San Mateo 26

Jesús pʉr awaag ibeptarr

(Mr. 14:1-2; Lc. 22:1-2; Jn. 11:45-53)

1Jesuu mag mʉg atag deeu ich beeju khap amkhĩir mag jaau dichtarr khur, maach ich dʉi ogdʉba wenʉrraajerr khʉʉnagta deeu magjim ich igwi:

2—Pãrau khaphʉ nʉmgui ajim, mʉigmua khãai numí nʉm ee phiesta Pascua burrju. Mʉg phiesta eeta õrau mʉch chi Emkhooi Iewaa pʉr deejugui ajim, pakuls gaai meerphe thõomkhĩir.

3Ya mag phiesta burrju khãai numpai waaur nʉm ee, phadnaan chi porkha nʉm khʉʉn jooin chi thierrnaan dʉi ãba biirdʉjierram aajem, phadnaan thumaam khʉʉn por Caifás di aig. 4Mag ãba biirdʉtarran, Jesús imeraa pʉr auwi thõopʉyaag ãba ibepaag ajim anʉm. 5Mamʉ mag i thõopʉyaag ẽkha nʉmta amachdeupai deeu, —Õor pom mʉg thʉnʉm meeukhapimaaugau, mʉg phiesta ee chan i chig aba, phiesta dichtarr khurta thõopʉijugui ajierram anʉm.

Ʉʉirau Jesús por ee jʉ̃gdeeu chootarr

(Mr. 14:3-9; Jn. 12:1-8)

6Mag nʉm ee Jesús woundam Simón anʉm di aig sĩejim, Betania phobor ee. Ich mag Simón anʉmpai ibʉʉr wauwi “phĩe paraa khitarr” a thʉ̃ʉrjeejim. 7Mag di aig mes gaai i thach kho oo simta, ʉʉi ãb jʉ̃gdee didam durrkhudau alabastro anʉm den boteedidam wau khitʉm dʉi dubchejim. Mag jʉ̃gdee nem parhẽpaaga sĩerrʉm. Mag waibeewi Jesús por ee sĩi choopʉichejim. 8Mag i por ee choobapʉim oobaawai maach chi Jesús dʉi wenʉrrarr khʉʉn ee ãaur khʉʉn mʉ khapeen meeukha phobaadewi, —¿Khantheeta jãg jʉ̃gdee parhẽpagkham sĩi ãr choobapʉima? ajierram, 9nem parhẽpag perpʉiwi ag phatkhonau dau aphʉʉm khʉʉndamag ʉu nemdam au deeju ãb sĩerrtá.

10Mamʉ am mag iekha nʉm ich Jesuu ũr sĩerr aawai, —¿Khantheeta pãrau chikham khĩir naaupi nʉma? Irua ʉuta jʉ̃gdeeu mʉ por khooi sĩebahab ajim amag. 11Mʉig eegar dau aphʉʉ khitheem khʉʉnan pãrau ich jãg pãach dʉi oo wai wenʉrraju, mamʉ mʉ chan tag pãar khĩir chitabamgui ajim. 12Mʉg ʉʉirau jʉ̃gdeeu mʉg mʉ khooibarmʉn maach jooin i aawai maach meeunau aajemjo mʉ aukherju edam athee ag nawe ya mʉ kha phuur sim khabahab ajim. 13Cha mʉ iekha chirʉm iekhau mʉg atag pawiajã durrpierr Ẽwandamau õor peerdʉajem iek jaau wenʉrrʉm dʉi ĩchab mʉg ʉʉirau mʉ dʉi mʉgbarmjã jaaub khaba jaaujugui ajim. Mag, ooba arr khʉʉnaujã ĩchab i iigjeeju a jaaujim ich Jesuu.

Judaau Jesús pertarr

(Mr. 14:10-11; Lc. 22:3-6)

14Maach i khapeen i dʉi doce ogdʉba wenʉrraajerr khʉʉn ee ãb Judas Iscariote a thʉ̃r sĩerrau phadnaan chi pornaan aar mawia 15amag, —Mua pãachig Jesús pʉr deebaawai, ¿pãrau kharr mʉrʉg phag nʉ? aimajim aajem.

Magbaawai amachdeu, —Marau pʉrʉg treinta piezas deejugui ajim anaabá.

Magbaawai chadcha ich magʉm gaai i eugar i perpʉijim anaabá. 16Magtarr aigmua Judaan sĩi ãba phadnaan chi pornaanag Jesús pʉr deejuuta ẽkha nʉrraajeejim.

Ãbmiecha Jesús ich khapeen dʉi thach khotarr

(Mr. 14:12-25; Lc. 22:7-23; Jn. 13:21-30; 1 Co. 11:23-26)

17Maach jooin i aawai pan levadura chukhu wauwia khoojem ag seman ee ya warrpem khãai ãb ãspa eebaadem ed maach ich dʉi wenʉrraajem khʉʉnauta marau ich Jesuug, —¿Jamta nemkhoo jaram ovejadam thõonaa kho nʉ? a jeeu naajim, khap aag.

18Mag ichig jeeubaawai ichdeu marag, —Jerusalén woun ãb sim aar ereubaadet ajim. Maimua magʉg mua jaaupʉi chirʉm abat: “Ya mʉch thõju gayaa pamaawai, pʉ di aigta nemkhoo jaram ovejadam wauwi pãar dʉi ãba khom khõsi chirʉm” abat ajim chi wetju khʉʉnag.

19Magbaawai chadcha ichdeu jaautarrjo, maar khapeenau wetwi, ichdeu jaaupʉitarrjo jaauwimawi, i na mag nemkhoo jaram ovejadam wauwimajierram.

20Maimua ich ẽudee okharta beewi, ya khĩsu aadem ee maach doce i dʉi wenʉrraajerr khʉʉn thum ãba i dʉi thach kho naajim. 21Mag ãba kho nʉmuata ichdeu marag magjim:

—Cha mʉ iekha chirʉm iekhau mʉig maach ãba nʉm khʉʉn ee ãbmua wir aig mʉ oomapham khʉʉnag mʉ pʉr deeju ajim.

22Mag ũrbaawai, chadcha maar okhĩirjuu aphobaadejim. Mag nʉm iekhau jũrram khʉʉnau irig, “Señor, ĩsin mua khãijãa agam” aajeejim.

23Mag jũrram khʉʉnau ichig jejeeu khaawai magjim:

—Chi mag wir aig mʉ khaibag waujuun nau mʉ dʉi ãbam thep ee pan sĩ khobarmʉugui ajim.

24Magnaa ichdeu, —Oo nʉm dau eyaa Emkhooi Iewaa chadcha Ẽwandam iek phã sĩsidʉm gaai jaau simjo wajappha dau aug wawaagpaama ajim. Pari apkhiitʉ mʉ mag aphʉʉ amkhĩir wir aig mʉ pertarr woun. Jãgʉm wounaan thaababa arr akhiin ʉucha akhamgui ajim.

25Magbaawai Judaau ichdeu khabajim amkhĩir, —Maestro, ĩsin mua khãijãa agam ajim.

Magbaa Jesuu irig, —Chadcha pʉchdeu khabá pua khaphʉ jaaubapʉim; pʉchdeu khabahab ajim.

26Mag iyʉʉ thach kho nʉmua Jesuu pandam jua ee aunaa, Ẽwandamag ag paar ʉu ajim anaa khõreunaa marag ʉapʉijim. Magnaa, —Khobat, mʉ mʉ morou ajim, chi pan igwi.

27Maimua jũrr vino jarrdam auwi, ag paarjã agjo Ẽwandamag ʉu ajim anaa deeu marag ʉapʉijim. Magnaa, —Dobat, mʉʉn mʉ bagau; ich jãg ãbam jarr eepai dopetat ajim. 28Mʉg jarr eem vinodam dobarmta warrgarwe Ẽwandamau õor dʉi iek deeju aajerrau. Mamʉ mʉg iekhan iek iiuriugui ajim. Mʉ bag mʉg vinojo khitʉm ãrbarmuata Ẽwandamau õor khaibag thum chugpaa aujugui ajim. 29Pari mʉg dobarmjo chan tag doba, ãba mʉchta mʉch Ayau thumaam khʉʉn Porkhapibarm edta deeu ũwaai pãar dʉi dojugui ajim. Pari mag ed maach oobarm chan ĩsimjopai khaba, oneechata aju, nem thʉnʉm thum chi iiur aju aawai a jaaujim ich Jesuu maachigcha.

Jesuu jaauwai Pedroou bʉ̃ʉrjã i khaugbam aju jaautarr

(Mr. 14:26-31; Lc. 22:31-34; Jn. 13:36-38)

30Mag maach ich dʉi ãba wenʉrraajerr khʉʉn ich dʉi ãba mes gaai iyʉʉ thach kho aaipawi, meukhaarjã Ẽwandam iek Salmos anʉm gayam auwia, Olivo durrsĩig wetjim. 31Mam panaa Jesuu marag, —Ẽwandam iek phã sim gaai, “Mua chi pastor thõobapäaiwai chi ovejanaandam parhooba aaidʉju” a simjo, ĩsim edaar pãrau mʉ mʉch ap barpʉawi thumaa aaidʉtkhajugui ajim. 32Mamʉ ũwaai phiidʉwia mʉch iiu chirsiewai pãar na mawia Galilea chiraimajugui a jaaujim.

33Magbaawaita Pedroou jũrr irig, —Thumaam khʉʉnau pʉch ap barpʉawiajã mua chan pʉ barpʉabamgui ajim.

34Magbaa Jesuu jũrr, —Pedro, cha mʉ iekha chirʉm iekhau nau ãthãrr bĩeju nawe biek thãrjup pua õrag bʉ̃ʉrjã mʉ khaugba chitʉm ajuwai ajim.

35Mamʉ Jesuu ichig magbaawai chará warag Pedroou irig, —Pʉ thõbaimam aar dʉi thõimaju awiajã mua chan pʉ khaugba chitʉm a iekhabamgui ajim.

Irua magbarm dʉi maach chi khapeenaujã thumaam khʉʉnau ich mag iekhajim.

Nemjĩirdo Getsemaní anʉm ee Jesús oraatarr

(Mr. 14:32-42; Lc. 22:39-46)

36Maigmua jũrr nemjĩirdo Getsemaní anʉmʉg maar phe arrjim. Maimua mam barwi, —Mʉig nʉisit, mʉ chum ʉ̃gthaag jewaakhemgui ajim.

37Maimua thãrjuppaim khʉʉn dʉi petajim. Mag ich dʉi phe arrtarr khʉʉn ãb Pedro ajim, maimua tagam khʉʉn numí jooi Zebedeo chaain ajim, Santiago Juan dʉi. Mam paaukhabaimaawai am iek okhĩirjuuga aademua gaai machaaga aadejim aajem, chi Jesús. 38Mag simua amag, —Mʉʉn degolp gaai machgau okhĩirjuuga aadem; ãba mʉch thõjuuta khĩirju chirʉmgui ajim. Pãar mʉig nʉisit, mamʉ mʉ dʉi daukhana abat. Oob khãimiet ajim anʉm.

39Amag mag jaau pʉawi ichin am bigaau am warphaapai sĩeimajim aajem. Magnaa jẽkhʉt thʉkhoonaa khĩeb jẽb gaai dagau dʉrnaa ʉ̃gthaag jeeumamua, “Tata, pua khõs akhiin, atcha mʉ dau aphʉʉ apibakhamgui” ajim anʉm. “Deeum nem waubarmuajã agjo õor peerdʉ auju ayaa akhiin, mʉ gaai machag mʉgcha ãwatbakham. Pari mʉchdeu khõsi chirʉmjo khaba, pʉchdeu khõsimjota mʉ dʉi abá” a jeeumajim aajem.

40Mag ich Ayag jeeu sĩi awi am oon beejim aajem. Maimua oocheewai am khãi nʉmta oochejim anaabá. Magbaawai Pedroogta, —Pãar chan oradam ãbjãta mʉ dʉi daukhana khaba nʉm. 41Jãg khãi nʉʉ aju khãai Ẽwandamagta jeeu nʉʉ abathʉ̃ ajim anʉm, dosãtag ʉdʉʉr pãach thʉ aupim ugua. Mua oowai pãrau pãach odiiwan chadcha jeeum khõsi durrumta, pari daphokgauta podbam ajim aajem amag.

42Maimua ichin deeu ũwaai mawia jeeubaademua ich Ayag, “Tata, pua mʉ mʉg dau aug waupibaju ayaa akhiin ʉu akhamgui” a khitaajeejim anʉm; “mamʉ ichiita mʉ aphʉʉ aju aai chirʉm khai, agjo ʉu sim. Mʉ dʉi pʉchdeu am aig abá” a jeeumajim aajem.

43Mag jeeu sĩi awi deeu am oon beewaijã, mag i khapeen irua phe arrtarr khʉʉn daphokgau podjã dau ẽeba sĩi khãidʉtkha thʉnʉmta oochejim anaabá. 44Mag khãidʉtkha thʉnʉm oobaichee deeu ich sĩerr aar mawia ich ag iekpai deeu ich Ayag jajawagmajim aajem. Ma biek thãrjupam ajim aajem, mag jeeu sim. 45Maimua ũwaai oon beewaijã agtha ich khapeen khãidʉtkha thʉnʉm oobaichee amag, —¿Agtha pãar sĩi khãi gaaita nʉ? ajim anʉm. Ya pekau pom sĩsidʉm khʉʉnag mʉch chi Emkhooi Iewaa pʉr deeju ora pabaichebahab. 46Phiidʉtkhabathʉ̃, maimua maach khapeen aar wettarraugui ajim anʉm. Mʉ oomapham khʉʉnag mʉ pʉr deeju wounan ya dakpa urumgui ajim anʉm amag.

Jesús pʉr arrtarr

(Mr. 14:43-50; Lc. 22:49-53; Jn. 18:2-11)

47Mag maar aig beewi agtha ich Jesús maar dʉi iyʉʉ dʉnʉm ee, ich mag maach i khapeen doce narr eem ãb Judas anʉmta õor pochag urajim. Mag wedurum khʉʉnan ãaur khʉʉn espaar jua panhapha bee thʉnaawai tagam khʉʉn pa dʉijã bee thʉnaajim. Makhʉʉn, phadnaanau jooin chi pornaan dʉimua pʉitarr khʉʉn ajim. 48Mag chadcha õor pochag beewi ya chi Judaau ag nawe, “Nau mua pãach dakhĩir khĩir ʉ̃ʉ athamta pʉr athat” a jaau wai sĩerr aawai 49ich dʉi wenʉrrʉm khʉʉn dakhĩraa ichdeu jaautarrjo Jesús dʉi ãba dʉnʉʉuwimawi irig, —Maestro, ¿jãgpai chirʉ́? anaa i khĩir ʉ̃ʉ athajim.

50Magbaa Jesuu irig, —Pʉch õor awaan beetarr jopai pʉr athaad perá ajim.

Magbaawai tagam khʉʉnau dʉi aig beewi Jesús pʉrphobaadejim.

51Mag i pʉrphobaadem oobaawai maar eem khʉʉnau ãbmua ich espaar sʉrr a jẽu athawi chi phadnaan thumaam khʉʉn por ag chog aig sĩerr kachta oorthubapʉijim.

52Magbaawai Jesuu irig, —Jopai pʉch espaar ich deg phĩ sĩubá ajim. Pua khaugba sĩeb ajim, esparau werbʉnaa õor khech nʉm khʉʉn agjo esparauta khechmaju. 53Mua mʉch chig apibaju akhiin, mʉch Ayag jeeubaawai irua mʉ thʉamkhĩir Ẽwandam chognaan pooma milam khʉʉn apha doce ejércitos khãijã deepʉijugui ajim. 54Mamʉ mʉch thʉamkhĩir mua jeeubaawai mag õor pom deepʉikhiinjã, ¿jãga Ẽwandam iek phã sĩsidʉm gaai mʉ igwia jaau sim thum ich agjo abarju? ajim Pedroog.

55Mag iekhapʉiwia jũrr ich pʉr awaan beetarr khʉʉnagta, —¿Pãrau oowain mʉʉn sĩi õor nem jĩgkhanaa õor thõomiejota chirab ajim jãg pãrau sĩi mʉ aig jua ee jierrnempan appai beeg athee? Ag na ed eepierr pãrag mua Aai i jeeujem deg Ẽwandam i jaaujeewai bʉ̃ʉrjã pãrau mʉ pʉr aubajierram. 56Pari pãrau ĩs mʉ dʉi mʉmʉgkhamʉn, jãan warrgar Ẽwandam i jaaumienau jaautarr thum ag eyaa obermkhĩrau ajim.

Ya irua mag iekhabarm ee, ĩchab maach chi khapeenaujã chi Jesús ich appai werpʉawia parhoob dʉrmid phobaadejim.

Jesús judionaan Asamblea ee wai narr

(Mr. 14:53-65; Lc. 22:54-55,63-71; Jn. 18:12-14,19-24)

57Mag i pʉr awaan beetarr khʉʉnau warre phadnaan por Caifás aarta athaadejierram, mamta Moiseeu ley phã pʉarr jawaag chi machnaan dʉi jooin chi thethemnaanpa dʉi ãba biirdʉ narr aawai. 58Mag amau i athaadeewai Pedro iek iruata warppaimua oopʉpʉigmamua mag chi phadnaan por aig di ũjãrr dubimajim aajem. Mag dubwi, “Mʉigmua ookhim jãga aju khai” awia, Aai i jeeujem di thʉajem khʉʉn ohoodo nʉm aig dʉi jupimajim aajem.

59Maagwai phadnaan chi pornaanau judionaan Asamblea eem khʉʉn dʉimua chi Jesuu nem wauba arrta seukha i gaai thʉpʉiju ẽkhaajeejim anaabá, magʉm gaaimua i thõopäaig. 60Mamʉ par mag jũrram khʉʉnau seukha i gaai nem parhooba thʉpʉiju ẽkha nʉmjã podba aajeejim aajem. Mamagkham ee, õor numí chi seumien beewi, 61—Mʉg wounau maar dakhĩir, iruan mʉg Aai i jeeujem di pogueupʉinaa khãai thãrjuppaim ee deeu eu dʉnʉʉuju a iekha sĩejimgui ajierram anaabá.

62Magbaawai chi phadnaan porou dʉnʉʉunaa Jesuug, —¿Pua am iekha nʉm ũr chirʉ́? ¿Khan jãgwi jãg pʉ iekhamapha sĩ? ¿Pua chadcha mag iekhajĩ wa iekhabajĩ? Jaaubá ajim anʉm irig.

63Pari magʉmjã Jesús bʉ̃ʉrjã jʉ̃ʉ aba, warag khĩuu sĩsijim aajem. Mag ich iek ʉkhaba abaawai deeu irig chi phadnaan porou, —Maach Ẽwandam ich mag iiu sĩerrʉm iek gaai thʉwi muata pʉrʉg “Jaaubá” a chirʉm. ¿Pʉʉta chadcha Ẽwandam Iewaa ichdeucha jʉr auwia pʉiju jaaujerrá? Marag jaaubá ajim anʉm.

64Magbaa Jesuu irig, —Pua khabá ag eyaa jaaubapʉim ajim anʉm. Mʉ cha iekha chirʉm iekhau mʉg woun Emkhooi Iewaa Ẽwandam chi jua thierr bigaau i juachaar gar oo sim pãrau pãach daujãau oowi edjã baug ee urumjã oojurau a iekhajim aajem, aig narr khʉʉn dakhĩir.

65Mag ũrbaawai chi phadnaan porou ich khajũa mor gayamta sʉrr abarmʉn, warre nem pom jẽ werppʉijim anaabá. Magnaa, —Mʉg wounau iekha sim chan ʉu khaba sim. Maach wounaan thum ãba thʉnʉmta iita mag Ẽwandam Iewaa anaab. Ya pãrau pãach jʉ̃gʉucha ũrbarm. 66¿Khani maadeu tag ũrm ig nʉ? ajim anʉm, ich khapeenag.

Magbaawai mag khapan aig pos thʉnarr khʉʉnau, —Í chadcha kulp pom sĩebahab; magua warre thõopʉiju aaita simgui ajierram anʉm.

67Magnaa i khĩir gaaijã icho thunaa i gaai mas waumajim anaabá. Pogkha i khĩidadcha juajãau deenaa 68irig, —Pʉchta chadcha warrgarwe ich Ẽwandamaucha jʉr auwia pʉiju aajerr khai, magan jaaubá: ¿khaíuta pʉ khĩidadcha dee sĩ? aajeejim anʉm jũrram khʉʉnau.

Pedroou bʉ̃ʉrjã Jesús khaugba chitʉm a iekhatarr

(Mr. 14:66-72; Lc. 22:56-62; Jn. 18:15-27)

69Mag chi thethem khʉʉnau Jesús dʉi mamag khaawai Pedro iek i daaugajãr ũjãrr oo chirajim aajem. Mag i oo chirʉm aigta, mag degam ʉʉi chi di khʉʉn chog beewia irig, —Pʉjã ĩchab jãg Jesús Galileapierr dʉi nʉrraajemʉugui aichejim anʉm.

70Pari ichig magbaicheewai i iek irua thum aig narr khʉʉn dakhĩir, —Mua khaugbam pʉ khan ata iekha sim khai; mua magʉm wounan khaugba chitʉm a chirajim anaabá.

71Ichig magbaicheewai i iek mag ich chirarr aigmua daaugajãrm puertdi aar majim aajem. Mamʉ mamjã agjo deeum ʉʉirau i oobaawai maguajã ich aig narr khʉʉnag, —Jãg wounan Jesús Nazaretpierr dʉi nʉrraajemʉuwai ajim anʉm irig.

72Pari magbaawai magʉgjã ichdeu, irua magʉm Jesús khaugbam a chirajim aajem.

73Maimua magtarr khur nʉʉpai awi i iek maig ich dʉi di ũjãrr narr khʉʉnaupai deeu irig, —Marau oowai pʉjã chadcha i dʉi wenʉrraajerr khʉʉn eemʉu. Pʉ iekha sim gaaipai merag chukkhu simgui ajierram anaabá.

74Magbaawaita irua warag khĩir mor chigpai iekhamamua, —Chadcha mua magʉm wounaanjã khaugab chitʉmta pãrau mʉrʉg mag naaba a chirajim anaabá ich Pedroou.

Mamʉ irua mag iekhabapʉim dʉicha ãthãrrta kekerekee ahbar. 75Mag ãthãrr iek ũrbaawaita ich Pedroou jaauwai i khĩir eyaa dʉnʉisijim anʉm, Jesuu ichig “Nau ãthãrr bĩeju nawe pua biek thãrjup õrag mʉ khaugba chitʉm a iekhaju” atarr. Mag khĩir ee dʉnʉisim abarmʉn chadau gaai machaaga aademua dawag oberwi warre o jãsenag aademua bĩe chirʉʉ ajim aajem, ichdeu jaauwai.

Currently Selected:

San Mateo 26: noaA

Highlight

Copy