San Marcos 15

Jesús Pilato aar arrtarr

(Mt. 27:1-2,11-14; Lc. 23:1-5; Jn. 18:28-38)

1Maimua ag ãspaau edpherre thum chi thethemnaan ãbam aig podpajierram aajem, khĩirjug jʉrwi Pilato aar paawai Jesús khaibag waupiju jaau khaphʉ jawaag. Maig naajim aajem: phadnaan chi porkha nʉm khʉʉn, Moiseeu Ẽwandam iek phã pʉarr jawaag chi machnaan, judionaan eem jooin chi thierrnaan maimua tagam khʉʉn agjo chi Asamblea eem khʉʉnpa thʉnaajim aajem. Makhʉʉnauta amach thumaam khʉʉnau Jesús jua jʉ̃khanaa Pilato aar arrjierram anaabá. 2Mag ich aar wai barbaimaawai Pilatoou ich Jesuug —¿Chadcha pʉʉta judionaan Reí? a jeeujim anʉm.

Magbaawai Jesuu irig, —Pua khabá khaphʉ jaaubapʉim ajim anʉm.

3Mag warag chi phadnaan porkha nʉm khʉʉnau ich khĩircha iek pom amachdeu jaaum aig seukha iekhamatarr igwia 4deeu ũmaai Pilatoou irig, —¿Khan jãgwi pʉ iekhamaphamjo sĩ? ajim anʉm. ¿Pua ũrbahab, jũrram khʉʉnau pʉch khĩircha pʉch khaibag waupi jaau nʉm?

5Mamʉ parii Pilatoou ichig mag jeeu ahaukhamjã sĩi warag khĩuu abaawai ich odegpai, “Wounaan mʉg oohba chitʉm” ajim anʉm.

Warre Jesús thõopi jaautarr

(Mt. 27:15-31; Lc. 23:13-25; Jn. 18:38–19:6)

6Pilatoou ag nawejã añopierr mag phiesta Pascua anʉm burrwai presonaan eem ãb parhoobam chi phoborpienau jeeubarm obeerpäaijeejim. 7Maagjerr aawai ich mag jaar woun ãb Barrabás anʉmta deeum khʉʉn dʉi cárcel deg preso sĩejim, ichdeu gobierno dʉi õor meeukhapiwia ag meeukhaa ee õor thõotarr gaaimua. 8Mag nemkhoopierr preso ãb sĩi obeerpäaijerr aawai chi phoborpien ãbam aig biirdʉwia ag na Pilatoou ichdeu aajerrjo preso ãb obeerpʉimkhĩir irig jajaau aajeejim anʉm. 9Ichig magbaawaita Pilatoou amag, —¿Pãrau judionaan Rey Jesuuta mʉrʉg obeerpʉipi nʉ? a jeeujim anaabá jũrr amag.

10Irua mag Jesuuta obeerpʉim khõsi sĩerran, phadnaan chi porkha nʉm khʉʉnau sĩi amachdeu Jesuu nem wau nʉrrarrjo pod nem waubam gaaimua iekkhõr wau nʉm iekhauta mag i pʉr dee wai nʉm khaphʉ sĩerr aawaita mag iekhajim aajem. 11¡Ih! Mamʉ Pilatoou mag iekhabaawai chará chi phadnaan porkha nʉm khʉʉnau sĩi warag õor wawikha thʉnʉʉujim anʉm, thumaam khʉʉnau ãba Barrabaata sĩi ich jãg weeupʉipi jajaau amkhĩir.

12Mag Barrabaata sĩi obeerpʉipim khõchkha nʉm ũrbaawai deeu Pilatoou, —¿Mag judionaan Rey anʉm dʉi mua jãgajuma? ajim anʉm.

13Magbaawai warag serereukhamua Jesús warre pakuls gaaita meerphepi jajaau aajeejim anaabá.

14Magbaa jũrr Pilatoou amag, —¿Pari khan nemta irua khaigba waujĩma ajim anʉm, pãrau mag warre i thõopi jaau nʉm?

Mamʉ irua magbaawai chará warag ich mag pakuls gaaita meerphepi jajaau aajeejim anʉm. 15Mag warag serereukhamjã pʉaba aawai, õor pom mag thʉnʉm jũrr ich dʉita meeukham ugua, chadcha am ipierr Barrabaata weeupʉipi jaaujim anaabá. Maimua chi Jesús jũrr wʉpi jaaunaa pakuls gaai meerphepʉimkhĩir warre amach jua ee deepʉijim aajem.

16Magbaawai chi soldaaunau Pilato sĩejem ag di ũjãrr chi Jesús warrwia soldaaun thum ãbam aig thʉ̃rkha aujierram aajem. 17Mag warrnaa, irig khajũa khichphe khĩir jũapinaa, ich agjo miu den werjũch phʉʉrthʉ waunaa, por gaai porsirkha jũapipʉijierram aajem. 18Mag jũapipʉinaa juau ogthom chi soldaaunaupai i wau iekhamamua, —¿Jãgpai chirʉ́ judionaan Rey? aajeejim anʉm.

19Mag wai nʉmua i porchajã paau wʉnaa, khĩirchajã ichoou thunaa, sĩi i wau nʉm iekhau i khĩirpheejã kanieu phõbkhakha aajeejim anʉm, amach rey anʉmua. 20Mag i dau aphʉʉ wau wai nʉʉ awia, amachdeu irig khajũa khichphe khĩir jũapitarr deeu ẽer auwia, ich khajũa chaardamta deeu jũapipʉinaa, pakuls gaai meerphepäain athaadejierram aajem.

Jesús pakuls gaai meerphepʉitarr

(Mt. 27:32-44; Lc. 23:26-43; Jn. 19:17-27)

21Mag Jesús pakuls gaai meerphepäain arrum ee, am khĩirphee woun ãb Simón anʉm ich phidag eemua ich diig urajim aajem. Mag woun Cirenepierr ajim aajem, Alejandro dʉi Rufo anʉm am aai. Chi soldaaunau mag Simón oobaawai jũrr ajués irigta Jesuu pakuls arrmaa atarr arrpijierram aajem.

22Mag ereu phobaadewi buchagdam Gólgota anʉmʉg arrjierram aajem. Maach meúan mag Gólgota anʉmʉn Porpá Durrsĩ a simʉu. 23Maig Jesuug vino mirra ee waaureu sim dopiju ẽkhajierram anaabá, khaparr aademua gaai machag thʉnʉm ãwatamkhĩir. Mamʉ Jesuu bʉ̃ʉrjã dobajim aajem. 24Mag dee nʉmjã doba abaawai ich mag pakuls gaai meerphepʉijierram anaabá. Mag meerphepʉiwia, khaíuta i khajũa wai sĩsiju khai awi, chi soldaaunau i khajũa jũajerr ʉ̃r phatkhon bar jemkha nʉmua amachpierr agdaujo gan aumajierram aajem.

25Mag amau i pakuls gaai meerphepäaiwai ya edaupherr garm las nueve thʉnaajim aajem. 26Mag i meerphe wai narr pakuls gaai i por ʉ̃r ẽsapdau phã sĩejim anaabá. Mamʉ mag nem khaigbam wautarr jaauju chukhu arr aawai sĩi “Judionaan Rey” a phã sĩejim. 27Mag i meerphebapʉim dʉi ĩchab agjo nem jĩgkhaajem khʉʉn numí amach khĩkhĩetdo i bigaau pakuls gaai meerphegkhapʉijierram aajem: ãb i juachaar gar, maagwai ãbakhai i juawe gar. [ 28Mag nʉm aiguin warrgarwe Ẽwandam i jaaumienau phã pʉarr gaai, “Chi khaigbam khʉʉn jãrr wai naaju” a iekhatarrjã thum chadcha ag eyaata ober sim.]

29Mag i pakuls gaai meerphe wai nʉm aig dich nʉm khʉʉnaujã i wau nʉm iekhau irig eerpanaa, ʉ̃iphʉʉrphʉʉrnaa, “Wa jãgʉm khabá, puan mag Aai i jeeujem dijã thum pogueupʉinaa deeu khãai thãrjuppaim ee eu dʉnʉʉuju aajerrta, 30jãg pua wir aig pʉchpai peerdʉ auwia jãg pakuls gaaimua eeg ʉʉrbabáma” aajeejim anʉm, dich nʉm khʉʉnau.

31Sĩi dich nʉm khʉʉnaujã irig mag iekha ereu dich thʉnaawai ich agjo phadnaan chi pornaanaujã Moiseeu Ẽwandam iek phã pʉarr jawaag chi machnaan dʉimua amach ee wir aigpai, “Bigaaum khʉʉnan peerdʉ autarrta jũrr wir aig ichpai chan pod peerdʉ auba sim” a iekha naajim anaabá, i waauwai. 32Magnaa ichigcha iekhamamua, —Israelam Rey, ¿pʉch khabá õor peerdʉ aumkhĩir Ẽwandamau pʉitarr? Magan pakuls gaaimua eeg ʉʉrbabaad anaajim aajem. Pʉ chadcha maar dakhĩir eeg ʉʉrbamʉn, maach daúacha oobaawai marau pʉ iek ʉkhaju anaajim anʉm irig.

Ich dʉicha mag ãba õor numí agjo pakuls gaai narr khʉʉnaujã irig iek khaigba iekha naajim aajem.

Jesús meetarr

(Mt. 27:45-56; Lc. 23:44-49; Jn. 19:28-30)

33Ich mag ed edausĩe thʉnʉm ee degolp edau khĩbaadem abarmʉn sĩi warre edaramjota joisijim anaabá. Mag khĩ thʉnʉʉ awia edau phʉʉibaajer las tres naata deeu edau aardʉbaadejim aajem. 34Ich mag edau khĩbaadem ee Jesuu thet äa a khitawia, “Eloi, Eloi, ¿lema sabactani?” ajim anʉm. Mag sim aig maach meúan: “Aay Ẽwandam, ¿khantheeta pua mʉ mʉg dau aphʉʉ chirʉmjã mʉrʉg oobamjoo aadema?” a simʉu. 35Magbaawai aig õor narr khʉʉnau Jesuu mag iekhabarm ũrbaawai jũrr amach khapeenag, —Keena, pãade ũrbat. Maguan warrgarm Ẽwandam i jaaumie Elías khararrta ich aig thʉ̃r simwai ajierram aajem.

36Magbaawai ãbmua khaphigbaadewia, putjo ũhũphe khitʉm gaai vino adchuchúu simta dorrdʉnaa aibeewi, pa gaai bʉʉrnaa, i i aig ʉa aujim aajem, ag gaaim bereu domkhĩir. Magnaa ichdeupai warm khʉʉnag, —Jãgnaan chad ideu sĩi ootarraugui ajim anʉm, daau chadcha Eliaau beewi i eeg jiirbapʉicheju.

37Pari mag nʉm ee deeu Jesuu thet äa a khitawia warre chaaupabaadejim anaabá. 38Magbarm bʉrre ĩchab Aai i jeeujem deg ierr dijã garcha put nem parrg sim eu wejorrta sĩi ʉ̃gthaamua eeg sʉrr abarmʉn warre jãrrcha thoophem numí jijirar joisijim anʉm. 39Mag Jesús äa awia meebaadem oobaawai chi soldaaun am capitán chi Jesús jiir wejom khĩirphee oo dʉnarrau, —Chadchata jãgan mʉg wounan Ẽwandam Iewaaugui ajim anaabá.

40Maig ĩchab ʉʉinjã naajim aajem. Makhʉʉn ʉʉinau sĩi warppaimua eerpa durruu ajim anʉm. Chi maig narr khʉʉn, María Magdalena ajim aajem, ãb agjo María a thʉ̃r sĩerrpa. Mag María Santiago ãd anaa ĩchab José ãd ajim aajem. Maig deeum ʉʉi Salomé anʉmjã dʉi sĩejim aajem. 41Ich makhʉʉn ʉʉinauta i Galilea ee nʉrraawaijã i dʉi wenʉrrʉmua irua nemdam iigwaijã thumaa irig au dedee aajeejim aajem. Maagjerr aawai Jerusalenagjã i dʉi beewia dʉi aig naajim anaabá. Pari makhʉʉn appaijã khaba, mag tag ʉʉin khapan am dʉi beetarr khʉʉnjã ĩchab aig naajim aajem.

Jesús aukhertarr

(Mt. 27:57-61; Lc. 23:50-56; Jn. 19:38-42)

42Amau mag i dau aphʉʉ wai kheumaa arran sĩi nem thum khĩir khaug sĩiujem ed ajim, jua ʉ̃i kheeujem noram. 43Mag ya kheeuraa aadem ee, woun ãb judionaan Asamblea eem José Arimateapierr majim aajem, Pilato aar. Mag woun ĩchab chi thethem ajim anaabá. Mag wounaujã ĩchab Ẽwandamau maach peerdʉ aumkhĩir pʉiju jaaujerr beeju anʉmta nʉajeejim aajem. Ich mag wounauta Pilato aar mawia 44irig jeeuwimajim aajem, chi meemdam arrwi aukheraan maag. Mag Jesús meebaadem a ũrbaawai Pilato warre jʉ̃gderraa aadejim anʉm, irua khĩirjuawain Jesús meeba agtha iiu sĩeju aai simta mag meebaadem a ũrbaawai. Magbaa Pilatoou chi capitán mag dʉi meerphe nʉm aar sĩerrjã thʉ̃rpʉijim aajem, magʉg khap jeeu oog. 45Maimua chi capitán beewia chadcha meebaadem a jaaubaawai Pilatoou Joseeg arrmkhĩir jaaujim aajem. 46Magbaawai Joseeu dĩesdam per auwia, mawia, mag Jesús chi meemdam pakuls gaaim eeg jiir aunaa agua ajapha pʉreupʉijim aajem. Magnaa ag nawe jẽbdi durrbʉ khõpag ee chi khorm sĩerr ee aukherwia chi jẽbdi i ee ajapha mok por pom simua joothʉ pʉajim aajem. 47Mag chi binaandam jẽbdeg aukherbarm ʉʉin numiim khʉʉnau warppaimua oo naajim aajem. Makhʉʉn ʉʉin ãb María Magdalena ajim anʉm, maimua ãbkhai José ãd agjo María a thʉ̃ʉrjerr ajim aajem.

Currently Selected:

San Marcos 15: noaA

Highlight

Copy