Luki 14

Yesuʼa agufamo ko siʼniya vekamo alino hageno ateʼniya gemae

1 # Lu 11:37 Mago Sapati afinaʼmo Yesuʼa Falasi vekamo yagaino neʼapateya vekamo nopiʼmo neʼyaʼmo nesiyafeʼmo uno haino maiʼnigeʼapaeʼmo yagaiʼa maiʼneʼa aulu heʼa ageʼa maiʼnae. 2Inagi mago vekamo agufamo ko siʼniya vekamo Yesu haopaleʼmo maiʼniye. 3#Lu 6:9Yesuʼa ani vekamo agetenoʼaeʼmo keʼaepa gemo neʼafiya vayaʼe Falasi vayaʼefeʼmo hunoʼaeʼmo, Sapati afinaʼmo aliʼa hageʼa neʼapataya kavafeʼmo keʼaepa gemoʼmo hunoʼaeʼmo, hiyo huno huʼnifi osiyo, huno huʼniye, huno ge huno apafi geʼnigeʼapaeʼmo 4ge osuʼa afaʼa maiʼnae. Agaemo alino hageno atetenoʼaeʼmo, afaʼa uvo, huno ha paitenoʼaeʼmo, 5#Mt 12:11; Lu 13:15lapakaepatiʼmo haiya vekamoʼmo mafaʼneʼamofi pulumakaʼamofi huno sapati afinaʼmo kelifiʼmo asagauno aisigenoʼaeʼmo malage huno kelifatiʼmo uno lamino oʼavalegaifiye, huno ge huno apafi geʼnigeʼapaeʼmo 6#Mt 22:46geʼaleʼmo afaʼa aeʼa atagaina huʼa ha opaiʼnae.

Lusi yagitamo huʼa neʼnaya yateʼmo maiʼneno hapa paiʼniya gemae

7 # Mt 23:6 Yesuʼa apakeyana vayaʼmo eʼa ala apaki vayaʼmo neʼmaiya siyateʼmo fai maiʼnageno apaketenoʼaeʼmo aeno kalafefa gemo huno hapa painoʼaeʼmo, 8#Mai 25:6-7aʼmo lagaugefeʼmo lusi yagita hutenoʼaeʼmo ge hisigeta etapaeʼmo ala apaki vayaʼmo neʼmaiya yateʼmo uta haita oʼmaiyo. Fiku yanageno mago aeno kaga seʼnisiya vekamo esigenoʼaeʼmo 9lanakaefeʼmo ge huʼniya vekamoʼmo eno kaha painoʼaeʼmo, he tika ugenoʼao ani vekamo maino, huno hisigekaeʼmo lusi kava huno kavagage hisigeka uka lamika henaga siyateʼmo fai maigane. 10Hugiyaʼmofeʼmo ge hisigeka ukaeʼmo henaga siyateʼmo uka haika maiyo. Kagaefeʼmo ge huʼniya vekamoʼmo enoʼaeʼmo, veʼnimo, huno, ala apaki vayaʼmo neʼmaiya siyateʼmo uka haika fai maiyo, huno kaha paisigekaeʼmo kagaeʼeʼmo magokepi lokaeʼa maiʼnaya vayaʼmogi apaulagaleʼmo ala kagikamo aligane. 11#Mt 23:12; Lu 18:14Muki vayaʼmogimo apakaiʼapi apakiʼapileʼmo aliʼa asaga nehisayaʼmoʼmo Gotiʼa apakiʼapileʼmo alino afepi apategaiye. Mago vayaʼmogimo apakaiʼapi apakiʼapileʼmo aliʼa afepi neʼatesayaʼmoʼmo Gotiʼa apakiʼapileʼmo alino asaga huno apategaiye, huno hapa paiʼniye. 12Agaemo agaefeʼmo ge huʼniya vekaeʼmo hunoʼaeʼmo, yagita hisana afinaʼmo kao vayanagi konaga vayakagi nofi vayakagi nokale kagemi yaʼapimo haneʼniya vayanagi huka ge osuvo. Fiku yanageʼa yagita hisaya afinaʼmo kagaefeʼmo eno, huʼa ge hisageka visanageʼapaeʼmo anonakalefeʼmo kamigae. 13#Loa 14:29Yagita nehana afinaʼmo kagemi yaʼapimo ohaneʼnisiya vayanagi apakufamo hosuʼnisiya vayanagi apaiyamo hosuʼnisiya vayanagi apaulagamo ali huʼnisiya vayaʼaifenagi huka ge huvo. 14#Yo 5:29Anonakalefeʼmo afaʼa okamigayaʼmofeʼmo Gotiʼa alino auleno kategaiye. Gotiʼa fatago vayaʼmo kanolufatiʼmo he tisaya afinaʼmo anonakalefeʼmo kamigiyaʼmofeʼmae, huno hapa paiʼniye.

Alopa neʼyafeʼmo aeno kalafefa gemo huʼniya gemae

(Mt 22:1-10)

15 # Lu 13:29 Agaeʼeʼmo hiʼyalemuteʼmo fai maiʼneno neʼyaʼmo neʼniya vekamoʼmo ani gemo afitenoʼaeʼmo, Gotiʼa yagaino neʼapateya koteʼmo uʼa haiʼa maiʼneʼa neʼyaʼmo neʼa maisaya vayaʼmo aulena vayaʼmo maigae, huno hapa paiʼniya geeʼmo loka huʼnigeno 16Yesuʼa hunoʼaeʼmo, mago vekamoʼmo lusi yagita hutenoʼaeʼmo asole vayaʼaifeʼmo ge huʼniye. 17Neʼyaʼmo ago kae maleteno apa vekaeʼmo hunoʼaeʼmo, ge huʼnova vayaʼaitegamo ukaeʼmo, muki neʼyaʼmo ago kae maleʼniyanagi eyo, huka hapa paiyo, huno ha paiteno alino ateʼnigeno uno ani gemo huno hapa paiʼniye. 18Muki vayaʼamogi magoke agufa geʼageʼmo huʼapaeʼmo, visuna afinatimo ohaneʼniyanageta afaʼa oʼugune, huʼa huʼnae. Mago vekamoʼmo hunoʼaeʼmo, mago mopamo miya fai maleʼnovanageʼna uʼna agegauvaʼmofeʼmo kahao ke hovanageʼna oʼuguve, huno ha paiʼnigeno 19mago vekamoʼmo hunoʼaeʼmo, teniʼa pulumakamo aliʼyaʼmo neʼaliya pulumakamo miya fai maleʼnovanageʼna aliʼyaʼmo kanale huʼa neʼalifi noʼalifi huʼna uʼna agegauvaʼmofeʼmo kahao ke hovanageʼna afaʼa oʼuguve, huno ha paiʼnigeno 20#1 Ko 7:33mago vekamoʼmo hunoʼaeʼmo, nagaemo hemenitomo a aliʼnovanageʼna afaʼa oʼuguve, huno ha paiʼniye. 21Aliʼyaʼamo neʼaliya vekamo halate aino atagineno eno aliʼyaʼmo afoʼamofeʼmo ani gemo ha paiʼnigeno afitenoʼaeʼmo aipamo leʼnigeno aliʼyaʼamo neʼaliya vekaeʼmo, malage huka uka taonifiʼmo alopa kateʼe aise kateʼeʼmo neʼukaeʼmo kagemi yaʼapimo ohaneʼnisiya vayanagi apakufamo hosuʼnisiya vayanagi apaulagamo ali huʼnisiya vayanagi apaiyamo hosuʼnisiya vayanagi huka apavalelikeka nagae nopiʼmo apato, huno ha paiʼnigeno 22aliʼyaʼamo neʼaliya vekamoʼmo ani kavaʼmo ago hutenoʼaeʼmo, Ala vekae, huno, naha paiʼnana kavaʼmo ago huʼnovaʼmonanafa mago vayaʼmo maisaya yaʼmo afaʼa haneʼniye, huno ha paiʼnigeno 23neʼyaʼmo yagita huʼniya vekamoʼmo aliʼyaʼamo neʼaliya vekaeʼmo hunoʼaeʼmo, kale kategatiʼe hoya kategatiʼeʼmo uka noʼnifiʼmo faiʼa kili paesayafeʼmo apayate alika apavalelika eno. 24Muki vayaʼaifeʼmo hogoteʼna ge huʼnova vayaʼmogimo neʼyaʼnimo afaʼa eʼa oʼnegae, huno huʼniye, huno Yesuʼa hapa paiʼniye.

Vayaʼmogimo hogoteʼa alagepa huʼa apakesamo afiteʼapaekeʼmo Yesuʼmo akame hisaya kavafeʼmo huʼniya gemae

(Mt 10:37-38)

25Yesuʼa asole vayaʼeʼmo magokepi neʼunoʼaeʼmo aino afe leno hapa painoʼaeʼmo, 26#Lu 18:29Nagaetegamo esiya vekamoʼmo afoʼamofenagi itaʼamofenagi aʼaenagi mafaʼneʼaenagi konagaʼamogifenagi asaʼamogifenagi agaiʼamo alagepa huno maisiya kavafenagi huno aini osuʼnisiyaʼmoʼmo geʼnimo neʼafiya vekamo afaʼa oʼmaigiye. 27#Lu 9:23Ina lagimo malipu yosaʼapimo aliʼa kofiliʼa nakame nosisafigeʼa geʼnimo neʼafiya vayaʼmo afaʼa oʼmaigae. 28Lapakaepatiʼmo ina laʼmo lusi yatala noʼmo kisiyafeʼmo hogoteno agesamo noʼafiye. Itopale maiʼnenoʼaeʼmo, ina kavaʼmo huʼna noʼmo kiʼna hano hisuvafeʼmo na magi moniletiʼmo muki yaʼamo miya faigufi, huno agesamo afigiye. 29Hogoteno agesamo oʼafiʼneno noʼmo aepa faino kiʼnisiyana moniʼamo hano hisigenoʼaeʼmo noʼamo kino hano osuno atalegaiye. Vayaʼmogi eʼa ageteʼapaeʼmo, 30ani vekamoʼmo noʼmo aepa faino kiʼniyaʼmonanafa afaʼa kino hano osuʼniye, huʼa huteʼa huʼa faipa huʼa ategae.

31Ani kavaʼmo huno haiya ala kini vekamoʼmo kame hisiyafeʼmo hogoteno agesamo noʼafiye. Haʼao, hogoteno agesamo afinoʼaeʼmo, ati vayaʼnimo teni tauseniʼa vayaʼmo maiʼnayaʼmonanafa kamemo hisuʼa kini vekamo ati vayaʼamo tuveti tauseniʼa vayaʼmo maiʼnae. Nagaemo kamemo huʼna aeʼna aga sesufi, huno agesamo afigiye. 32Kame huʼna aeʼna oʼaga segauve, huno agesamo afiʼnisiyana kame hisiya kini vekamo oʼmeno afagitega maiʼnisigenoʼaeʼmo, kame osuta afaʼa atesunafeʼmo na agufa kavaʼmo huguʼae, huteno, uta afi geyo, huno apa vayaʼamo alino apatesigeʼa ugae. 33Ani kavaʼmo huno lapakaepatiʼmo ina laʼmo muki agaiʼa yafeʼmo afaʼa atalegauve, huno osisiyana geʼnimo neʼafiya vekamo oʼmaigiye, huno hapa paiʼniye.

Yesuʼmo ataleno visiya vekamo haga nosiya hagegana huno maiʼniya gemae

(Mt 5:13; Mk 9:50)

34Hagemo kanale yaʼmo haneʼniyaʼmonanafa haga nehiya yaʼamo hano hisigenoʼaeʼmo halate haiya agufa kavaʼmo huno haga nehiya yaʼamo alino ha maleno ategaiye. 35Ani agufa hagemoʼmo aliʼyaʼamo alagi ohaneʼniyaʼmofeʼmo aliʼa yaga auʼa neʼatalae. Gemo afisaya lapakesamo haneʼnisiyaʼmoʼmo mani gemo alagepa huta afiyo, huno hapa paiʼniye.

Currently Selected:

Luki 14: kyg2013

Highlight

Copy