اعمالٚ رسولأن ۸
۸
اذیت و آزارٚ شائول به کلیسا و ایماندارأن
۱ شائولم جزوٚ او اشخاصی بو کی موافقٚ کوشتنٚ استیفان بو. جٚه هو روز آزار و شکنجه اورشلیمٚ ایماندارأنٚ میأنی شروع بوبوسته. همه‌تأنٚ اوشأن سراسرٚ یهودیه و سامره میأن پراکنده بوستیدی، بجز رسولأن. ۲ مردأکأنٚ خوداترس استیفانَ ببردیدی، دفنَ کودید و اونٚ‌ره عزاداری‌یٚ بوزرگی بیگیفتید. ۳ ولی شائول، بی‌رحمی اَمرأ مسیحیأنَ حمله کودی و خانه بخانه گردستی، مردأکأن و زنأکأنَ بیرون فأکشه‌یی و زندانٚ میأن تأوده‌یی.
فیلیپُس اوستانٚ سامره میأن بشارت دهه
۴ اوشأنی کی فرار بوکوده‌بید، هر جا کی شوییدی، خودا کلامَ بشارت دَییدی. ۵ فیلیپُس به ایتأ جٚه شهرأنٚ اوستانٚ سامره کی شومالٚ اورشلیم نهَه‌بو، بوشو و پیغامٚ مسیحی مردومٚ‌ره موعظه بوکوده. ۶ تومامٚ مردوم وختی فیلیپُسٚ گبأنَ ایشنأوستیدی، اونچی کی گفتی دقتٚ اَمرأ گوش کودیدی، چونکی به عیسی مسیحٚ نام معجزاتی کی آشکارَ بوستی ده‌ییدی؛ ۷ کی جٚه اونٚ دس پلیدٚ روحأن فریادکونأن جٚه خیلی آدمأنی کی دیوزده بید، بیرون اَموییدی و خیلی‌یأنم کی ایفلیج و شل بید شفا پیدا کودیدی. ۸ هَنٚ وأسی بو کی شادی و خوشحالی‌یٚ زیادی او شهرٚ میأن دکفته.
شمعونٚ جادوگر
۹ او شهرٚ میأن ایتأ مردای زندگی کودی کی شمعون نام دأشتی و مردومٚ سامِرِه‌یَ، خو جادوگری اَمرأ حیرانَ کوده‌بو و خودش گفتی کی خوره ایتأ پیله کسی ایسه. ۱۰ همه‌تأن، کوجه‌دأنه و پیله‌دأنه، اونٚ گبأنَ گوش دَییدی و گفتیدی: «اَ مردای ایتأ اوشأنٚ پیله خودایأنٚ قوّته، کی اونٚ نام ‹قودرتٚ عظیم› ایسه.» ۱۱ همه‌تأن اونَ ایحترامٚ زیادی کودیدی، چونکی سالیأنٚ سال بو کی خو جادوگری اَمرأ مردومَ حیرانَ کودی. ۱۲ ولی وختی فیلیپُسٚ بشارتَ درباره‌یٚ خودا پادشایی و عیسایٚ مسیح باور بوکودیدی، همه‌تأن جٚه مردأکأن و زنأکأن تعمید بیگیفتیدی. ۱۳ حتی شمعونم ایمأن بأورده و غسلٚ تعمید بیگیفته. اون همیشه فیلیپُسٚ اَمرأ بو و جٚه معجزاتی کی آشکارَ بوستی، در عجب و حیرت بو.
۱۴ وختی رسولأن، اورشلیمٚ میأن بیشتأوستیدی کی سامریأن، خودا کلامَ قوبیل بوکودیدی، پطرس و یوحنایَ اوسه کودیدی اوشأنٚ ورجأ. ۱۵ پطرس و یوحنا بموییدی سامره و اوشأنٚ رِه دوعا بوکودیدی تا روح‌القدسَ دریافت بوکونید، ۱۶ چونکی هنوز هیچ‌کدام جٚه مردومٚ سامره روح‌القدسَ نأشتیدی، بلکی فقط به عیسایٚ مسیحٚ خوداوندٚ نام غسلٚ تعمیدَ بیگیفته‌بید. ۱۷ پس پطرس و یوحنا اوشأنٚ سر، دس بنَه‌ییدی و اوشأنم روح‌القدسَ دریافت بوکودید.
۱۸ وختی شمعون بیده کی ایماندارأن، رسولأنٚ دس نَهنٚ اَمرأ روح‌القدسَ دریافت کونیدی، خو پولَ بأورده پطرس و یوحنا ورجأ ۱۹ و رسولأنَ بوگفته: «مرَ اَ قودرتَ فدید تا هر کسٚ سر دس بنم، روح‌القدسَ دریافت بوکونه.» ۲۰ پطرس بوگفته: «تی پول تی اَمرأ نابودَ به! چونکی فیکر بوکودی خودا عطایَ شأ پولٚ اَمرأ هِئن. ۲۱ تو اَ خدمتٚ میأن هیچ سهمی نأری، چونکی تی دیل خودا ورجأ صاف نی‌یه. ۲۲ تی شرارتٚ جأ توبه بوکون و دوعا بوکون بلکی خوداوند اونچی‌یَ کی تی دیلٚ میأن فیکر بوکودی ببخشه؛ ۲۳ چونکی دینم زهرٚ تلخی به دیل دأری و شرارتٚ زنجیلٚ جأ اسیری.»
۲۴ شمعون بوگفته: «شومأن مِره خوداوندٚ ورجأ دوعا بوکونید کی هرچی بوگفتیدی می سر نأیه.» ۲۵ وختی پطرس و یوحنا، خوداوندٚ کلامَ بوگفتیدی و شهادت بدَه‌ییدی، وأگردستیدی اورشلیمٚ میأن و هَطو خوشأنٚ رأ سر، سامره دیهاتأنٚ میأنی بشارت دهیدی.
فیلیپُس و خواجه‌سرایٚ حَبشی
۲۶ او وخت خوداوندٚ فرشته، فیلیپُسَ بوگفته: «ویریز، بوشو سمتٚ جنوب، جٚه او بیابانی رأ کی اورشلیمٚ جأ شه غزه.» ۲۷ بأزین اون ویریشته رأ دکفته بوشو. خو رأ سر خواجه‌سرایٚ حَبشی‌یَ بیده کی ملکه‌یٚ حَبَشه، «کَنداکِه»، خزانه‌دار بو و نفوذٚ فراوانی دأشتی و عیبادتٚ‌ره بمو بو اورشلیم. ۲۸ وأگردستنٚ‌ره خو ارابه میأن نیشته‌بو و اِشعیای نبی کیتابَ خوأندن دوبو. ۲۹ او وخت روح‌القدس، فیلیپُسَ بوگفته: «او ارابه‌یَ نزدیکَ بو و اوشأنٚ اَمرأ همرأه بوبو.»
۳۰ فیلیپُس ارابه طرف بودُوٚسته و بیشنأوسته کی خواجه‌سرایٚ حَبشی، اِشعیای نبی کیتابَ خوأندن دره. پس اونَ بوگفته: «اونچی‌یَ کی خوأندن دری، متوجه بی؟» ۳۱ خواجه‌سرایٚ حَبشی وأگردسته بوگفته: «چوطو تأنم بفهمم، اگه کسی مرَ رأنمایی نوکونه؟» و فیلیپُسَ دعوت کونه سوارٚ ارابه ببه، اونٚ ورجأ بینیشینه.
۳۲ قسمتی جٚه خودا کلامَ خوأندن دوبو کی گفتی:
«اون گوسفندٚ مأنستن بو، کی کوشتنٚ‌ره بریدی
و ایتأ بره مأنستن بو کی پشم‌چینأنٚ ورجأ آرام ایسه و گبی نزنه.
۳۳ اون فروتن بو، هَنٚ وأسی هر جور بی عیدالتی‌یَ اونٚ‌ره روا بِدأشتید.
اون زأکی نأشتی، پس کی تأنه اونٚ نسلٚ جأ گب بزنه؟
چونکی اونٚ حیات، جٚه زیمینٚ سر قطعَ بوسته.»#۸:۳۳ اِشعیای نبی کیتاب بابٚ ۳۵، آیه ۷ و ۸
۳۴ خواجه‌سرا وأگردسته، فیلیپُسَ بوگفته: «خوأهش کونم مرَ بوگو کی اِشعیای نبی راجع به خودش گب زِئن دره، یا جٚه اینفرٚ دیگر؟» ۳۵ پس فیلیپُس شروع کونه به گب زِئن و جٚه هو قسمتٚ خودا کلام و قسمتهای دیگر کی مربوط به عیسی مسیح بو بشارت دهه. ۳۶ هَطو کی شوئون دیبید، به آب فأرسه‌ییدی و خزانه‌دار بوگفته: «بیدین آب نَهه. هسأ دِه مشکلی وجود نأره، تأنی مرَ غسلٚ تعمید بدی؟» ۳۷ فیلیپُس بوگفته: «اگه تی تومامٚ دیلٚ اَمرأ ایمأن بأوردی، مشکلی نی‌یه.» خواجه‌سرا بوگفته: «ایمأن دأرم کی عیسی مسیح، خودا پسره.» ۳۸ پس خواجه‌سرا فرمان بده ارابه‌یَ بدأرید و فیلیپُس و خواجه‌سرا، هر دوتأ شیدی آبٚ دورون و فیلیپُس اونَ تعمید دهه. ۳۹ وختی آبٚ جأ بیرون بموییدی، ایدفعه‌یی روح‌القدس فیلیپُسَ اوسأده ببرده. بأزین خزانه‌دار دِه اونَ نیده و خوشحالی اَمرأ رأ دکفته بوشو. ۴۰ امّا فیلیپُسَ، اَشدودٚ شهرٚ میأن بیده‌ییدی. اون تومامٚ او دور و ورٚ شهرأنٚ میأن گردستی و بشارت دَیی کی به قیصریه فأرسه.
Currently Selected:
اعمالٚ رسولأن ۸: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
