Jenesis 20

Abraham Hawe Abimelek

1Ano badeh Abraham ruwani ndrahunen bwena, eme iy edek ili loboho Negeb ma manyah udu ndrokowa Kades hawe Sur. Iy udu Gerar badeh luwen bwe, 2eme badeh Abraham tiye anya Sara badeh nadu tinen. Ano kabin badu Gerar nyaran Abimelek atehei sahou ili andrei Sara ili.

3Arile Kindrei asahan ta Abimelek na ameh na ben ma tiye i tan, “Ou kameh amak tasah ou andrei badih tasou badeh.”

4Eme badeh Abimelek bala mirihik tan bwe, eme iy tiye, “Laban, jo badeh mwasin labai, ou kameh adai jo ma iri lau tek ai? 5Abraham tiye badeh anya iy nadu tinen, eme Sara ale tiye i buku aliy. Jo mwesekei doh badeh budon tek bandra-i bwe ma jo bamwesekei ari lakou ndra-in bwe.”

6Eme Kindrei tiye i tan na ameh, “Jo tanan, ou badeh budon tam bandra-i bwe, eme jo badeh bamwesekei ou bamwekes lomondra ndra-in bame badak bwe, ma bamwesekei ou batawi iy bwe. 7Ya eme na le dan, badeh ou atehei udun ki hamon. Tasah iy badeh ndramak ta boho Kindrei iy kameh amwekes salom i tam, i buku bwe, jo tiye tanan tam ou kameh amak ma hawe iri lau tam mari.”

8Eme na ma ndraben badeh iy luhi iri lau ta lahou badu bolo asiu tan ame, eme badeh iy asehek nyala iri. Eme badeh iri anoh. 9Ano badeh Abimelek luhi Abraham eme bolon ma tiye, “Ou amwekes sasah eme taso dah? Jo mwesekei madam andra-i ta sasah handru, eme ya ou adeu maha tinan eme la-u aso ma tondrok tek dah? Lakou ou amwekes dah badeh ou winiyan bamwekes bame tek bwe ai.” 10Ano badeh Abimelek ndremenya Abraham, “Saba katin handru ou badeh amwekes kandriyen dah?”

11Eme Abraham anya eh, “Jo abudon le i buku doh, iri lau badu kon dah banoh Kindrei bwe, eme i dah kameh iri kadai jo, tasah na uduk. 12Arile iy badeh nadu tine handru. Iy badeh nadu tama arile, nadun ta tine ta tewedeu jo bwe, eme badeh jo sudi iy. 13Eme Kindrei tiye jo eme len ta munyak, eme kon leheleh, eme badeh jo tiye i tan ta iy badeh kaleheya mwasin tan hawe seken tan udu tek handru ki tiri kon mari, ta jo badeh nadu tinen.”

14Ano badeh Abimelek eme badeh kuhi katin haka sipsip ma bulumakau ma hawe iri bonyo-ou mwan ma badih atehei i ta Abraham, ma iy atehei udun Sara i hamon. 15Eme badeh Abimelek tiye i tan, “Munyak tek udu madam kede-eh, ou manyah ado aliy na seken tam.”

16Ya i ta Sara badeh iy tiye i buku doh, “Jo kameh edeu ta nadu tinem kameh wa-iralou hayen nyikilikin amwekes na silba. Ta leheya udu mada iri lau tam mari, ta ou badeh bamwekes ari kandriyen ndra-in bwe, eme iri lau mari katanan ou badeh bamwekes ari lakou bandra-i bwe.”

17Ano badeh Abraham amwekes salom i ta Kindrei, ma Kindrei mwesekei Abimelek ma hawe udun hawe oro bonyo-ou badih tan badeh ato-ou nah ja. 18Tasah ta udu Abraham Sara le mene, Kindrei mene sokei lakou ta amwekes nah tiri lau mari badu baha tondrok ta Abimelek.

Currently Selected:

Jenesis 20: lidNTpo

Highlight

Copy