San Marcos 14

Jesús pʉr awaag ibeptarr

(Mt. 26:1-5; Lc. 22:1-2; Jn. 11:45-53)

1Jesuu mag ich khapeenag ich mawia deeu beeju jaauwai nemkhoo pomaam burraag khãaidam numpai waaur sĩejim aajem. Mag phiesta ĩchab Pascua a thʉ̃ʉrjem; ajapcharan maar meeun judionaanau pan sĩi ich jãg levadura chukhu wauwia seman enter khoojem ag semanma. Mag phiesta burrju khãai khapan khaba waaur nʉm ee, phadnaan chi pornaanau Moiseeu Ẽwandam iek phã pʉatarr jawaag chi machnaan dʉimua ãba biirdʉwi khĩirjug jʉr naajim anaabá, nemdam bʉ̃ʉr abarm gaaimua Jesús imeraa pʉr auwi thõopʉyaag. 2Amach odegpain mag i thõopʉiju khĩirju naajieb mamʉ, jũrr tagam khʉʉnau, “Keena, mʉg nemkhoo ee maadeu i thõoba sĩuju. Magba akhiin õor pom mʉg wejom maach dʉita meeukhaju” aajeejim anʉm.

Ʉʉirau Jesús por ee jʉ̃gdeeu chootarr

(Mt. 26:6-13; Jn. 12:1-8)

3Mag nʉm ee Jesús Betania phobordam ee mawi woun Simón anʉm deg thach kho sĩejim aajem. Ich mag Simón ibʉʉr wauwi “phĩe paraa khitarr” a thʉ̃ʉrjeejim aajem. Maig i thach kho simta, ʉʉi ãb jʉ̃gdee didam durrkhudau alabastro anʉm den boteedidam wau khitʉm dʉi dubchejim aajem. Mag ee jʉ̃gdee narrdo anʉm den thũpaaga sim ipir aibeejim aajem. Mag jʉ̃gdee khĩir nem parhẽpag sĩerrʉm. Mag sim dʉi jua ee dubchewi, chi boteedidam o khõorpnaa, õor dakhĩir Jesús por ee choopʉijim anaabá. 4Mes gaai i dʉi ãba thach kho narr khʉʉnau amach daúa mag jʉ̃gdee parhẽpagkhamta sĩi i por ee choobapʉim oobaawai ãaur khʉʉnau wir aigpai amach khapeenag, —Keena, ¿khantheeta jãg jʉ̃gdee parhẽpag simta sĩi jãg ãr choobarma? ajierram anʉm, 5jãg sĩi par ãr chooju khãai, parhẽphʉ perpʉiwia ag phatkhonau ʉu dau aphʉʉm khʉʉn khĩirdam jãsenkhaju aai sĩerrtá.

6Mag bigaaum khʉʉnau magbaawaita jũrr ich Jesuu amag, —¿Khantheeta pãrau mag ʉʉi khĩir naau iekha nʉma? ajim anaabá. Jãgbarmua irua mʉ dʉi ʉu abarm khabahab; ideu i sĩi khajapha sĩubat ajim anʉm. 7Dau aphʉʉm khʉʉndaman pãrau pãach ee ich jãg oo wai wenʉrrajugui ajim anʉm. Maagwai pãachdeu nemdam deem khõsim aig pãrau amag deeju aai naabahab; pari mʉ chan pãrau pãach ee ich mag mʉ oo wai wenʉrrabaju. 8Mʉg ʉʉirau ichdeu khĩirjuawai ajapcha simjota abarbahab mʉ dʉi. Mʉg mʉ por ʉ̃r jʉ̃gdeeu choobarmua mʉ meebaadeewai aukheraan arrju nawe ya irua mʉ kha phuur sim khabahab ajim anʉm. 9Magnaa, Ĩs mua chadcha pãrag mag chirʉmgui ajim anʉm: Mʉg atag pawiajã durrpierr Ẽwandamau õor peerdʉ aaujem iek jaau wenʉrrʉm dʉi ĩchab mʉg ʉʉirau mʉ dʉi mʉgbarmjã jaaub khaba jaauju. Mag, ooba arr khʉʉnaujã ĩchab i iigjeejugui ajim anʉm.

Judaau Jesús perpʉitarr

(Mt. 26:14-16; Lc. 22:3-6)

10Mag phadnaan chi pornaanau Moiseeu Ẽwandam iek phã pʉatarr jawaag chi machnaan dʉimua ich Jesús dakhãu wai nʉm ee, ich dʉi doce wenʉrraajerr eem ãb Judas Iscariote a thʉ̃r sĩerrau phadnaan chi porkha nʉm khʉʉn dʉi iekhaan majim aajem, jãga ichdeu amag Jesús pʉr deeju a jawaag. 11Maimua mawia chadcha Judaau amachig Jesús pʉr deeju a ũrbaawai chi phadnaan porkha nʉm khʉʉn oneeu phobaadewia chi Judaag phatkhonpa deeju ajierram anaabá. Ichig mag phatkhonpa deeju abaawai chará ãba i imeraa pʉr auwia warre amag amach jua ee deeju khĩirjugpaita wai sĩsijim anaabá.

Jesús ãbmiecha ich khapeen dʉi thach khotarr

(Mt. 26:17-29; Lc. 22:7-23; Jn. 13:21-30; 1 Co. 11:23-26)

12Pan levadura chukhu wauwia warrpem phiesta burr nʉm edcha judionaanau nemkhoo jaram ithee ovejadam thõowia edau kheubaadeewai khoojem. Magua ich mag edcha Jesús khapeenau irig, —¿Jampaita marau pʉ na phiejãb wauwimaju aai nʉma? ajierram anʉm.

13Mag ichig jeeubaawai ich khapeen eem numí ich aig thʉ̃rkha auwi pʉyaagpamua amag, —Pãar maar na Jerusalén phoborog ereubaadet ajim anʉm. Nau pãar ya phobor ee paaukhabaimaawai pãrau woun ãb dothũr ee do joi arrum ooimajugui ajim anʉm. Mag woun dothũr dʉi mam oobaawai i ẽudee wetwi, 14i dubbaimam deg dʉi dubwia, chi dikhʉʉg mʉ imeerba, “Maestroou pʉrʉg jeeupijim, ¿jamta í ich khapeen dʉi ãba nemkhoo jaram thach khoju aai chirʉ́?” a jeeubat ajim anʉm. 15Magbaawai mag wounau pãar ʉ̃gthaa warrwia dijã pooma sĩi wajappha jar sim pãrag jaauju. Maigta phiejãb wauwia sĩi maar na wajapha nem khĩir khaug sĩubat ajim anʉm, mag ich khapeen ichdeu pʉiju khʉʉnag.

16Jesuu amachig magbaawai, chadcha i ipierr Jerusalén phoborog ereuwia ooimaawai, chadcha amachig jaautarrjo ooimajierram anaabá. Mag oobaimaawai maig mag nemkhoo jaram ovejadam wai narr wauwia sĩi i baraata oo nʉisijim aajem.

17Mag ich na numí pʉitarr aawai ya kheeuraa aadem ee, tagam khʉʉn dʉi barjim aajem, warm khʉʉnau phiejãb wau wai narr aar. 18Mag barbaimaawai thach thoikhawia ya ãba mes gaai kho nʉmua Jesuu amag, —Keena, mua warre pãrag jaaukhimgui ajim anʉm: Mʉ cha iekha chirʉm iekhau maach khapeer mʉig maach dʉi ãba thach kho simuapai thethem khʉʉnag mʉ pʉr deejugui ajim anʉm.

19Jesuu amachig mag iekhabarm ũrwia warre okhĩirjuu nʉisijim anaabá. Mag okhĩirjuu nʉm iekhau jũrram khʉʉnau irig jejeeu aajeejim anʉm, chijãguata magju khap aag awi. 20Mamʉ par mag ichig jejeeukhamjã amag chi thʉ̃rjã jaauba, sĩi, —Pãach mʉg doce nʉm eem ãb mʉ kho chirʉm thep ee ich panau sĩkho sim wounauta mʉ khaibag waujugui ajim anʉm. 21Mʉ dʉi magbarmua Emkhooi Iewaan Ẽwandam iek phã sim gaai jaau simjo ich ag eyaata obebergmam. Mamʉ ¡eh, apkhiitʉ chi mag mʉ perpʉi sim woun! Ante magju khapnaa thaababa arr amuan ʉucha akhamgui ajim anʉm.

22Maimua mag iyʉʉ thach kho nʉmua Jesuu pan jua ee auwia, Ẽwandamag ʉu ajim anaa khõreunaa amag ʉapʉinaa, —Mʉg pan khobat. Mʉ mʉ morougui ajim anʉm.

23Maimua ich agjo jarrdamjã jua ee auwia, ag paar Ẽwandamag ʉu ajim anaa, deeu amag ʉapʉijim aajem. Magbaawai thumaam khʉʉnau ag eem dojierram aajem. Mag ʉapʉiwia ich Jesuupai magjim anʉm:

24—Jãg dobarmʉn mʉ bagau, warrgarwe Ẽwandamau õor dʉi iek deeju aajerr. Mamʉ mʉg iekhan iek iiuriugui ajim anʉm. Mʉg pãar ithee mʉ bag mʉg vinojo khitʉm ãrbarmuata Ẽwandamau, ĩsmua atagan chadau pãar peerdʉ wenʉrraju aai nʉm a jaau simgui ajim anʉm. 25Maimua, Mua warre pãrag jaaukhimgui ajim anʉm: Mʉg vino dobarm aigmua mua chan tag doba, ãba Ẽwandamta thumaam khʉʉn Porkha sĩsim edta deeu ag khãyaujã ajapcharamta dojugui ajim anʉm.

Jesuu jaauwai Pedroou bʉ̃ʉrjã i khaugbam aju jaautarr

(Mt. 26:30-35; Lc. 22:31-34; Jn. 13:36-38)

26Jesús mag ich khapeen dʉi ãba mes gaai iyʉʉ thach kho naawia, meukhaarjã Ẽwandam iek Salmos anʉm gaaim auwia, Olivo durrsĩig ereujim aajem. 27Mag wetwia mam pabaimaawai ich Jesuu amag magjim anʉm:

—Nau pãach thumaam khʉʉnau mʉ mʉch appai barpʉaju. ¿Jãgwi mag chirʉ́? Ich warrgarwe Ẽwandam i jaaumienau Ẽwandam iek phã pʉarr gaai ich mag aju a sĩewaima. Mag amau phã pʉarr gaai jaauwai, Ẽwandamau ʉdʉraa chi nemchaain pap õrag thõopiju a sim, mʉ igwia. Mag mʉ thõopʉyaag pʉr athaawai pãar sĩi nemchaainjo parhoob pãach papjã khaugba, chawag aaidʉju a phã simgui ajim anʉm. 28Pari mag mʉ thõopʉiwiajã deeu iiu phiidʉwia mʉchta pãar na majugui ajim anʉm, Galileaag. Mamta deeu pãar dʉi oojugui ajim anʉm ich khapeenag.

29Jesuu mag iekhabaawai Pedroou irig magjim anʉm:

—Mʉ khapeenau pʉ ogdʉwia chawag aaidʉtkhawiajã mʉ chan bʉ̃ʉrjã pʉ aigmua chawag ogdʉbamgui ajim anʉm.

30Pedroou ichig magbaawai Jesuu irig, —Pʉ mag iekha chirab mamʉ, cha mʉ iekha chirʉm iekhau nau ãspajuag ãthãrr biek numí bĩeju nawe õrau pʉchig jeeubaawai pua biek thãrjup mʉ khaugba chitʉm ajugui ajim anʉm ichigcha.

31Magbaa Pedroou jũrr irig, —Pʉ thõbaimam aar thõimaju awiajã mua chan pʉ kha ogdʉbajugui ajim anʉm.

Pedroou mag ijẽjẽb khaawai tagam khʉʉnaujã ich agjo, “Maraujã pʉ kha ogdʉbaju” a iekha naajim aajem.

Nemjĩirdo Getsemaní anʉm ee Jesús oraatarr

(Mt. 26:36-46; Lc. 22:39-46)

32Jesuu ich khapeen ich dʉi phe arrwia nemjĩirdo Getsemaní anʉm ee barwia amag, —Mʉ chum Ẽwandamag jewaan mamich, pãar mʉig nʉisit ajim anʉm tagam khʉʉnag.

33Magpet awi thãrjuppai ich dʉi phe arrjim aajem: Pedro, Santiago maimua Juan. Maimua amach appai aphobaadem aig, Jesús nem okhĩirjuuga aademua gaai machaaga aadejim aajem. 34Ich magbaadeewai ichdeu amag magjim anʉm:

—Mʉʉn degolp gaai machgau okhĩirjuuga aadem; ãba mʉch thõjuuta khĩirju chirʉmgui ajim anʉm. Pãar mʉig nʉisit, mamʉ daukhana abat. Oob khãimiet ajim anʉm amag.

35Magpet awi ichin ag atgajãrpai kanieu phõbkhanaa, jẽb gaai dagau dʉrnaa, Ẽwandamag jeeumamua i gaai machag ãwatpibaju akhiin ʉu akham a jeeumajim aajem. Magnaa, 36—Tata, pʉ ithee chan bʉ̃ʉrjã phithurm nem chukhum. Pua khõs chirʉm khai mʉ peerdʉ athá ajim anʉm, mʉ dau aphʉʉ aju nawe. Pʉrʉg mua jeeu chirʉm, mamʉ mʉchdeu khõsi chirʉmjo khaba pʉchdeu khõsimjota abá mʉ dʉi a jeeumajim aajem.

37Mag jeeu sĩewi am aig beewi oocheewai am khãi nʉmta oochejim anaabá. Magbaawai jũrr Simonagta, —Pʉʉn sĩita khãi chirabma. Pʉ chan oradam ãbjã pod daukhana aju khabahab ajim anʉm. 38Sĩi jãg khãi nʉʉ aju khãai Ẽwandamagta jeeubat ajim anaabá, dosãtag ʉdʉʉr pãach thʉ aupim ugua. Mua oowai pãach odiiwan chadcha pãrau jeeum khõsi durrumta pari daphokgauta podba nʉmgui ajim anʉm.

39Mag iekha pʉawi deeu am aigmua petajim aajem. Maimua Ẽwandamag ichdeu nacha jeeu sĩerrjo ich ag iekpai iekhamamua deeu jeeumajim aajem. 40Mag jeeu sĩi awia deeu oon beewaijã, i khapeen daphokgau podjã dau ẽeba, sĩi khãidʉtkha thʉnʉmta oochejim anaabá. Mag daphokgau podjã dau ẽepiba thʉnaawai Jesuu amachig iekhabaichemjã pod i iek ʉkhaju khaugba naajim anʉm. 41Mag biek thãrjupam gaaijã agtha khãidʉtkha thʉnʉm oobaicheewaita deeu amag, —¿Agtha pãar sĩi khãai gaaita nʉ? Khãigap nem pʉabat ajim anʉm. Pekau pom sĩsidʉm khʉʉnag mʉch chi Emkhooi Iewaa pʉr deeju ora pabaichebahab. 42Phiidʉtkhabat, maimua maach khapeen aar wettarrau ajim anʉm. Mʉ oomapham khʉʉnag mʉ pʉr deeju wounan ya dakpa urumgui ajim anʉm.

Jesús pʉr arrtarr

(Mt. 26:47-56; Lc. 22:47-53; Jn. 18:2-11)

43Jesús agtha mag iekha dʉnʉm ee, ich khapeenpai mag doce narr eem ãb Judas anʉmta õor pochag urajim anʉm. Mag wedurum khʉʉnan ãaur khʉʉn sĩi espaar jua panhapha bee thʉnaawai tagam khʉʉn sĩi pa dʉijã bee thʉnaajim aajem. Makhʉʉn phadnaan chi porkha nʉm khʉʉnau Ẽwandam iek jawaag chi machnaanau tagam khʉʉn jooin chi pornaan dʉimua pʉitarr khʉʉn ajim aajem. 44Mag chadcha õor pochag beewi ya chi Judaau ag nawe, “Nau mua mawia pãach dakhĩir khĩir ʉ̃ʉ athamta pʉr auwia athaadet” a jaau wai sĩerr aawai, 45chadcha ich dʉi wenʉrrʉm khʉʉn dakhĩraa ichdeu jaautarrjo Jesús dʉi ãba dʉnʉʉuwimawia irig, “Maestro, ¿jãgpai chirʉ́?” anaa i khĩir ʉ̃ʉ athajim anaabá.

46Magbarm bʉrre chi soldaaunau Jesús phʉʉr thuur auwia i pʉrphobaadejim aajem.

47Mamʉ chi khapeen i dʉi wenʉrrarr khʉʉnau amach dakhĩir mag amach khapeer pʉrphobaadem oobaawai ãbmua ich espaar chi baindegam sʉrr a jẽu aunaa waa phadnaan thumaam khʉʉn por ag chog kachta bis abarmʉn oorthu werppʉijim anaabá. 48Mag ich pʉrphobaadeewai Jesuu amag, —¿Pãrau oowain mʉʉn sĩi õor nem jĩgkhanaa õor thõomiejota chirab ajim anʉm, jãg pãrau sĩi mʉ aig jua ee jierrnem panhappai beeg ithee? 49Ag na ed eepierr pãrag mua Aai i jeeujem deg Ẽwandam i jaaujeewai bʉ̃ʉrjã pãrau mʉ pʉr auba arrta ĩsta chadcha pãrau mʉ pʉr auju ed ajimgui ajim anʉm. Pari pãrau mʉ dʉi mʉgbarmʉn, jãan mʉ igwia ich Ẽwandam iek phã sim gaai jaau sim thumaa ich ag ee obeberg mamkhĩirta chadcha mʉgbarmgui ajim anʉm amag.

50Chi khapeenau mag amach dakhĩir amach Por pʉrphobaadem oobaawai tag irigjã ooba, sĩi warag khaphig phobaadewia ich appai barpʉajim anaabá. 51Mamʉ mag amau ich appai i werpʉawia athaadem ee, ẽwan ãb sĩerrauta sĩi borrjooupai opʉʉrnaa dʉi i ẽudee maa ajim aajem. Mamʉ chi soldaaunau mag woun dʉi mam oo athaawai i pʉr awaag ẽkha naajim anʉm. 52Pari mag ich gaai pʉrbaichee sĩi warag am jua ee chi borrjo jẽu pʉawi ich jãg mor kharr khaphigbaadejim anaabá.

Jesús judionaan Asamblea ee warrtarr

(Mt. 26:57-68; Lc. 22:54-55,63-71; Jn. 18:12-14,19-24)

53Soldaaunau mag Jesús pʉr auwia ãb mag phadnaan thum thʉnʉm khʉʉn porkha sim aar warrjierram aajem. Mag mam i wai dubphobaadeewai aig pos aimajierram anaabá: tagam khʉʉn chi phadnaan porkha nʉm khʉʉn, judionaan Asamblea eem chi pornaan, maimua agjo Moiseeu Ẽwandam iek phã pʉarr jawaag chi machnaanpa thum ãba. 54Mag i pʉr athaadem ẽudee ĩchab Pedroou sĩi warppaimua oopʉpʉig mawia phadnaan por sĩejem ag di ũjãrr dʉi dubwi jupimajim aajem, guardianaan Aai i jeeujem di thʉajem khʉʉn bigaau. Mag jupimawi i iek õt uu thʉnʉm bigaau dʉi chi guardianaanpa ãba õt khãai oo chirsijim aajem.

55Maagwai phadnaan chi pornaanau judionaan Asamblea eem khʉʉn dʉimua chi Jesuu nem wauba arrta seukha i gaai thʉpʉiju ẽkhaajeejim anaabá, magʉm gaaimua i thõopäaig. Mamʉ chadcha irua bʉ̃ʉrjã nem khaigba wauba sĩerr aawai 56parii i khaibag waupi jaau nʉm khʉʉnaujã seukha nem ĩgkham khõchgau amach iekpai parhoob jaaubaadephʉmjã pod i pʉr auba aajeejim aajem, mag ihãbajã khaba sĩi aaiphur nem jaauphobaadep aawai. 57Warm khʉʉnau mamagkham ee, jũrr deeum khʉʉn bʉjãau paaukhabaadewi chi thethemnaanag ich khĩircha, 58—Marau maachdeucha i iekha sim ũurwain, irua mʉg Aai i jeeujem di õrau da eu auba arrjã sĩi thum pogueupʉiwia, õor juajã igba, khãai thãrjuppaim ee deeu eu dʉnʉʉuju a iekha sim ũrjimgui aajeejim anaabá jũrram khʉʉnau.

59Mamʉ par jũrram khʉʉnau mamagkhamjã ihãbajã deeba, sĩi warag maadeujã khaugbata jaauphobaadejim anʉm.

60Magbaa chi phadnaan porou sĩi mag õor pos thʉnʉm ee phiidʉbaadewi Jesuug, —¿Pua am iek ũr chirʉ́? ¿Khan jãgwi jãg pʉ iekhamapha sĩ? ajim anʉm. ¿Pua chadcha mag iekhajĩ wa iekhabajĩ? Jaaubá ajim anʉm.

61Mamʉ magʉmjã Jesuu bʉ̃ʉrjã jʉ̃ʉjã aba, sĩi warag khĩuu sĩsijim anaabá. Mag ich iek ʉkhaba abaawaita deeu chi phadeu pʉaba jeeumamua irig, —¿Pʉʉta chadcha Ẽwandam Iewaa ichdeucha jʉr auwi pʉiju jaaujerrá? Marag jaaubá ajim anʉm irig.

62Magbaa Jesuu, —Eera, chadcha mʉʉugui ajim anʉm. Mʉg atag pãrau mʉ Ẽwandam thumaam khʉʉn khãaijã jua theeg ʉ̃rpai sĩerrʉm bigaau i juachaar garcha jup chirʉmjã oowi ʉ̃gtharmua edjã baug ee urumjã pãach daúacha deeu mʉ oobajup ajim anʉm.

63Jesuu ich dakhĩir mag iekhabarm ũrbaawai chi phadnaan porou ich khajũa mor gaai jũa sĩerrta sʉrr abarmʉn warre jẽbpʉijim anaabá, khĩir machgau. Magwia ich khapeenag, —Keena, ¿khan atchata maadeu deeum khʉʉnau jaau nʉmta ũrm ig nʉma? ajim anʉm. 64Ya irua ich iiucha jaau sĩebahab ajim anʉm. Pãrau thumaam khʉʉnau i iekhabarm ũrbarm, chadcha irua Ẽwandam dau na khaigba iekhabarm. ¿Pãrau mʉg woun dʉi jãga aju khĩirju nʉ keena? ajim anʉm ich khapeenag.

Magbaawai thumaam khʉʉnau ihãba, —Jãan iekkhõr pom sĩewai ichiita thõopʉijugui ajierram aajem.

65Magphobaadewi ãaur khʉʉnau warag i khĩir gaai ichooujã thunaa, putiujã i dau phãarjʉ̃naa, i gaai mas waunaa, juajãaujã khĩidadcha deejeejim anʉm. Magnaa ogthom irig, —¿Khaíuta pʉ gaai mas deejĩ? Magan jaaubá aajeejim anʉm.

Mag jũrram khʉʉnau i mag wai naawai chi Aai i jeeujem di thʉajem guardianaanaujã dʉi i khĩidadcha deejeejim aajem.

Pedroou bʉ̃ʉrjã Jesús khaugba chitʉm a iekhatarr

(Mt. 26:69-75; Lc. 22:56-62; Jn. 18:15-18,25-29)

66Mam ierr Jesús dʉi mamag khaawai Pedro iek i di ũjãrr chirajim aajem, daaugajãr. Maig i chirʉmta i aig ʉʉi ãb beejim aajem, phadnaan thumaam khʉʉn porkha sim ag chog. 67Mag ʉʉirau Pedro õt khãai sim oobaicheewai i khĩir eerpa wai dʉnʉʉ awia irig, —Pʉjã ĩchab Jesús Nazaretpierr dʉi nʉrraajem khabahab ajim anʉm.

68Ichig magbaawai i iek irua, —Mʉ khabam, mua khaugbam pua khaita jaau sim khai a chirajim anʉm.

Magwia warag dawag mawia puertdi daaugajãrm aar i oothẽu chiirbaimamta, ãthãrrta kekerekee aadejim aajem. 69Maimua deeu ũmaai chi ʉʉirau ichdeu i oobaawai aig õor thʉnarr khʉʉnag, —Chamʉg woun chadcha Jesús dʉi nʉrraajerr khabahab ajim anʉm.

70Mag, biek numiim gaaijã Pedroou irua magʉm Jesús khaugba chitʉm ajim anʉm. Mamʉ ag khur nʉʉpai awia deeu ũwaai aig narr khʉʉnau, —Chadcha pʉʉn ĩchab Jesús khaperau. Pʉ Galileapierr khabahab ajim anʉm. Maguata pʉ iekha sim ũurwaijã pʉ iek gaai merag chukhu sĩsim khaphobaadejim anʉm irig jũrram khʉʉnau.

71Pari ichig mag nʉʉ paawai Pedro iek warag irua chi Jesús igwia, —Chadcha mua magʉm woun khaugab chitʉmta mʉrʉg mag naab. Mʉ seukha chirʉm khai, Ẽwandamau mʉ gaai jua khʉaba deeju aai simgui a chirajim anaabá.

72Pedroou mag irua chan bʉ̃ʉrjã Jesús khaugba chitʉm a iekhabarm ee, deeu ũmaai chi ãthãrrta kekerekee ajim anaabá. Mag ãthãrr biek numí bĩe dichdimaawaita Pedroou warre Jesuu ichig iekhamatarr khĩir eyaa aadejim anʉm, “Ãthãrr biek numí bĩeju nawe pua biek thãrjup õrag bʉ̃ʉrjã mʉ khaugba chitʉm a iekhaju” ichig Jesuu jaautarr. Ichig magtarr thumaa khĩirju athaawaita warre okhĩirjug machag aademua icharaucha o jãsehne bĩe chirʉʉ ajim anaabá.

Currently Selected:

San Marcos 14: noaA

Highlight

Copy