Aepa Gemae 44

Yosefe kapuʼamo lageso huʼniya gemae

1Apakaemo neʼyaʼmo ago neʼa hano huteʼapaeʼmo Yosefe aliʼyaʼamo neʼaliya vayaʼaiteʼmo yagaino neʼapateya vekaeʼmo ha painoʼaeʼmo, afaʼa aliniʼa visaya agufa neʼyaʼmo kuʼapifiʼmo alika ku aika apato. Apaote apaote huka kuʼapimo avayaleʼmo moniʼapimo ku aika apato. 2Henaga mafaʼnemo kupiʼmo nagae kapumo siluva kapuʼniʼe vitimo miya faisiyafeʼmo alinino eʼniya moniʼeʼmo ku aika ato, huno Yosefeʼa ha paiʼnigeno muki huʼniya kavaʼamo akame huno huʼniye. 3Kotilamiyapiʼmo Yosefe aliʼyaʼamo neʼaliya vayaʼmogimo ani konaga anagaʼmo aliʼa apateʼnageʼa nokiʼapiʼeʼmo magokepi uʼnae. 4Apakaemo taonifatiʼmo ataleʼa uʼnayaʼmonanafa uʼa afagi osuʼnagenoʼaeʼmo inagi Yosefeʼa noʼaleʼmo neʼyagaiya vekaeʼmo ha painoʼaeʼmo, Kagaemo ani vayaʼmo apakame huka uvo. Kagaemo uka apaiyafiʼmo aetekaeʼmo apakaefeʼmo ina ge huka ge huka apafigo. Lagaemo lapakaetegamo alagepa kavaʼmo huʼnonaʼmonanafa na kava higetapaeʼmo lapakaemo lagaetegamo hosu kavaʼmo huʼnae. 5Lapakaemo ani aliʼnaya kapumo ala vekaʼnimoʼmo aniʼmo neʼneya kapumo ku ailitapa eʼnae. Ani kapuletiʼmo lageso huʼniya yaʼmo neʼage kapumae. Lapakaemo lusi hosu kavaʼmo huʼnae, huka hapa paiyo, huno ha paiʼniye.

6Inagi agaemo uno apaiyafiʼmo aetenoʼaeʼmo agaemo Yosefeʼa ha paiʼniya gemo huʼniye. 7Geʼaleʼmo aeʼa atagaina huʼapaeʼmo, ala vekae, huʼa, na kava higekaeʼmo lagaefeʼmo ani agufa gemo nehane. Lagaemo ani huʼnana kavaʼmo alagi osuʼnone. 8Afiyo, huʼna, kagaemo ageʼnanageta lagae kuʼmo avayaleʼmo haneʼnigeta aliʼnona monimo Kenani kotegatiʼmo halate aliniteta lapamiʼnone. Lapamiʼnonaʼmofeʼmo haiya kava huta ala vekakamo nopatiʼmo siluvamofi golimofi huta kumayaʼmo aligune. 9#Aep 31:32Lagaepatiʼmo ina laʼmo ani kapumo aliʼnisigeka agesapi inagi kagaemo ani vekamo kamitimo amagigane. Inagi lagaemo mukiʼamogitamo kalavusi aliʼyakamo alisuna vayaʼmo ha malegaune, huʼa ha paiʼnae. 10Agaemo hunoʼaeʼmo, Lapakaemo huʼnaya gemo akame hugune. Lapakaepatiʼmo mago vekamoʼmo ani kapumo aliʼnisigeʼna agesuvaʼmoʼmo ani vekamogeʼmo nagaeteʼmo kalavusi aliʼyaʼmo alisiya vekamo maigiyana lapakaemo vaiʼmo oʼalitapa afaʼa ugae. 11Inagi apakaemo malage huʼa kuʼapimo mopafi maleʼneʼa kuʼmo aliʼa avayaka huʼnae. 12Inagi agaemo aepa faino yege vekamo nepuʼapimo kupiʼmo ageno alagepa huteno ageme ageme uno henaga mafaʼnemo kupiʼmo ageʼniye. Agaemo ani kapumo henaga mafaʼnemo Menesemani kupiʼmo haneʼnigeno ageʼniye. 13Apakaemo kukenaʼapimo aliʼa apake aiteʼa kuʼapimo halate aliʼa nokimo agotofuleʼmo maleteʼa taonifilagamo aiʼa atagineʼa uʼnae.

14Inagi Yutaʼe konagaʼamogiʼeʼmo Yosefe noteʼmo uʼa avaʼyi huteʼa ageʼnayana oʼuno afaʼa maiʼnigeʼa ageteʼapaeʼmo aulagaleʼmo mopafi asagauʼa aiʼnae. 15Yosefeʼa apakaefeʼmo ina ge huno huʼniye. Lapakaemo na agufa kavaʼmo huʼnae. Nagaefeʼmo lageso huʼniya yaʼmo ageno neʼaliye, hutapa oʼnageʼnafiye, huno huʼniye. 16#Nap 32:23Yutaʼa hunoʼaeʼmo, Ala vekae, huno, lagaemo na agufa gemo hisune. Haiya agufa gemo hugune. Haiya kava huta kaulagaleʼmo maigune. Gotiʼa aliʼyakamo neʼaluna vayamogita hosu kavatimo ageteno ago alino afole aino lateʼniye. Ala vekae, huʼna, lagaemo aliʼyakamo neʼaluna vayakamo maiʼnone. Kapukamo kuʼafatiʼmo ageʼnisana vekaʼe lagaeʼeʼmae, huno ha paiʼniye. 17Inagi Yosefeʼa hunoʼaeʼmo, alagi haʼao, huno hapa paiʼniye. Nagaemo lapakaemo afaʼa lapatesugetapa ani agufa kavaʼmo osugae. Nagae kapumo kumaya aliʼnisiya mafaʼnemo agaiʼageʼmo aliʼyaʼnimo alisiya vekamo hamalegaiye. Lapakaemo magoʼamo lapaipamoʼmo falu huʼninagetapa afotapimotegamo atagi netapa viyo, huno hapa paiʼniye.

Yutaʼa Menesameni aimuʼyaleʼmo maisiyafeʼmo huʼniya gemae

18Inagi Yutaʼa eno Yosefe haopaletiʼmo ha painoʼaeʼmo, Ala vekae, huno, Kahaoke hovanagi afaʼa nateʼnegeʼna afisana agufa gemo kaha paiguve. Kagaemo Isipi kotega kini vekamo Felokana huka maiʼnanaʼmofeʼmo kaipamo leka oʼnato. 19Kagaemo ala vekaʼnimoga aliʼyakamo neʼaluna vayaʼmogitaeʼmo, afotapimoʼmo maiʼnifi ago faliʼniye. Lapakanatapimoʼmo maiʼnifi oʼmaiʼniye, huka ge huka lafi geʼnane. 20Lagaemo kaha paitaeʼmo, he afotimoʼmo afaʼa maiʼniyaʼmonanafa agaemo ago kosuna leʼniyapatiʼmo alino ateʼniya mafaʼnemo hemenimo neya vekamo maiʼniye. Nepuʼamoʼmo ago falitegeno itaʼamoʼmo magoke mafaʼnetoʼamo maiʼnigeno afoʼamoʼmo ani mafaʼneʼaeʼmo hau ayamopafiʼmo hauʼniye. 21Kaha paiʼnonagekaeʼmo kagaemo ani ge huka laha paiʼnane. Lapakaemo lapakanatapimoʼmo avalelitapa egeʼna nagaemo ageno, huka huʼnane. 22Lagaemo kagae geleʼmo aeta atagaina huta kaha paitaeʼmo ani mafaʼnemo afoʼamoʼmo afaʼa atalesigeno oʼmegaiye. Atalesigeno esigenoʼaeʼmo afoʼamoʼmo faligiye, huta ago kaha paiʼnone. 23Kaha paiʼnonagekaeʼmo aliʼyakamo neʼaluna vayaʼmogitaeʼmo ani ge huka laha paiʼnane, lapakanatapimoʼmo lapakaeʼeʼmo magokepi lokaeno oʼmesiyaʼmoʼmo inagi lapakaemo etapa naulagaleʼmo he titapa oʼmaigae. 24Inagi lagaemo atagineta uta afotimofeʼmo ala vekatimogamo huʼnana gemo ha paiʼnone. 25Henagaʼamo afotimoʼmo lagaefeʼmo laha painoʼaeʼmo, utapa neʼyatimo miya faiyo, huno huʼniye. 26Lagaemo oʼugune, huta huʼnone. Laganatimoʼmo lagaeʼeʼmo magokepi lokaeno oʼvisiyaʼmoʼmo ani vekamo aulagaleʼmo halate hetita oʼmaigunaʼmofeʼmo laganatimoʼmo lagaeʼeʼmo magokepi lokaeno visigetaekeʼmo inagi lagaemo afaʼa ugune, huta huʼnonagenoʼaeʼmo 27afotimoʼmo aliʼyakamo neʼaliya vekamoʼmo hunoʼaeʼmo, lapakaemo ago ageʼnae. Ani aʼnimoʼmo lole mafaʼnelaʼmo alino anateʼniye. 28Mago mafaʼneʼnimo afela heʼnigeʼnaeʼmo laiyonimoʼmo kamiti haeno neʼnegaiye, huʼna huteʼna alagi oʼageʼnove. 29Hemenimo lapakaemo nagaetegatiʼmo halate ani mafaʼneʼniʼeʼmo avalelitapa visayategamo kategatiʼmo mago hanageke yaʼmo alisiyaʼmoʼmo nagaemo lusi kava huno naipamoʼmo kana hisiya yaʼmo alitapa namigayaʼmofeʼmo nagaemo kosuna leʼnovanageʼna vayaʼmo faliʼa uʼa neʼmaiya kotegamo uʼna lamiguve, huno huʼniye. 30#1 Sam 18:1Huʼniyaʼmofeʼmo nagaemo afoʼnimotegamo visugenoʼaeʼmo ani mafaʼnemo nagaeʼeʼmo magokepi lokaeno oʼvisigenoʼaeʼmo afoʼnimoʼmo faligiye. Afoʼnimoʼmo ani mafaʼneʼaeʼmo lusi kava huno hau ayamopafi hauʼniyaʼmofeʼmae. 31Ani kava huta agaemo lusi kava huno aipamoʼmo kana hisiya yaʼmo alita amigunaʼmofeʼmo kosuna letenoʼaeʼmo kanolufiʼmo uno lamigiye. 32#Aep 43:8-9Nagaemo afoʼnimofeʼmo ha paiʼnaeʼmo, alagepa huʼna yagaiʼna ateteʼna avaleliʼna egauve. Avaleliʼna halate oʼmesuvaʼmoʼmo ani vaiʼmo muki afinaʼmo nagaeteʼmo hanege hanege huno afaʼa hanegaiye, huʼna ha paiʼnove. 33#Hat 32:32Kahaoke hovanagi, aliʼyakamo aliʼnova vekamo alika nategeʼna naganaʼnimo aimuʼyaleʼmo maiteʼna kalavusi aliʼyakamo alino. Agaemo afaʼa ategenoʼa nepuʼamogiʼeʼmo uno haino. 34Ani mafaʼnemo nagaeʼeʼmo magokepi lokaeno uno ohaisiyaʼmoʼmo haiya kava huʼna afoʼnimotegamo uguve. Afoʼnimoteʼmo lusi kana yaʼmo afole aisigeʼna agesuvafeʼmo alagi oʼnahaiye, huno ha paiʼniye.

Currently Selected:

Aepa Gemae 44: kyg2013

Highlight

Copy