لوقا ۱۷
۱۷
بخشش، ایمأن دأشتن و وظیفه
۱ عیسی خو شاگردأنَ بفرمأسته: «گوناه وأسی همیشه وسوسه نهَه، امّا وای بحالٚ کسی کی بخوأیه دیگرأنَ فأکشه وسوسه طرف. ۲ او جور آدمٚ رِه بهتره کی پیله‌دأنه آسیابٚ سنگ اونٚ گردن دٚوٚدید و اونَ تأودید دریا دورون کی ساده‌دیلٚ آدمأنَ گومراه نوکونه. ۳ پس شیمی حواس جم ببه! اگه تی برأر ترَ بدی بوکونه، اونَ توبیخ بوکون و اگه توبه بوکوده، اونَ ببخش. ۴ حتی اگه بخوأیه ایتأ روزٚ میأنی هفت وار ترَ بدی بوکونه، بأزین هفت وارم بأیه بگه ‹مرَ ببخش›، وأستی اونَ ببخشی.»
۵ رسولأن، عیسایٚ خوداوندَ بوگفتید: «اَمی ایمأنَ زیادَ کون.» ۶ عیسی بفرمأسته: «اگه شیمی ایمأن ایتأ خردل دأنه قدر ببه، تأنید اَ توتٚ دارَ بیگید کی ریشه جأ بکنده ببه کی دریا دورون بکاشته ببه و او درختم شیمی جأ ایطاعت کونه.
۷ «فرض بوکونید: ایتأ جٚه شومأن غولامی دأره کی زراعی زیمینَ شخم زنه یا گوسفندأنٚ رِه شبانی کونه. وختی او غولام مزرعه جأ وأگرده، آیا اونَ گی: ‹بیأ بینیش غذا بوخور!›؟ ۸ اونَ نیگی: ‹می شامَ حاضرَ کون، تی کمرَ دٚوٚد و مرَ خدمت بوکون تا اوّل من بوخورم. بأزین تونم تأنی بوخوری›. ۹ آیا او ارباب خو غولامٚ جأ اونٚ ایطاعتٚ وأسی ممنون به؟ ۱۰ هَطویی وأ ببه کی شومأنم وختی می دستورأنَ اجرا کونیدی وأستی بیگید: ‹نا‌لایقٚ غولامأن ایسیم و فقط اَمی وظیفه‌یَ انجام بدَییم.›»
ده‌تأ جوذامی شفا گیفتن
۱۱ عیسی خو سفرٚ دورون اورشلیمٚ طرف، سامره و جلیل مرزٚ جأ دوأرستَن دوبو. ۱۲ او وختی کی خوأستی ایتأ دیهأتٚ میأن بشه، ده‌تأ جوذامی اَمرأ روبرو بوبوسته کی دور ایسَه‌بید ۱۳ و ایجگره زنان گفتیدی: «اَی عیسی، اَی اوستاد، اَمرَ رحم بوکون!» ۱۴ وختی عیسی اوشأنَ بیده، بفرمأسته: «رحم کونم،#۱۷:۱۴ اَ کلمه‌یأن متنٚ اصلی دورون ننَه ولی مترجم ایضافه کوده کی بتأنه توضیح بده، عیسی مسیح اَ کارٚ اَمرأ، هم اوشأنَ شفا بدَه و هم اوشأنَ بوگفته کاهنأنٚ ورجأ بیشید کی ثابت ببه اوشأنٚ مریضی کاملاً خُب بوبوسته. هسأ بیشید کاهنأنٚ ورجأ و شمرَ اوشأنَ نیشأن بدید.» هَطو کی رأ دکفتید شوئون دیبید، اوشأنٚ جان جوذامٚ جأ پاکَ بوسته. ۱۵ ایتأ جٚه او جوذامیأن، وختی بیده شفا بیأفته، هَطو کی ایجگره زنان خودایَ حمد و ستایش کودی، وأگردسته بمو عیسی ورجأ. ۱۶ خودشَ عیسی پا جیر تأودَه و اونٚ لطفٚ جأ تشکر بوکوده. او شخص سامره شین بو. ۱۷ عیسی وأورسه: «مگه من ده نفرَ شفا ندم؟ پس او نُه نفر چی بوبوستید؟ ۱۸ غیرٚ اَ غریبه، هیکس دِه وأنگردسته کی خودایَ شوکر بوکونه؟» ۱۹ بأزین عیسی او مردأکَ بفرمأسته: «ویریز بوشو. تی ایمأن ترَ نجات بدَه.»
خودا پادشایی اَمون
۲۰ فریسیأن عیسی جأ وأورسه‌ییدی: «خودا پادشایی کِی اَیه؟» عیسی در جواب بفرمأسته: «خودا پادشایی جوری نأیه کی بتأنید بیدینید ۲۱ و کسی نتأنه بگه کی خودا پادشایی اَیه ایسه یا اویه ایسه، چونکی خودا پادشایی شیمی میأن نهَه.»
۲۲ بأزین خو شاگردأنَ بفرمأسته: «ایتأ زمأن فأرسه کی شومأن ناجه بدأرید حتی ایروزم بوبوسته، مرَ کی اینسأنٚ پسرم بیدینید، امّا شیمی آرزو براَورده نیبه. ۲۳ مردومأن شِمرِه خبر اَوریدی کی من وأگردستم و فلان جا و یا بیسار جا ایسَم. اوشأنٚ دونبأل نیشید، ۲۴ چونکی اینسأنٚ پسرٚ اَمون عینٚ گورخانه مأنستن به، کی اَ سر تا او سرٚ آسمانَ روشنَ کونه. ۲۵ امّا قبلٚ اون، وأستی ایتأ عالمه رنج و سختی‌یأنَ تحمل بوکونه و اَ دورٚ زمأنه مردومأن اونَ قوبیل نوکونید. ۲۶ اینسأن پسرٚ اَمونٚ وخت، آدمأن عینٚ نوحٚ زمأت خودا کارأنَ بی‌توجه بیدی. ۲۷ نوحٚ زمأت مردومأن همه‌تأن سرگرمٚ خوردن، نوشیدن و عروسی کودن بید تا او روزی کی نوح کشتی میأن بوشو. بأزین سیل و طوفان بمو و همه‌تأنَ جٚه بین ببرده. ۲۸ لوطٚ زمأنم هَطو بو کی مردوم کأشتیدی، خوردیدی، هه‌ییدی، فروختیدی و خانه‌سازی کودید ۲۹ تا او روزی کی لوط، سدومٚ شهرٚ جأ بیرون بوشو و آتش و گوگرد آسمانٚ جأ بوأرسته و همه‌تأنَ نابودَ کوده. ۳۰ روزی کی اینسأنٚ پسر بأیه، هو روزأنٚ مأنستن بِه. ۳۱ او روز هر کی خو خانه پشتٚ بامٚ جور ایسَه، نوأستی بیجیر بأیه کی خو مال و منالَ خانه جأ اوسأنه و هر کی‌یم مزرعه دورون ایسَه، نوأستی وأگرده. ۳۲ لوطٚ زنٚ#۱۷:۳۲ لوطٚ زن، خودایَ اعتماد نوکوده، وأگردسته خو پوشتَ نیگاه بوکوده و خو جانَ جٚه دس بده.مردنَ بخأطر بأورید. ۳۳ هر کی سعی بوکونه خو جانَ نجات بده، اونَ جٚه دس دهه. هر کی‌یم خو جانٚ جأ بوگذره، اونَ نجات دهه. ۳۴ او شب اگه دو نفر ایتأ جا خوفته‌بید، ایتأیَ بریدی و اویتأ هویه مأنه. ۳۵ جٚه دوتأ زنای کی سرگرمٚ آسیاب کودنٚ گندم ایسیدی، ایتأیَ بریدی و اویتأیَ هویه نیهیدی. ۳۶ دوتأ مردای کی مزرعه دورون کار کودن دریدی، ایتأیَ بریدی و اویتأ هویه جا مأنه#۱۷:۳۶ اَ آیه بعضی جٚه یونانی طومارأنٚ میأن وجود نأره..»
۳۷ شاگردأن، عیسی جأ وأورسه‌ییدی: «اوستاد، کویه اَ ایتفاق دکفه؟» عیسی بفرمأسته: «هو جایی کی لاشه‌یٚ مُرده بمأنه، لاشخورأن هویه جمَ بیدی.»
Currently Selected:
لوقا ۱۷: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
