متّی ۱۰
۱۰
دوازدهتأ شاگردٚ وظیفه
۱ بأزین عیسی خو دوازدهتأ شاگردَ خو ورجأ دوخوأده و اوشأنَ قوّت و ایجازه فدَه تا ارواحٚ پلیدَ بیرونَ کونید و هر درد و مرضییم شفا بدید. ۲ اونٚ دوازدهتأ رسولٚ نام اَشأن بید: اوّل شمعون، معروف به پطرس و اونٚ برأر آندریاس؛ یعقوب زِبدی پسر و اونٚ برأر یوحنا؛ ۳ فیلیپُس و برتولما؛ توما، و متّی کی باجگیر بو؛ یعقوب حلفایٚ پسر، و تَدّای؛ ۴ شمعونٚ غیور و یهودایٚ اسخریوطی کی عیسایَ خیانت بوکوده.
۵ عیسی او دوازده نفرَ اوسه کوده و اوشأنَ مأموریت فده و بوگفته: «غیریهودیأنٚ سرزیمینٚ دورون نیشید و سامریأنٚ هیتّأ شهرٚ دورون وارد نیبید، ۶ بلکی قومٚ ایسرائیلٚ اویرَ بوسته گوسفندأنٚ ورجأ بیشید. ۷ وختی کی شوئون دریدی، اَ خبرَ اعلام بوکونید کی آسمانٚ پادشایی نزدیکه. ۸ مریضأن و جُذامیأنَ شفا بدید، موردهیأنَ زندَه کونید و دیوأنَ بیرونَ کونید. موفت فیگیفتیدی، موفتم فدید. ۹-۱۰ سفرٚ رِه هیچ طلا یا نقره یا مس شیمی کمربندأنٚ میأن نبرید و کولهبار، یا ایضافه پیرهن، یا کفش، یا چوبدستی اونسَنید، چونکی کارگر حق دأره خو مواجبَ فیگیره. ۱۱ هر شهر یا دیهاتییَ کی شیدی، ایتأ خوروم آدمٚ دونبأل بگردید و تا او مدت زمأتی کی او شهرٚ میأن ایسَهییدی، اونٚ خانه میأن بِیسید. ۱۲ وختی ایتأ خانه دورون شیدی، بیگید: ‹سلام بر شومأن›. ۱۳ اگه اوشأنی کی خانه میأنی ایسَهییدی لایق بیبید، ببه کی شیمی سلامٚ برکت اوشأنٚ رو قرار بیگیره، وگرنه، دوواره وأگرده شمرَ. ۱۴ اگه کسی شمرَ قوبیل نوکونه و شیمی گبأنَ گوش نده، وختی کی او خانه یا شهرَ خوأییدی ترکَ کونید، شیمی پا خاکَ بتکأنید. ۱۵ آمین شمرَ گم کی روزٚ داوری دورون، موجازات بوستنٚ سُدوم و غَموره شهرأن آسانتر به، تا او شهرٚ رِه.
۱۶ «من شمرَ گوسفندأنٚ مأنستن، گرگأنٚ میأن اوسه کونم. پس لنتی مأنستن زیرک بیبید و کبوترٚ مأنستن ساده. ۱۷ مواظب بیبید، چونکی مردومأن شمرَ به محکمهیأن ایسپأریدی و خوشأنٚ کنیسهیأنٚ میأن شلاق زنیدی. ۱۸ می وأسی شمرَ والییأن و پادشایأنٚ ورجأ بریدی، و شِمره ایتأ فرصتی ایسه کی اوشأنٚ ورجأ و دیگر قومأنٚ رِه شهادت بدید. ۱۹ امّا وختی شمرَ تسلیم کونیدی، نیگران نیبید کی چی بیگید یا چوطو بیگید. هو زمان چیزأنی کی وأ بیگید، شمرَ فده به، ۲۰ چونکی شومأن نیییدی کی گب زِئن دریدی، بلکی شیمی آسمانی پئرٚ روح ایسه کی شیمی زبانٚ جأ گب زنه. ۲۱ برأر خو برأرَ، و پئر خو زأکَ مرگٚ دس ایسپأره. زأکأن بر علیه خوشأنٚ پئر و مار ویریزیدی و باعث بیدی کی اوشأن کوشته بیبید. ۲۲ می نامٚ وأسی تومامٚ مردوم شیمی جأ متنفر بیدی ولی اون کی تا آخر بِیسه و تحمل بوکونه، نجات یأفه. ۲۳ وختی ایتأ شهرٚ دورون شمرَ اذیت و آزار کونیدی، فرار بوکونید بیشید ایتأ شهرٚ دیگر. آمین شمرَ گم کی قبلٚ اونکی بتأنید همهیٚ ایسرائیلٚ شهرأنٚ دورون بیشید، اینسأنٚ پسر اَیه.
۲۴ «شاگرد جٚه خو اوستاد، و نوکر جٚه خو ارباب بالاتر نییه. ۲۵ شاگرد وأستی خو اوستادٚ مأنستن ببه و نوکرم خو اربابٚ مأنستن. اگه خانه پیلهترَ ‹بَعَلزبول#۱۰:۲۵ «بَعَلزبول» ینی شیطأن.› نام بنید، بأزین اهلٚ او خانهیَ چی دوخوأنیدی؟
۲۶ «پس اوشأنٚ جأ نوأ ترسئنید. هیچ چیزَ نشأ قایمَ کودن کی آشکارَ نبه و هیچ چیزَ نشأ جیگا دَئن کی معلوم نبه. ۲۷ اونچی کی شمرَ تاریکی میأن گفتن درم، روشنایی میأن بیگید و اونچی کی شیمی گوشٚکون ایشنأوستن دریدی، پوشتٚ بامانٚ سر اعلام بوکونید. ۲۸ جٚه کسأنی کی جسمَ کوشیدی نوأ ترسئنید چونکی نتأنیدی روحَ بوکوشید؛ وأ کسی جأ بترسید کی تأنه هم شیمی روحَ و هم شیمی جسمَ جهندمٚ میأنی هلاکَ کونه. ۲۹ مگر دوتأ چیچینییَ ایتأ سکه اَمرأ نشأ هِئن؟ ولی حتی ایتأ جٚه اوشأن بدونٚ خوأستهیٚ شیمی آسمانی پئر بیجیر نکفه. ۳۰ حتی شیمی سرٚ همهتأ خالٚ مویأنم بیشمأرده بوبوستهیه. ۳۱ پس نوأ ترسئنید، چونکی شیمی ارزش ایتأ عالمه چیچینی جأ ویشتره.
۳۲ «اگه کسی مردومأنٚ ورجأ اعلام بوکونه کی جٚه من ایسه، بأزین منم می آسمانی پئر ورجأ اعلام کونم کی میشین ایسه. ۳۳ ولی هر کی مردومٚ ورجأ اعلام بوکونه کی جٚه من نییه، منم می آسمانی پئرٚ ورجأ اعلام کونم کی میشین نییه.
۳۴ «گومان نوکونید کی بموم صلحَ زیمینٚ سر بأورم؛ نَموم کی صلح بأورم، بلکی بموم تا شمشیرَ بأورم! ۳۵ می اَمون باعث به کی:
‹پسر، پئرٚ جأ،
دُختر، مارٚ جأ
و عروس، مردٚ مارٚ جأ سیوأ بیبید،
۳۶ و ایتأ شخصٚ خانه آدمأن اونٚ دوشمن بیدی.›#۱۰:۳۶ میکاه نبی بابٚ ۷، آیه ۶
۳۷ «هر کی خو پئر و مارَ می جأ ویشتر دوس بدأره، می لیاقتَ نأره؛ و هر کییم خو پسر یا دُخترَ می جأ ویشتر دوس بدأره، شایستهیٚ من نییه. ۳۸ هر کی خو صلیبَ اونسَنه و می دونبألسر نأیه، لایقٚ من نییه. ۳۹ هر کی بخوأیه خو زندگییَ حفظ بوکونه، اونَ جٚه دس دهه و هر کییم خو زندگییَ می وأسی جٚه دس بده، اونَ حفظَ کونه.
۴۰ «هر کی شمرَ قوبیل بوکونه، مرَ قوبیل بوکوده و هر کییم مرَ قوبیل بوکونه، او کسییَ کی مرَ اوسه کوده، قوبیل بوکوده. ۴۱ هر کی پیغمبرییَ جٚه اَ خأطر کی پیغمبر ایسه، قوبیل بوکونه، پیغمبری پاداشَ فیگیره. و هر کییم ایتأ شخصَ جٚه اَ خأطر کی عادل ایسه، قوبیل بوکونه، عادلٚ آدمٚ پاداشَ فیگیره. ۴۲ هر کی ایتأ جٚه می اَ کوجهدأنهترین شاگردأنَ، حتی ایتأ لیوان سردٚ آب فده، جٚه اَ خأطر کی اون می شاگرد ایسه، آمین شمرَ گم کی بیپاداش نمأنه.»
Currently Selected:
متّی ۱۰: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media