متّی ۲۸
۲۸
عیسی ویریشتن جٚه مورده‌یأن
۱ بعدٚ شَبّاتٚ روز، اوّلی روزٚ هفته کی یکشنبه بو، خروس خوأنٚ موقع، مریمٚ مجْدلیّه و اویتأ مریم، بوشوییدی قبرَ بیدینید. ۲ ایدفعه‌یی ایتأ زیمین‌لرزه‌یٚ شدید بمو، چونکی خوداوندٚ فرشته آسمانٚ جأ نازلَ بوسته، بأزین بوشو قبرٚ سر، سنگَ گرَ دَه ایتأ کنار و اونٚ رو بینیشته. ۳ او فرشته دیم برق زه‌یی و اونٚ لیباس ورفٚ مأنستن سیفید بو. ۴ وختی نیگهبانأن اونَ بیده‌ییدی، ترسٚ جأ بپرکستیدی و مورده‌یأنٚ مأنستن بوبوستیدی. ۵ بأزین فرشته زنأکأنَ بوگفته: «نوأ ترسئنید! دأنم کی عیسی دونبأل گردیدی کی مصلوب بوبوسته. ۶ اون اَیه نِیسه، چونکی هَطو کی بفرمأسته‌بو، رستاخیز بوکوده! بأیید جایی کی اون خوفته‌بو، بیدینید، ۷ بأزین بی‌معطلی بیشید و اونٚ شاگردأنَ بیگید کی ‹اون، مورده‌یأنٚ دونیا جأ ویریشته و شیمی جأ جُلُوتر شه جلیل و اویه اونَ دینیدی.› هسأ شمرَ گفتَن درم.» ۸ پس زنأکأن ترس و شوق‌و‌ذوقٚ زیادی اَمرأ بی‌معطلی قبرٚ جأ بیرون بوشوییدی و بودُوٚستیدی تا او ایتفاقَ شاگردأنَ بیگید. ۹ ایدفعه‌یی عیسی اوشأنٚ اَمرأ رودرو بوبوسته و بوگفته: «سلام بر شومأن!» زنأکأن جُلُو بموییدی بکفتیدی اونٚ پا جیر و اونَ پرستش بوکودیدی. ۱۰ او وخت عیسی اوشأنَ بفرمأسته: «نوأ ترسئنید! بیشید و می برأرأنَ بیگید کی رأ دکفید بیشید جلیل. اویه مرَ دینیدی.»
نیگهبانأن گزارش دیهیدی
۱۱ وختی کی زنأکأن رأ دورون ایسَه‌بید، بعضی جٚه نیگهبانأن بوشوییدی شهر و تومامٚ ماجرایَ سرأنٚ کاهنأنٚ رِه گزارش بدَه‌ییدی. ۱۲ اوشأنم بعدٚ اَنکی قومٚ پیله کسأنٚ اَمرأ مشورت بوکودیدی، سربازأنَ پولٚ زیادی فدَه‌ییدی ۱۳ و بوگفتیدی: «مردومَ بیگید کی ‹وختی کی اَمأن خوفته‌بیم، اونٚ شاگردأن شبانه بموییدی و اونٚ جسدَ بودوزدأنه‌ییدی.› ۱۴ و اگه اَ خبر والی گوش فأرسه، اَمأن خودمأن اونَ راضی کونیم تا شِمره مشکل پیش نأیه.» ۱۵ بأزین سربازأن پولَ فیگیفتیدی و هوطویی کی اوشأنَ بوگفته‌بید، انجام بدَه‌ییدی و اَ داستان تا به ایمروز یهودیأنٚ میأن شایع ایسه.
پیله مأموریت
۱۶ او یازده‌تأ شاگرد بوشوییدی جلیل، هو کوه جور کی عیسی اوشأنَ بفرمأسته‌بو. ۱۷ وختی عیسایَ اویه بیده‌ییدی، اونَ پرستش بوکودیدی ولی بعضی‌یأنم شک بوکودیدی. ۱۸ بأزین عیسی اوشأنٚ ورجأ بمو بفرمأسته: «تومامی‌یٚ قودرت آسمان و زیمینٚ سر مرَ بیسپرده بوبوسته. ۱۹ پس بیشید و تومامٚ قومأنَ شاگرد چأکونید، و اوشأنَ پئر، پسر و روح‌القدسٚ نامٚ اَمرأ تعمید بدید ۲۰ و اوشأنَ تعلیم بدید کی هر اونچی کی شمرَ فرمان بدَم، بجا بأورید. وأ بدأنید کی من هر روزه تا آخرٚ اَ دونیا شیمی اَمرأ ایسَم!»
Currently Selected:
متّی ۲۸: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
