San Juan 13

Jesuu ich khapeen bʉ ʉtarr

1Ya phiesta Pascua anʉm burrju khãai ãbpai waaur sĩejim. Maagwai Jesuu khaphʉ sĩejim, ya ichdeu mʉg durr werpʉawi deeu ich Aai dʉi ãba sĩeimaju ed pabaadem. Thum mʉg jẽb gaai maar ich denkha durrarr khʉʉnan bʉ̃ʉrjã chig aba jãsehne aajeejim. Maagjerr aawai ya ãbmiecha amau i thõoju ed paawaijã agtha ichdeu maar khõsi sim khaphʉ apijim. 2Amau i magju ed maar i dʉi thum ãba thach kho naajim, ya kheeuraa pamamua. Maagwain Judas Iscarioteen ya meperau por meu thʉnaajim, Jesús oomapha aajem khʉʉnag i pʉr deeg. Chi Judas woun ãb Simón anʉm iewaa ajim.

3Jesuu khaphʉ sĩejim, ich Ayau ichigta nem thum jaaunaa ʉ̃gtharmua ich pʉitarr aawai deeu i aar maju. 4Mag khaphʉ sĩerr aawai thach kho oo sĩewi, phiidʉbaadewi, ich khajũa ʉ̃rʉm ẽernaa, jũrr toayaauta ãi jʉ̃ sĩsijim. 5Magnaa thep por pomaam ee do choonaa maar bʉ ʉbaadejim. Mag ʉnaa ichdeupai deeu mag toayaau wajapha jʉser jʉʉupʉimajim.

6Mag ʉkhapʉpʉigmamua ya Simón Pedro den ʉag abaawai chi Simón Pedroou irig magjim:

—Señor, ¿puata mʉ bʉ ʉagá? ajim.

7Magbaawai Jesuu irig, —Mua ĩs pãar dʉi mʉg chirʉm pua pod khaugba khabahab; pari okharta pua khap abajup ajim, jãgwiata mua mʉg pãar bʉ ʉ chirajĩ.

8Magbaawai chará warag Pedroou irig, —Señor, pʉʉta mʉ khãai ʉ̃rpai sĩewai pʉrʉg chan mua mʉch bʉ ʉpibamgui ajim.

Magbaawai jũrr Jesuu chi Simón Pedroog, —Pua mʉrʉg pʉch bʉ ʉpimapha chirʉm khai, magan ya tag pʉ mʉ dʉi nʉrraju khaba simgui ajim irig.

9Magbaawaita Simón Pedroou irig, —Señor, mag khai magan oob mʉ bʉ appai ʉm. Mʉ bʉjã ʉnaa, mʉ juajã ʉnaa mʉ porpa sũurbapʉi ajim.

10Pari magbaawai Jesuu irig, —Ar ya wajapha domerwia nʉm khʉʉn tag domerju igba naabahab, ãba bʉ appai ʉju aai nʉmgui ajim. Pãar thum khabahab mamʉ ya pãar wajapha domer nʉmjo thãar wajapha naabahab; ãba ãbpaita pãar ee domerbamjo thãar wajap khaba simgui ajim.

11Irua mag maar ee ãb thãar wajap khaba sim a sĩerran, maach eem ãbmua imeraa wir aig ich pʉr deeju khaphʉ sĩerr aawaita mag sĩejim.

12Mag Jesuu maar bʉ ʉkhapʉiwia, ũwaai ich khajũa jũapʉinaa deeu mes gaai jupchejim. Mag jupchewia marag, —Ĩsin chadau mua pãrag jaaukhimgui ajim, khantheeta mua pãar dʉi mʉg chirajĩ. 13Chadcha pãrau mʉrʉg Maestro anaa Señor aajem; pãrau mag nʉm aig agchata iekha nʉmgui ajim. 14Mag mʉ pãar Maestro anaa pãar Porkha chirʉmuata pãar bʉ mʉg ʉbarpí, pãraujã agjo jũrr chikham chogkha nʉmjo agdaujo dich khapeen bʉ ʉju aai naabahab ajim. 15Mʉg pãar bʉ ʉbarmua mua pãrag ejemplota dee chirʉmgui ajim, pãragjã mʉch denjo amkhĩir. 16Pãade khĩirjubat. Sĩi chikham chogkha nʉm khʉʉn chan amach pornaan khãai ʉ̃rpai khaba, ni sĩi piyonnaankha nʉm khʉʉnjã amach patronnaan khãai ʉ̃rpai khaba aajemgui ajim. Ich agjota naabahab ajim maachjã. Mʉ pãar Porkha chirʉmuata pãach dʉi jãgbarm oowia oob pãachta pãach khapeen khãaijã ʉ̃rpai nʉm a khĩirjuwia, “Maar chan chikham chogkhaju khaba nʉm” a khĩirjumiet ajim. 17Pãrau ya mʉ iek ũrbarm; pãrauta mua nem jaautarr khĩirjunaa chadcha mʉ ipierraa mʉch denjo nem wau wenʉrrʉmʉn, pãar onee wenʉrrajugui ajim.

18’Mag pãar onee wenʉrraju a chirʉm chan, pãar thumaam khʉʉn igwiata mag jaauba chirʉmgui ajim, ãb pãar eem cha mʉchdeu jaau chirʉmjo onee khabaju aawai. Mua khaphʉ chirʉmgui ajim, chadcha mʉchdeucha jʉr autarr khʉʉn thãar. Pari ichiita Ẽwandam iek phã sim gaai “Mʉ dʉi ãbam mes gaai thach khoojerraupaita ãsie mʉ khaibag wauju” a phã simjo, chadcha ich ag ee obermkhĩirta mua jãjã jʉr aujimgui ajim. 19Ya mua ag nawe pãrag jaau chirʉmgui ajim, maagwai ya eeupemjo magbaadeewaijã pãrag mʉʉta chadcha ich Ẽwandamaucha jʉr auwia pʉitarrau a khap amkhĩir. 20Ãbmua mag wir aig mʉ khaibag waujup mamʉ, ichiita pãran mua pʉi chirʉmgui ajim. Magua khaphʉ abat: Mua mʉch iek jaaumkhĩir pʉi chirʉmta õraujã ʉu pãar iek ũrm khõsi ũrnaa ʉkha nʉmʉn magan mʉchdeucha jaaubarmta ʉkhabarmjo abarmgui ajim. Mag mʉ iek ũrm khõsi ũr nʉm khʉʉnaun magan ĩchab ich mʉ pʉitarr iekchata ũr nʉmgui ajim ich Jesuu marag.

Jesuu jaauwai Judaauta i pʉr deeju ajim

(Mt. 26:20-25; Mr. 14:17-21; Lc. 22:21-23)

21Marag mag iekhawia warag ichta gaai machaaga aademua, —Chadcha mʉ cha iekha chirʉm iekhau pãar eem khʉʉnau ãbmua wir aig imeraa sĩi chikhamnag mʉ pʉr deejugui ajim.

22Pari irua warre chi thʉ̃rcha jaauba arr aawai marau khaugba, sĩi jũrr chikham khĩirta agdaujo eerpag eerpag naajim. 23Maagwai mʉ i bigaau i dʉi ãba thach kho oo chirajim, mʉʉta ʉ̃rcha ichdeu jãsene aajerr aawai. 24Mag mʉchta i bigaau chirarr aawai Simón Pedroou mʉrʉg juaupai jaaujim, khai igwiata mag sĩ a khap jeeumkhĩir.

25Magbaawai mua chi Jesús simʉgaacha ĩiudʉnaa irig, —Señor, mag pua jaau sim, ¿khai igwiata mag sĩwi? a chirajim.

26Magbaawai ich Jesuu mʉrʉg, —Oobá, pʉrʉg oomkhĩir mua pan omnaa agʉgcha deekhimgui ajim.

Magnaa chadcha pan khõreunaa, omnaa, Judaagta deejim, woun ãb Simón Iscariote anʉm ag iewaag.

27Mag Jesuu ichig pan omnaa ʉabaawai atham bʉrre mepeer mag chi Judas por ee dubtarrta warag ʉ̃rpabaadejim. Magbaawai Jesuu irig, —Pʉchdeu wauju khĩirju simjo jopai waubá ajim.

28Pari mʉ khapeen dʉi ãba thach kho narr khʉʉnau pod khaugbajierram, jãgwiata irig mag sĩejim khai. 29Ich chi Judaauta maar thumaam khʉʉn phatkhon dijã wai nʉrraajerr aawai maraun sĩita irig phiesta ee nem igjuuta per awaan mamkhĩir jaau simpii naajim; wa magbam khai, aphʉʉm khʉʉndamag khãijã ag eem deepi jaau sim khãijã anaajim.

30Mag ichig pan ʉabapäaiwai, auwia, khopʉiwia, warre oberbaadejim maar aigmua. Maagwai ya edaar ajim.

Jesuu iek iiur jaautarr

31Mag ya Judas oberbaadeewai Jesuu magjim marag:

—Ĩsta ya chadcha mʉch chi Emkhooi Iewaa jua theeg chirʉm thumaam khʉʉnau oogpam. Maagwai jũrr mʉ gaaimua Ẽwandamau ich jua theegjã oopiegpamgui ajim. 32Mʉch chi Emkhooi Iewaau Ẽwandam jua theeg mʉg oopi chirʉmjo, ich Ẽwandamaujã ĩchab nau jopcha mʉ jua theeg oopijugui ajim.

33Mag iekhamamua ich thõoju igwia, —Chaaina, mʉʉn sĩi khũchpaita pãar dʉi chirajugui ajim. Mʉ petaawai parii pãrau mʉ jʉrju. Pari na mʉchdeu judionaan chi thierrnaan dakhĩir iekha chirarrjo, mʉʉgwaiwe chan pãar mʉ chiraimam aar pod barju khaba naawai 34pãrag iek iiurta jaau pʉakhim. Ma, mʉgaugui ajim: Jũrr agdaujo chikham kha khõsi abat. Mua jãg pãach khõsi wai chitʉmjo, pãraujã agjota pãach khapeen kha khõsi abat. 35Magta pãrau chadcha agdaujo chikham kha khõsi amʉn, thumaam khʉʉnau khaphʉ ajugui ajim, chadcha pãar mʉ khapeenkha nʉm.

Jesuu jaauwai Pedroou bʉ̃ʉrjã i khaugbam aju jaautarr

(Mt. 26:31-35; Mr. 14:27-31; Lc. 22:31-34)

36Mag i iekha opinaa Simón Pedroou irig, —Señor, ¿pʉ jamag mamta mag sĩ? ajim.

Magbaawai ich Jesuu irig, —Ĩswe chan pod pʉ mʉ dʉi mabam; pari okharta ich agjo pʉ mʉ ẽudee majugui ajim Pedroog.

37Magbaawai deeu ich Pedrooupai irig, —Señor, pari ¿khan jãgwi ĩswe mʉ pʉ dʉi pod maju khaba chirʉ́? ajim. Pʉ gaaimuan thõju akhiinjã mʉʉn thõju chirʉmgui ajim.

38Magbaawai Jesuu irig, —¿Chadcha mʉ gaaimua pua ʉdʉraa pʉch thõopiju chirʉ́wi? ajim. Mʉ cha iekha chirʉm iekhau nau õrau pʉchig jeeuwai ãthãrr bĩeju nawe biek thãrjup pua amag bʉ̃ʉrjã mʉ khaugba chitʉm ajugui ajim.

Currently Selected:

San Juan 13: noaA

Highlight

Copy