متّی ۸
۸
جذامی شفا
۱ وختی عیسی کوه جأ بیجیر بمو، ایتأ عالمه مردوم اونٚ دونبألسر رأ دکفتید. ۲ ایدفعه‌یی ایتأ مردای کی جذام دأشتی اونٚ ورجأ بمو و زانو بزه و بوگفته: «آقا جان، اگه بخوأیی تأنی مرَ شفا بدی.» ۳ عیسی خو دسَ درازَ کوده، اونَ لمس بوکوده و بوگفته: «خوأیم، پاکَ بو!» هو لحظه اونٚ جذام پاکَ بوسته. ۴ بأزین عیسی اونَ بفرمأسته: «بیدین چی گفتن درم. هیکسَ هیچی نوگو، بوشو خودتَ کاهنَ نیشأن بدن و پیش‌کشی‌یَ کی موسی تعیین بوکوده#۸:۴ اَ پیش‌کشی در واقعی قوربانی‌یی ایسه کی توراتٚ دورون یهودیأنٚ تکلیف بوبوسته (لاویان بابٚ ۱۴). ، فَدن تا اوشأنٚ رِه شهادتی ببه.»
افسرٚ رومی ایمأن
۵ وختی عیسی واردٚ کفرناحومٚ شهر بوبوسته، ایتأ افسرٚ رومی اونٚ ورجأ بمو و ایلتماسٚ اَمرأ ۶ اونَ بوگفته: «آقا جان، می خدمتکار ایفلیجه و خانه میأن خوفته و سخت درد کشئن دره.» ۷ عیسی بوگفته: «من اَیم و اونَ شفا دهم.» ۸ افسر وأگردسته بوگفته: «آقا جان، من لایقٚ اَن نی‌یم کی تو می خانه بأیی. تو فقط ایتأ کلمه بیگی، می خدمتکار شفا گیره، ۹ چونکی منم ایتأ مأمورٚ فرمانبرم و سربازأنی‌یم می جأ فرمان بریدی. اگه ایتأ جٚه اوشأنَ بگم: ‹بوشو›، شه، و دیگری‌یَ بگم، ‹بیأ›، اَیه. می نوکرَ بگم، ‹اَ کارَ انجام بدن›، انجام دهه.» ۱۰ عیسی وختی اونٚ گبأنَ بیشنأوسته، تعجب بوکوده و کسأنی‌یَ کی اونٚ دونبألسر اَموییدی، بوگفته: «آمین شمرَ گم کی اَجور ایمأن ایسرائیلٚ قومٚ میأنم نیدم. ۱۱ وأ بدأنید کی خیلی‌یأن شرق و غربٚ جأ اَییدی و آسمانٚ پادشایی میأن، ایبراهیم و ایسحاق و یعقوبٚ اَمرأ سفره سر نیشینیدی، ۱۲ ولی کسأنی کی آسمانٚ پادشایی رِه بدونیا بموییدی، تاریکی میأن تأودَه بیدی، جایی کی اشک فوکونیدی و خوشأنٚ دندانأنَ سر بسر سابیدی». ۱۳ بأزین او افسرَ بوگفته: «بوشو! ببه کی مطابقٚ تی ایمأن انجام ببه.» هو وخت اونٚ نوکر شفا بیگیفته.
عیسی پطرسٚ زن‌مار و خیلی‌یأنٚ دیگرَ شفا دهه
۱۴ وختی عیسی پطرسٚ خانه بوشو، اونٚ زن‌مارَ بیده کی تب دأشتی و رختخوابٚ میأن درازَ کشه‌بو. ۱۵ عیسی اونٚ دسَ لمس بوکوده و اونٚ تب قطَ بوسته. بأزین اون ویریشته تا عیسی جأ پذیرایی بوکونه.
۱۶ غروب دم خیلی جٚه کسأنی‌یَ کی دیو دأشتیدی، بأوردیدی عیسی ورجأ و اون خو کلامٚ اَمرأ، پلیدٚ روحأنَ اوشأنٚ جأ بیرونَ کوده و همه‌تأ مریضأنَ شفا بده. ۱۷ اَطویی اونچی کی اِشعیای نبی زبانٚ جأ بوگفته بوبوسته‌بو، حقیقت پیدا کوده کی:
«اون اَمی ضعفأنَ فیگیفته
و اَمی مریضی‌یأنَ اوسأده.»#۸:۱۷ اِشعیای نبی بابٚ ۵۳، آیه ۴.
عیسی جأ پیروی کودن سخته
۱۸ وختی عیسی بیده کی ایتأ عالمه آدمأن اونٚ دور و ور جمَ بوستیدی، خو شاگردأنَ فرمان بدَه کی بیشید او طرفٚ دریاچه. ۱۹ هو وخت ایتأ جٚه دینٚ علما اونٚ ورجأ بمو و بوگفته: «اَی اوستاد، هر جا بیشی، تی دونبأل اَیم.» ۲۰ عیسی جواب بده: «روبایأن و پرنده‌یأن لانه دأریدی ولی اینسأنٚ پسر#۸:۲۰ عیسی مسیح کلمه‌یٚ «اینسأنٚ پسرَ» چندین بار در درباره‌یٚ خودش به کار ببرده. اَ کلمه اَمرأ نیشأن بده کی اینسأنم ایسه، هَطویم خو قودرت و ایقتدارَ کی عهدٚ عتیقٚ دورون پیشگویی بوبوسته‌بو نیشأن بده (مثلاً دانیال بابٚ ۷، آیه ۱۳ تا ۱۴). جایی نأره کی خو سرَ اویه بنه.» ۲۱ ایتأ جٚه شاگردأن، عیسایَ بوگفته: «آقا جان، وهل اوّل بشم می پئرَ دفنَ کونم.» ۲۲ ولی عیسی اونَ بوگفته: «می دونبألسر بیأ، بده مورده‌یأن، خوشأنٚ مورده‌یأنَ دفنَ کونید.»
عیسی مسیح دریاچه طوفانَ آرامَ کونه
۲۳ بأزین عیسی لوتکایَ سوارَ بوسته و شاگردأنم اونٚ دونبألسر بوشوییدی. ۲۴ ایوأرکی دریاچه میأن ایتأ پیله‌دأنه طوفان رأ دکفته، جوری بوبوسته‌بو کی نزدیک بو موجأن لوتکایَ غرقَ کونید. ولی عیسی خوفته‌بو. ۲۵ شاگردأن بموییدی و عیسایَ خوابٚ جأ ویریزأنه‌یید و بوگفتید: «اوستاد، اَمرَ نجات بدن، هلاکَ بوستَن دریم.» ۲۶ عیسی اوشأنَ بوگفته: «اَی کم ایمأنأن، چره اَطو بترسه‌ییدی؟» بأزین ویریشته و باد و موجأنَ نهیب بزه و همه چی آرامَ بوسته. ۲۷ شاگردأن تعجبٚ اَمرأ کس‌کسَ وَورسه‌ییدی: «اَن چو جور آدمی‌یه کی حتی باد و موجأن اونَ ایطاعت کونیدی!»
دو‌تأ دیوزده مردای شفا گیریدی
۲۸ وختی کی عیسی «جَدَریانٚ» سرزیمینٚ میأن فأرسه، کی دریاچه او طرف نهَه‌بو، دو‌تأ دیوزده مردأکٚ اَمرأ رودررو بوبوسته کی قبرستانٚ جأ بیرون شوئون دیبید. اوشأن اونقدر وحشی بید کی هیچکی نتأنستی او رأ دواره. ۲۹ اوشأن فریاد بزه‌ییدی: «اَی پسرٚ خودا، تو اَمی اَمرأ چی کار دأری؟ آیا بمویی تا قبلٚ او وختٚ تعیین بوبوسته اَمرَ عذاب بدی؟» ۳۰ او طرفتر ایتأ پیله گله خوکأن چرا کودن دیبید. ۳۱ دیوأن عیسی جأ خوأهش بوکودیدی: «اگه خوأیی اَمرَ اخراجَ کونی، او خوکأنٚ گله دورون اوسه کون.» ۳۲ عیسی بفرمأسته: «بیشید!» بأزین دیوأن بیرون بوشوییدی و خوکأنٚ دورون قرار بیگیفتیدی و تومامٚ گله تپه شیبٚ جأ هوجوم ببردیدی دریاچه دورونی و آبٚ میأن هلاکَ بوستید. ۳۳ خوکبانأن فرار بوکودیدی بوشویید شهر و تومامٚ او ماجرایَ و اونچی‌یَ کی دیوزده‌یأنٚ رِه ایتفاق دکفته‌بو، مردومٚ رِه تعریف بوکودیدی. ۳۴ بأزین تومامٚ شهرٚ مردومأن، عیسی دِئنٚ رِه بیرون بموییدی و وختی اونَ بیده‌ییدی، ایلتماس بوکودیدی کی اوشأنٚ سرزیمینَ ترکَ کونه.
Currently Selected:
متّی ۸: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
