San Mateo 8

Jesuu woun ãb kokobé beneu sĩerr monaautarr

(Mr. 1:40-45; Lc. 5:12-16)

1Mag durrsĩ gaai Jesuu õrag jaau sĩi awia ʉʉrbaau, õor pooma i ẽudee wetjim anʉm. 2Mag i mamta i khĩirphee woun ãb kokobé beneu bar sim oberchewia i khĩirphee jĩepor phõbkhanaa irig, —Señor, pua khõs chirʉm khai, mʉg phĩedau warre mʉ gaaimua chugpaabapʉi aichejim anaabá.

3Magbaa Jesuu i gaai pʉrnaa, —Mua pʉ monaaupʉim khõsi chirʉm; monaau chirsí magan ajim anʉm irig.

Magbarm bʉrre chi phĩe kha dodos chirarr monaau sĩsiewai mor wajappha aadejim anaabá. 4Magbaadeewai chi Jesuu irig, —Pʉch mʉgbarm oob chikhamnag jawamgui ajim anʉm. Magju khãai nacha Jerusalén mawia Aai i jeeujem degam phadeg pʉch mor oopibaimá. Maimuan chad pʉch chadcha monaau sĩsim thumaam khʉʉnag khap amkhĩir, Moiseeu iek phã pʉarr gaai jaau simjo nemchaain ofrendakha deebá ajim anʉm.

Jesuu Romaam capitán chog monaautarr

(Lc. 7:1-10)

5Mag kokobé beneu sĩerr monaaupʉiwia petaau, phobordam Capernaum anʉm ee dubimajim aajem. Mag barbaimam khaug athaawai capitán soldaaun por i aig beewia 6irig chaigpamamua, —Señor, mʉ di aar aaunaan wai chirʉm, mʉ chog. Sĩi put eepai pod phiidʉba kherʉm, kha chʉkhʉ khitaawai. Mag nʉm dʉi kha machagaupata warag eeg pamam ajim anʉm, chi capitanau Jesuug.

7Magbaawai Jesuu jũrr irig, —Oob khĩirjum; mua pʉ chog monaaupäain majugui ajim anʉm.

8Pari magbaa chi capitán garmua deeu Jesuug, —Señor, pʉ mapimaaugau khabam, pari mʉ chadcha Ẽwandam dau na ʉu khaba chirʉm, pʉ mʉ deg dubaag. Ich maupaimua mʉ chog monaaupi jaaubá. Pua mag jaaumʉn, pʉch iekhau aawai i monaaubajupa ajim anʉm Jesuug. 9Muajã mʉch gaaita khaphʉ chitʉmgui ajim anʉm, mʉchjã ĩchab mʉch pornaan jua eegarpai chiraawai. Mag chirab mamʉ, mʉchdeujã ĩchab soldaaun mʉch jua eegar phe wai chirʉm. Makhʉʉn ee ãbamʉg khãijã mua “Pet” aawai maajem, mʉ ipierraa; maimua deeumʉgjã “Pidú” aawai beejem. Wa mʉch chogag khãijã “Mʉgta abá” aawai mʉ ipierr aajem. Magua, maupaimua pua monaaupi jaaumʉn chadcha monaauju khaphʉ chirʉmgui ajim anʉm irig.

10Chi capitanau ich jʉ̃g daar mag iekhabaawai jʉ̃gderraa aademua ich ẽudee wetmarr khʉʉnagta, —Keena, pãade oobat: Mʉg maach israelnaan ee mʉg woun denjo ʉkha nʉm chan mua agtha ooba chitʉmgui ajim anʉm ich Jesuu. 11Chadcha mʉg atag õor pom durrpierram khʉʉnta maach jooin Abrán khararr dʉi, Isá khararr dʉi maimua Jacob khararrpa ʉ̃gthar Ẽwandam dʉi ãbam mes gaai ohood aphobaadeju, i dʉi ãba thach khoog. Maig thʉnaaju: ed obeerjem garm khʉʉn dʉi edau burrjem garm khʉʉnpa maach meeun dʉi ãba. 12Pari mag ed pãar chi israelnaanta chadcha Ẽwandam thumaam khʉʉn Porkha sim aar naaju aai nʉmta, pãachdeu ʉkhaba nʉm gaaimua pãachta jũrr khĩmie durr barkhʉʉipʉiju ajim anaabá, amach khĩircha. Mam barkhʉʉibapäaiwaita icharaucha pãar bĩep jẽbʉ abarju. Maigta mamag khaphobaademʉn ich maig ich mag nʉisim iekhau a jaaumajim anaabá.

13Mag iekhapʉiwi deeu chi capitanag eerpanaa, —Pʉch diig petá; pʉchdeu ãba mua pʉch chog monaaujupaita khĩirju sĩewai chadcha pʉ chog monaaujugui a ajim anʉm irig.

Mag Jesuu “Pʉ chog monaauju” abarm bʉrre mam warp mor mas kherarrta chadcha monakkha aadejim anaabá.

Jesuu Pedro phaauhũan monaautarr

(Mr. 1:29-31; Lc. 4:38-39)

14Maimua petaau, ich Jesús jũrr Pedro di aar majim aajem. Mam barwi ooimaawai, ich chi Pedro phaauhũan mor mas khʉʉumie paar thʉnʉm ooimajim aajem. 15Mag oobaimaawai Jesuu i aar mawi i jua gaai pʉrbaawai, warre chi khʉʉumie meeudʉbaadejim anaabá. Mag khʉʉumie meeudʉbaadee, phiidʉwi am jãhogaagpajim aajem.

Jesuu õor pom monaautarr

(Mr. 1:32-34; Lc. 4:40-41)

16Maimua ya edau kheubaadem ee, õor dosãt beneu sĩsidʉm khʉʉn khapaana Jesús aig waibeemajierram anʉm. Mag ich aig waibee nʉm khʉʉnan, sĩi par iekhaupai obeerpi jaaubaawai, mag am mor eem ben khaigbamjã obeerpʉinaa sĩi khajapham khamor machgau sĩsidʉmjã monaaupʉi maajeejim aajem. 17Mag irua õor monaaumaajerran, warrgar Ẽwandam i jaaumie Isaías khararrau jaautarrjo, “Ichdeuta maach kha thũg ich gaai auwia, maach khamor machagjã chugpaapʉijim” a simjo, chadcha ich ag eyaa obermkhĩir ajim.

Jesús dʉi wenʉrram ig narr khʉʉn

(Lc. 9:57-62)

18Mag õor pom bee thʉnʉm khʉʉnau ich phʉʉr thuurbaadeewai Jesuu ich ag thʉrrdo eepai thoom igar ich arrpijim aajem, ich khapeenag. 19Pari mag nʉm ee Moiseeu ley phã pʉarr jawaag chi machnaan eem ãb beewi irig, —Maestro, mʉʉn pʉ mampierr pʉ dʉi chitam khõsi chirʉm aichejim anʉm.

20Magbaa jũrr Jesuu irig, —Pʉchdeu mag mʉ dʉi mam khõsi chirʉm khai, marrau magan; mamʉ pʉrʉg jaaukhimgui ajim anʉm: Mʉ khãyau pabʉ eem nemchaain amach khãaijem jẽbdi paraam; nem ichpanjã kheeupaawai amach khãaijem khãidu wai sĩsidʉm. Mamʉ mʉch chi Emkhooi Iewaa chan mʉg chitʉm aig kheubaadeewai khãyaag wajapha werba chiraju didamjã chukhu chitʉmgui ajim anʉm. Pʉjã mʉjo magta chitam khõsi chirʉm khai, marrau magan ajim anʉm.

21Magbaawai ãb mag khapan thʉnʉm ee dʉi i iek ũraag i ẽudee nʉrraajerrau jũrr irig, —Señor, mʉjã pʉ dʉi chitam khõsi chirʉm, pari ideu nacha mʉch aai aar mawia i dʉi chirʉʉ apibá ajim anʉm. Mʉg atag mʉch juadamaucha jooi aukher pʉabajeen chadau mʉ pʉ dʉi ogdʉba chitajugui ajim anʉm.

22Magbaa jũrr Jesuu irig, —Magju khãai warre mʉ dʉita marrau ajim anʉm. Ideu ar jãg amach Ẽwandam iek ʉkhamaaugau chi thõmjo nʉm khʉʉnagta amach binaan beppibá ajim anʉm irig.

Jesuu phũ dʉi phũas thumbapitarr

(Mr. 4:35-41; Lc. 8:22-25)

23Mag ich arrpibaawai, ya wetumua Jesús am na jap ee waaidʉbaadeewai, chi khapeenau i arrjim aajem. 24Ya mag dojãrr paaukhabaadem eeta, degolp phũas meeukhabaadewi phũas theega japau pod ãwatbajujo aadejim aajem. Pari mag thʉnʉm ee ich Jesús khãi jorrajim anaabá. 25Magbaawai i khapeen ãaur khʉʉnau i phiriupʉyaan wetwia irig, —Señor, phiidʉbaad. Ya maach khoogpabahaba. Maar khaigper athá ajierram anʉm.

26Magbaawai ichdeu amag, —¿Khantheeta atcha jãphierr nʉma? ajim anaabá. Jãgan pãrau chan mʉ pãach dʉi chitʉmjã khaugbata naab ajim anʉm, jãgcha jãphierraag.

Magnaa phiidʉwia phũug meeurrau sĩunaa ĩchab chi phũasagjã meeurrau sĩubaawai, tag phũjã weba, phũasdaujã baupa khaba, warre sĩi dojã meuu joisijim anaabá. 27Jesuu amach dakhĩir magbarm oowia dauderraa nʉmua amach wir aigpaita, —Keena, ¿khanim wounta jãg mʉg phũasaujã i ipierraanaa phũujã i ipierraata nʉma irua iekhaawai? anaajim aajem.

Gadara durr dosãt dau eerpamieu baarjerr khʉʉn numí Jesuu monaautarr

(Mr. 5:1-20; Lc. 8:26-39)

28Mag wetmaa awia, ya thoom igar Gadara durr paaukhabaimaawai, wounaan numí dosãt dau eerpamieu bar sĩsidʉm khʉʉnta ujã aarmua oberdʉtkhachewi, chi Jesús sim dakha beejierram aajem. Mag sĩsidʉmʉn sĩi pabʉ eem nem maach khoojem khʉʉnjota sĩsid arr aawai mag am nʉm gar õor dichju akhʉr aajeejim anaabá. 29Mag i dakha beewi i thʉ̃rcha thʉ̃rthʉ̃rnaa irig, —Jesús, Ẽwandam Iewaa, ¿khantheeta pʉ maar dʉi mʉgbaichema? Mʉʉgwaiwe chan oob maar chig a chiram ajierram anʉm, mag chi dosãt ben wai narr khʉʉnau.

30Maigmua warpcha khaba khũsnaan khapan phathau jʉr kho wenʉrrajim aajem. 31Chi mepeenaujã makhʉʉn khũsnaan maig wenʉrrʉm khaphʉ narr aawai warag Jesuug chaigpanaa irig, —Pua maar jʉrkhʉyaagpam khai, ideu warag jãkhʉʉn khũsnaan eeta marag dubpibá ajierram anʉm.

32Magbaawai Jesuu amag, —Magan jãkhʉʉn khũsnaan ee dubjurauma ajim anʉm.

Magbaawai makhʉʉn mepeen makhʉʉn wounaan eemua oberdʉtkhawi jũrr makhʉʉn khũsnaan eeta dubphobaadejim anaabá. Magbaawai sĩi por lokoomjo parhooba thʉrrdoog khaphig phobaadewi do ee dʉrbagkha sĩi khũsnaan khapan khẽu khuurbʉ khechjierram aajem.

33Magbarm oowi, chi khũsnaan thʉa narr khʉʉn jãphierrwi, phoborog khaphig phobaadewi, mag wounaan numí dosãt dau eerpamieu sĩsid arr mor eem mepeen oberdʉtkhawia jũrr khũsnaan ee dubtarr thumaa phobor eem khʉʉnag jaaumajierram aajem. 34Magbaawai chi phobor eem khʉʉn khapan ag bʉrre chi Jesús aar wetwi warag ichta maigmua jũrr deeum durrag mapi jaaujierram aajem.

Currently Selected:

San Mateo 8: noaA

Highlight

Copy