San Juan 11

Lázaro meetarr

1Biek ãb phobordam Betania anʉm ee woundam Lázaro anʉm mor machpajim aajem. Ich Lázaro ʉ̃phʉʉin numí wai sĩejim, María Marta dʉi. Makhʉʉn dʉita sĩejeejim ich. 2Ich mag Lázaro ʉ̃phʉi Mariaau ajim, maach Por Jesús bʉ ʉ̃r jʉ̃gdeeu choonaa ich porbʉʉupai jʉʉupʉitarr. 3Mag amach ẽphemkhoi mor machpawia warag eeg pamaawaita amach numiim khʉʉnau õor jʉr auwia ich Jesús aig pʉijierram, jawaan mamkhĩir. Magbaawai chadcha beewia, —Señor, pʉ khapkhʉʉn chi wajapham pua ʉ̃rcha iigjemjã podba kherʉmgui a jaauchejim Jesuug.

4Pari ichig mag jaaubaa sĩi warag, —Jãg khamor machagau chan i meem iek meebamgui ajim. Jãan sĩi jãg khamor machag gaaimua Ẽwandamta thumaam khʉʉn khãaijã ʉ̃rpai sim anaa mʉchjã i Iewaa aawai agjo chirʉm a khap amkhĩirta jãgpijimgui ajim ich Jesuu mag ichig iek jaauchetarrag.

5Jesuu chadcha Marta dʉi Mariajã oomap khaba ni ich Lazarojã oomap khaba aajeejim. 6Mamʉ mag simta mag Lázaro mor mas sim ichig jaaubaichemjã maba, warag khãai numí mag maach narr aig sĩsijim. 7Maimua ag khur ya khãai numí naata marag ichdeu, —Deeu Judeaag wettarraugui ajim.

8Magbaawai marau irig, —Maestro, ¿ĩschapai ich jamaam khʉʉnau peer pʉch mokou bar thõotarr khʉʉn aarta deeu pʉ mam ig sĩ? anaajim.

9Magbaawai jũrr ichdeu marag, —Pari agtha amau mʉ thõoju ora khaba sĩebahab ajim. ¿Pãrau oowai mʉg edau ãspapakham doce oras sĩeba aajẽ? ajim. Ãsdawan maach dichmam aig mawiajã bʉ waaur thʉthʉgag maba aajemgui ajim, ãsdaau aawai. 10Pari maach edaarta chitaju atheen, sĩi bʉheu subaadeeu khãijã buudimajugui ajim, khĩchag ee aawai. Mag agtha ag ora khaba sĩewai araragagta chitʉmjo õrau mʉ chig abajugui ajim.

11Maimuata sĩi awia, —Maach khapkhʉʉn Lázaro ya khãibaadem; pari mua deeu i phiriupäain majugui ajim.

12Magbaata marau irig mag naajim:

—Señor, mag khãibaadem khai, magan ʉu i khĩirdam inaa aadem. Mag khai magan ʉu por khoordʉjugui anaajim.

13Pari Jesuu mag Lázaro khãibaadem a sĩerran, maan iin ya i meebaademta jaau sim ajiebma. Pari mag simta maraun khaugba, sĩi khãai chaar khãibaademta jaau simpii naajim.

14Maimuata ya warre marag, —Lázaro meejimgui ajim. 15Pari ʉuta mʉ i aar khaba chirajimgui ajim. Magba akhiin nau jãg chi mee sim mua pãach dakhĩir phiriu aujujã oobakham. Mamʉ chadcha Ẽwandam jua theeg mʉ gaai sim khap amkhĩir, i aarcha oon wettarrau ajim marag.

16Mag irua oon wettarrau abaawai maar eem ãb maar khapeer am den ibʉʉr wauwia Meís a thʉ̃ʉrjerrau, —Keena, magan maachjã i dʉi wettarrau ajim, i dʉi ãba khechimaag.

Irua mag sĩerran, Judeapienau peer ich Jesús thõotarr aarta deeu ogkhaba maagpam igwiata mag sĩejim. Mag Meís anʉm, i thʉ̃r chaar Tomás ajim.

Mag, chadcha Jesús mam dʉi maarjã i dʉi wetjim.

Jesuu õor phiriu auwia ich mag wenʉrrapiejem

17Mag wetwia ũrimaawaijã, ya khãai jayap sim a jaau naajim, chi Lázaro aukhertarr. 18Mag chi meetarr phobor Betania anʉm Jerusalén dakha kilómetros thãrjupjo sĩejim baraag. 19Jerusalenmua mag dakha sĩewai judionaan khapan weetjeejim aajem, Marta María dʉi nʉm aar, mag amach numpai aphobaadeewai amach ẽphemkhoi khĩirjuwia atcha gaai machgau okhĩirjuu apimaaugau awia. 20Mag nʉm ee Martaau ũr athajim aajem, ya Jesús amach dakpamam. Mag khaug athaawai i khĩirphee oon beejim. Pari María maba, deg sĩsijim. 21Mag beewia ya Jesús dʉi thẽubaicheewai chi Martaau irig, —Señor, pʉ mʉig sĩerr akhiin, mʉ ẽphemkhoi mʉg dau aphʉʉ abakhamgui ajim. 22Pari mua khaphʉ ʉmgui ajim, pua Ẽwandamag jeeubaawai pʉchdeu jeeubarmpierr irua aju.

23Magbaawai Jesuu irig, —Marta, pʉ ẽphemkhoi deeu iiu phiidʉjugui ajim.

24Magbaa Martaau, —Chadcha mua khaphʉ ʉmgui ajim, mʉg atag otarr khʉʉn thum deeu phiidʉtkha nʉm edan ijã dʉi phiidʉju.

25Magbaawai irig Jesuu magjim:

—Muata õor phiriu aunaa ich mag wai chirsiejem. Chi mʉ iekta ʉkha sim khʉʉn meewiajã deeu iiujugui ajim. 26Maimua ar mʉig eegarwejã mʉ iekta thãraucha ʉkhawia mʉ denkha thʉnʉm khʉʉn chan meem iek meebam. Makhʉʉnan meewiajã deeu phiidʉtkhawia ich mag nʉisijugui ajim. Magnaa irig, —¿Pua mʉ mag iekha chirʉm chadcha ʉkha ʉwi? ajim chi Martaag.

27Magbaawai chi Martaau, —Señor, mua khaphʉ ʉmgui ajim, pʉ chadcha ich Ẽwandam Iewaau. Pʉʉta warrgarwe ich Ẽwandamau ich iek jaaumkhĩir mʉg jẽb gaai pʉiju aajerr khabahab ajim irig.

Jesús Lázaro aukhertarr aar mawia bĩetarr

28Maimua Jesús dʉi mag iekha dʉnaawia, chi Martaau ich eeum aar mawia, okharii i kach gawaa, —María, maach Maestro ya chum phobor igaau sĩeichem. I iek pʉ dʉi iekhaag aajemgui aimajim aajem.

29Mag chadcha ichig mag jaaubaimam bʉrre Jesús aig beejim. 30Maagwai chan agtha Jesús phobor ee dubba, Marta dʉi ootarr aigpai sĩejim. 31Pari mag María apuraa oberbaadem oobaawai judionaan am khĩir jãsenkhaag am aig beewia narr khʉʉnau chi binaandam aukhertarr aarta bĩen mampii awia dʉi i ẽudee pochag beejim.

32Mag beewi, Jesús aig barchewi, i bʉkhʉrr phõbkhanaa irig, —Señor, pʉ mʉig sĩerr akhiin, mʉ ẽphemkhoi mʉg dau aphʉʉ abakhamgui ajim, bĩemamua.

33Mag warag ich dakhĩir bĩebaadem dʉi chi judionaan i dʉi beetarr khʉʉnjã bĩephobaadem oobaawai ichpa o jãsenaaga aademua gaai machaaga aadejim. 34Mag warag ich aig narr khʉʉnagta, ¿Jampaita aukherjierrá? a jeeujim.

Magbaa amachdeu, —Señor, achum khabahab; oomierrau ajierram irig.

35Mag gaai machag aademua ich Jesujã bĩejim. 36Mag Jesús bĩebaadem oowia chi judionaanau, —Keena, pãade oobat: Jãgan chadchata irua i jãsene aajeejimwai aajeejim jũrram khʉʉnau. 37Pari makhʉʉnau mag nʉm ee, agjo bigaaum khʉʉnau jũrr, —Ichta mʉig sĩerr akhiin, jãg dau khĩsu khitʉm monaautarrjo, ¿mʉg Lazarojã irua monaaubakham khai? aajeejim.

Jesuu Lázaro phiriu autarr

38Mag mawia ya chi aukhertarr aar pabaimaawai deeu gaai machag aadejim. Chi binaan aukhertarr jẽbdi, nawe durrbʉ ee chi khorm ajim. Mag simta mok por pom simuata sĩi chi jẽbdi i ee joothʉ wai naajim. 39Mag aig pachewia Jesuu chi aig narr khʉʉnag chi mokpor chawag pʉreupʉipi jaaujim. Magbaawai Martaau irig, —Señor ya maach aukhertarr khãai jayap sim aawai ya maach ãr kherabahab ajim.

40Magbaawai Jesuu irig, —Mamʉ mua khabá chaigjã pʉrʉg, mua i phiriu auju pʉch thãar ee khaphʉ ʉm khai, pua chadcha Ẽwandam jua theeg ooju a chirajimgui ajim.

41Mag chi mok chawag pʉreupi jaautarr aawai chadcha chawag pʉreupʉijierram. Magbaawai Jesuu ʉ̃gthaag eerpanaa Ẽwandamag, —Tata, mua pʉrʉg ʉu ajim a chirʉmgui ajim, mʉg mʉchdeu jeeu chirʉm pua ʉu mʉ iek ʉkhabaawai. 42Mua khaphʉ chirʉmgui ajim, mua pʉchig jeeuwai pua mʉ iek ʉkhaajem. Pari magʉm ãba, ichiita thumaam khʉʉn jʉ̃g daar mua thet mag ʉu ajim a chirʉmgui ajim, thumaam khʉʉnag chadcha pʉchdeuta mʉ pʉijim a khap amkhĩir.

43Mag iekhawia deeu ichdeupai jũrr mag chi meem jẽb deg sĩerragta i thʉ̃rcha thʉ̃rthʉ̃rnaa thet, —Lázaro, dawag oberbaiche ajim.

44Magbaawai maach chi meem arrta chadcha dawag oberchejim. Oowai ich aukhertarr ich mag bʉ aarmua khĩeb mor thum dĩes baúa pʉreunaa odi aigmua ʉ̃gthaag porpa khĩir jãarjemua pʉreu simta oberchejim. Mag oberbaicheewai aig narr khʉʉnag, —Jãimua jãg put ẽerkhabapʉit ajim, ideu ich diig mamkhĩir.

Jesús pʉr awaag ibeptarr

(Mt. 26:1-5; Mr. 14:1-2; Lc. 22:1-2)

45Mag Jesuu Lázaro phiriu autarr amach daúacha ootarr gaaimua, judionaan khapan María dʉi beetarr khʉʉnau khaphʉ nʉisijim, chadcha Jesús ich Ẽwandamau pʉitarr. Mag warag i igar nʉisijim. 46Pari mag thʉnʉm ee, ãaur khʉʉn warag fariseonaan aar wetjim. Mag wetwi Jesuu mag õor phiriu athamta ĩgkhaimajierram aajem. 47Magbaawai chi fariseonaan, phadnaan chi porkha narr khʉʉn dʉi ãba, tagam khʉʉn chi thierrnaanpa biirdʉjierram aajem. Mag biirdʉnaa amach eepai jũrr amach khapeenagta, —Keena, ¿maadeu jãga ajuma jãg woun dʉi? ajierram anʉm. Jãguan chadchata maach dauderraa ag na õrau nem ooba aajempata wau nʉrrʉm. 48Maadeu ʉdʉraa irig jãgʉm nem waupi nʉmʉn, thumaam khʉʉnta i igar paaukhawia amach reikhapiju. Magbaawai Romapien chi thethemnaan beewia, jũrr maach Aai i jeeujem diita pogueupʉinaa, maachjã dau aug waujugui ajierram aajem.

49Mamʉ ãaur khʉʉnau mamagkham ee, ãb mag añoou phadnaan thum thʉnarr khʉʉn porkha sĩerr Caifás a thʉ̃ʉrjerrau ich khapeenag, —Pãrau chan bʉ̃ʉrjã khĩirjubata iekha nʉmgui ajim anʉm. 50Magnaa ichdeupai, Mua oowai wajapcha ajuun, mag pãrau jaau nʉmjo maach thumaam khʉʉnta dau aphʉʉ apiju khãai, jãg appaita maach thumaam khʉʉn kõit thõopiju aai simgui ajim anaabá, Jesús igwia.

51Pari wajapcharan Caifaau mag iekhatarr chan ich khĩirjugjã khabajim. Wajapcharan mag añoou ichta thum phadnaan thʉnarr khʉʉn por arr aawai ich Ẽwandamau mag iekhapibaawaita mag iekhajim, Jesuuta judionaan thʉnʉm kõit thõju igwia. 52Pari magbarm chan ĩchab judionaan kõitpai khaba, ewag paawai thum ich chaainkhaju khʉʉn kõitpa thõju a sim ajim, judionaan khabam khʉʉn awiajã, magbarmua ich chaain durrpierram khʉʉnta khod ãbamkha awaag. 53Ya Caifaau mag iekhatarr aawai magtarr aigmua judionaan chi thethemnaanau ãba ibepwia warre Jesús thõoju khĩirjugta wai nʉisijim.

54Jesuu ya mag ich thõoju khĩirju nʉm khaphʉ sĩerr aawai ya tag judionaan ee parhooba nʉrraba aajeejim. Mag gaaimua ichta warag Judea durrmua warp petajim, phobordam Efraín anʉmʉg. Mam chan õor pomcha khaba naajeejim. Maig maar i dʉi naaimajim, i kha ogdʉba wenʉrraajerr aawai.

55Mag phobor Efraín anʉmʉg weetwai judionaan phiesta Pascua aajem burrju dakpapa khajim. Amach i arr aawai, mag phiesta ʉ̃rʉʉ arr aawai, õor pom Jerusalenag erereu khajim, Pascua burrju nawe khĩir khaugaag, amach jooinau jaaujerrjo domer nʉmua amach khaibag barpäain. 56Mag wet thʉnʉmuan Jesuuta jʉrphoo aajeejim. Maimua ya Aai i jeeujem degcha paaukhaimawiajã i beebaju khĩirjuwia jũrr amach khapeenagta, —Keena, ¿pãrau khĩirjuawai mʉg phiesta ee i beeju khai? aajeejim aajem.

57Maagwai chi fariseonaanau phadnaan chi porkha narr khʉʉn dʉimua ya õrag jaaukha wai naajim aajem, chi Jesús sim khaug athaawai amachig jaaumkhĩir, mag amachig jaaubaawai sĩi i pʉr awaan wetaag.

Currently Selected:

San Juan 11: noaA

Highlight

Copy