Matiyu 9

Yesuʼa mago kanage kanaga osuno neʼmaiya vekamo alino he tino ateʼniya gemae

(Mk 2:1-12; Lu 5:17-26)

1 # Mt 4:13 Yesuʼa sipifiʼmo uno haino maiteno aino atagi neno agaiʼa taonifilagamo uno avaʼyi huʼniye. 2Mago vayaʼmogimo kanage kanaga osuno yakaikonaʼaleʼmo havaeno neʼmaiya vekamo avaleliʼeʼa Yesu haopaleʼmo ateʼnae. Yesuʼa agaiʼaeʼmo apakesamo afiʼa fatago huʼnaya kavaʼapimo apaketenoʼaeʼmo kanage kanaga osuno neʼmaiya vekaeʼmo ha painoʼaeʼmo, mafaʼneʼnimogae, huno, hosu kavakamo aliʼna ataleʼnovanagi koli osuka kaipamoʼmo falu hino, huno ha paiʼniye. 3Keʼaepa gemo avoʼmo kaeʼa aliʼa apaya neʼmalaya vayaʼmogimo huʼapaeʼmo, Ani vekamoʼmo Gotifeʼmo huno faipa huno ateʼniye, huʼa apaipafi apakesamo afiʼnae. 4#Mt 12:25; Lu 9:47; Yo 2:25Yesuʼa apaipafi apakesamo afiʼnaya kavaʼapimo apaketenoʼaeʼmo, na kava higetapaeʼmo hosu lapaipa lapakesamo neʼafiye. 5Nagaemo huʼnaeʼmo, hosu kavakamo aliʼna ataleʼnove, huʼna huʼnovanageʼna hemenimo he tika umenitata huvo, huʼna hisuvana haiya gemoʼmo lokiyaʼamo ohaneʼniye. 6#Yo 17:2; 5:8Vemo mafaʼnemoʼmo ma mopafi maiʼnaya vayaʼai hosu kavaʼapimo alino atalesiya himamuʼamo haneʼniyanageno alino lapave ligiye, huno hapa paiteno kanage kanaga osuno neʼmaiya vekaeʼmo, he tika yakaikonakamo aliteka nokalegamo uvo, huno ha paiʼnigeno 7he tino noʼalegamo uʼniye. 8Asole vayaʼmogimo ani kavaʼmo ageteʼapaeʼmo lusi kava huʼa hapau aiteʼa Gotiʼa ani agufa himamuʼamo vayaʼmo alino neʼapamiyaʼmofeʼmo agiʼaleʼmo aliʼa asaga huʼa ateʼnae.

Matiyufeʼmo ge huʼniya gemae

(Mk 2:13-17; Lu 5:27-32)

9Yesuʼa ani haopalegatiʼmo ataleno uno ageyana takesi moni neʼaliya vekamo agiʼamo Matiyuʼa takesi monimo neʼaliya nopiʼmo fai maiʼnigeno ageʼniye. Agetenoʼaeʼmo, atalekeka nakame huvo, huno ha paiʼnigeno ataleno eno akame huno uʼniye.

10Yesuʼa uno haino Matiyu nopiʼmo fai maiʼnigeʼapaeʼmo asole vayaʼmo takesi moni neʼaliya vayaʼe hosu vayane, huʼa nehaya vayaʼmogiʼeʼmo eʼa agaeʼe geʼamo neʼafiya vayaʼeʼmo magokepi lokaeʼa maiʼneʼa neʼyaʼmo neʼnae. 11#Lu 15:2; 19:7Falasi mono vayaʼmogi apaketeʼapaeʼmo geʼamo neʼafiya vayaʼaifeʼmo, Na kava higenoʼaeʼmo tisa vekatapimoʼmo takesi moni neʼaliya vayaʼe hosu vayaʼeʼmo magokepi lokaeno maiʼneno neʼyaʼmo neʼne, huʼa ge huʼa apafi geʼnae.

12Yesuʼa ani gemo afitenoʼaeʼmo, lota vayaʼmogimo kaita ohapauʼniya vayaʼaitegamo uʼa aliʼyaʼmo noʼalifa kaita hapauʼniya vayaʼaitegakeʼmo uʼa aliʼyaʼmo neʼaliye. 13#Mt 12:7; Hos 6:6Goti mukufi gemoʼmo hunoʼaeʼmo, Afumo heʼa ofalini namisayafeʼmo oʼnahauʼniyaʼmonanafa hapau huʼa apatesayafekeʼmo nahauʼniye, huno avoʼmo kae maleʼniya gemo aepaʼamo afisayafeʼmo uta kahauya hutapa ageyo. Nagaemo fatago vayaʼaifeʼmo keya aeʼna ge hisuvafeʼmo emiʼnoʼmeʼnofa hosu vayaʼaifeʼmo keya aeʼna ge hisugeʼa eʼa apaipamo aliʼa afe lesayafekeʼmo emineʼnove, huno hapa paiʼniye.

Neʼyaʼmo mo nesiya kavafeʼmo huʼniya gemae

(Mk 2:18-22; Lu 5:33-39)

14 # Lu 18:12 Ani afinaʼmo Yoni geʼamo neʼafiya vayaʼmogi eʼa huʼapaeʼmo, lagaeʼe Falasi mono vayaʼeʼmo muki afinaʼmo neʼyaʼmo oʼneta mo nesunaʼmonanafa na kava higeʼapaeʼmo gekamo neʼafiya vayaʼmogi neʼyaʼmo mo nosiye, huʼa ge huʼa afi geʼnae. 15#Yo 3:29Yesuʼa hapa painoʼaeʼmo, saufa aʼmo aliʼniya vekaʼe ao vayaʼaʼeʼmo magokepi lokaeʼa maiʼneʼapaeʼmo yulagefa noʼaiyaʼmonanafa henagaʼamo mago vayaʼmogimo aʼmo aliʼniya vekamo apakaetegatiʼmo avaleliʼa visageʼapaeʼmo neʼyaʼmo oʼneʼa mo sigae.

16 # Yo 1:17 Atafa lavolavomo apake neʼaigeʼapaeʼmo saufa lavolavomo sese osuʼnaya lavolavoletiʼmo lagauʼa nofakaniye. Saufa lavolavoletiʼmo lagauʼa fakaniteʼa sese nehisagenoʼaeʼmo atupaʼamoʼmo aino vayu hisigeno atalagauno alino avala aigiye. 17Ani kava huʼa vayaʼmogi saufa nofi alagafati aniʼmo aliʼa afu agufa keʼmo atafa kepiʼmo nolakiye. Lakisayana atafa keʼmo haneʼniyaʼmofeʼmo aeno apalo atino aniʼmo asagauno aisigeno keʼamo hosugiye. Saufa afu agufa kepiʼmo saufa aniʼmo lakisagenoʼaeʼmo saufa aniʼmoʼa saufa kepiʼmo alagepa huno hanegaiye, huno hapa paiʼniye.

Kaita hauʼniya a kanomo alino hageno ateteno faliʼniya aʼmafaʼnemo alino he tino ateʼniya gemae

(Mk 5:22-43; Lu 8:41-56)

18Ani gemo hapa nepaigenoʼaeʼmo Yu monoteʼmo neʼyagaiya vekamoʼmo eno aiyafiʼmo ape huno aleʼya faino maiʼnenoʼaeʼmo, aʼmafaʼneʼnimo hemenimo ago faliʼnigeʼna eʼnogi uka agufaleʼmo kayaʼmo malegeno he tino, huno ha paiʼnigeno 19Yesuʼa he tino uʼnigeʼa geʼamo neʼafiya vayaʼeʼmo magokepi lokaeʼa uʼnae.

20Neʼvagenoʼaeʼmo mago a kanomo tuolofuʼa kafuga aiguʼyaʼmo hauge hauge huno maiʼniya a kanomoʼmo Yesu akamelegatiʼmo eno yatala kukena yaʼamo atupaleʼmo ayatetiʼmo ame aliʼniye. 21#Mt 14:36Agaemo hunoʼaeʼmo, kukena yaʼalekeʼmo ame alisugenoʼaekeʼmo aiguʼyaʼnimo nahagegaiye, huno aipafiʼmo agesamo afiʼniye. 22Yesuʼa aino afe leno agetenoʼaeʼmo, Aʼmafaʼneʼnimogae, huno, kagesamo afika fatago nehana kavakamoʼmo alino kahageno kateʼniyanagi koli osuka afaʼa maiyo, huno ha nepaigenoʼaeʼmo aiguʼyaʼamo malage huno hageʼniye.

23Yesuʼa uno yagaino neʼapateya vekamo nopiʼmo uno haino apakeyana feliopa kepatiʼmo nehaya agufa apakemo aige asole vayaʼmogimo kagegage huge huʼa maiʼnageno apaketenoʼaeʼmo, 24#Yo 11:11Ataletapa kumatega uta lamiyo. Mani aʼmafaʼnemo ofaliʼnifa afaʼa au kaleno maiʼniye, huno hapa paiʼnigeʼapaeʼmo huʼa faipa huʼa ateteʼa kigi huʼa ateʼnae. 25Muki vayaʼamo he tiʼa kumatega uʼa lamiʼnagenoʼaeʼmo Yesuʼa ani aʼmafaʼnemo maleʼnaya nopiʼmo uno haino ayateʼmo alino he tino ateʼniye. 26Ani kavaʼmo huʼniya ava gemo muki haopalegamo aino atagu faeno uneno huʼniye.

Yesuʼa anaulagamo ali huʼniya vekalaʼmo alino ayakeno anateʼniya gemae

27 # Mt 20:29-34 Yesuʼa ani haopalegatiʼmo ataleno neʼvigeʼanaeʼmo lole vekalaʼmo anaulagamo ali huʼniya vekalaʼmo akame huʼana neʼuʼanaeʼmo, Nevini aginagomo, huʼana, Kahau huka laʼato, huʼana hume hume eʼnaʼae.

28Yesuʼa nopiʼmo uno haino maiʼnigeʼana eʼana maiʼnaʼageno hana painoʼaeʼmo nagaemo lanaulagamo afaʼa aliʼna ayakegauve, hutana lanakesamo afitana fatago nehaʼafiye, huno ge huno anafi geʼnigeʼanaeʼmo, He, Ala kava nene, huʼana huʼnaʼagenoʼaeʼmo 29#Mt 8:13anaulagaleʼmo ayaʼmo maleʼnenoʼaeʼmo, Ani kavafeʼmo lanakesamo afitana fatago huʼnaʼaʼmofeʼmo mani kavaʼmo lanakaeteʼmo afole aigiye, huno hana paiʼnigeno anaulagalaʼmo ayakeʼnigeʼana ageʼana ayakeʼnaʼae. 30Yesuʼa lokiya gemo huno hana painoʼaeʼmo, mago vayaʼaifeʼmo hapa opaiʼao, huno hana paiʼniyaʼmonanafa 31uʼana ava gemo aeʼana hakalo huʼana hapa paiʼnaʼageno muki ani haopalegamo aino atagu faeno uneno huʼniye.

Agemo noʼaiya vekaeʼmo, Kagemo aiyo, huno huʼnigeno agemo aiʼniya gemae

32Lole vekalaʼmo ataleʼana neʼvaʼageʼapaeʼmo mago vayaʼmogi hosu aune vekamo aipafiʼmo maiʼnigeno agemo oʼaino neʼmaiya vekamo Yesutegamo avaleliʼeʼa ateʼnae. 33#Mk 2:12Yesuʼa hosu aune vekamo alino hafaino ataleʼnigenoʼaeʼmo agemo oʼaino neʼmaiya vekamoʼmo aepa faino agemo aiʼnigeʼapaeʼmo aliʼa anupa huʼa maiʼnaya vayaʼmogi ageteʼa hapau aiteʼapaeʼmo, Hogoteno Isaleli kotegamo ani agufa kavaʼmo afole oʼaiʼniye, huʼa huʼnae.

34 # Mt 12:24; Mk 3:22; Lu 11:15 Huʼnayaʼmonanafa Falasi mono vayaʼmogi huʼapaeʼmo, hosu apaune vayaʼaiteʼmo yagaino neʼapateya vekamo himamuʼaletiʼmo hosu apaune vayaʼmo alino hapafaino neʼatale, huʼa huʼnae.

Yesuʼa hau huno apateʼniya gemae

35 # Mt 4:23; Mk 1:39 Yesuʼa muki alopa taonifiʼe aise taonifiʼeʼmo uneno huno Yu vayaʼai mono nopiʼmo alino apaya malege Gotiʼa yagaino neʼapateya kavafeʼmo alagepa faigoko gemo aeno hakalo huno hapa paige muki alu kaita alu kaitaʼmo hapauʼniya vayaʼmo alino hapageno apatege huno uneno huno maiʼniye. 36#Mt 14:14; Nap 27:17; 1 Kin 22:17; Iyi 34:5Agaemo asole vayaʼmo apaketenoʼaeʼmo aipafiʼmo hau huno apateʼniye. Sipisipileʼmo yagaino neʼapateya vekamo ago apataleno uʼnigeʼa sipisipi afumo atagu faeʼa uʼeʼa huʼa maiʼnayana hapa maesiya vekamo oʼmaiʼnigeʼa maiʼnaya kava huʼa asole vayaʼmo maiʼnageno apaketenoʼaeʼmo hau huno apateʼniye. 37#Sak 10:2; Mk 6:34; Lu 10:2Inagi geʼamo neʼafiya vayaʼaifeʼmo, hoyafiʼmo lusi neʼyaʼmo afu leʼniyaʼmonanafa alisaya vayaʼmo aiseʼamo maiʼnae. 38Ago afu leʼniyaʼmofeʼmo hoyamo afoʼamofeʼmo nunumuʼmo higenoʼao hoyaʼafatiʼmo neʼyaʼmo alisaya vayaʼmo alino apatesigeʼa ugae, huno hapa paiʼniye.

Currently Selected:

Matiyu 9: kyg2013

Highlight

Copy