San Juan 5
5
Jesuu kha chʉkhʉ khitʉm monaautarr
1Magtarr khur Jerusalén phobor ee judionaan phiesta wai narr aawai, Jesús deeu agʉg petajim. 2Mag Jerusalén phobor ee dubaag “Ovejanaan Puertdi” a thʉ̃r sim dakha thʉ̃rrdo juau wautarr estanque anʉm sim. Mag thʉrrdo thʉ̃r hebreonaan meúa Betesda aajem. Mag thʉ̃rrdo igaau pórticos anʉm cinco naajim. 3Ma, sĩi jʉserg eegar arr aawai mor masim khʉʉn khapan thũphãau thʉnaajeejim: dau khĩsu khitheem khʉʉn, bʉ wedʉ wedʉ khitheem khʉʉn, maimua sĩi juadam wa mor enter khãijã kha chʉkhʉ khitheem khʉʉnpa. [Maig nʉmua do waaurewaata nʉ naajim, 4kharii Ẽwandam chog ʉ̃gtharmua beewia mag do waaureu pʉabajem ee chi nacha dubbaimamta monaaujerr aawai ag ee dubaag. Mag do waaureu pʉabajem ee chi nacha dubbaimamʉn parhoobam khamor machag wai sĩerr khãijã monaaub khaba monaaujeejim aajem.] 5Mag mor masim khʉʉn pom thũphãau wejom ee sĩejim ĩchab woun ãb treinta y ocho años, sĩi kha chʉkhʉ aawai pod ich appaijã phiidʉba khitʉm. 6Mag werba kherʉm Jesuu oobaimawia mag año khapan dau aphʉʉ kherʉmjã khaug athaawai irig, —¿Pʉ monaaum khõsi chirʉ́wi? ajim.
7Magbaawai chi mor masi kherarrau, —Señor, mʉʉn monaaum khõchag chirʉm; pari chi do waaureu sĩubaawai ag ee mʉ jiirpʉiju khʉʉn chukhu aawaita pod monaauba chirʉmgui ajim. Maadeu ag ee dubaag ẽkhaawai maach nawe ãbmua ag ee paajemgui ajim.
8Magbaawai Jesuu irig, —Magan phiidʉwia dʉrdʉr abá; maimua pʉch put juurwia athaad ajim.
9Ichig magbarm bʉrre chadcha warrjã ich mag monakha sĩerrjota phiidʉ dʉnʉisiwia dʉr nʉnʉʉu khabaadejim. Maimua ich put juur auwia ag dʉi petajim. Pari mag i monaautarr ed jua ʉ̃ʉijem ed arr aawai, 10Moiseeu phã pʉarr iek wajapha ʉʉrkhaajerr khʉʉnau irig, —Ĩs chan pua jãg put chʉgag jiir wai nʉrraju khaba simgui ajim anaabá.
11Pari ichig magbaawai chi woundamau amag, —Pari chi mʉ monaaupʉitarrauta mʉrʉg “Pʉch put juurwia athaad” atarr aawaita mua arrubahab ajim aajem.
12Magbaawai amachdeu, —¿Chijãguata pʉrʉg mag sĩejĩ? ajierram aajem.
13Pari mag i monaaupʉiwia ich Jesujã sĩi õor khapanag ee dubbaaderr aawai pod i khaugpʉiba arr gaaimua, ĩs mag thʉ̃r thʉ̃rnaa mag wounauta mʉrʉg mag jaaujimjã abajim aajem. 14Maimua ag khur Jesuu ich ag woundamcha Aai i jeeujem deg oobaimaawaita irig, —Ya ʉu pʉ jãg monaau chirsipí, oob tag pekau wau chitam. Eeu magbamʉn jũrr pʉch gaai ag khãai atcha khãijã adukham ajim.
15Jesuu ichig magbaawai judionaan chi pornaan aar mawia amag jaauwimajim aajem, Jesuuta chadcha ich monaautarr. 16Mag gaaimua judionaan chi pornaanau chan warag Jesús khõchkhaba aajeejim, mag amach dakhĩir jua ʉ̃ʉijem edam magwe õor monaaujerr aawai. Amagan mag nʉmdampai phidkha nʉm dʉi ãba sĩerr aawai jua ʉ̃i nʉm ed pod magju khaba sĩejim. 17Pari Jesuu mag chi judionaanau khĩirju nʉmjã khaphʉ sĩerr aawai amag, —Jua ʉ̃ʉijem edam magwe mʉ Ayaujã õor dau aug khaaugjeewai muajã ich agjota chirʉm khabahab ajim amag.
18Jesuu amach jʉ̃g daar mag iekhabaawai chará waragta i thõopʉim khõchkha phobaadejierram. Pari wajapcharan amach denjo jua ʉ̃ʉijem edjã ʉʉrkhaba sim gaaimuapaijã khaba, am jʉ̃g daar Ẽwandam igwia i Aai a iekhaawaita mag i thõom iigjeejim, mag sim aig magan iita Ẽwandam dʉi ãba chirabma awia.
Ẽwandam Iewaa iek theeg
19Pari Jesuu warag, —Mʉch chi Chaairaujã mʉch Ayau nem waupim khõsi sim khaugba akhiin, muajã mʉch khĩrau chan waubajugui ajim. Magba irua nem waupim khõsi sim mʉchdeu khaphʉ chiraawaita muajã chadcha waaujemgui ajim Jesuu chi judionaanag. 20Mag ich mʉ Ayaujã mʉ khõsi aajeewai ichdeu nem waupim khõsim thum mʉrʉg khap apiejemgui ajim. Maagjeewai ĩsmua atagta mua nem wau chirʉm gaaimua pãrau i jua oogpamgui ajim. Ante mʉg woun monaautarr khãaijã ʉ̃rʉʉcha mua nem waumaju. Mag oowiata pãar dauderraa ajugui ajim. 21Ich jãg chi Ayaujã õor mee nʉm khʉʉnjã phiriutkha auwia ich mag ich dʉi wai sĩejemjo, mʉch chi Chaairaujã mʉchdeu magam khõsim khʉʉn dʉin ich agjo ajugui ajim. 22Ich Ẽwandam chi Ayaujã ichdeu chan jaauba, mʉch chi Chaairagta jaaupiejem, õor ich aar auju wa auba isegju, 23mag gaaimua ich jãg mʉ Aai tho iyʉʉ aajemjo mʉch chi Chaaijã agjo thumaam khʉʉnag tho iekhamkhĩir. Mag sĩewai mʉch chi Chaairagjã eenaa wajapha mʉ tho iekhaba nʉm khʉʉnau chan magan mʉ Aaijã thoba nʉmgui ajim, ichdeu mʉ pʉitarrta mʉ mʉg chitʉmjã igba naawai.
24’Mʉ cha iekha chirʉm iekhau chi mʉg mua jaau chitʉm iekta ũrwia ʉkha simuan Ẽwandam iekta ʉkha simgui ajim, chadcha ichdeuta mʉ pʉiwia mag ich iek jaaupitarr aawai. Mag ʉkhabarm wounan Ẽwandamau ya ich denkha auwia ich mag i dʉi sĩsim iekhau. Magbarm woun gaai Ẽwandamau ichdeu õor i agkha nʉm edjã mas abajugui ajim, warr ich khaibag eepai chi thõmjo sĩerrta ich mag iiu nʉrraag ya chi peerdʉm aawai. 25Chadcha ĩsta pãar mag chi thõmjo nʉm khʉʉnaujã mʉch chi Ẽwandam Iewaa iekcha ũrju ed pabaichemgui ajim. Mag mʉ iek ũrwia ʉkha nʉm khʉʉnan warre Ẽwandam denkhanaa mʉg atagjã ich mag iiu nʉisijugui ajim. 26Ich jãg chi Ayaujã ichdeuta õor iiupiejemjo, ich denjo amkhĩir mʉch chi Chaairagjã agjo ich jua theeg deejimgui ajim. 27Mag nʉm dʉi ĩchab mʉrʉgta õor ich aar auju wa auba isegju a jaaumkhĩirjã iek theeg apijimgui ajim, mʉchta Emkhooi Iewaa aawai. 28Mag muata õrag amach khĩircha jawaagjã iek theeg chirʉm a ũrwia oob jʉ̃gderraa amiet. Pari chadcha mʉchdeuta mʉg atag otarr khʉʉnagjã amach beptarr jẽbdegmua obeerpi jaaubaawai deeu iiu phiidʉtkhajugui ajim. 29Chi nem wajapha waaujerr khʉʉnan tag meeba ich mag Ẽwandam dʉi wenʉrraagta phiidʉtkhaju; pari nem khaigbamta waaujerr khʉʉnan Ẽwandamau amach isegwia khĩmie durrta barkhʉʉiju abarm ũraagpaita phiidʉtkhajugui a jaaumajim ich Jesuucha.
Jesuun chadcha iek theeg sim
30’Mʉ Ayauta mʉ pʉitarr aawai irigjã jeeuba sĩi mʉch khĩrau chan pod mua nem wauba chitʉmgui ajim. Maguata, mʉch Ayau jaaubaawaita mua agpierr nem waaujem; mag ichdeu jaau sĩewai nem agchata waaujemgui ajim. 31Mua mʉch igwia mʉchdeupaita mʉ iek theeg chirʉm akhiin, mua magju khaba chirʉmgui aju õrau, tag mʉ ipierr jaau nʉm khʉʉn chukhu aawai. 32Pari ãb simgui ajim, ma mʉ Ayau. Iruata mʉ kõit chadcha nem agcha jaaujem. Mua khaphʉ chirʉmgui ajim, mag irua nem jaau sim chadcharau. 33Pãrau Juan aar õor pʉijierramgui ajim, iita Ẽwandamau pʉiju aajerrá a khap jeeumkhĩir. Magbaawai irua, í chan ar khabam, ãb i ẽudee urumta aruugui ajim, mʉ igwia. Ichdeu mag pãrag jaaupʉitarr chadcha ajimgui ajim. 34Pari mʉ chan mag sĩi õraupaita jaauju aai nʉmjã abam. Mua mag Juan igamjo chirʉmʉn, irua nem jaaujerr ʉkhawia pãach peerdʉtkhamkhĩrau ajim. Mʉ wajapcha khaphʉnaa jaauju aai sim chan mʉig eegarm khabamgui ajim. 35Juanan chadcha lámpara dau wajaug phuu dʉnʉmjo sĩejim, muata õor peerdʉ auju aai chirʉm a jawaag. Mag irua jaau nʉrrarr ũurwai pãach jʉ̃gaagaa arr aawai khũchpain pãar onee ajierramgui ajim. 36Pari Juanau sĩi idamaupai jaau nʉrraajerr khãai mua wajapcharam wai chirʉmgui ajim, aguata Ẽwandamau mʉch pʉijim a khap apieg. Ma, õrau ag na nem mag ooba aajem waaujem ag jua theegaugui ajim. Mag jua theegau mʉ Ayau nem khĩir pogkhe waupi jaautarr aawai, õor dakhĩir mag waauwai, chadcha ichdeuta mʉ pʉijim a jaau sim khabahab ajim. 37Pãrau oojã ooba ni i iekjã ũrba naab mamʉ, ich mʉ Aai mʉ pʉitarraujã agjo mʉ igar sim a sim, ichdeuta warrgarwejã mʉ igwia ich iek gaai phãpitarr aawai. 38Pari mag ichdeu mʉ pʉiwia mua jaau chitʉmjã pãachdeu ʉkhaba naawai pod i iekjã pãrau pãach thãar ee auba nʉmgui ajim. 39Pãraun sĩi Ẽwandam iek phã sĩsidʉm gaai thʉ̃rnaa ag gaai jaau sĩsidʉm ʉʉrkha nʉmuata pãach peerdʉjupii awia thʉ̃ʉrjerram. Pari par mag ag gaai thʉ̃ʉrwai mʉ igwia jaau sĩsidʉm oo nʉmta, pãrau pãach thãar theeg nʉm gaaimua 40bʉ̃ʉrjã mʉ igba nʉmgui ajim, ich mag iiu wenʉrram khõsi nʉm anʉmta.
41’Mua chan mag pãrag sĩi mʉchig ee amkhĩirta nem wauba chirʉmgui ajim. 42Mua khaphʉ chirʉm, pãrau chan thãraucha Ẽwandam khõchkhaba nʉmta sĩi par iiupai i khõsi nʉm aajerram. 43Mʉʉn ich mʉ Aai iekhau pʉiwiata mʉg chitʉm; pari magʉmjã mua mag jaauwai pãrau mʉ iek ʉkhaba nʉmgui ajim. Mamʉ jũrr ãb sĩi ich khĩraupai beewiata pãrag magchekhiin, mag iekhan chadau pãrau ʉkhajugui ajim. 44¿Jãga pãrau mua nem jaau chirʉm ʉkhabarju ajim, jãg Ẽwandam ichta ãbpai khitʉmta pãachdeu nem wau nʉm gaaimua onee apiju khĩirjubanaa ãba pãach khapeenagpaita pãach thopim khõsi thʉnʉm? 45Oob pãach jãg nʉm paar muata Ẽwandamag pãach khaibag waumkhĩir irig nem ĩgkha thʉnʉʉuju amiet ajim amag. Chi Ẽwandamag pãar ĩgkhajuun Moiseeuta pãar ĩgkhabajup, sĩi irua phã pʉarr iek wajapha ʉʉrkha nʉmuata pãach ʉ̃gthar oberpiju anʉmta chadcha irua phã pʉarr thum ipierraajã khaba naawai. 46Chadcha pãrau Moiseeu phã pʉatarr thumta ipierraa nʉm akhiin, ichdeu Ẽwandam iek phã pʉarr gaai mʉ igwia jaau pʉarr aawai, pãrau mʉ iekjã ʉkha naakhamgui ajim. 47Pari irua mʉ igwia mag phã pʉarrjã pãrau ʉkhab nʉm, ¿jãga ĩs mʉchdeucha jaau chirʉmjã ʉkhabarju? ajim amag amach khĩircha.
Currently Selected:
San Juan 5: noaA
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.