Aepa Gemae 3

Ve kanoʼe a kanomoʼeʼmo Goti geʼamo amagiʼana ataleʼnaʼa gemae

1 # 2 Ko 11:3; Le 12:9 Ala kava neʼmo Gotiʼa muki alo huno apateʼniya yapatiʼmo nagaloʼyavemoʼmo hosu kava hisiyafeʼmo afiteno ageʼniya kavaʼaletiʼmo muki alo huno apateʼniya afela yaʼamo ago aeno apaka seʼniye. Inagi nagaloyavemoʼmo a kanoeʼmo ina ge huno ge huno afi geʼniye. Gotiʼa muki hoyafiʼmo haneʼniya yosa alagaʼamo oʼneʼao, huno huʼnifiye. 2#Aep 2:16Inagi a kanomoʼmo geʼaleʼmo aeno atagaina huno ha painoʼaeʼmo, laʼagaemo muki mani hoyafiʼmo haneʼniya yosa alagaʼamo afaʼa negauʼae. 3#Aep 2:17Afaʼa negauʼaʼmonanafa hoya folagapiʼmo haneʼniya yosa alagaeʼmo Gotiʼa, haʼao, alagi oʼneʼao, huno huʼniye. Gotiʼa ina ge huno huʼniye. Lanakaemo mani yosa alagamo oʼnege ame oʼalige hiʼao fiku faligaʼanagi, huno huʼniye. 4#Yo 8:44; Lo 6:23Nagaloʼyavemoʼmo a kanoeʼmo ha painoʼaeʼmo, haʼao, huno ofaligaʼae. 5#Aiy 14:14; Iyi 28:2Lanakaemo mani yosa alagamo nesaʼaʼmoʼmo lanaulagamo ayakesigetana alagepa kavaʼe hosu kavaʼeʼmo agetetana Gotikana hutana maigaʼae. Gotiʼmo ani kavaʼmo ago ageʼniyaʼmofeʼmo mani yosa alagamo oʼneʼao, huno huʼniye.

6 # Ye 1:14-15; 1 Yo 2:16 A kanomoʼmo ani yosa alagamo ageʼniyana alagepa yosa alagamo aeʼnigeno ageno haʼye huʼniye. A kanomoʼmo ina kava huno agesamo afiʼniye, kanalenageʼna mani yosa alagamo neteʼnaeʼmo alagepa huʼna afiteʼna agegauve, huno huteno ani yosa alagamo lagino neʼniye. Neteno anauʼamoʼmo agaeʼeʼmo lokaeno maiʼniya vekamo amiʼnigeno neʼniye. 7#Aiy 64:6Neʼnaʼagenoʼaeʼmo anaulagamo ayakeʼnigeʼana anakeʼanaeʼmo, laʼagufalagaʼageʼmo maiʼnoʼae, huʼana anaketeʼanaeʼmo fiki yosamo haitamo hakeʼana anakufaleʼmo aiʼana ati kaesaʼa yaʼmo vaiteʼana hapiʼnaʼae. 8#Yop 34:23; Sam 139:7-12Ala kava neʼmo uneʼmo alino falu huʼniya kanaleʼmo hoyafiʼmo sapa sapa hulino eʼnigeʼana afiteʼanaeʼmo Ala kava netegatiʼmo anaune hetaleʼana uʼana yosa hoyafilagamo fala kiʼnaʼae. 9Ala kava neʼmoʼa Atamufeʼmo keya aeno ge hunoʼaeʼmo, Haiyateʼmo maiʼnane, huno keya aeno ge huʼnigenoʼaeʼmo, 10#Hat 19:16sapa sapa hulika eʼnageʼna afiteʼnaekeʼmo nagufalagaʼageʼmo maiʼnovaʼmofeʼmo koli huteʼna eʼna fala kiʼnove, huno huʼniye.

11Gotiʼa agaefeʼmo ge huno afi geʼniye. Haiya kava huka nagufalagaʼageʼmo maiʼnove, huka kageʼnane. Ina laʼmo kaha paiʼniye. Nagaemo oʼno, huʼna kaha paiʼnova yosa alagamo neʼnapiye, huno afi geʼniye. 12#Mai 28:13Ve kanomoʼmo geʼaleʼmo aeno atagaina huno ha painoʼaeʼmo, Kagaemo nagaeʼeʼmo magokepi lokaeno maisiyafeʼmo namiʼnana a kanomokeʼmo ani yosa alagamo namiʼnigeʼna neʼnove. 13#Lo 7:11Ala kava neʼmo Gotiʼa a kanoeʼmo ge huno afi geʼniye. Na kava higeka ani kava hane, huno ge huno afi geʼnigenoʼaeʼmo, Nagaloʼyavemokeʼmo humi nateʼnigeʼna neʼnove, huno ha paiʼniye.

Gotiʼa ani kavaʼmo huguve, huno polomasi gemo hana paiʼniya gemae

14Ala kava neʼmo Gotiʼa nagaloʼyaveeʼmo ha painoʼaeʼmo, Kagaemo ani hosu kavaʼmo huʼnanaʼmofeʼmo lokiya gemo huʼnaeʼmo aliʼna hosu huʼna kategauve. Kagaeteʼmo lusi kana yaʼmo hanegaiye. Kagaemo alisana kana yaʼmoʼmo muki yuna afu anagaʼe afela afu anagaʼmogiʼeʼmo alisaya kana yaʼmo ago aeka apaka seka aligane. Hemenimogi henagaʼamogi muki afinaʼaeʼmogi huka kamulagepalegatikeʼmo umenitata hugane. Ina kava huteka mumusopamo negane. 15#Aiy 7:14; Lo 16:20; Hi 2:14; 1 Ti 2:15Ala kava neʼmoʼa nagaloʼyaveeʼmo ha painoʼaeʼmo, Nagaemo kagaeʼe a kanoʼeʼmo aliʼna fako huʼna lanatesugetana kame kame hutana maigaʼae. Ina kava huʼa mafaʼnekamogimo aʼne mafaʼneʼalegamo kame huʼa apatesageʼa aʼne mafaʼneʼamogimo mafaʼnekalegamo kame huʼa apatesageʼa hugae. Mafaʼneʼamo aiya afeʼalumelagamo maiʼnisanageno agaemo kagenopamo aeno latapaisigeka kagaemo aiya kigupafiʼmo akafu hanigane, huno ha paiʼniye. 16#Yo 16:21; Ef 5:22Gotiʼa a kanoeʼmo ha painoʼaeʼmo, kagaemo kaipaguʼeʼmo maisana afinaʼmo lusi kana yaʼmo kamiguve. Kagaemo mafaʼnemo alika ategefe hisana afinaʼmo lusi kava huno kagafu kigiye. Anaukamofeʼmo alagikeʼmo kahaʼye hugiyanageno yagaino kategaiye. 17Gotiʼa Atamufeʼmo ha painoʼaeʼmo, Akamo gemo afiteka oʼno, huʼna kaha paiʼnova yosa alagamo neʼnanaʼmofeʼmo mopamo aliʼna hosu huʼna atesugeno neʼyaʼmo alagepa huno afole oʼaigiye. Muki afinaʼmo lusi kava huka mopafiʼmo aliʼyaʼmo alisanagenoʼaekeʼmo neʼyaʼmo afole aigiye. 18#Lo 8:20-22Aufe nofiʼe ino kahauʼeʼmo hoyakamo aeno atikaegaiye. Mopakaletiʼmo kahaufilagatiʼmo neʼyaʼmo alika negane. 19#2 Te 3:10Lusi kava huka ahaise vose hukageʼmo aliʼyaʼmo aliteka neʼyaʼmo alika afole aika negane. Inagi kagaemo muki afinaʼmo ina kava huka aliʼyaʼmo alitekaeʼmo falisana afinaʼmo mopafiʼmo uka lamigane. Na kava hinagekaene. Nagaemo mopaletiʼmo alo huʼna kateʼnovaʼmofeʼmo halate mopafiʼmo uka lamigane.

20Inagi Atamuʼa aʼaeʼmo agiʼamo, Iviʼae, huno ateʼniye. Muki afaʼa maisaya ve aʼnemogi itaʼapimoʼmo maiʼniyaʼmofeʼmae. 21#Aiy 61:10Ala kava neʼmo Gotiʼa sipisipi agufaletiʼmo yatala kukenamo alo huteno Atamuʼe aʼaʼeʼmo vaino anateʼniye.

Gotiʼa Atamuʼe Iviʼeʼmo Ineni hoyafatiʼmo alino hana faino anataleʼniya gemae

22 # Le 2:7 Ani afinaʼmo Ala kava neʼmo Gotiʼa hunoʼaeʼmo, Afiyo, huno, ve kanomoʼa alagepa kavaʼe hosu kavaʼeʼmo ago ageyaʼmofeʼmo lagaekana huno alino ha maleʼniye. Fiku yanageno afaʼa maisiya yaʼmo neʼapamiya yosa alagamo neteno muki afinaʼmo afaʼa maige maige huno maigiye, huno huʼniye. 23Huno huteno Ala kava neʼmo Gotiʼa Ineni hoyafatiʼmo Atamuʼmo alino hafaino ataleʼnigeno uʼniye. Gotiʼa mopaletiʼmo alo huno ateʼniya mopafiʼmo aiʼyumo aiteno hoyamo alino vaisiyafeʼmo alino ataleʼnigeno uʼniye. 24Inagi Gotiʼa ve kanoʼe a kanoʼeʼmo alino hana faino anataleteno mago lokiya enisole vayaʼmo alino apateʼnigeʼa emiʼeʼa yegemo haine neʼeya haopalega Ineni hoyaleʼmo yagaiʼa maiʼnae. Gotiʼa mago ata neleya naipemo maleʼnigeno muki haopalegamo aino vego vego huge huge huno maiʼniye. Enisole vayaʼmogiʼe naipemoʼeʼmo afaʼa neʼmaiya yaʼmo neʼapamiya yosa aepaleʼmo fiku yanageno mago vekamo ugiyaʼmofeʼmo yagaiʼa maiʼnae.

Currently Selected:

Aepa Gemae 3: kyg2013

Highlight

Copy