اعمالٚ رسولأن ۶

هفت نفر اینتخاب بوبوستیدی خدمت کودنٚ رِه

۱ او روزأن کی ایماندارأنٚ تعداد ایضافه بوستی، ایماندارأنٚ یونانی‌زبان، جٚه ایماندارأنٚ عبرانی‌زبان گِله و شکایت کودیدی کی «جیره‌یٚ روزأنه‌یٚ غذا به اَمی وِیوه‌زنأکأن فَنرسه.» ۲ هَنٚ وأسی او دوازده‌تأ رسول، تومامی‌یٚ ایماندارأنَ دوخوأدیدی و بوگفتیدی: «شایسته نی‌یه کی اَمأن غذا فَدنٚ وأسی خودا کلامٚ تعلیمٚ جأ دس بکشیم تا مردومَ غذا فدیم. ۳ پس اَی برأرأن، شیمی میأن هفت نفرَ اینتخاب بوکونید کی موردٚ اعتماد بیبید و حکمت و روح‌القدسٚ جأ پوریدی تا اَ خدمتَ اوشأنَ فدیم ۴ و اَمأن، خودمأنَ وقفٚ دوعا بوکونیم و خودا کلامَ تعلیم بدیم.»

۵ همه‌تأن اَ پیشنهادَ قوبیل بوکودیدی. پس استیفان، کی جٚه بقیه ایماندارأنٚ غیرتٚ ویشتری نیشأن دَیی و روح‌القدسٚ جأ پور بو با فیلیپُس، پْروخُروس، نیکانور، تیمون، پَرمیناس و نیکولائوسٚ اَمرأ، کی ایتأ غیریهودی‌یٚ اَنطاکیه شین بو کی به دینٚ یهودیت بپیوسته‌بو و بعدش هم ایمأن بأورده و مسیحی بوبوسته، اینتخاب بوکودیدی. ۶ ایماندارأن او مردأکأنَ بأوردیدی رسولأنٚ ورجأ و رسولأنم اوشأنٚ رِه دوعا بوکودیدی و بر اوشأن دس بنَه‌ییدی. ۷ بأزین خودا کلام اعلام بوستی و روز به روزم ایماندارأنٚ تعداد، اورشلیمٚ میأن ایضافه بوستی و کاهنأنٚ زیادی هم به عیسی مسیحٚ نام ایمأن اَوردیدی.

استیفان دسگیر به

۸ استیفان، خودا فیض و قودرتٚ جأ پور بو و معجزات و نیشأنه‌یأنٚ زیادی‌یَ، مردومأنٚ رِه آشکارَ کودی. ۹ ولی چند نفر جٚه اعضای کنیسه‌یی کی «آزاد بوسته‌یأن» نام دأشتیدی، جٚه یهودیأنٚ قیرَوان و اسکندریه و کیلیکیه و آسیا، بموییدی اونٚ اَمرأ مشاجره بوکودیدی. ۱۰ ولی استیفانٚ مره کی روح‌القدس و حکمتٚ اَمرأ گب زه‌یی، نتأنستیدی کاری بوکونید. ۱۱ هَنٚ وأسی خلوتی چند نفرَ وادار بوکودیدی کی بیگید: «اَمأن بیشتأوستیم کی استیفان به موسایٚ نبی و خودا کفر گفتن دوبو.»

۱۲ اوشأنم، مردوم و پیله آدمأنٚ قوم و دینٚ علمایَ تحریک بوکودیدی و استیفانٚ سر فووُستیدی، اونٚ بیگیفتیدی و ببردید شورا. ۱۳ چند نفرم بأوردیدی، اوشأنم شهادتٚ دوروغ بدَه‌ییدی و بوگفتیدی: «اَ مردای، جٚه کفر گفتن بر ضدٚ اَ معبدٚ موقدّسٚ اورشلیم و موسی شریعت دس نکشه. ۱۴ چونکی اَمأن بیشتأوستیم کی گفتی: ‹عیسایٚ ناصری اَمی معبدٚ موقدّسَ خرابَ کونه و احکامی کی موسایٚ پیغمبر، اَمرَ بیسپرده، تغییر دهه.›» ۱۵ او وخت تومامٚ اوشأنی کی شورا میأن ایسَه‌بید، استیفانَ خیره بوبوستیدی و استیفانٚ دیمَ کی فرشته‌یأنٚ دیمأنٚ مأنستن بوبوسته‌بو، بیده‌ییدی.

Currently Selected:

اعمالٚ رسولأن ۶: گیلکی (رشتی)

Highlight

Copy