ܡܬܝ 9

ܝܼܫܘܿܥ ܒܲܣܘܼܡܹܐ ܐ݇ܢܵܫܵܐ ܫܦܝܼܠܵܐ

ܡܪܩܘܣ 2‏:1‏‐12؛ ܠܘܩܐ 5‏:17‏‐26

1ܘܐ݇ܣܝܼܩ ܠܹܗ ܝܼܫܘܿܥ ܓܵܘ ܓܵܡܝܼ، ܘܐ݇ܙܝܼܠ ܠܹܗ ܠܗ̇ܘ ܡܲܪܙܵܐ ܐ݇ܚܹܪ݇ܢܵܐ ܘܐ݇ܬܹܐ ܠܹܗ ܠܡܕܝܼܢ݇ܬܹܗ. 2ܘܡܘܼܐܬܹܐ ܠܗܘܿܢ ܠܟܸܣ ܠܹܗ ܚܲܕ ܫܦܝܼܠܵܐ ܕܸܪܝܵܐ ܒܫܘܝܼܬܵܐ. ܐܝܼܡܲܢ ܕܚܙܹܐ ܠܹܗ ܝܼܫܘܿܥ ܗܲܝܡܵܢܘܼܬܲܝܗܝ، ܐ݇ܡܝܼܪܹܗ ܠܗ̇ܘ ܫܦܝܼܠܵܐ، ”ܗܘܝܼ ܠܸܒܵܢܵܐ ܒܪܘܿܢܝܼ، ܦܘܼܚܠܹܐ ܝܢܵܐ ܐܸܠܘܼܟ݂ ܚܛܝܼܵܬܘܼ̈ܟ݂.“ 3ܗ̇ܝܓܵܗ ܐ݇ܡܝܼܪܗܘܿܢ ܚܲܕ݇ܟܡܵܐ ܣܵܦܪܹ̈ܐ ܓܵܘ ܓܵܢܲܝܗܝ، ”ܐܵܗܵܐ ܒܸܓܕܵܦܵܐ ܝܠܹܗ.“ 4ܝ݇ܕܝܼܥ ܠܹܗ ܝܼܫܘܿܥ ܚܘܼܫܵܒܲܝ̈ܗܝ ܘܐ݇ܡܝܼܪܹܗ، ”ܩܵܡܘܿܕܝܼ ܒܸܚܫܵܒ݂ܵܐ ܝܬܘܿܢ ܒܝܼܫܬܵܐ ܒܠܸܒܵܘܟ݂ܘܿܢ؟ 5”ܐܲܝܢܝܼ ܝܠܵܗ̇ ܒܘܼܫ ܦܫܘܼܩܬܵܐ ܠܹܐܡܵܪܵܐ، ’ܦܘܼܚܠܹܐ ܝܢܵܐ ܐܸܠܘܼܟ݂ ܚܛܝܼܵܬܘܼ̈ܟ݂،‘ ܝܲܢ ܠܹܐܡܵܪܵܐ، ’ܩܘܼܡ ܚܕܘܿܪ؟‘ 6”ܐܝܼܢܵܐ ܕܝܵܕܥܝܼܬܘܿܢ ܕܒܪܘܿܢܵܐ ܕܐ݇ܢܵܫܵܐ ܐܝܼܬ ܠܹܗ ܫܘܼܠܛܵܢܵܐ ܒܐܲܪܥܵܐ ܕܦܲܚܸܠ ܚܛܝܼܵܬܹ̈ܐ.“ ܗ̇ܝܓܵܗ ܐ݇ܡܝܼܪܹܗ ܠܗ̇ܘ ܫܦܝܼܠܵܐ، ”ܩܘܼܡ، ܫܩܘܿܠ ܫܘܝܼܬܘܼܟ݂، ܘܙܹܠ݇ ܠܒܲܝܬܘܼܟ݂.“ 7ܘܩܝܼܡ ܠܹܗ ܘܐ݇ܙܝܼܠ ܠܹܗ ܠܒܲܝܬܹܗ. 8ܘܐܝܼܡܲܢ ܕܚܙܹܐ ܠܗܘܿܢ ܟܸܢܫܹ̈ܐ، ܙܕܝܼܥ ܠܗܘܿܢ، ܘܫܘܼܒܸܚ ܠܗܘܿܢ ܠܐܲܠܵܗܵܐ ܕܝܘܼܗ݇ܒܸܠ ܠܹܗ ܗܲܕܟ݂ܵܐ ܫܘܼܠܛܵܢܵܐ ܠܒܢܲܝ̈ܢܵܫܵܐ.

ܡܫܝܼܚܵܐ ܒܸܩܪܵܝܵܐ ܠܡܲܬܲܝ

ܡܪܩܘܣ 2‏:13‏‐17؛ ܠܘܩܐ 5‏:27‏‐32

9ܘܟܲܕ ܥܒ݂ܝܼܪܹܗ ܝܼܫܘܿܥ ܡ̣ܢ ܬܵܡܵܐ، ܚܙܹܐ ܠܹܗ ܚܲܕ ܐ݇ܢܵܫܵܐ ܫܸܡܹܗ ܡܲܬܲܝ، ܝ݇ܬܝܼܒ݂ܵܐ ܒܒܹܝܬ ܡܵܟ݂ܣܹ̈ܐ، ܘܐ݇ܡܝܼܪܹܗ ܐܸܠܹܗ، ”ܬܵܐ ܒܵܬ݇ܪܝܼ.“ ܩܝܼܡ ܠܹܗ ܘܐ݇ܙܝܼܠ ܠܹܗ ܒܵܬ݇ܪܹܗ. 10ܘܟܲܕ ܝ݇ܬܝܼܒ݂ܵܐ ܝܗ݇ܘܵܐ ܠܣܘܼܦܪܵܐ ܓܵܘ ܒܲܝܬܵܐ ܕܡܲܬܲܝ، ܐ݇ܬܹܐ ܠܗܘܿܢ ܪܵܒܵܐ ܡܵܟ݂ܣܹ̈ܐ ܘܚܲܛܵܝܹ̈ܐ ܘܝ݇ܬܝܼܒ݂ ܠܗܘܿܢ ܥܲܠ ܣܘܼܦܪܵܐ ܥܲܡ ܝܼܫܘܿܥ ܘܬܲܠܡܝܼܕܘܼ̈ܗܝ. 11ܟܲܕ ܦܪ̈ܝܼܫܹܐ ܚܙܹܐ ܠܗܘܿܢ ܐܸܠܲܝܗܝ، ܐ݇ܡܝܼܪܗܘܿܢ ܠܬܲܠܡܝܼܕܘܼ̈ܗܝ، ”ܩܵܡܘܿܕܝܼ ܥܲܡ ܡܵܟ݂ܣܹ̈ܐ ܘܚܲܛܵܝܹ̈ܐ ܒܹܐܟ݂ܵܠܵܐ ܝܠܹܗ ܪܲܒܝܼܵܘܟ݂ܘܿܢ؟“ 12ܘܟܲܕ ܫܡܝܼܥ ܠܹܗ ܝܼܫܘܿܥ ܐ݇ܡܝܼܪܹܗ ܐܸܠܲܝܗܝ، ”ܠܹܐ ܝܢܵܐ ܣܢܝܼܩܹܐ ܠܐܵܣܝܵܐ ܐܵܢܝܼ ܕܝܼܢܵܐ ܒܚܘܼܠܡܵܢܵܐ، ܐܸܠܵܐ ܐܵܢܝܼ ܕܡܪܝܼܥܹܐ ܝܢܵܐ. 13”ܙܹܠ݇ܡܘܼܢ ܘܝ݇ܠܘܿܦܘܼܢ ܡܘܿܕܝܼ ܝܠܹܗ، ’ܪ̈ܲܚܡܹܐ ܟܹܐ ܒܵܥܹܝܢ، ܘܠܵܐ ܕܸܒ݂ܚܵܐ.‘ ܣܵܒܵܒ ܐܵܢܵܐ ܠܵܐ ܐ݇ܬܹܐ ܠܝܼ ܕܩܵܪܹܝܢ ܠܙܲܕܝܼܩܹ̈ܐ، ܐܸܠܵܐ ܠܚܲܛܵܝܹ̈ܐ.“#ܗܘܫܥ 6‏:6

ܒܘܼܩܵܪܵܐ ܒܘܼܬ ܨܵܘܡܵܐ

ܡܪܩܘܣ 2‏:18‏‐22؛ ܠܘܩܐ 5‏:33‏‐39

14ܗ̇ܝܓܵܗ ܐ݇ܬܹܐ ܠܗܘܿܢ ܠܟܸܣ ܝܼܫܘܿܥ ܬܲܠܡܝܼ̈ܕܹܐ ܕܝܘܿܚܲܢܵܢ ܘܐ݇ܡܝܼܪܗܘܿܢ، ”ܩܵܡܘܿܕܝܼ ܐܲܚܢܲܢ ܘܦܪ̈ܝܼܫܹܐ ܟܹܐ ܨܵܝܡܲܚ ܪܵܒܵܐ، ܐܝܼܢܵܐ ܬܲܠܡܝܼܕܘܼ̈ܟ݂ ܠܹܐ ܨܵܝܡܝܼ؟“ 15ܐ݇ܡܝܼܪܹܗ ܐܸܠܲܝܗܝ ܝܼܫܘܿܥ، ”ܩܵܡܘܿܕܝܼ، ܟܹܐ ܡܵܨܝܼ ܐ݇ܢܵܫܹ̈ܐ ܕܓܢܘܿܢܵܐ ܥܵܒ݂ܕܝܼ ܬܵܥܙܝܼ ܟܡܵܐ ܕܚܸܬܢܵܐ ܥܲܡܲܝܗܝ ܝܠܹܗ؟ ܐܝܼܢܵܐ ܒܸܬ ܐܵܬܝܼ ܝܵܘܡܵܢܹ̈ܐ ܐܝܼܡܲܢ ܕܦܵܐܹܫ ܫܩܝܼܠܵܐ ܡܸܢܲܝܗܝ ܚܸܬܢܵܐ، ܘܗ̇ܝܓܵܗ ܒܸܬ ܨܵܝܡܝܼ. 16”ܐܘܼܦ ܚܲܕ ܠܹܐ ܕܵܪܹܐ ܥܵܪܵܝܬܵܐ ܚܲܕܬܵܐ ܥܲܠ ܠܒ݂ܝܼܫܬܵܐ ܒܠܝܼܬܵܐ، ܕܠܵܐ ܗܵܘܝܵܐ ܕܓܵܪܫܵܐ ܥܵܪܵܝܬܵܐ ܡ̣ܢ ܗ̇ܝ ܠܒ݂ܝܼܫܬܵܐ، ܘܒܸܙܥܵܐ ܒܘܼܫ ܓܲܪܘܸܣ. 17”ܘܐ݇ܢܵܫܹ̈ܐ ܠܹܐ ܕܵܪܝܼ ܚܲܡܪܵܐ ܚܵܕ݇ܬܵܐ ܓܵܘ ܓܘܼܕܹ̈ܐ ܒܸܠܝܹ̈ܐ، ܕܠܵܐ ܦܵܪܛܝܼ ܓܘܼܕܹ̈ܐ، ܘܫܵܦܹܟ݂ ܚܲܡܪܵܐ، ܘܚܵܪܒ݂ܝܼ ܓܘܼܕܹ̈ܐ. ܐܝܼܢܵܐ ܟܹܐ ܕܵܪܝܼ ܚܲܡܪܵܐ ܚܵܕ݇ܬܵܐ ܓܵܘ ܓܘܼܕܹ̈ܐ ܚܵܕ݇ܬܹ̈ܐ، ܕܗܲܕܟ݂ܵܐ ܬܸܪܘܲܝܗܝ ܦܵܝܫܝܼ ܢܛܝܼܪܹܐ.“

ܡܫܝܼܚܵܐ ܒܲܣܘܼܡܹܐ ܒܲܟ݂ܬܵܐ ܡܪܝܼܥܬܵܐ ܘܡܲܚܘܼܝܹܐ ܒܪܵܬܵܐ ܡܝܼܬܬܵܐ

ܡܪܩܘܣ 5‏:21‏‐43؛ ܠܘܩܐ 8‏:40‏‐56

18ܟܲܕ ܝܼܫܘܿܥ ܗܲܡܙܘܼܡܹܐ ܝܗ݇ܘܵܐ ܥܲܡܲܝܗܝ، ܐ݇ܬܹܐ ܠܹܗ ܚܲܕ ܫܲܠܝܼܛܵܐ ܘܣܓ݂ܝܼܕ ܠܹܗ ܐܸܠܹܗ، ܘܐ݇ܡܝܼܪܹܗ، ”ܒܪܵܬܝܼ ܐܵܕܝܼܵܐ ܡܝܼܬ ܠܵܗ̇، ܐܝܼܢܵܐ ܬܵܐ ܘܡܲܬܸܒ݂ ܐܝܼܕܘܼܟ݂ ܥܲܠܘܼܗ̇ ܘܒܸܬ ܚܵܝܵܐ.“ 19ܩܝܼܡ ܠܹܗ ܝܼܫܘܿܥ، ܘܥܲܡܹܗ ܬܲܠܡܝܼܕܘܼ̈ܗܝ، ܘܐ݇ܙܝܼܠ ܠܗܘܿܢ ܒܵܬ݇ܪܹܗ. 20ܘܗܵܐ ܚܕܵܐ ܒܲܟ݂ܬܵܐ ܕܒܹܐܙܵܠܵܐ ܝܗ݇ܘܵܐ ܕܸܡܘܼܗ̇ ܩܵܐ ܬܪܸܥܣܲܪ ܫܸܢܹ̈ܐ، ܐ݇ܬܹܐ ܠܵܗ̇ ܡ̣ܢ ܒܵܬ݇ܪܹܗ، ܘܕܩܝܼܪܵܗ̇ ܒܫܸܦܘܼܠܵܐ ܕܠܒ݂ܝܼܫܬܹܗ. 21ܣܵܒܵܒ ܐ݇ܡܝܼܪܵܗ̇ ܒܓܵܢܘܼܗ̇، ”ܐܵܦܸܢ ܒܠܒ݂ܝܼܫܬܹܗ ܐܲܚܟ̰ܝܼ ܕܵܩܪܵܢ، ܒܸܬ ܦܵܝܫܵܢ ܒܣܝܼܡܬܵܐ.“ 22ܘܦܬܝܼܠ ܠܹܗ ܝܼܫܘܿܥ ܘܚܸܙܝܵܐ ܠܹܗ ܘܐ݇ܡܝܼܪܹܗ ܐܸܠܘܼܗ̇، ”ܗܘܝܼ ܠܸܒܵܢܬܵܐ ܒܪܵܬܝܼ، ܗܲܝܡܵܢܘܼܬܵܟ݂ܝ ܩܲܡ ܡܲܚܝܼܵܐ ܠܵܟ݂ܝ.“ ܘܗܲܪ ܒܗ̇ܝ ܥܕܵܢܵܐ ܦܝܼܫ ܠܵܗ̇ ܒܣܝܼܡܬܵܐ ܗ̇ܝ ܒܲܟ݂ܬܵܐ. 23ܐ݇ܬܹܐ ܠܹܗ ܝܼܫܘܿܥ ܠܒܲܝܬܵܐ ܕܫܲܠܝܼܛܵܐ، ܘܚܙܹܐ ܠܹܗ ܠܡܵܚܝܵܢܹ̈ܐ ܕܫܲܒܝܼܒܹ̈ܐ ܘܟܸܢܫܵܐ ܫܓ݂ܝܼܫܹܐ، 24ܘܐ݇ܡܝܼܪܹܗ ܐܸܠܲܝܗܝ، ”ܦܠܘܿܛܘܼܢ. ܒܪܵܬܵܐ ܠܹܐ ܝܠܵܗ̇ ܡܝܼܬܬܵܐ، ܐܸܠܵܐ ܕܡܝܼܟ݂ܬܵܐ ܝܠܵܗ̇.“ ܘܓܚܝܼܟ ܠܗܘܿܢ ܒܝܼܹܗ. 25ܘܐܝܼܡܲܢ ܕܦܘܼܠܸܛ ܠܹܗ ܠܟܸܢܫܵܐ، ܥܒ݂ܝܼܪܹܗ ܘܕܒ݂ܝܼܩ ܠܹܗ ܒܐܝܼܕܘܼܗ̇، ܘܩܝܼܡ ܠܵܗ̇ ܗ̇ܝ ܒܪܵܬܵܐ. 26ܘܦܪܝܼܣ ܠܹܗ ܐܵܗܵܐ ܚܲܒܪܵܐ ܒܟܠܵܗ̇ ܗ̇ܝ ܐܲܪܥܵܐ.

ܒܵܣܲܡܬܵܐ ܕܬܪܹܝ ܣܸܡܝܹ̈ܐ

27ܘܟܲܕ ܫܘܼܢܹܐ ܠܹܗ ܝܼܫܘܿܥ ܡ̣ܢ ܬܵܡܵܐ، ܐ݇ܙܝܼܠ ܠܗܘܿܢ ܒܵܬ݇ܪܹܗ ܬܪܹܝ ܣܸܡܝܹ̈ܐ، ܡܲܩܘܘܼܚܹܐ ܘܒܹܐܡܵܪܵܐ، ”ܥܒ݂ܘܿܕ ܪ̈ܲܚܡܹܐ ܥܲܠܲܢ، ܒܪܘܿܢܵܐ ܕܕܵܘܝܼܕ.“ 28ܘܐܝܼܡܲܢ ܕܐ݇ܬܹܐ ܠܹܗ ܠܒܲܝܬܵܐ، ܩܘܼܪܒܸܢܗܘܿܢ ܐܸܠܹܗ ܐܵܢܝܼ ܣܸܡܝܹ̈ܐ. ܘܐ݇ܡܝܼܪܹܗ ܐܸܠܲܝܗܝ ܝܼܫܘܿܥ، ”ܗܲܡܘܼܢܹܐ ܝܬܘܿܢ ܕܡܵܨܹܝܢ ܐܵܢܵܐ ܥܵܒ݂ܕܹܢ ܐܵܗܵܐ؟“ ܐ݇ܡܝܼܪܗܘܿܢ ܐܸܠܹܗ، ”ܗܹܐ، ܡܵܪܲܢ.“ 29ܗ̇ܝܓܵܗ ܕܩܝܼܪܹܗ ܒܥܲܝܢܲܝ̈ܗܝ ܘܐ݇ܡܝܼܪܹܗ، ”ܐܲܝܟ݂ ܕܗܘܼܡܸܢܵܘܟ݂ܘܿܢ ܗܵܘܹܐ ܐܸܠܵܘܟ݂ܘܿܢ.“ 30ܘܒܗ̇ܝ ܥܕܵܢܵܐ ܚܙܹܐ ܠܗܘܿܢ. ܘܩܲܫܝܵܐܝܼܬ ܣܘܼܦܹܐ ܠܹܗ ܐܸܠܲܝܗܝ ܝܼܫܘܿܥ ܘܐ݇ܡܝܼܪܹܗ، ”ܚܙܹܝܡܘܼܢ ܕܐܘܼܦ ܚܲܕ ܠܵܐ ܝܵܕܹܥ ܒܘܼܬ ܐܵܗܵܐ.“ 31ܐܝܼܢܵܐ ܐܵܢܝܼ ܦܠܝܼܛ ܠܗܘܿܢ ܘܦܪܝܼܣ ܠܗܘܿܢ ܐܵܗܵܐ ܚܲܒܪܵܐ ܒܟܠܵܗ̇ ܗ̇ܝ ܐܲܪܥܵܐ.

ܒܵܣܲܡܬܵܐ ܕܚܲܕ ܠܵܠܵܐ

32ܘܟܲܕ ܒܸܦܠܵܛܵܐ ܝܗ݇ܘܵܘ ܝܼܫܘܿܥ ܘܬܲܠܡܝܼܕܘܼ̈ܗܝ، ܡܘܼܐܬܹܐ ܠܗܘܿܢ ܠܟܸܣ ܠܹܗ ܚܲܕ ܚܲܪܫܵܐ ܕܐܝܼܬ ܗ݇ܘܵܐ ܒܝܼܹܗ ܫܹܐܕܵܐ. 33ܘܐܝܼܡܲܢ ܕܦܝܼܫ ܠܹܗ ܦܘܼܠܛܵܐ ܫܹܐܕܵܐ، ܗܘܼܡܙܸܡ ܠܹܗ ܗ̇ܘ ܚܲܪܫܵܐ. ܘܥܘܼܓ̰ܸܒ ܠܗܘܿܢ ܟܸܢܫܹ̈ܐ ܘܐ݇ܡܝܼܪܗܘܿܢ، ”ܚܲܕ ܗܲܕܟ݂ܵܐ ܡܸܢܕܝܼ ܠܲܝܬ ܦܝܼܫܵܐ ܚܸܙܝܵܐ ܓܵܘ ܝܼܣܪܵܝܹܠ.“ 34ܐܝܼܢܵܐ ܦܪ̈ܝܼܫܹܐ ܐ݇ܡܝܼܪܗܘܿܢ، ”ܒܝܲܕ ܓܘܼܪܵܐ ܕܫܹܐܕܹ̈ܐ ܦܲܠܘܼܛܹܐ ܝܠܹܗ ܫܹܐܕܹ̈ܐ.“

ܝܼܫܘܿܥ ܒܸܥܒ݂ܵܕܵܐ ܪ̈ܲܚܡܹܐܥܲܠ ܟܸܢܫܹ̈ܐ

35ܒܸܚܕܵܪܵܐ ܝܗ݇ܘܵܐ ܝܼܫܘܿܥ ܒܟܠܲܝܗܝ ܡܕܝܼܢܵܬܹ̈ܐ ܘܒܡܵܬܘܵܬܹ̈ܐ، ܘܡܲܠܘܼܦܹܐ ܒܟܢܘܼܫܝܵܬܲܝ̈ܗܝ، ܘܡܲܟܪܘܼܙܹܐ ܐܹܘܲܢܓܲܠܝܼܘܿܢ ܕܡܲܠܟܘܼܬܵܐ، ܘܒܲܣܘܼܡܹܐ ܟܠܲܝܗܝ ܟܘܼܪ̈ܗܵܢܹܐ ܘܟܠܲܝܗܝ ܡܲܪ̈ܥܹܐ. 36ܘܟܲܕ ܚܙܹܐ ܠܹܗ ܝܼܫܘܿܥ ܠܟܸܢܫܹ̈ܐ، ܪܘܼܚܸܡ ܠܹܗ ܥܲܠܲܝܗܝ، ܕܫܘܼܪܫܝܼܹܐ ܝܗ݇ܘܵܘ ܘܫܸܪܝܹܐ، ܐܲܝܟ݂ ܥܸܪ̈ܒܹܐ ܕܠܲܝܬ ܠܗܘܿܢ ܪܵܥܝܵܐ.#ܡܢܝܢܐ 27‏:17؛ ܐ. ܡܠܟ̈ܐ 22‏:17؛ ܒ. ܕܒܪܝܡܝܢ 18‏:16؛ ܚܙܩܝܐܝܠ 34‏:5 37ܐ݇ܡܝܼܪܹܗ ܠܬܲܠܡܝܼܕܘܼ̈ܗܝ، ”ܚܸܨܕܵܐ ܪܵܒܵܐ ܝܠܹܗ، ܘܦܵܥܠܹ̈ܐ ܒܵܨܘܿܪܹ̈ܐ ܝܢܵܐ. 38”ܒܘܼܬ ܐܵܗܵܐ، ܛܠܘܿܒܘܼܢ ܡ̣ܢ ܡܵܪܵܐ ܕܚܸܨܕܵܐ، ܕܫܲܕܸܪ ܦܵܥܠܹ̈ܐ ܠܚܸܨܕܹܗ.“

Currently Selected:

ܡܬܝ 9: ABTAB

Highlight

Copy