Hechos 3
3
Woun ãb bʉ ãkhãraa khitʉm monaautarr
1Biek ãb Pedro Juan dʉi Aai i jeeujem deg wetjierram aajem, ya kheeuragam las tres nʉm ee. Mag ora paawai õrau Ẽwandamag jeeujerr aawai ĩchab amach paat jewaan wetjim aajem. 2Mag Aai i jeeujem deg dub nʉm puertdi aigcha ed eepierr woun ãb aphʉʉ khitʉm jup kheeujeejim aajem. Mag woun bi eewe bʉ ãkhãraa khitʉmta thaabatarr aawai podjã ich appai dʉrdʉr aba, sĩi õrauta jiir aubeewia mag puertdi “Chi Ooimʉg” anʉm aig juppi sĩiujeejim aajem, õor ag ee dub nʉm khʉʉnag phatkhondam jeeumkhĩir.
3Biek ãb i mag oo chirʉmta, Pedro Juan dʉi ierrag dich wetum oobaawai amag, —Aay keena ajim anʉm, mʉ ap chitʉm, mʉrʉg phatkhondam deebat ajim anʉm.
4Magbaawai amach numiim khʉʉnau irig eerpanaa Pedroou irig, —Marag oobá ajim anʉm.
5Mag Pedroou ichig “Oobá” abaawai ichig nemdamta deegpampii awia amag eerpa oo sĩsijim aajem. 6Mag amachig eerpabaa Pedroou magjim anʉm irig:
—Mʉ chan bʉ̃ʉrjã phatkhon chukhu chirʉm, mamʉ mʉchdeu podju ayaam chan mua pʉrʉg ĩgkhabam. Ãba Jesucristo Nazaretpierrau pʉch monaaujuuta khĩirjunaa phiidʉbaad ajim anʉm.
7Mag iekhanaa i juachaar gar pʉrnaa ʉ̃gthaag eudʉ athaawai chadcha nem bʉpá ubag aadejim anaabá. 8Mag ich jua gaai pʉrnaa dʉnʉʉupi athaawai, dʉi ʉ̃gthaag phuddʉ oo dʉnʉisiwia ich mag nem ajaug dʉrdʉr sĩsijim aajem. Mag warag am dʉi ãba Aai i jeeujem deg dubwia sĩi chaaijo onegau bʉ jiir nʉnʉʉugmamua Ẽwandamag, —Ʉuchata pua mʉg mʉ monaaubapʉim Ẽwandam; chadcha pʉchta thumaam khʉʉn khãaijã chi thierriugui a ijẽb nʉnʉʉu khabaadejim aajem.
9Magtarr aigmua atag ich mag onee Ẽwandamag ʉu ajijimkham thumaam khʉʉnau oojierram aajem. 10I mag nʉrrʉm oowia dauderraa naajieb mamʉ, thumaam khʉʉnau, “Jã chadcha ar Aai i jeeujem deg dub nʉm puertdi Chi Ooimʉg a thʉ̃ʉrjem aig oo simua õor dich nʉm khʉʉnag phatkhondam jeeujerr woun khabahab” aajeejim aajem jũrram khʉʉnau.
“Pórtico de Salomón” anʉm ee Pedroou iekhatarr
11Mag ich monaaubapäaiwai chi bʉ ãkhãraa khitarrau Pedro Juan dʉi chaaug wetpimaaugau, warag am gaai pʉrbaadejim aajem. Ya mag i monaaubaadem õrau khakhapdo aadeewai daaugajãr edau obeerjem bi gar dijãjo weu wejom “Pórtico de Salomón” anʉmʉg thum khaphig phobaadejim aajem, mam gar chi bʉ ãkhãraa khitarrau Pedro Juan dʉi wenʉrrʉm kha ogdʉba sĩerr aawai. 12Pedroou mag amachig khaphig wedurum oobaawai mag khapan thʉnʉmʉg magjim aajem:
—Keena, ¿khan jãgwia jãg maar oowia pãar dauderraa nʉ? ajim anʉm. Pãrau jãg maragta eerpapaad aadephʉm, ¿pãrau khĩirjuawai marau maach juapaauta jãg monaaubarmjoo nʉ, wa Ẽwandam na maach pekau chukhu nʉm gaaimua jãgbarm khãijã anʉ́ pãrau pãach odegpai? ajim anʉm amag. Mag khabamgui ajim anʉm ichdeupai. 13Jãan ar Ẽwandamau ich Iewaa pʉitarrta ar khabam awi pãachdeu thõotarr ag jua theegauta jãg i monaaubapʉimgui ajim anʉm. Ich jãg Jesuuta i chogkha beetarr aawai, maach Ẽwandam anaa ĩchab maach jooin Abrán Isá maimua Jacob am Ẽwandamaupai thumaam khʉʉn Porkhapinaa nem jua theeg apijim. Ich ag Jesupai khabajieb ajim anʉm, ar Pilatoou pʉapäaig abaawai pãachdeu warag thõopʉipi jaautarr. 14I bʉ̃ʉrjã pekau chukhunaa thumaam khʉʉn dʉi agpierraa khitarrta pãrau warag thõopi jaaunaa jũrr ag khãai chadcha õor thõomie chaarta pãach ipaarmua warag cárcel degmuajã weeupʉipijierramgui ajim anʉm. 15Mag, pãrau chadcha warag maach thumaam khʉʉn iiupiejemta thõopʉijierramgui ajim anʉm. Mag i thõopʉijierrab mamʉ, deeu Ẽwandamau i phiriu aujimgui ajim anʉm, jẽbdeg sĩerr ãba. Marau mag jaau nʉmʉn, mag pãachdeu i thõotarr khurjã maach daúacha monakha meeba arrjo nʉrrʉm oojerr aawaiugui ajim aajem Pedroou amach khĩircha. 16Maimua mag chi woun bʉ ãkhãraa khitarr igwi, Pãade wajapha khĩirjubat ajim anʉm. Mʉig ni ãbmuajã meraajã khaba sim, warr jãga sĩejĩ mʉg woun. Mag sĩejieb mamʉ, chadcha Jesuu ich monaauju khaphʉ sĩerr aawaita jãg monaau sĩsimgui ajim anʉm. Pãrau ĩs mʉg woun monakha oo nʉmʉn, jãan maraujã maach khĩirjug ee ãba Jesús jua theegaupaita i monaauju khaphʉ narr gaaimuaugui ajim anʉm. Mag gaaimuata jãg warre ich bi eewe monakha thaabatarrjo pãrau ĩs i monakha oo nʉmgui ajim aajem.
17Magnaa ich Pedrooupai, —Mua khaphʉ chirʉmgui ajim anʉm, pãrau pãach pornaan dʉimua Jesús pʉrnaa thõopäaiwai chadcha ich Ẽwandamaucha pʉitarr khabampii awiata jãg i thõojierram. 18Pãrau i dʉi jãgtarran, ich Ẽwandamau warrgarwe ich i jaaumienag jaaupibaawai jũrr amau õrag, “Ẽwandam Iewaa Cristo beewia õrau i dau aphʉʉ thõoju” a jaautarrjo, ich Ẽwandamauta ʉdʉraa pãrag i thõopi sim khabajieb ajim anʉm. 19-20Pãachdeu i dʉi magtarr jũrr pãach khaibag thumaa ãsie ewag khĩirjunaa Ẽwandamag chugpaapi jeeubat ajim aajem, mag khaibag chugpamkhĩir. Pãach thum israelnaanau magta jeeukhiin, mag Jesús warrgarwe Ẽwandamau jʉr auwi pʉiju aajerr deeu pʉibarm gaaimua Ẽwandamauta pãar kha oneg chukhu narrjã kha onee apijugui ajim aajem. 21Mag irua pʉijup mamʉ, mʉʉgwaiweran Jesús ich jãg ʉ̃gthar sĩeju aai simgui ajim anʉm, warrgarwe Ẽwandamau ich i jaaumienag jaaujerrjo mʉg durr thum deeu ũmaai durr wʉjʉúg paapäain bee nʉm ora. 22Ich ag Jesús igwia Moiseeujã warrgarwe maach jooinag,
“Maach Por Ẽwandamau maach khodnaan eempai õor ãb ich i jaaumkhĩir pʉijugui” ajim anʉm, “ich jãg mʉrʉgjã pãach ee ich iek jaaupitarrjo jaaumkhĩir.
Mag ichdeu pʉibarmua pãachig nem jaauwai i ipierraa abat” ajim aajem.
23“Mag ichdeucha jʉr auwia pʉibarmua nem jaau simta ʉkhaba abarm khʉʉn chan, oob amau amach ʉ̃gthar oberju amiet” a jaaujim aajem Moiseeu maach jooinag. (Dt. 18:15-19)
24Mag iekhakhagmamua ich Pedrooupai, —Ich jãg Moiseeu ichjo Ẽwandamau ãb ich i jaaujem pʉiju jaaujerrjo, tagam khʉʉn agjo i i jaaujerr khʉʉn thum Samuel khararr aigmua ewagam khʉʉnaujã ich mag jaaujeejimgui ajim anʉm. 25Magnaa, Pãach khabahab ajim anʉm, warrgar mag Ẽwandam i jaaujerr khʉʉn ag chaain ewagam khʉʉn. Pãar dennaan dʉi Ẽwandamau iek deewai ya pãarta irua khĩirju wai sĩebajieb ajim anʉm. Magtarr aawai ichdeu jooi Abranag, “Mʉg atag paawai pʉ chaain ewagam khʉʉnau chaai ãb oobarmuata thumaam khʉʉn dʉi nem ajapha waujugui” a iekhatarr aawai 26Ẽwandamau chadcha ich Iewaa jʉr auwi pãar eeta nacha pʉijimgui ajim anʉm, pãach pekau pom sĩsidʉm isegwia pãach thãar ee i athaawai pãach ʉu amkhĩir.
Currently Selected:
Hechos 3: noaA
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.