لوقا ۹
۹
دوازده‌تأ رسولٚ مأموریت
۱ عیسی خو دوازده‌تأ رسولَ دوخوأده خو ورجأ و اوشأنَ قوّت و ایجازه فدَه کی بتأنید تومامٚ دیوأنَ بیرونَ کونید و مریضأنم شفا بدید. ۲ بأزین رسولأنَ اوسه کوده کی خودا پادشایی‌یَ مردومٚ‌ره اعلام بوکونید و بیمارأنم شفا بدید. ۳ قبلٚ اَنکی رسولأن بیشید، عیسی اوشأنَ بوگفته: «اَ سفرٚ میأن هیچی شیمی اَمرأ نبرید، نه چوب‌دستی، نه بقچه، نه خوردنی، نه پول، نه ایضافه پیرهن. ۴ هر کسٚ خانه کی شیدی، تا وختی کی او شهرٚ جأ بیرون نوشوییدی، هویه بئسید. ۵ اگه کسأنی‌یم شمرَ قوبیل نوکودید، وختی او شهرٚ جأ بیرون شوئون دریدی، شیمی پا خاکَ بتکأنید کی اوشأنٚ ضد ایتأ شهادت ببه.» ۶ پس رسولأن دیهأت به دیهأت کی شوییدی، خودا پادشایی خوروم خبرَ مردومٚ‌ره گفتیدی و مریضأنم شفا دَیید.
۷ وختی هیرودیس کی جلیلٚ حکمرأن بو، عیسی معجزه‌یأنَ بیشنأوسته، نیگران و پریشأنَ بوسته، چونکی بعضیأن گفتیدی کی عیسی هو یحیی ایسه کی زندَه بوسته. ۸ بعضیأنم گفتیدی کی الیاسٚ نبی ظوهور بوکوده و بعضیأنم گفتیدی ایتأ جٚه قدیمٚ پیغمبرأن زندَه بوسته. ۹ هیرودیس بوگفته: «من خودم دستور بدَم کی یحیی سرَ وأوینید. پس اَن دِه کیسه کی اَ جور عجایب غرایب گبأن در موردٚ اون ایشنأوستن درم؟» و تلاش کودی کی عیسایَ بیدینه.
عیسی مسیح پنج هیزارتأ مردأکَ غذا فده
۱۰ وختی عیسی رسولأن وأگردستیدی، کارأنی کی انجام بدَه‌بید عیسی‌ره تعریف بوکودید. او وخت، عیسی اوشأنَ اوسأده و خو اَمرأ ببرده ایتأ شهری کی «بیت‌صیدا» نام دأشتی تا کی اویه اوشأنٚ اَمرأ تنها ببه. ۱۱ خیلی مردومأن اوشأنٚ شوئونٚ جأ وأخبرَ بوستید و اوشأنٚ دونبألسر رأ دکفتید. عیسی‌یم اوشأنَ قوبیل بوکوده و خودا پادشایی جأ گب بزه و مریضأنَ شفا بدَه.
۱۲ غروب دمٚ نزدیکی بو کی رسولأن بمویید عیسی ورجأ و بوگفتید: «اَ مردومأنَ اوسه کون کی بیشید دور و ورٚ دیهأتأن و مزرعه‌یأن کی خوشأنٚ رِه جا و خوردنی بیأفید، چونکی اَیه کی ایسه‌ییم آبادی جأ دوره.» ۱۳ عیسی وأگردسته خو رسولأنَ بوگفته: «شومأن خودتأن اوشأنَ غذا فدید.» رسولأن تعجبٚ اَمرأ بوگفتید: «چوطویی؟ اَمأن فقط پنج‌تأ نان دأریم و دوتأ مأیی، مگه اَنکی بیشیم اَشأنٚ‌ره غذا بیهینیم.» ۱۴ اویه پنج هیزارتأ مردای ایسَه‌بو.#۹:۱۴ زنأکأنم هویه ایسَه‌بید ولی اوشأنٚ فرهنگٚ میأن ایشماُردُنٚ موقع فقط مردأکأنَ بحیساب اَوردید. عیسی خو رسولأنَ بوگفته: «مردومَ پنجاه نفر پنجاه نفر زیمینٚ سر بینیشأنید.» ۱۵ رسولأنم اَ کارَ بوکودید و همه‌تأنَ بینیشأنه‌ییدی. ۱۶ بأزین عیسی پنج‌تأ نان و دوتأ مأیی‌یَ اوسأده و آسمأنَ فندرسته و خودایَ شوکر بوکوده و نانَ تیکه تیکَه کوده، فدَه رسولأنٚ دس کی آدمأنٚ میأن تقسیم بوکونید. ۱۷ همه‌تأن بوخوردید و سِئرَ بوستید و دوازده‌تأ سبدم خورده‌نان و مأیی ایضافه بمو.
پطرس، عیسی مسیح جأ شهادت دهه
۱۸ ایتأ روز کی عیسی تنهایی دوعا کودن دوبو و اونٚ شاگردأنم اونٚ اَمرأ بید، اوشأنٚ جأ وأورسه: «مردومأن چی گیدی، من کیسم؟» ۱۹ اوشأن جواب بدَه‌یید: «بعضیأن گیدی یحیی کی تعمید دَیی. بعضیأنم گیدی الیاسٚ نبی و بعضیأنم گیدی تو ایتأ جٚه قدیمٚ پیغمبرأن ایسی کی زندَه بوستی.» ۲۰ عیسی اوشأنٚ جأ وأورسه: «شومأن مرَ کی دأنیدی؟» پطرس وأگردسته بوگفته: «تو مسیحٚ خودایی#۹:۲۰ «مسیح» ایتأ عنوانه و کسی وأسی بکار شه کی خوداوند اونَ اینتخاب کونه تا خو قومَ نجات بده و مسح کودن ایتأ کارٚ روحأنی‌یه کی عهدٚ عتیقٚ میأن خیلی اونٚ اَمرأ برخورد کونیمی و اون اَنه کی اینفرَ روغنٚ اَمرأ مسح کودیدی و اَ کارٚ اَمرأ نیشأن دَییدی کی خوداوند او شخصَ پادشایی وأسی اینتخاب بوکوده. .» ۲۱ بأزین عیسی خو شاگردأنَ قدغن بوکوده و دستور بدَه کی اَ موضوع‌یَ هیکسَ نیگید ۲۲ و بوگفته: «من کی ‹اینسأنٚ پسر› ایسم، وأستی ایتأ عالمه رنج و عذاب بکشم و پیله کاهنأن، قومٚ پیله کسأن و دینٚ علما مرَ قوبیل نوکونید و بوکوشید و سوّمی روزٚ رِه مورده‌یأنٚ دونیا جأ ویریزم.»
۲۳ عیسی بأزین همه‌تأنٚ اوشأنَ بفرمأسته: «اگه کسی خوأیه مرَ پیروی بوکونه، وأستی خورَه اینکار بوکونه و همه‌تأ روزأن خو صلیبَ اوسأنه#۹:۲۳ اَ آیه دورون کلمه‌یٚ صلیبٚ معنی دسبند و گردنبند و اَ جور چیزأن نی‌یه بلکی «صلیب اوسأدن» ایتأ ایستعاره ایسه و اونٚ معنی اَنه کی وأ حاضر بیبیم عیسی نام وأسی رنج و درد و نامهربانی‌یأنَ تحمل بوکونیم. و می دونبأل بأیه. ۲۴ چره کی هر کی بخوأیه خو جانَ نجات بده، اونَ جٚه دس دهه؛ ولی هر کی می وأسی خو جانَ فده، اونَ نجات دهه. ۲۵ اینسأنٚ رِه چی فایده دأره کی تومامٚ دونیا اونٚ شین ببه، بأزین خو جانَ جٚه دس بده؟ ۲۶ هر کی اَ دونیا میأنی مرَ و می تعلیمَ عار بدأره، منم وختی کی می جلال و می پئر و موقدّسٚ فرشته‌یأنٚ جلالٚ اَمرأ وأگردم اَ دونیا، اونٚ جأ عار دأرم. ۲۷ یقین بدأنید کسأنی کی اَیه ایسَه‌ییدی تا خودا پادشایی‌یَ نیدینید مرگٚ طعمَ نیچشیدی.»
عیسی مسیحٚ شاگردأن اونٚ جلالَ دینیدی
۲۸ حدودٚ هشت روز کی عیسی گبأنٚ جأ بوگوذشته‌بو، عیسی پطرس، یوحنا و یعقوبَ اوسأده و دوعا کودنٚ وأسی بوشو کوه جور. ۲۹ هَطو کی کوه جور دوعا کودن دوبو، عیسی دیمٚ رنگ عوضَ بوسته و اونٚ لیباسأن سیفیدی جأ برق زه‌یی. ۳۰ ایدفعه‌یی دوتأ مردای کی موسی و الیاسٚ نبی بید شکوه و جلالٚ اَمرأ اونٚ ورجأ ظاهیرَ بوستید و شروع به گب زِئن بوکودید. ۳۱ اوشأن عیسی اَمرأ در موردٚ اونٚ مرگ کی وأستی خودا ایراده اَمرأ اورشلیمٚ دورون ایتفاق دکفه، گب بزه‌یید. ۳۲ پطرس و اونٚ همراهأن وأخوابَ شویید. بأزین کی بیدارَ بوستید، عیسی جلالَ بیده‌ییدی کی او دوتأ نبی‌یم اونٚ پهلو بپا ایسَه‌بید. ۳۳ هَطویی کی موسی و الیاس او محلَ ترکَ کودن دیبید، پطرس کی دس پاچه بوبوسته‌بو و نأنستی کی چی گفتن دره، عیسایَ بوگفته: «اَی اوستاد، چی خُبه کی اَمأن اَیه ایسه‌ییم. وهل سه‌تأ سرپناه چأکونیم: ایتأ تِره، ایتأ موسی رِه و ایتأ الیاسٚ رِه.»
۳۴ هنوز پطرسٚ گبأن تومامَ نوبوسته‌بو کی ایتأ ابر بمو و اوشأنٚ سر سایه تأودَه و اوشأن همه‌تأن بترسه‌ییدی. ۳۵ جٚه او ابرٚ دورون ایتأ صدا فأرسه کی بوگفته: «اَن می پسره، کی اونَ اینتخاب بوکودم. اونٚ گبأنَ گوش بدید.» ۳۶ وختی او ندا آسمانٚ جأ تومامَ بوسته، رسولأن عیسایَ تنها بیده‌یید. اوشأن او رازَ خوشأنٚ ورجأ بدأشتیدی و او روزأنٚ میأنی#۹:۳۶ متّی و مَرقُس، خوشأنٚ انجیلٚ دورون، اَ ماجرایَ اَطویی توضیح بدَه‌یید کی، عیسی رسولأنٚ جأ بخوأسته‌بو تا قبلٚ اونٚ قیام اَ ایتفاقَ هیکسٚ رِه تعریف نوکونید (متّی بابٚ ۱۷ آیه ۹ و مَرقُس بابٚ ۹ آیه ۹). هر چی کی بیده‌بید هیکسٚ رِه واگویا نوکودید.
عیسی مسیح ایتأ دیو بزه پسرَ شفا دهه
۳۷ فردا روز، وختی عیسی و اونٚ رسولأن او کوه جأ بیجیر بمویید، ایتأ عالمه مردومأن عیسی رافا ایسَه‌بید. ۳۸ ایدفعه‌یی ایتأ مردای او آدمأنٚ دورونی ایجگره بزه: «اَی اوستاد، تی جأ ایلتماس کونم می پسرَ کی می ایتأدأنه زأکه، تی لوطفٚ اَمرأ فندری، ۳۹ چونکی ایتأ پلیدٚ روح مرتب اونٚ دورون شه و اونَ وادار کونه ایجگره بزنه. بأزین چک و پر زنه و اونٚ دَهن کخ کونه. او پلیدٚ روح ایدفعه‌یی می زأکَ حمله کونه و سختی اَمرأ اونَ ولَ کونه. ۴۰ تی شاگردأنٚ جأ خوأهش و ایلتماس بوکودم کی پلیدٚ روحَ اونٚ جأ بیرونَ کونید ولی اوشأن نتأنستیدی.»
۴۱ عیسی بفرمأسته: «اَی نسلی کی ایمأن نأریدی و منحرف ایسید، تا اَکِی شیمی اَمرأ بِیسم و شمرَ تحمل بوکونم؟ تی زأکَ بأور می ورجأ.» ۴۲ وختی کی اونٚ پسرَ اَوردن دیبید، دیو اونَ زیمین بزه و دوواره شروع بوکوده چک و پَر زِئن. عیسی او پلیدٚ روحَ نهیب بزه و او پسر شفا بیگیفته و عیسی اونَ بیسپرده اونٚ پئرٚ دس. ۴۳ همه‌یٚ او آدمأنی کی اویه ایسَه‌بید خودا قودرتٚ جأ تعجب بوکودیدی و هَطویی کی مردوم، عیسی کارأنٚ جأ حیران بید، عیسی خو شاگردأنَ بوگفته: ۴۴ «اونچی کی شمرَ گم خُب گوش بدید: اینسأنٚ پسر، آدمأنٚ دس تسلیم به.» ۴۵ ولی اوشأن نفهمستید کی عیسی چی گفتَن دره، چونکی اوشأنٚ ذهن کور بو و ترسه‌ییدی عیسی جأ وأورسید.
کی همه‌تأنٚ جأ پیله‌تر ایسه؟
۴۶ شاگردأنٚ میأنی اَ بحث پیش بمو کی اوشأنٚ دورون کویتأ پیله‌تره. ۴۷ عیسی کی بفهمسته‌بو اوشأنٚ کله دورون چی گوذره، ایتأ کوجه‌دأنه زأکَ بأورده، خو ورجأ بدأشته ۴۸ و اوشأنٚ رِه بفرمأسته: «هر کی اَ زأکَ می نامٚ وأسی قوبیل بوکونه، مرَ قوبیل بوکوده و هر کی مرَ قوبیل دأره، اونی‌یَ کی مرَ اوسه کوده قوبیل دأره. شیمی میأن او کسی همه‌تأنٚ جأ پیله‌تره کی خورَه کوجه‌دأنه‌تر بدأنه.»
هر کی اَمی ضد نی‌یه، اَمی اَمرأ ایسه
۴۹ یوحنا بوگفته: «اَی اوستاد، اینفرَ بیده‌ییم کی تی نامٚ اَمرأ، پلیدٚ روحأنَ بیرونَ کودی. چونکی جٚه اَمأن نوبو، اونٚ جولُویَ بیگیفتیم.» ۵۰ عیسی بفرمأسته: «اونٚ جولُویَ نیگیرید. هر کی شیمی ضد نبه، پس شیمی اَمرأیه.»
ایتأ جٚه سامره دیهأتأنٚ مردومأن عیسی مسیحَ قوبیل نوکونیدی
۵۱ چون عیسی وأگردستنٚ وخت به آسمان فأرسئن دوبو، قوی ایراده اَمرأ اورشلیمٚ طرف بوشو، ۵۲ هَنٚ وأسی چن‌تأ قاصدَ جُلُو جُلُو اوسه کوده تا ایتأ جٚه سامره دیهأتأنٚ دورون اونٚ‌ره جایی فراهم بوکونید. ۵۳ او دیهأتٚ مردوم نخوأستیدی عیسی جأ پذیرایی بوکونید، چونکی معلوم بو اون اورشلیمٚ#۹:۵۳ چونکی اوشأن سامری شین بید و یوهودیأنٚ اَمرأ جٚه قدیمأن دوشمنی دأشتیدی. طرف شوئون دره. ۵۴ وختی عیسی شاگردأن، یعقوب و یوحنا، اَ ماجرایَ بیده‌ییدی، عیسی جأ وأورسه‌یید: «اوستاد، خوأیی دوعا بوکونیم و بخوأییم کی خودا، آسمانٚ جأ آتش بوأره و همه‌تأنٚ اوشأنَ نابودَ کونه؟» ۵۵ ولی عیسی وأگردسته اوشأنَ ملامت بوکوده ۵۶ و ایتأ دیهأتٚ دیگر بوشوییدی.
عیسی مسیح گه وأستی چوطویی اونٚ جأ پیروی بوکونید
۵۷ رأ دورون ایتأ مردای عیسایَ بوگفته: «هر جا بیشی، تی دونبأل اَیم.» ۵۸ عیسی اونَ جواب بده: «روباه‌یأن لانه و پرنده‌یأن لانه دأریدی، امّا اینسأنٚ پسر جایی نأره تا خو سرَ خوفتنٚ رِه بنَه.» ۵۹ عیسی اینفرٚ دیگرَ بوگفته: «می دونبألسر بیأ.» او شخص عیسایَ بوگفته: «آقا، وهل اوّل بشم می پئرَ بیگیلَ کونم.» ۶۰ عیسی بفرمأسته: «اوشأنی کی حیاتٚ جاودانی نأریدی وأستی بیشید خوشأنٚ مورده‌یأنَ بیگیلَ کونید، ولی تو وأستی بیشی خودا پادشایی‌یَ همه جا اعلام بوکونی.» ۶۱ اینفرٚ دیگرم بوگفته: «آقا، من شیمی اَمرأ اَیم. وهل بشم می خانواده اَمرأ خوداحافظی بوکونم.» ۶۲ عیسی اونٚ‌ره بفرمأسته: «کسی کی زیمینَ شخم زِئن دره بخوأیه خو پشتٚ سرَ نیگاه بوکونه، خودا پادشایی لایق نی‌یه.»
Currently Selected:
لوقا ۹: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
