یوحنا ۲۱
۲۱
ظاهرَ بوستنٚ عیسی به هفتأ از شاگردأن
۱ بعد از اَ ایتفاقأن، عیسی بارٚ دیگر خودشَ در کنارٚ دریاچه تیبِریه، به خو شاگردأن آشکارَ کوده. اون اَطو ظاهرَ بوسته: ۲ ایتأ روز، شمعونٚ پطرس، تومایٚ معروف به دوقولو، نَتَنائیل از مردومأنٚ قانایٚ جلیل، زِبدی پسرأن، و دوتأ از شاگردأنٚ دیگرم با هم بید.
۳ شمعونٚ پطرس اوشأنَ بوگفته: «من شوئون درم ماهی صید بوکونم.»
اوشأن بوگفتیدی: «اَمأنم تی اَمرأ اَییم.» پس بیرون بوشوییدی و قایقَ سوارَ بوستیدی. امّا او شب هر چقدر تور تأودیدی، چیزی صید نوکودیدی.
۴ وختٚ سحر، عیسی ساحلٚ کنار بِیسه، امّا شاگردأن نفهمستیدی کی عیسایه. ۵ اون اوشأنَ بوگفته: «اَی زأکأن، چیزی خوردنٚ‌ره نأریدی؟»
جواب بدَه‌ییدی: «نه!»
۶ بوگفته: «تورَ طرفٚ راستٚ قایق تأودید، تأنیدی بیگیرید.» اوشأن اَ کارَ بوکودیدی و از زیادی ماهی نتأنستیدی تورَ قایقٚ دورون فأکشید.
۷ شاگردی کی عیسی اونَ دوست دأشتی، پطرسَ بوگفته: «اون خوداونده!» وختی شمعونٚ پطرس بیشنَوسته اون خوداونده، خو لیباسَ خو دور دوٚسته - چونکی اونَ از خو تن بیرون بأورده‌بو و خودشَ دریا میأن تأودَه. ۸ امّا شاگردأنٚ دیگر قایقٚ اَمرأ بموییدی، در حالی کی تورٚ پور از ماهی‌یَ، خوشأنٚ اَمرأ فأکشئن دیبید. چونکی اوشأنٚ فاصله ساحلٚ اَمرأ حدودٚ صد متر بو.
۹ وختی به ساحل فأرسه‌ییدی، آتشی‌یَ بیده‌ییدی کی زغالٚ اَمرأ چأکوده‌بوسته‌بو و ماهی‌یم اونٚ رو و نانم اویه نهَه‌بو.
۱۰ عیسی اَشأنَ بوگفته: «از او ماهی‌یأنی کی الأن بیگیفتیدی، بأورید.» ۱۱ شمعونٚ پطرس واردٚ قایق بوبوسته و تورَ به طرفٚ ساحل فأکشه. تور پور از پیله ماهی بو، به تعدادٚ صد و پنجاه و سه‌تأ ماهی. با اَنکی تعدادٚ ماهی بیش از حد بو، تور پاره نوبوسته.
۱۲ عیسی اَشأنَ بوگفته: «بأیید ناشتأیی بوخورید.» هیچ‌کدام از شاگردأن جرأت نوکودیدی از اون وَورسه‌یید «تو کی ایسی؟» چونکی دأنستیدی کی اون خوداونده. ۱۳ عیسی جُلُو بمو و نانَ اوسَده و اوشأنَ فدَه و ماهی‌یم هَطو. ۱۴ اَن سوّمی بار بو کی عیسی بعد از ویریشتن از مورده‌یأنٚ میأن، به خو شاگردأن ظاهرَ بوسته.
عیسی گفتگو پِطرُسٚ اَمرأ
۱۵ بعد از ناشتأیی، عیسی از شمعونٚ پطرس وَورسه: «اَی شمعون، یوحنا پسر، آیا مرَ ویشتر از اَشأن دوست دأری؟»
اون جواب بدَه: «بله اَی خوداوند! تو دأنی کی ترَ دوست دأرم!»
عیسی اونَ بوگفته: «از می گوسفندأن مراقبت بوکون.»
۱۶ دوّمی بار عیسی از اون وَورسه: «اَی شمعون، یوحنا پسر، آیا مرَ دوست دأری؟»
اون جواب بدَه: «بله اَی خوداوند! دأنی کی ترَ دوست دأرم!»
عیسی بوگفته: «از می گوسفندأن مراقبت بوکون.»
۱۷ سوّمی بار اونَ بوگفته: «اَی شمعون، یوحنا پسر، آیا مرَ دوست دأری؟»
پطرس از اَنکی عیسی سه بار از اون وَورسه کی «آیا مرَ دوست دأری؟» ناراحتَ بوسته و جواب بدَه: «اَی خوداوند! تو از همه چیز واخبری. تو دأنی کی ترَ دوست دأرم.»
عیسی بوگفته: «از می گوسفندأن مراقبت بوکون. ۱۸ آمین، آمین، ترَ گم، زمانی کی جوانتر بی، تی کمرَ دَوستی و هر جا کی خوأستی شویی؛ امّا وختی کی پیرَ بی، تی دسأنَ درازَ کونی و کسی دیگر تی کمرَ دَوَده و به جایی کی نخوأیی بیشی، ترَ بره.» ۱۹ عیسی اَ حرفأنٚ اَمرأ ایشاره به چوطو مَردنٚ پطرس کودی کی اونٚ اَمرأ خودایَ جلال دهه. بعد از اون، عیسی اونَ بوگفته: «می دونبألسر بیأ!»
۲۰ او وخت پطرس وأگردسته و بیده کی او شاگردی کی عیسی اونَ دوست دأشتی، اونٚ دونبألسر اَمون دره. اون هونی بو کی شامٚ موقع عیسی سینه سر تکیه بدَه‌بو و وَورسه بو کی: «سرورم، کی‌یه کی ترَ تسلیم کونه؟» ۲۱ وختی پطرس اونَ بیده، از عیسی وَورسه: «پس اون چی به؟»
۲۲ عیسی اونَ بوگفته: «اگه بخوأیم اون تا می وأگردستن، زنده بمأنه، به تو چی؟ تو می دونبأل بیأ!» ۲۳ پس اَ فیکر، برأرأنٚ میأن شایع بوبوسته کی او شاگرد نیمیره، در حالی کی عیسی پطرسَ نوگفته کی اون نیمیره، بلکی بوگفته: «اگه بخوأیم اون تا می وأگردستن، زنده بمأنه، به تو چی؟»
۲۴ هو شاگرده کی بر اَ چیزأن شهادت دهه، و اَشأنَ بینیویشته و اَمأن دأنیم کی اونٚ شهادت راسته.
در آخر
۲۵ عیسی کارأیٚ زیادٚ دیگری‌یم بوکوده، کی اگه دانه دانه بینیویشته بوبوسته بید، گومان نوکونم حتی تومامٚ دونیایم گنجایشٚ اونٚ نیویشته‌یأنَ بدأشته بی.
Currently Selected:
یوحنا ۲۱: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
