پیدایش ۱۷

۱۷

پیمانٚ ختنه

۱ وختی کی ابرام نود و نه سال دأشتی، خوداوند اونَ آشکارَ بوسته و بوگفته: «من خودایٚ قادرٚ مطلقم؛ می چومأنٚ جُلُو رأ بوشو و پاک زندگی بوکون. ۲ می عهد و پیمانَ تی اَمرأ دَوَدم و تی نسلَ خیلی خیلی زیادَ کونم.» ۳ ابرام دمر بکفته زیمینٚ سر و خودا اونَ بوگفته: ۴ «هسه می سهم! اَن می پیمانه کی تی اَمرأ دَودم: تو میلتأنٚ زیادی پئر بی. ۵ پس نَوأ ترَ دِ ابرام دوخوأنید؛ بلکی تی نام وأ ایبراهیم ببه، چونکی ترَ میلتأنٚ زیادی پئر چأکودم. ۶ من تی نسلَ خیلی خیلی بارورَ کونم، تی جَا قومأن به وجود اَورم، و پادشایأن تی نسلٚ جَا به وجود اَییدی.

۷ «می پیمانَ بین خودم و تو و تی نسل بعدٚ تو برقرارَ کونم کی نسل اندر نسل پیمانٚ همیشگی ببه؛ کی تِره و بعدٚ تو تی نسلٚ ره خودا ببم. ۸ اَ سرزیمینَ کی اونٚ دورون غریبی، یَنی تومامٚ سرزیمینٚ کنعانَ، ترَ و بعدٚ تو تی زأکأنَ، نسل به نسل کی همیشه شیمی‌شین ببه و من اوشأنٚ خودا بم.»

۹ خودا ایبراهیمَ بوگفته: «هسه تی سهم! تو وأ به می عهد وفادار بیبی، تو و تی زأکأنٚ بعدٚ تو، نسل اندر نسل، وأ به می پیمان وفادار بمأنید. ۱۰ هَنه می پیمان، من و شیمی میأن کی اونَ وأ بدأرید، تو و تی زأکأنٚ بعدٚ تو: هر مردی یا پسری شیمی میأن وأ ختنه ببه. ۱۱ شومأن وأ ختنه بیبید، و هَن، نیشأنه‌یٚ پیمانی ببه اَمی میأن. ۱۲ همه‌تأ هشت روزه پسر شیمی میأن وأ ختنه ببه، هر پسر زأکی شیمی نسلأنٚ میأن، چی غولامی کی تی خانه دورون به دونیا اَیه، چی غولامٚ بیگانه‌یی کی هینی، حتی اوشأنی کی تی نسلٚ جَا نی‌ییدی. ۱۳ چی خانه زاد ببه، چی غولامٚ زرخرید، وأ ختنه ببه تا می پیمان شیمی جانٚ میأنی همیشه بمأنه. ۱۴ هر مردی یا پسری کی ختنه نوبوسته، وأ قومٚ جَا ریشه‌کن ببه، چونکی می پیمانَ بشکنه.»

۱۵ هَطویم خودا ایبراهیمَ بوگفته: «هسه تی زن سارای! دِ اونَ ‹سارای› دونخوأن؛ اونٚ نام ‹سارا› به. ۱۶ من اونَ برکت دهم و اونٚ جَا، ترَ ایتأ پسر بخشم. سارایَ برکت دهمه، کی اونٚ جَا قومأنی به وجود اَییدی و پادشایأنی جٚه اونٚ نسل به دونیا اَییدی.»

۱۷ ایبراهیم زیمینٚ سر دمر بکفته، خنده بوکوده و خو دیلٚ میأن بوگفته: «آیا به، صد سالٚ مردأکٚ ره پسر ببه؟ سارا نود سالگی دورون زأی بأوره؟» ۱۸ ایبراهیم خودایَ بوگفته: «کاش کی ایسماعیل، تی برکاتٚ اَمرأ زندگی بوکونه.»

۱۹ ولی خودا بوگفته: «بدأن سارا تی زن، تِره پسری به دونیا اَوره کی تو وأ اونَ ایسحاق‏#۱۷‏:۱۹ ایسحاق یَنی «اون خنده کونه». نام بنی. من می پیمانَ اونٚ اَمرأ دَوَدم، کی بعدٚ اون پیمانی اَبدی اونٚ نسلٚ اَمرأ ببه. ۲۰ ولی ایسماعیلٚ وسی، تی خوأسته‌یَ بیشنَوستم: بدأن اونَ برکت دهم، بارور کونم و زأکأنٚ فراوانی بخشم. اونٚ جَا دوازده‌تأ رهبر و ایتأ پیله میلت به وجود اَورم.#۱۷‏:۲۰ ایسماعیلٚ زأکأنٚ نام هَه کیتابٚ پیدایش، بابٚ ۲۵، آیه ۱۲ تا ۱۸ بینیویشته بوبوسته. ۲۱ ولی ایسحاقٚ اَمرأ می پیمانَ بر قرار کونم، کی سارا سالٚ دیگر هَه وخت اونَ تِره به دونیا اَوره.»

۲۲ وختی کی خودا خو گبأنَ ایبراهیمٚ اَمرأ تومامَ کوده، جٚه ایبراهیمٚ ورجه صعود بوکوده. ۲۳ هو روز ایبراهیم خو پسر ایسماعیل و خو خانه تومامٚ مردأکأنَ ختنه بوکوده، چی خانه دورون به دونیا بَمو بید، چی غولامٚ زرخرید بید، هوطو کی خودا فرمان بدَه‌بو. ۲۴ ایبراهیم نود و نو سال دأشتی کی ختنه بوبوسته ۲۵ و اونٚ پسر ایسماعیل سیزده ساله بو. ۲۶ ایبراهیم و اونٚ پسر ایسماعیل، هر دو نفر هو روز ختنه بوبوستیدی. ۲۷ ایبراهیمٚ خانه همه‌یٚ مردأکأن و پسرأن، یَنی هر کس کی اونٚ خانه دورون به دونیا بَمو بو و غولامأنٚ زرخرید، اونٚ اَمرأ ختنه بوبوستید.

Currently Selected:

پیدایش ۱۷: گیلکی (رشتی)

Highlight

Copy