Maki 3

Ayaʼmo kalage kiʼniya vekaeʼmo huʼniya gemae

(Mt 12:9-14; Lu 6:6-11)

1Yesuʼa halate Yu vayaʼai mono nopiʼmo uno haino maiʼnigeno ayaʼmo kalage kiʼniya vekamo ani mono nopiʼmo maiʼniye. 2Mago vayaʼamogimo agoti huʼa atesayafeʼmo ageʼa maiʼneʼapaeʼmo, Sapati afinaʼmo alino api aeno atesifigeta agegaune, huʼa huʼnae. 3Yesuʼa ayaʼmo kalage kiʼniya vekaeʼmo hunoʼaeʼmo, he tika manile eno, huno hutenoʼaeʼmo 4#Lu 14:3apakaefeʼmo hunoʼaeʼmo, Sapati afinaʼmo keʼaepa gemo akame hisunafeʼmo na agufa kavaʼmo hugune. Sapati afinaʼmo alagepa kavaʼmo hisupi hosu kavaʼmo hugune. Vayaʼmo hapaegaupi hapa maegaune, huno apafi geʼnigeʼapaeʼmo ge osuʼa afaʼa maiʼnae. 5#Yo 11:33Yesuʼa aulu hapaeno apakelinuneno huteno aipamo leno apateʼniye. Lokiya apaipa vayaʼmo maiʼnayaʼmofeʼmo aipamoʼmo kana huʼniye. Agaemo hunoʼaeʼmo, kayaʼmo aeka hayo huvo, huno huʼnigeno aeno hayo huʼnigeno ayaʼmo alino api aino ateʼnigeno alu ayakana huno haneʼniye. 6#Mt 22:15-16Falasi mono vayaʼmogi ani kavaʼmo ageteʼapaeʼmo mono nopatiʼmo emi eʼa malage huʼa Helotiʼa akame huʼnaya vayaʼeʼmo aliʼa anupa huʼa maiʼneʼa Yesuʼa amagisayafeʼmo ge huge afige huʼa maiʼnae.

Muki vayaʼmo ani kotuteʼmo aliʼa anupa huʼa maiʼnaya gemae

(Lu 6:17-19)

7-8 # Mt 4:25 Yesuʼe geʼamo neʼafiya vayaʼeʼmo apataleʼa Galeliya kotega ani kotutegamo neʼvageʼapaeʼmo Galeliya kotegatiʼmo asole vayaʼmo apakame huʼa uʼnae. Asole vayaʼmogimo huʼniya kavafeʼmo ava gemo afiteʼapaeʼmo Yesutegamo Yutiya kotegati ege Yulusalemu taonifatiʼmo ege Itomiya haopaletiʼmo ege Yoneni aniʼmo mugagayaga faliga kotegatiʼmo ege Taiya taoni haopalegatiʼmo ege Saitoni taoni haopalegatiʼmo ege huʼnae. 9-10#Mt 14:36; Mk 4:1; Lu 5:1-3Asole vayaʼmo hogoteno ago alino hapageno apateʼniyaʼmofeʼmo kaita hapauʼniya vayaʼmo eʼa agufaleʼmo ame alisayafeʼmo eʼa faiʼa kili paeteʼa maleʼa apaliʼnae. Maleʼa apaliʼnayaʼmofeʼmo geʼamo neʼafiya vayaʼaifeʼmo hunoʼaeʼmo, maleʼa oʼnapalisayafeʼmo mago aise sipimo alita alo huta nateyo, huno hapa paiʼniye. 11#Lu 4:41Hosu apaune vayaʼmogi ageteʼapaeʼmo asagauʼa aiteʼa alopa gefatiʼmo huʼapaeʼmo, Goti mafaʼneʼamo maiʼnane, huʼa huʼnae. 12#Mk 1:34Yesuʼa hosu apaune vayaʼaifeʼmo lokiya gefatiʼmo hunoʼaeʼmo, ina laʼnamo maiʼnofi hutapa hapa opaiyo, huno hapa paiʼniye.

Yesuʼa apa vayaʼamo lekana paino apateʼniya gemae

(Mt 10:1-4; Lu 6:12-16)

13Yesuʼa aise avefiʼmo uno haino maiʼnenoʼaeʼmo hauʼniya vayaʼaifeʼmo ge huʼnigeʼa agaetegamo eʼnae. 14-15Agaemo tuolofuʼa vayapatiʼmo agaeʼeʼmo magokepi lokaeʼa maige alino apatesigeʼa uʼa Goti geʼamo aeʼa hakalo huʼa hapa paige kaita hapauʼnisiya vayaʼaina aliʼa hapageʼa apatege himamuʼaletiʼmo hosu apaune vayaʼaina aliʼa hapa faiʼa apatalege hisayafeʼmo lekana paino apateʼniye. 16#Yo 1:42Lekana paino apateʼniya vayaʼai apakiʼapimo haneʼniye. Yesuʼa Saimonifeʼmo Pitaʼae huno agi ateʼniya vekagi 17#Lu 9:54Sepeti mafaʼnelaʼmo Yemisiʼe aganaʼamo Yoniʼefeʼmo Yesuʼa Moʼanasesi vekalane huno anaki anateʼniya anakimo aepaʼamo hakalu nehiya kava huno lokiya vekalanagi 18-19Etaluʼagi Filipiʼagi Matolomiyuʼagi Matiyuʼagi Tomasiʼagi Afiyasi mafaʼnemo Yemisiʼagi Taʼniyasiʼagi Saimoni Selotiʼagi Yutasi Isakaliyotiʼa Yesu kutulu yaʼmo neʼniya vekagi huʼa maiʼnae.

Yesu aipafiʼmo Sataniʼmo maiʼniye, huʼa huʼnaya gemae

(Mt 12:24-32; Lu 11:14-23; 12:10)

20Yesuʼa halate noʼalega uno maiʼnigeʼapaeʼmo asole vayaʼmo eʼa aliʼa anupa huʼa maiʼnagenoʼaeʼmo Yesuʼe geʼamo neʼafiya vayaʼeʼmo neʼyaʼmo nesaya kanaʼapimo ohaneʼniye. 21#Yo 10:20Yesu vayaʼamogimo ani kavafeʼmo ava gemo afiteʼapaeʼmo, negi kavaʼmo nehiye, huʼa huteʼa avalesayafeʼmo uʼnae. 22#Mt 9:34; 10:25Keʼaepa gemo aliʼa apaya neʼmalaya vayaʼmo Yulusalemu taonifatiʼmo eʼapaeʼmo, Mielisemuliʼa aipafiʼmo maiʼniye. Hosu apaune vayaʼaiteʼmo yagaino neʼapateya vekamo himamuʼaletiʼmo hosu apaune vayaʼmo vayaʼai apaipafatiʼmo alino hapafaino neʼapatale, huʼa huʼnae. 23Yesuʼa hunoʼaeʼmo, eyo, huno ge huʼnigeʼa eʼnagenoʼaeʼmo aeno kalafefa gemo huno hapa painoʼaeʼmo, haiya kava huno Sataniʼa agaiʼamo alino ha faino atalegaiye. 24Magoke vayapatiʼmo aliʼa fako huʼa apakaiʼapiʼeʼmo kamemo hisayana ani vayaʼmo oʼmaigae. 25Ina kava huʼa magoke afamo anagaʼmogimo aliʼa fako huʼa kaveta hisayana magokepi alagepa huʼa lokaeʼa oʼmaigae. 26Ina kava huno Sataniʼa yagaino apateʼniya vayaʼaʼeʼmo kame huno apatesiyana muki vayaʼaiteʼmo yagaino apateʼniya himamuʼamo hano hugiye. 27No aepa vekamo lokiya vekamo maiʼnisiyana mago vekamoʼmo eno atafauno nofi kino oʼatesiyana noʼafatiʼmo muki kagemi yaʼamo afaʼa uno haino oʼaligiye. Hogoteno no aepa neʼmo atafauno nofi kino atesiyaʼmoʼmo afaʼa uno haino noʼafatiʼmo muki yaʼamo aligiye. 28Lama gemo lapa nepauve, huno, Gotiʼa muki hosu kavaʼapiʼe agaefeʼmo huʼa faipa huʼa neʼataya geʼapiʼeʼmo afaʼa alino atalegaiye. 29Alino atalegaiyaʼmonanafa aote Aunemeʼaeʼmo huʼa faipa huʼa neʼatesaya vayaʼai hosu kavaʼapimo alagi alino oʼatalesigeno huʼa faipa huʼa neʼataya gemo anonaʼapimo afaʼa hanege hanege huno hanegaiye, huno hapa paiʼniye. 30Apakaemo hosu aune vekamo aipafiʼmo maiʼniye, huʼa huʼnayaʼmofeʼmo Yesuʼa ani gemo huno hapa paiʼniye.

Yesu itaʼamoʼe aganaʼamogiʼefeʼmo huʼniya gemae

(Mt 12:46-50; Lu 8:19-21)

31 # Mk 6:3; Yo 2:12; Ap 1:14 Ani afinaʼmo Yesu itaʼamoʼe aganaʼamogiʼeʼmo eʼa kumategamo he tiʼa maiʼneʼapaeʼmo mago vekamo aliʼa ateʼnageno nopiʼmo uno haiʼniye. 32Asole vayaʼmogimo faiʼa ku aiʼa ateʼa maiʼneʼapaeʼmo, itakamoʼe kaganakamogiʼeʼmo kagaemo kagesayafeʼmo eʼa kumatega maiʼnae, huʼa ha paiʼnagenoʼaeʼmo, 33-34itaʼnimoʼe naganaʼnimogiʼeʼmo haiyate eʼa maiʼnae, huno huteno aulu hapaelinuneno huno neʼapakenoʼaeʼmo, itaʼnimogiʼe naganaʼnimogiʼeʼmo manifiʼmo maiʼnae. 35Gotiʼa hauʼniya kavaʼageʼmo nehaya vayaʼmo naganaʼnimogi maige nasaʼnimogi maige itaʼnimogimo maige huʼnae, huno hapa paiʼniye.

Currently Selected:

Maki 3: kyg2013

Highlight

Copy