San Marcos 13

Aai i jeeujem di õrau pogueupʉiju Jesuu jaautarr

(Mt. 24:1-2; Lc. 21:5-6)

1Mag Aai i jeeujem deg sĩewia oberbaadeewai i ogdʉba wenʉrraajerr khʉʉn eem ãbmua chi Jesuug, —Maestro, pʉde oobá ajim anʉm, mokpor dapkhamua sĩi di ooimʉ joothʉthʉʉd eu dʉnʉm.

2Magbaawai Jesuu irig, —Ar jãg di dap dʉnʉnʉidʉm pua oo chirabá; jãg thʉnʉm chan mok por ãbjã ãbam ʉ̃r ich jãg ajapha joothʉthʉʉd sĩerrabam. Jãg thʉnʉmʉn sĩi thumaa õrau pogueupʉijuuta jãg dʉnʉmgui ajim anʉm.

Ẽwandamau maach i agkhaimʉʉ paawai nem oomaju

(Mt. 24:3-28; Lc. 21:17-24; 17:22-24)

3Maigmua ereubaadeeu mag Aai i jeeujem di khĩirphee durrsĩ Olivo anʉm gaai sĩeimajim aajem, ich khapeen dʉi. Maimua barwi ya i jẽkhʉt jupbaimaawai Pedroou, Santiago, Juan maimua Andrés dʉimua amach jayapam khʉʉnau irig jeeumamua magjierram anʉm:

4—Pʉ iek mag jãg mokdau joothʉthʉʉd thʉnʉm thum õrau pogueupʉiju anʉm, ¿ma jãagwaichata magjuma? ajim anʉm. ¿Khan jãg nʉm gaaimua cha pʉchdeu jaau simjo Ẽwandamau ijaaurjo oopijuma ajierram anʉm, mag Aai i jeeujem di pogueupʉimʉʉ pam?

5Magbaawai Jesuu amag, —Magan mua pãrag jaaukhimgui ajim anʉm. Maimua jaaubaadewia, Keena, khĩir khaphʉ wenʉrrathʉ̃; oob chikhamnag pãach ʉdʉraa khũgurpimiet ajim anʉm. 6Mua pãrag mag chirʉmʉn, mʉg atag paawai õor khapankham khʉʉnau amach iekpai mʉ iek gaai thʉwia, “Mʉʉta ag Cristoou Ẽwandamau pʉiju aajerr” awia, õor pom khũgurmaju aawaita mag chirʉmgui ajim anʉm. Pari makhʉʉnau pãachig magwia khãijã oob pãrau am iek ʉkhamiet ajim anaabá, am wawimamua.

7’Juurhi phiidʉju theega jajaaukhamjã pãrau ũrjugui ajim anʉm. Mamʉ pãachdeu mag ũurwai oob jãphierrmiet. Ichiita jerrba chadcha ich mag aju. Magjup mamʉ ma chan agtha Ẽwandamau pãar i agkha nʉm khabamgui ajim anʉm. 8Magbaadem dʉi ĩchab durr mʉg wejom ee amach eepai jũrr durr chaauram khʉʉn dʉi werbʉjurau, amachta jũrr chikhamnaan khãyau ʉ̃rpai am khõchgau. Mag nʉm dʉi ĩchab durrpierr ʉʉur theega duuimam dʉi jãdau theegjã burrju. Mamʉ mag nʉmʉn sĩi warrpem Jooirau õor dau aug waupi simʉugui ajim anʉm.

9’Pãach mordam wir aig ʉʉrkhabathʉ̃. Thethem khʉʉnag pãar pʉr deewi judionaan Ẽwandam iek jaaujem degjã pãar gaai amau mas deemaju. Mʉ gaaimua pãar khaibag waumkhĩir amau pãar gobernadornaan aarjã warrwi reinaan aarjã warrmaju. Mamʉ magʉm khʉʉn aar pãar warrwaita warag pãrau mʉ iek jaauwímʉcha amag jaaujugui ajim anʉm. 10Ẽwandamau mʉg durr i agkhaju nawe mʉg õor peerdʉ aaujem iekhan ichiita thumaa durr warpham magwe meupierr jaaudubjugui ajim anʉm ĩchab. 11Mag pãach pʉr aauwai, thethemnaan khĩirphee iekhaagpaawai, oob pãrau, “¿Khan ata mʉ iekhajuuta mʉgbaadema?” a khĩirjumiet ajim anʉm. ¿Khan jãgwi mua mag chirʉ́? Ya maig chan pãar pãach khĩirjugdamaupai iekhabam; magbaadem aiguin ich Ẽwandam Akharauta pãrag iekhamkhĩir khĩirjug deeju aawaita mua mag chirabahab ajim anʉm. 12Mag jaran wir aig khod ãbam khʉʉnjã chi ʉkhaba sim garmua ʉu mʉ iek ʉkha kherʉm thethemnaanag jaaupʉimaju, ich khodpai wir aig thõomkhĩir. Amach dennaanjã mʉ gaaimua thõomkhĩir thethemnaanag jaaupʉimaawai chi dennaanaujã ich agjo ajugui ajim anʉm, amach chaain dʉi wir aig. 13Pãachdeu mʉ iek ʉkha durrum gaaimuajã thumaam khʉʉnau pãar oomapha aju. Mamʉ magʉm gaaimua phithur dau aug wau nʉmjã igba mʉ dʉi ubʉ kherʉmʉn ʉu peerdʉjugui ajim anʉm.

14’Ẽwandam i jaaumie Daniel khararrau jaautarrjo, Aai i jeeujem deg ierr phadnaankha nʉm khʉʉnjã dubba aajem aarta woun ãb beewia ichta maig ierr sĩeichem oobaawai, Judea durr nʉm khʉʉn pabʉ ee durr dapag ee dʉrbat ajim anʉm. (Mʉg iek phã sim gaai oonaa thʉ̃r simua wajapha khaphʉ abá.) 15Ich maagwai jua ʉ̃ʉiwai ich diheu ʉ̃r khãijã sim khai, ich nem phe awaan awi oob tag ierrag dubam. 16Wa magba di chaaur ich phidag ee khãijã sim khai, oob tag degag mam, ich khajũajom khãijã jʉraan. 17Mamʉ ¡eh, apdurr ajim anʉm, magbaadem jaar ar ʉʉin jõor khitheem khʉʉn, maimua ĩchab ʉʉin ar chaaindam daumeraa jũd dopi wai durrum khʉʉn! 18Magju nawe pãrau Ẽwandamagta jeeubat ajim anʉm, eeu degolp magbaadewia edau khõrg jaar khãijã pãach dau aphʉʉ wenʉrradukham. 19Mag jaarta wajappha õor dau aug waujupa. Mag jaar õor dau aug waujujo chan Ẽwandamau mʉg jẽb ompaaju nawejã ooba, ni ag khurjã agjo chan abaju ajim anʉm. 20Mamʉ magbaadem ich Ẽwandamau bʉ̃ʉrjã khãai eeg bʉchdʉ auba ich mag warag apikhiin, ni ãbjã peerdʉbaju. Pari ar ich iek ʉkha nʉm khʉʉn daupigau, irua khãai khapan deeju atarr ʉu magcha deebajugui a jaaumajim aajem.

21’Magbaadem ee õrau pãachig, “Oobat, chamʉʉta warrgarwe Ẽwandamau pʉiju aajerrauwai” aawai, oob ʉkhamiet. Wa magbam khai, “Ar simta ichiuwai” aawaijã, oob ʉkhamiet ajim anʉm. 22Mua mag chirʉmʉn amach iiupai amta Ẽwandamau pʉijim anʉm khʉʉn dʉi Ẽwandam i jaaumien anʉm khʉʉnjã sĩi seukha chikham khũgur wenʉrraju aawaita mag chirʉmgui ajim anʉm, khap amkhĩir. Makhʉʉnaun chadcha Ẽwandamauta amach pʉijim amkhĩir, ag na õrau nem ooba aajempa õor dauderraa wau wenʉrraju. Mag nem wau wenʉrrʉmua ich Ẽwandamaucha jʉr auwi ich iek ʉkhapi autarr khʉʉnpa khũgur ẽkhajugui ajim anʉm. 23Magnaa amag, Mua ya pãrag jaaubarmgui ajim anʉm, magju nawe khap amkhĩir; maagwai pãrag mʉch beeju nawe khĩir khaphʉ abat a chirʉmgui ajim anʉm.

Jãga Emkhooi Iewaa deeu beeju

(Mt. 24:29-35; Lc. 21:25-36)

24’Mag õor ajappha dau aug wau dichtarr khur ĩchab ãsdawam edaujã khĩwia edaram edau argjã khĩjugui ajim anʉm. 25Magbaadem dʉi phĩdagjã edjã eemua khʉibaadeewai tagam nem Ẽwandamau nem waumatarr edjã ee sĩsidʉmpata sĩi parhooba amach sĩsid arr chaaur aaidʉ jorrjee thʉnʉisijugui ajim anʉm. 26Magbaawaita thumaam khʉʉnau mʉch chi Emkhooi Iewaa chadcha edjã baug ee dau daau urum oojurau. Ya maig mʉg jẽb gaaim khʉʉn thum chachbaadem aawai mʉchta nem jua theeg thumaam khʉʉn Porkha beejugui ajim anʉm. 27Mag mʉch pierrum dʉi mua mʉch chognaan durrpierr aaidʉpʉijugui ajim anʉm, mʉchdeu mʉch ithee jʉr autarr khʉʉn thum ãbam aig biirdʉ aumkhĩir.

28Mag jajawagmamua, —Pãrag khap amkhĩir mua jaaukhimgui ajim anʉm: Pãrau khaphʉ nʉm, mʉig Israel durr higo kher khukhuur aademʉn thumaam khʉʉnau ya chadcha dochʉumie burrju dakpapakham aajem. 29Ich agjota ajugui ajim anʉm ĩchab, mʉch chi Emkhooi Iewaa beeju gaai paawaijã. Cha mua nem jaau chirʉm thum ich ag ee obebergmam pãach daúa oobaawai, khaphʉ abat ajim anʉm: ya mʉch chi Emkhooi Iewaajã deeu beeimʉʉ chirʉm. 30Mua pãrag mag aai i jeeujem di õrau pogueupʉiju a chirʉmʉn, cha õor thʉnʉm khʉʉn khechju nawe, cha mʉchdeu jaau chirʉmjo thumaa chadcha ajugui ajim aajem. 31Edaujãjã mʉg jẽb dʉi thum chukhu aadeju, mamʉ cha mua pãrag jaau chirʉm chan seukhaawai khabam; jãan thumaa ich ag ee obebergmajugui ajim anʉm.

32’Mamʉ mag mʉ beeju ed chan ni ãbmuajã khaugbamgui ajim anʉm. Ẽwandam chognaan ʉ̃gthar thʉnʉm khʉʉnaujã khaugba, ni mʉchdeujã khaugba, ãba ich mʉ Ayaupaita mag mʉ beeju orajã khaphʉ simgui ajim anʉm.

33’Mag pãachdeu mʉ beeju orajã khaugba naawai muan pãragan, nem parhoobam nem wauba Ẽwandamagpaita jeeu nʉʉ jeeu nʉʉ abat a chirʉmgui ajim anʉm. 34Mag mʉ beejuun, woun ãb deeum durr maagpaawai ich chognaanag chi morkhʉ denjo ich di thʉamkhĩir jaaunaa, amachpierr phidagjã jaaukhawi, chi puertdi thʉajemʉgjã ajapha oopaar jaau pʉawi petarrjota simgui ajim anʉm. Maagwai pãar chi di gar nem thʉa nʉisierrjota nʉmgui ajim anʉm ich khapeenag. 35Mamʉ pãrau ni ãbmuajã mag mʉ beeju khaugba naawai sĩi wajaphata khĩir khaug nʉisit ajim anʉm, mʉ beewaim ithee. Pãrau khaugbam, khan orata mʉ beeju: kheeuraa aadem ee, edachanaa, ãspa urumua ãthãrr bĩebaadem ee, wa edpherre khãijã, ni ãbmuajã khaugbamgui ajim anʉm. 36Eeu sĩi degolp mʉ dʉnʉʉubaicheewai mʉ dʉi wetaag pãar agtha khĩir khaugba khãi nʉmjo nʉm khãijã oochedukham. 37Cha mua pãrag mag jaau chirʉm chan sĩi pãragpaijã khabam; maan thumaam khʉʉn itheeta mag jaau chirʉmgui ajim anʉm. Maguata muan pʉaba, khĩir khaugbathʉ̃ a chirʉmgui ajim anʉm, mʉ beewaim ithee.

Currently Selected:

San Marcos 13: noaA

Highlight

Copy