma Jises sebenei iy.

27Arile badih nane anya, “Laban, ou asehek sahou handru. Arile iri nadu mwi aimon kahu nyamon taku in bahandra sau ta nyamon ta tama iri ale.”

28Jises anuhun sahou doh ma iy asumon i buku doh, “Badih, budon tam boto-on labai. Saba lakou ou aso-ok kameh asahan tam, iy winiyan asahan.” Kala le don nadun badih asahan amwenen ja.

Jises mesekei iri lau solo-an bada iri ndra-in amwenen

29Eme Jises ruwani kon doh ma iy edek iu ili kapa gwa li Galili. Iy ili bwele-e ka-u mandrei ma iy manyah. 30Iri lau solo-an ame hawen. Iri atiye iri lau kati iri ndra-in ma iri lau mada iri ndra-in ma ndruwi iri hewon, ma boho iri bwe, ma iri lau solo-an bada iri ndra-in. Iri atehei iri an mirihik ta kati Jises. Ma iy mesekei iri asahan amwenen. 31Eme iri lau mwan ma badih atou iri lau boho iri bwe asehek sahou, ma iri ndruwi iri hewon asahan amwenen, ma iri lau kati iri ndra-in adek ja, ma iri lau mada iri bwe atou kon, ma iri abudon solo-an. Eme iri atudun nyara Kindrei badu Isra-el i loken.

Jises edeu nyamon niri lau ma hawa (4,000)

(Mak 8:1-10)

32Jises luhi oro lau tan ma iy tiye toro i buku doh, “Jo tikisi iri lau dah. Iri an hawek ndra winiya len taloh ai, ma niri nyamon ta aimon bwe. Jo bwalek iri amak son ya jo kasuni iri ka-au. Kora-on mada iri kabuluw ya iri kataku kareu san.”

33Eme oro lau tan tiye anya, “Kon dah lau aliy bwe. Idah kameh to kakohok jabi ramen solo-an badu heh, ya to kanyohonei iri lau solo-an an kon lomale an dah?”

34Eme Jises ndremenyani oro, “Nado jabi ramen sabe udu aliy?”

Eme oro anya, “Ndro taloh le, ma hawe iri nadu ni rayah bwisik.”

35Eme ya Jises tiye tiri lau mwan ma badih kamanyah kado andri bada munyak. 36Eme iy andrei jabi ramen ma ndro taloh nane, ma nadu ni, ma iy edeu wurah i ta Kindrei. Ano iy boso-ei, ma atehei ili mine oro lau tan, ma oro lau tan adeu ili niri lau. 37Lau mari aimon ma ndrine iri idih. Ano iri tukumwi tikibwah asahan bwak ma ndro taloh. 38Iri lau aimon nyamon doh, kane iri badeh, ma hawa (4,000), idoh bondrek iri badih ma nah bwe. 39Eme Jises tiye iri mwan ma badih au. Ano iy sandroh i bolo ndron, ya oro ala loboho Magadan.

Currently Selected:

Metiu 15: lidNTpo

Highlight

Copy