San Marcos 12

Kwail kal kimtuz kwinta

(Mt 21.33-46; Lc 20.9-19)

1Jesúsne katsa pariyaruzakas Moisés kaizta aizpa kamtamtuzakas ɨlapa ampuruzakas masas kamtam kwintakasa kamtanamɨzta: “Maza ampune, su pamikane, wankail tɨt pippa paiña pilkin wara. Paiña pilkin kintɨt mɨjazi. Pil kɨht kit akkal alpara uk tarɨt, wankail pippa kuztɨt tulpiznapa. Ainki yalmin sara, wan su izna. Su pamika sun kal kimturuza nailnakin chɨhkat kit attishta ɨrɨt. 2Paktu payu akane, su pamikane paiña kiwainmumikasha paiña sura ɨninta, nail kit paiña paimpa sapnapa. 3Su kal kimturuzne kiwainmumikasha pizat kit aim kiara. Uspane ussa chinkas mɨlarachi. Uspane kainmin ussa ɨninaara. 4Mamasa su pamikane mamaz kiwainmumikasha ɨninta. Uspane ussa pizat kit kɨzpukin aim kiat kit ussa kwail kiarɨt. 5Usne kwizta mamazta ɨninta. Uspane ussa piantaarɨt. An akkwanta ɨninnara. Uspane akkwanta ilnarɨt. Anparuza piantanarɨt.

6Su pamikane paiña painkulkasa uzta. Ussa pashire. An kwizpane ussa ɨninta. ‘Ap painkulta kwail kiamanazi,’ minta. 7Paiña painkulta izarawane, su kal kimturuzne usparuzpain kaizara: ‘Su sapmumikane amtui. Ussa piz kit piantana ɨzhain. Ussa piantarawane, aune paiña su pakiwiznapas,’ kizara. 8Uspane ussa pizat kit piantaara. Irɨkane, uspane ussa wankail pippa piltas pianmal kiakpɨnara, kiznara.

9Suasne Jesúsne pariyaruzakas Moisés kaizta aizpa kamtamtuzakas ɨlapa ampuruzakas kaiznara: ‘¿Su pamikane chima kinazi? Usne paiña sura kail kit su kal kimtuza piantananazi. Suas paiña sukin mamaz kal kimtuza chɨhkananazi,’ kiznara.

10Jesúsne kaiznara: Une Dios pit pɨnkɨhta izarɨt. Ka parɨt:

‘Yal sammikane wat uk kiakpɨntɨt.

An kwizta usne sun kiakpɨntɨt uk sak kit sam wara, yal naina akwa.

11Au Anpat Dios us kishit aizpa sarɨt akwa,

Aune Dios kit aizpa kwisha wari kizmuspas,’#Sal 118.22-23 ka parɨt,” kiznara.

12Sun awane Jesús sun kamtam kwintakasa usparuza paranamtu minñara. Uspa ussa pizshiarakas, uspane akkwan awa akwa ishkuat kit Jesús tukis ɨara.

¿Gobiernora pial tanansa?

(Mt 22.15-22; Lc 20.20-26)

13Fariseo awaruzkas Herodes kanpamtuzkas mazantuza Jesústa ɨninñara, us nil chi kwinta kininpa. 14Uspane ussa aat kit kaizara:

—Kamtam. Aune nu watcha paramtu pianmakpas. Nune pailta awara kawarain paranamtu. Nune izmuruzakas aliz awaruzakas kawarain paranamtu, ishkwatchin. Nune awa Dios ɨnintɨtkana uzanapa kamtanamtu. Roma pɨpulura Emperadorne katsa mikwa i. Usne apas awara ɨninnamtu. ¿Mizama kai? ¿Pial ussa tanapas? ¿Pial ussa tamanapas? kizara.

15Jesúsne uspa minñamtu aizpa pian. Uspane nil chi minñara. Suasne Jesúsne usparuza kaiznara:

—Une nawa kwail kiashinintu. ¡Maza pial kararain izna! kiznara.

16Uspane ussa pial karaara. Usne usparuza mɨmanara:

—¿Mɨn awa kɨzpuma izamtuas? ¿Mɨn munma pialta parɨt? kiznara.

Uspane kaizara:

—Au pɨpulu Emperador mikwa kɨzpura izamtuas, kizara.

17Jesúsne usparuza kaiznara:

—Emperadorpa pial ussa tarain. Emperador ɨnintu aizpa kirain. Kawarain Diospa pial ussa tarain. Dios manta kit aizpa mɨrain, kiznara.

Uspane paiña pitkasa iztaspaarɨt.

Awa irɨtne, ¿Mamasa kuhstuki?

(Mt 22.23-33; Lc 20.27-40)

18Saduceo awaruzne Jesústa aara. Uspane nil chi min kit mamaztuza kamtanamtu. Awa irawane, mamasa kuhsamtuchi minñamtu. Uspane Jesústa sunpa mɨmaara:

19—Kamtam, Moisésne ñamin aumɨza ka pattɨt, “Ampu irane, pashpa mɨjchi irane, paiña ashampane mazain uz. An impara irɨtmikawa aimpihshne paiña ashampara mɨltawa, us akwa pashpa mɨjan,”#Dt 25.5 ka parɨt. 20Siete aimpihshtuzpain uzara. Aimpihsh ɨlapamikane ashampa mɨlta. Ashampa pashpa mɨltachasmin, ampune irɨt. Usne pashpa mɨjchi irɨt. 21Suasne kanmika aimpihshne paiña ashampara mɨlta. Uskas pashpa mɨjchi irɨt. Kawarain kanmika aimpihshne pashpa mɨjchi irɨt. 22Sunkana siete aimpihshtuzne sun ashampara mɨlara. Pashpa mɨjchi iarɨt. An kwiztane sun ashampakas irɨt. 23Awa irɨt mamasa kuhstane, ¿mɨnmika sun ashampara mɨlnasa? wan siete aimpihshtuzpain ussa mɨlarɨt akwa, ka kizara.

24-25Jesúsne usparuza sɨnkanara:

—Nune ñanta kiat kit Dios parɨt aizpa pianchime. Diosne wan kishina. Awa irɨttuza kuhstawane, chiyura ashampane ampura mɨlkain. Ampune ashamparakas mɨlkain. Uspane ángelkanain puranazi. Ángelne ashampara mɨlkain. Katmizna une nil minñamtuchi. 26Nane awa irɨttuzpa umɨza kainanash, uspa kuhsamtu akwa. Une ñamin Moisés pɨnkɨh parɨt aizpa pianmai. Suane Moisés impaktɨmtu tɨra iztuasmin, Diosne ussa ka kwinta kirɨt: “Nane Dios ish. Abrahampa Dios ish. Isaacpa Dios ish. Jacobwa Dios ish.”#Éx 3.6, 15 27Uspane an ñancha iarɨt. Uspa iarawane, Diosne usparuza kwinta kinara. Katmizna uspane ma payu uzamtu. Une awa irɨttuz kuhsamtuchi kizamtu. Une ñanta minñamtu, kiznara.

Dios ɨninta pit anza tɨnta i

(Mt 22.34-40)

28Jesús Saduceo awaruza wat sɨnkamtawane, Moisés kaizta aizpa kamtammikane kamtanarɨt aizpa mɨt kit Jesús tukin at kit mɨmaara:

—Nu usparuza watsal sɨnkanarɨt akwa, nawa sɨnkazha. Diosta akkwan ɨnim pit para. ¿Chi ɨninta pit an wari? kizta.

29Jesúsne sɨnkara:

—Diosne an ñamin an watsal ɨnim pit ka manta kinara: “Israel awa, mɨrain. Au anpatne Dios i. Mamaz diosne uzchi. 30Ka akwaizna u Anpatta, u Diosta pashirain u kaijchukin. Mintuasmin, Diosta pashirain. Kal kimtuasmin, Diosta pashirain.”#Dt 6.4-5 31Suasne Diosne kwizta mamaz ɨnim pitka manta kinara: “Up kwalta pashirain. Kawarain izmuruzakas pashinarain.”#Lv 19.18 Mamaz an kwisha wat ɨnim pit wachi, kizta.

32Moisés kaizta aizpa kamtammikane ussa kaizta:

—Kamtam. Nune nilkas watchakas sɨnkamtu. Diosne mazain i. Mamaz diosne uzchi.#Dt 4.35; Is 45.21 33Diosta pashitpa. U kaijchukin Diosta pashitpa. Mintuasmin, Diosta pashitpa. Kal kimtuasmin, Diosta pashitpa. Izmuruza pashitpa up kwalkana. Sunkana kiarane, une Dios ɨnintu aizpa kianazi. Maintas une wakara paktana Diosta mɨlara. Chiwazha Diosta mɨlaarɨtkas, Diostakas izmuruzakas pashinana anza wari,#Lv 19.18; Os 6.5 kizta.

34Jesúsne sun Moisés kaizta aizpa kamtammika watsal sɨnkara minta. Katmizna Jesúsne ussa kaizta:

—Nune Diospa ɨnintukin kasha pianpain. Diosne nua ɨninshimtu, kizta.

Tas mɨnminkas ussa mɨmaashitchi.

¿Cristone, mɨn painkulma i?

(Mt 22.41-46; Lc 20.41-44)

35Jesúsne Dios katsa yalkin awara kamtanat kit kaiznara:

—Moisés kaizta aizpa kamtamtuzne “Cristone Davidpa kwal i” kizamtu. ¿Chikishma sun kaizamtu? 36Davidne, Dios Sɨnam Izpul akwa, ñamin kaiz kit “Cristone ap Anpat i”, parɨt:

“Diosne Cristora ka kaizta:

‘Ap makin uzti, nakasa ɨninnapa,

nua aliztuza anuppanakima,’ ”#Sal 110.1 kiznara.

37Ñamin Diosne Cristora ka kaizta: Davidne “Cristo ap Anpat i” kiztui. Katmizna Cristone Davidpa kwalkas Davidpa Anpatkas i, kiznara.

Sunkana Jesúspa usparuza kamtanara akwa, kwisha akkwan awane ussa wat mɨashira.

Jesúsne Moisés kaizta aizpa kamtamtuza tɨnta paranara

(Mt 23.1-36; Lc 11.37-54; 20.45-47)

38Jesúsne akkwan awa wanmaktɨttuza kamtanat kit kaiznara:

“¡Kwiraruin! Moisés kaizta aizpa kamtamtuzkana uzman. Uspane aks kwaksham kwashiamtu. Uspane sun kwakshamkasa pɨpuluwara chashiamtu, awa usparuza ‘wat kɨntɨre’ kizanapa. 39Uspane Judío kammu yalta akkwan awa purakin uzshiamtu. Uspane pishtara an ñancha chat kit an wat uzmura uzshiamtu. 40Ɨnkwa mɨj aizpa walkwatpane, uspane tɨnta kukaizamtu, awa uspa pɨrail appamtu minñamanpa. Diosne usparuza tɨnta ilnanazi, naiznanakima,” kiznara.

Ɨnkwane, mazainpa chammikane, pial Diosta tamtu

(Lc 21.1-4)

41Jesúsne Dios katsa yalta pial sapmukin kashain kunta. Akkwan awa pial taamtu aizpa izta. Pampa pial mɨjtuzne akkwan pial taara. 42Maza ɨnkwane, mazainpa uzmikane, at kit pial sapmukin paas pialmin winta. 43Suasne Jesúsne paiña kammuruza ussain akwanat kit ka kaiznara:

—Watcha kaiznamtus. An ɨnkwane kwisha puiza i. Usne pial sapmukin at kit wan tararuzkin an akkwan tara. Anpa kwazparuzne an wemin taara. 44Anpa kwazparuzne pial tiztɨt mɨj aizpa taarɨt. Puiza ɨnkwane wan mɨj aizpa tarɨt, kiznara.

Currently Selected:

San Marcos 12: kwi

Highlight

Copy