Apa 24

Yu vayaʼmogimo Poloʼmo agoti huʼa ateʼnaya gemae

1Faefuʼa afinaʼmo utegeʼa mono huʼa neʼapataya vayaʼaiteʼmo yagaino neʼapateya vekamo agiʼamo Ananayasiʼagi vayatama vayanagi mago agotimo huno neʼapateya vekamo agiʼamo Tetalasiʼagi huʼa Sisaliya taonifiʼmo uʼnae. Uʼa yagaino neʼapateya vekamo Filikisi aulagaleʼmo he tiʼa maiʼneʼa Poloʼmo agoti huʼa ateʼnae. 2Tetalasifeʼmo ge huʼnageno eno Poloʼmo aepa faino agoti huno atetenoʼaeʼmo, Ala vekae, huno, Kagaemo lagaeteʼmo alagepa huka yagaika nelatanageta alagepa huta magokepi lokaeta afaʼa maiʼnone. 3Lagaemo ani kavafeʼmo muki afinaʼmo muki haopalegamo amuse huta kateteta kahao ke nehone. 4Kahao ke hove. Fiku yanageʼna yatala gemo hisugeno alaga kahaegaiyanagi aise gemo hisuva gemo afiyo. 5#Ap 17:6Ani vekamo lagaemo ago ageʼnonana hanageke vekamo maiʼniye. Agae gemo alino aepa fai maleʼnigeʼa muki haopalegamo maiʼnaya Yu vayaʼmogi apano aege aege huʼa neʼmaiye. Agaemo Nasalasa vekamo akame nehaya vayapati ala vekaʼapimo maiʼnigeʼa akame huʼnageno alino fako huno nelate. 6#Ap 21:28-30Alopa mono notieʼmo huno faipa huno ategefe nehigetaeʼmo kalavusi huta ateʼnone. Lagae keʼaepa geletiʼmo agoti huta ategefeʼmo huʼnonana 7ati vayaʼaiteʼmo yagaino neʼapateya vekamo Lisiyasiʼa layapatiʼmo lokiya vaino alino laha faleno avalelino uʼniye. 8Lisiyasiʼa hunoʼaeʼmo, agoti huta ategaune, hutapa huʼnaya vayaʼmo utapa Filikisi aulagaleʼmo agoti hutapa ateyo, huno laha paiʼniyaʼmofeʼmo eʼnone. Loka huka afigegenoʼao agaiʼa avayafatiʼmo agoti huta neʼatona kavafeʼmo ava gemo hisigeka afigane, huno ha paiʼniye. 9Ani agufa gemo huʼa Yu vayaʼmogi huʼapaeʼmo, lama gemo nehiye, huʼa ha paiʼnae.

Poloʼa agaiʼamo gemo huno ha maeno huʼniya gemae

10Yagaino neʼapateya gamani vekamoʼmo Poloʼmo gemo hisiyafeʼmo aulama huʼnigeno Poloʼa hunoʼaeʼmo, ago afiʼnovana yatala kafugamo Yu vayaʼmogitaleʼmo yagaika nelatanaʼmofeʼmo naipamoʼmo falu huʼniyanageʼna gemo huʼna naha maeʼna kaha paigesuve. 11#Ap 21:17Kagaemo ani vayaʼaifeʼmo loka huka apafi gesanageʼapaeʼmo ani gemo kaha paisageka afigane. Nagaemo Gotifeʼmo mono hisuvafeʼmo Yulusalemu taonifiʼmo uʼna maiʼnogeno tuolofuʼa afinaʼmo utegeʼna hemenimo maiʼnove. 12Yu vayaʼeʼmo alopa mono nopiʼmo geletiʼmo kaveta osuge Yu vayaʼai muki mono noʼapifiʼmofi taoniʼapifiʼmofi huʼna hosu kavaʼmo hisayafeʼmo aliʼna he tiʼna apatege huʼnogeʼa oʼnageʼnae. 13Hemenimo agoti huʼa neʼnataya geeʼmo alagi lama gemo nehune, huʼa aliʼa kave oligae. 14#Ap 24:5Ani gemo nehuvaʼmonanafa magoʼe gemo aeʼna hakalo huʼna kaha paiguve. Nagaemo mago aigofe kane huʼa nehaya kateʼmo akame nehuʼna laginago vayaʼai Gotiʼapimofeʼmo mono nehuve. Muki avoʼmo kae maleʼnaya gemo Mosese keʼaepa geʼenagi Gotitegati gemo alini eʼa aeʼa hakalo huʼa hapa nepaiya vayaʼai geʼapienagi huʼna nagesamo afiʼna fatago nehuve. 15#Yo 5:28-29Apakaemo muki hosu vayaʼe alagepa vayaʼeʼmo faliʼnayatetiʼmo he tigae, huʼa apakesamo afiʼa fatago huteʼa apavayagunagu huʼa agava maiʼnaya kava huʼna nagesamo afiʼna fatago huteʼna navayagunagu huʼna agava neʼmauve. 16#Ap 23:1Nagaemo Goti aulagaleʼe ma mopafi vayaʼai apaulagaleʼeʼmo yuʼilaga vekaʼnimoʼa agoti huno oʼnatesiyafeʼmo nayamukiki huʼna alagepa kavaʼmo nehuve.

17 # Lo 15:25-26; Ga 2:10 Akeyaʼvilaga Yulusalemu taonifatiʼmo ataleʼnuʼna asole kafugamo maiteʼna henagaʼamo mago ofalini monimo aliteʼna vayaʼnimo hapa maesiya ofalini monimo apamisuvafeʼmo aliniʼna atagineʼna Yulusalemu taonifiʼmo eʼnove. 18#Ap 21:26-27Alopa mono nopiʼmo uʼna haiʼna mono kavaʼmo huʼna nagufamo aliʼna alagepa huʼna ateteʼna mono kavaʼmo huʼnogeʼa nageʼnae. Ani afinaʼmo nagaeʼeʼmo asole vayaʼmo magokepi lokaeʼa oʼmaige apano oʼaege huʼnageta afaʼa maiʼnone. Mono nopiʼmo maiʼnogeʼapaeʼmo mago Yu vayaʼmo Esiya kotegatiʼmo eʼnaya vayaʼmogimo nageʼnae. 19#2 Ti 1:15Ani vayaʼmogi agoti huta ategaune, huʼa hisayana eʼa kagae kaulagaleʼmo afaʼa agoti huʼa nategae. 20Eʼa agoti huʼa oʼnatesageʼapaeʼmo manile maiʼnaya vayaʼmogimo kanisole vayaʼai apaulagaleʼmo he tiʼna maiʼnova afinaʼmo hosu kavaʼnimo ageʼnisaya kavafeʼmo afaʼa kaha paigae. 21#Ap 23:6Hosu kavaʼmo osuʼnovaʼmofeʼmo na agufa kavatefeʼmo agoti huʼa neʼnatafi, huʼna oʼafiʼnove. Apaulagaleʼmo he tiʼna maiʼneʼnaeʼmo alopa gefatiʼmo, faliʼnaya vayaʼmo he tigae huʼna nagesamo afiʼna fatago huʼnova kavatefeʼmo hemenimo agoti hutapa neʼnatae, huʼna hapa paiʼnovaʼmofeʼmo lapaulagaleʼmo agotimo huʼa neʼnatafiye, huno hapa paiʼniye. 22#Ap 23:26Filikisiʼa Poloʼmo akame nehiya kafeʼmo ava gemo ago afiʼniyaʼmofeʼmo Polo geʼamo afiteno agoti huno hano huno ateʼniye. Filikisiʼa Yu vayaʼaifeʼmo hunoʼaeʼmo, ati vayaʼaiteʼmo yagaino neʼapateya vekamo Lisiyasiʼa esigeʼnaeʼmo aliʼna alagepa huʼna agoti huʼna ategauve, huno hapa paiʼniye. 23#Ap 27:3; 28:16,30Ani gemo huteno Poloteʼmo yagaino neʼateya ati vekaeʼmo, avalelikuka kalavusi huka oʼateka kalavusi nopiʼmo afaʼa ateʼnegeʼapao ao vayaʼmogimo ha maeʼa yagaiʼa ateyo, huno ha paiʼniye.

Poloʼa Filikisiʼe aʼaʼeʼmo hana paiʼniya gemae

24Mago afinaʼmo utegeʼana Filikisiʼe aʼamo Yu vayapati a kanomo agiʼamo Nulusilaʼeʼmo eʼnaʼae. Filikisiʼa Polofeʼmo ge huʼnigeno eno Yesu Kalaisifeʼmo agesa afino fatago hisiya agufa gemo ha paiʼniye. 25Poloʼa alagepa kavafeʼmo ava gemo huno ha paige vayaʼmogimo apakaiʼapi apakufaleʼmo apamete apamete huʼa yagaisaya kavafeʼmo ava gemo huno ha paige Gotiʼa agoti huno apatesiya kavafeʼmo ava gemo huno ha paige nehigenoʼaeʼmo Filikisiʼa koli huteno, Afaʼa ateka uvo. Henagaʼamo maiʼneʼna gekamo afiguve, huʼna hisuva afinaʼmo ge hisugeka eka naha paigane, huno ha paiʼniye. 26Filikisiʼa Poloʼmo kalavusifatiʼmo hatu maeʼna atesuvana mago monimo namigiye, huno agesamo afiteno magoʼe huno ge huʼnigeno eʼnigeʼana ge huge afige huʼana maiʼnaʼae. 27#Ap 25:9Filikisiʼa Yu vayaʼmogimo amuse huʼa atesayafeʼmo Poloʼa hatu maeno oʼateno kalavusifiʼmo afaʼa ateʼnigeno maiʼniye. Lole kafugamo utegeno Posiyasi Fesitasiʼmo Filikisi aimuʼyaleʼmo eno maiʼneno yagaino apateʼniye.

Currently Selected:

Apa 24: kyg2013

Highlight

Copy