ܡܬܝ 8

ܕܲܟ݂ܵܝܬܵܐ ܕܚܲܕ ܓܸܪܒ݂ܵܢܵܐ

ܡܪܩܘܣ 1‏:40‏‐45؛ ܠܘܩܐ 5‏:12‏‐16

1ܐܝܼܡܲܢ ܕܨܠܹܐ ܠܹܗ ܝܼܫܘܿܥ ܡ̣ܢ ܛܘܼܪܵܐ، ܬܒܝܼܥ ܠܗܘܿܢ ܐܸܠܹܗ ܟܸܢܫܹ̈ܐ ܪܵܒܵܐ. 2ܘܐ݇ܬܹܐ ܠܹܗ ܚܲܕ ܓܸܪܒ݂ܵܢܵܐ ܘܣܓ݂ܝܼܕ ܠܹܗ ܐܸܠܹܗ ܘܐ݇ܡܝܼܪܹܗ، ”ܡܵܪܝܼ، ܐܸܢ ܒܵܥܹܝܬ، ܡܵܨܹܝܬ ܕܲܟܹܝܬ ܠܝܼ.“ 3ܘܦܘܼܫܛܵܐ ܠܹܗ ܝܼܫܘܿܥ ܐܝܼܕܹܗ، ܘܕܩܝܼܪܹܗ ܒܝܼܹܗ، ܘܐ݇ܡܝܼܪܹܗ، ”ܒܵܥܹܝܢ، ܦܘܼܫ ܕܸܟ݂ܝܵܐ.“ ܘܗܲܪ ܒܗ̇ܝ ܥܕܵܢܵܐ ܦܝܼܫ ܠܹܗ ܕܸܟ݂ܝܵܐ ܡ̣ܢ ܓܸܪܒܹܗ. 4ܘܐ݇ܡܝܼܪܹܗ ܐܸܠܹܗ ܝܼܫܘܿܥ، ”ܠܵܐ ܗܵܘܝܵܐ ܕܐܵܡܪܹܬ ܠܐܘܼܦ ܚܲܕ، ܐܸܠܵܐ ܙܹܠ݇ ܡܲܚܙܝܼ ܓܵܢܘܼܟ݂ ܠܟܵܗܢܵܐ، ܘܡܲܩܪܸܒ݂ ܕܸܒ݂ܚܵܐ ܐܲܝܟ݂ ܕܦܩܝܼܕ ܠܹܗ ܡܘܼܫܹܐ ܠܣܵܗܕܘܼܬܲܝܗܝ.“#ܟܗܢ̈ܐ 14‏:1‏‐32

ܗܲܝܡܵܢܘܼܬܵܐ ܕܪܲܒ ܐܸܡܵܐܐܪܗ݇ܘܿܡܵܝܵܐ

ܠܘܩܐ 7‏:1‏‐10؛ ܝܘܚܢܢ 4‏:43‏‐54

5ܐܝܼܡܲܢ ܕܥܒ݂ܝܼܪܹܗ ܝܼܫܘܿܥ ܓܵܘ ܟܦܲܪܢܵܚܘܿܡ، ܐ݇ܬܹܐ ܠܹܗ ܠܟܸܣ ܠܹܗ ܚܲܕ ܪܲܒ ܐܸܡܵܐܐ ܘܦܘܼܪܦܸܠ ܠܹܗ ܒܝܼܹܗ، 6ܘܐ݇ܡܝܼܪܹܗ، ”ܡܵܪܝܼ، ܪܹܓܝܼ ܒܫܘܝܼܬܵܐ ܝܠܹܗ ܓܵܘ ܒܲܝܬܵܐ، ܫܦܝܼܠܵܐ، ܘܓ̰ܲܢܓ̰ܘܼܪܹܐ ܝܠܹܗ ܪܵܒܵܐ.“ 7ܐ݇ܡܝܼܪܹܗ ܐܸܠܹܗ ܝܼܫܘܿܥ، ”ܐܵܢܵܐ ܒܸܬ ܐܵܬܹܝܢ ܘܒܲܣܡܸܢܹܗ.“ 8ܓ̰ܘܼܘܸܒ ܠܹܗ ܪܲܒ ܐܸܡܵܐܐ ܘܐ݇ܡܝܼܪܹܗ، ”ܡܵܪܝܼ، ܐܵܢܵܐ ܠܹܐ ܝܘܸܢ ܚܫܝܼܚܵܐ ܕܐܲܢ݇ܬ ܥܵܒ݂ܪܹܬ ܓܵܘ ܒܲܝܬܝܼ، ܐܸܠܵܐ ܐ݇ܡܘܿܪ، ܒܗܹܡܸܙܡܵܢ ܐܲܚܟ̰ܝܼ، ܘܒܸܬ ܒܵܣܹܡ ܪܹܓܝܼ. 9”ܐܘܼܦ ܐܵܢܵܐ ܚܲܕ ܐ݇ܢܵܫܵܐ ܝܘܸܢ ܬܚܘܿܬ ܫܘܼܠܛܵܢܵܐ، ܘܐܝܼܬ ܬܚܘܿܬ ܐܝܼܕܝܼ ܕܲܚܫܹ̈ܐ، ܘܟܹܐ ܐܵܡܪܹܢ ܠܐܵܗܵܐ، ’ܙܹܠ݇،‘ ܘܟܹܐ ܐܵܙܹܠ؛ ܘܠܗ̇ܘ ܐ݇ܚܹܪ݇ܢܵܐ، ’ܬܵܐ،‘ ܘܟܹܐ ܐܵܬܹܐ؛ ܘܠܪܹܓܝܼ، ’ܥܒ݂ܘܿܕ ܐܵܗܵܐ،‘ ܘܟܹܐ ܥܵܒܹܕ.“ 10ܐܝܼܡܲܢ ܕܫܡܝܼܥ ܠܹܗ ܝܼܫܘܿܥ ܐܵܗܵܐ، ܥܘܼܓ̰ܸܒ ܠܹܗ، ܘܐ݇ܡܝܼܪܹܗ ܠܐܵܢܝܼ ܕܒܹܐܬܵܝܵܐ ܝܗ݇ܘܵܘ ܥܲܡܹܗ، ”ܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܵܘܟ݂ܘܿܢ، ܐܘܼܦ ܓܵܘ ܝܼܣܪܵܝܹܠ ܠܵܐ ܡܘܼܫ݇ܟ̰ܸܚ ܠܝܼ ܗܲܝܡܵܢܘܼܬܵܐ ܐܲܝܟ݂ ܐܵܗܵܐ. 11”ܘܒܹܐܡܵܪܵܐ ܝܘܸܢ ܐܸܠܵܘܟ݂ܘܿܢ، ܕܪܵܒܵܐ ܒܸܬ ܐܵܬܝܼ ܡ̣ܢ ܡܲܕܢܚܵܐ ܘܡ̣ܢ ܡܲܥܪܒ݂ܵܐ، ܘܒܸܬ ܝܵܬܒ݂ܝܼ ܥܲܡ ܐܲܒ݂ܪܵܗܵܡ ܘܐܝܼܣܚܵܩ ܘܝܲܥܩܘܿܒ݂ ܓܵܘ ܡܲܠܟܘܼܬܵܐ ܕܫܡܲܝܵܐ؛ 12”ܐܝܼܢܵܐ ܒܢܘܿܢܹ̈ܐ ܕܡܲܠܟܘܼܬܵܐ ܒܸܬ ܦܵܝܫܝܼ ܪܘܼܦܝܹܐ ܓܵܘ ܚܸܫܟܵܐ ܒܲܪܵܝܵܐ، ܐܲܝܟܵܐ ܕܒܸܬ ܗܵܘܹܐ ܒܸܟ݂ܝܵܐ ܘܚܲܪܚܲܟ̰ܬܵܐ ܕܟܹܟܹ̈ܐ.“ 13ܘܐ݇ܡܝܼܪܹܗ ܝܼܫܘܿܥ ܠܗ̇ܘ ܪܲܒ ܐܸܡܵܐܐ، ”ܙܹܠ݇، ܐܲܝܟ݂ ܕܗܘܼܡܸܢܘܼܟ݂ ܗܵܘܹܐ ܠܘܼܟ݂.“ ܘܒܣܝܼܡ ܠܹܗ ܪܹܓܹܗ ܒܗ̇ܝ ܣܵܥܲܬ.

ܒܵܣܲܡܬܵܐ ܕܚܡܵܬܵܐܕܫܸܡܥܘܿܢ ܟܹܐܦܵܐ

ܡܪܩܘܣ 1‏:29‏‐34؛ ܠܘܩܐ 4‏:38‏‐41

14ܐ݇ܬܹܐ ܠܹܗ ܝܼܫܘܿܥ ܠܒܲܝܬܵܐ ܕܫܸܡܥܘܿܢ ܟܹܐܦܵܐ، ܘܚܙܹܐ ܠܹܗ ܠܚܡܵܬܹܗ ܕܡܝܼܟ݂ܬܵܐ ܘܕܒ݂ܝܼܩܬܘܼܗ̇ ܚܲܡܚܲܡܬܵܐ. 15ܘܕܩܝܼܪܹܗ ܒܐܝܼܕܘܼܗ̇ ܘܫܒ݂ܝܼܩ ܠܵܗ̇ ܐܸܠܘܼܗ̇ ܚܲܡܚܲܡܬܵܐ، ܘܩܝܼܡ ܠܵܗ̇ ܘܥܒ݂ܝܼܕ ܠܵܗ̇ ܐܸܠܲܝܗܝ ܚܸܠܡܲܬ. 16ܐܝܼܡܲܢ ܕܗܘܹܐ ܠܹܗ ܪܲܡܫܵܐ، ܡܘܼܐܬܹܐ ܠܗܘܿܢ ܠܟܸܣ ܠܹܗ ܪܵܒܵܐ ܡ̣ܢ ܐܵܢܝܼ ܕܐܝܼܬ ܗ݇ܘܵܘ ܒܝܼܲܝܗܝ ܫܹܐܕܹ̈ܐ. ܘܦܘܼܠܸܛ ܠܹܗ ܠܫܹܐܕܲܝ̈ܗܝ ܒܗܹܡܸܙܡܵܢ، ܘܒܘܼܣܸܡ ܠܹܗ ܠܟܠܲܝܗܝ ܐܵܢܝܼ ܕܡܪܝܼܥܹܐ ܝܗ݇ܘܵܘ. 17ܘܐܵܗܵܐ ܗܘܹܐ ܠܵܗ̇ ܕܦܵܐܹܫ ܬܘܼܡܸܡܵܐ ܡܸܢܕܝܼ ܕܦܝܼܫ ܠܹܗ ܐ݇ܡܝܼܪܵܐ ܒܐܹܫܲܥܝܵܐ ܢܒ݂ܝܼܵܐ ܕܐ݇ܡܝܼܪܹܗ:

ܗ̇ܘ ܫܩܝܼܠ ܠܹܗ ܡܲܪ̈ܥܲܢ ܘܛܥܝܼܢܹܗ ܟܹܐܒܲܢ̈.#ܐܫܥܝܐ 53‏:4

ܨܲܚܨܵܝܬܵܐ ܕܬܲܠܡܝܼ̈ܕܹܐ

ܠܘܩܐ 9‏:57‏‐62

18ܐܝܼܡܲܢ ܕܚܙܹܐ ܠܹܗ ܝܼܫܘܿܥ ܠܟܸܢܫܹ̈ܐ ܪܵܒܵܐ ܕܝܼܗ݇ܘܵܘ ܠܚܵܕܸܪ̈ܘܵܢܘܼܗܝ، ܦܩܝܼܕ ܠܹܗ ܕܐܵܙܠ݇ܝܼ ܠܗ̇ܘ ܡܲܪܙܵܐ ܐ݇ܚܹܪ݇ܢܵܐ ܕܝܵܡܵܐ. 19ܘܩܘܼܪܒܸܢܹܗ ܚܲܕ ܣܵܦܪܵܐ ܘܐ݇ܡܝܼܪܹܗ ܐܸܠܹܗ، ”ܪܲܒܝܼ، ܒܸܬ ܐܵܬܹܝܢ ܒܵܬ݇ܪܘܼܟ݂ ܠܐܲܝܟܵܐ ܕܐܵܙܹܠ݇ܬ.“ 20ܐ݇ܡܝܼܪܹܗ ܐܸܠܹܗ ܝܼܫܘܿܥ، ”ܬܲܥܠܹ̈ܐ ܒܸܙܥܵܙܹ̈ܐ ܐܝܼܬ ܠܗܘܿܢ، ܘܛܲܝܪܹ̈ܐ ܕܫܡܲܝܵܐ ܩܸܢܵܬܹ̈ܐ، ܐܝܼܢܵܐ ܒܪܘܿܢܵܐ ܕܐ݇ܢܵܫܵܐ ܠܲܝܬ ܠܹܗ ܕܘܼܟܵܐ ܕܡܲܬܸܒ݂ ܪܹܫܹܗ.“ 21ܐ݇ܡܝܼܪܹܗ ܐܸܠܹܗ ܚܲܕ ܐ݇ܚܹܪ݇ܢܵܐ ܡ̣ܢ ܬܲܠܡܝܼܕܘܼ̈ܗܝ، ”ܡܵܪܝܼ، ܗܲܒ݂݇ܠ ܠܝܼ ܦܣܵܣܵܐ ܩܵܕ݇ܡܵܝܬܵܐ ܐܵܙܹܠ݇ܢ ܘܩܵܒ݂ܪܹܢ ܠܒܵܒܝܼ.“ 22ܐܝܼܢܵܐ ܝܼܫܘܿܥ ܐ݇ܡܝܼܪܹܗ ܐܸܠܹܗ، ”ܬܵܐ ܒܵܬ݇ܪܝܼ، ܘܫܒ݂ܘܿܩ ܡܝܼܬܹ̈ܐ ܩܵܒ݂ܪܝܼ ܡܝܼܬܲܝ̈ܗܝ.“

ܡܲܫܠܵܝܬܵܐ ܕܝܵܡܵܐ

ܡܪܩܘܣ 4‏:35‏‐41؛ ܠܘܩܐ 8‏:22‏‐25

23ܐܝܼܡܲܢ ܕܐ݇ܣܝܼܩ ܠܹܗ ܝܼܫܘܿܥ ܓܵܘ ܓܵܡܝܼ، ܥܒ݂ܝܼܪܗܘܿܢ ܥܲܡܹܗ ܬܲܠܡܝܼܕܘܼ̈ܗܝ. 24ܘܗܘܹܐ ܠܹܗ ܚܲܕ ܫܓ݂ܘܼܫܝܵܐ ܓܘܼܪܵܐ ܒܝܵܡܵܐ، ܗܲܕܟ݂ܵܐ ܕܠܲܦܹ̈ܐ ܟܘܼܣܹܐ ܠܗܘܿܢ ܠܓܵܡܝܼ. ܘܝܼܫܘܿܥ ܕܡܝܼܟ݂ܵܐ ܝܗ݇ܘܵܐ. 25ܘܩܘܼܪܒܸܢܗܘܿܢ ܬܲܠܡܝܼܕܘܼ̈ܗܝ ܘܡܘܼܪܥܸܫ ܠܗܘܿܢ ܐܸܠܹܗ، ܘܐ݇ܡܝܼܪܗܘܿܢ، ”ܡܵܪܲܢ، ܦܲܨܝܼ ܠܲܢ، ܒܸܛܠܵܩܵܐ ܝܘܲܚ.“ 26ܐ݇ܡܝܼܪܹܗ ܐܸܠܲܝܗܝ ܝܼܫܘܿܥ، ”ܩܵܡܘܿܕܝܼ ܒܸܙܕܵܥܵܐ ܝܬܘܿܢ، ܝܵܐ ܒܵܨܘܿܪܹ̈ܐ ܕܗܲܝܡܵܢܘܼܬܵܐ؟“ ܗ̇ܝܓܵܗ ܩܝܼܡ ܠܹܗ ܢܓ̰ܝܼܘ ܠܹܗ ܒܦܵܘܚܵܐ ܘܒܝܵܡܵܐ، ܘܗܘܹܐ ܠܹܗ ܫܸܬܩܵܐ ܓܘܼܪܵܐ. 27ܐ݇ܢܵܫܹ̈ܐ ܥܘܼܓ̰ܸܒ ܠܗܘܿܢ ܘܐ݇ܡܝܼܪܗܘܿܢ، ”ܡܵܢܝܼ ܝܠܹܗ ܐܵܗܵܐ ܕܦܵܘܚܵܐ ܘܝܵܡܵܐ ܒܸܫܠܵܡܵܐ ܝܢܵܐ ܐܸܠܹܗ؟“

ܒܵܣܲܡܬܵܐ ܕܬܪܹܝ ܫܹܐܕܵܢܹ̈ܐ ܓܸܕܪ̈ܵܝܹܐ

ܡܪܩܘܣ 5‏:1‏‐20؛ ܠܘܩܐ 8‏:26‏‐39

28ܘܐܝܼܡܲܢ ܕܐ݇ܬܹܐ ܠܹܗ ܝܼܫܘܿܥ ܠܡܲܪܙܵܐ ܐ݇ܚܹܪ݇ܢܵܐ ܓܵܘ ܐܲܬܪܵܐ ܕܓܸܕܪ̈ܵܝܹܐ، ܬܦܝܼܩ ܠܗܘܿܢ ܒܝܼܹܗ ܬܪܹܝ ܫܹܐܕܵܢܹ̈ܐ ܒܸܦܠܵܛܵܐ ܡ̣ܢ ܒܹܝܬ ܩܒ݂ܘܼܪܹ̈ܐ، ܘܗܲܕܟ݂ܵܐ ܝܗ݇ܘܵܘ ܣܪ̈ܝܼܚܹܐ ܕܐܘܼܦ ܚܲܕ ܠܹܐ ܡܵܨܹܐ ܗ݇ܘܵܐ ܥܵܒܹܪ ܗ݇ܘܵܐ ܒܗ̇ܝ ܐܘܼܪܚܵܐ. 29ܡܘܼܩܘܸܚ ܠܗܘܿܢ ܘܐ݇ܡܝܼܪܗܘܿܢ، ”ܡܵܐ ܠܘܼܟ݂ ܡܸܢܲܢ، ܝܵܐ ܝܼܫܘܿܥ ܒܪܘܿܢܵܐ ܕܐܲܠܵܗܵܐ؟ ܐ݇ܬܹܐ ܠܘܼܟ݂ ܠܐܲܟ݂ܵܐ ܡ̣ܢ ܩܵܕ݇ܡ ܥܕܵܢܵܐ ܕܓ̰ܲܢܓ̰ܸܪܸܬ ܠܲܢ؟“ 30ܐܝܼܬ ܗ݇ܘܵܐ ܪܸܚܩܵܐ ܡܸܢܲܝܗܝ ܚܕܵܐ ܒܸܩܪܵܐ ܓܘܼܪܬܵܐ ܕܚܙܘܼܪܹ̈ܐ ܒܸܪܥܵܝܵܐ. 31ܘܛܠܝܼܒ ܠܗܘܿܢ ܡܸܢܹܗ ܐܵܢܝܼ ܫܹܐܕܹ̈ܐ ܘܐ݇ܡܝܼܪܗܘܿܢ، ”ܐܸܢ ܦܲܠܛܸܬ ܠܲܢ، ܗܲܒ݂݇ܠ ܠܲܢ ܦܣܵܣܵܐ ܕܐܵܙܲܠ݇ܚ ܓܵܘ ܒܸܩܪܵܐ ܕܚܙܘܼܪܹ̈ܐ.“ 32ܐ݇ܡܝܼܪܹܗ ܐܸܠܲܝܗܝ ܝܼܫܘܿܥ، ”ܙܹܠ݇ܡܘܼܢ.“ ܘܒܗ̇ܝ ܥܕܵܢܵܐ ܦܠܝܼܛ ܠܗܘܿܢ ܘܥܒ݂ܝܼܪܗܘܿܢ ܓܵܘ ܒܸܩܪܵܐ ܕܚܙܘܼܪܹ̈ܐ، ܘܗ̇ܝܓܵܗ ܪܚܝܼܛ ܠܵܗ̇ ܒܸܩܪܵܐ ܕܚܙܘܼܪܹ̈ܐ ܠܫܩܝܼܦܵܐ، ܘܢܦܝܼܠ ܠܗܘܿܢ ܓܵܘ ܝܵܡܵܐ، ܘܚܢܝܼܩ ܠܗܘܿܢ. 33ܐܵܢܝܼ ܕܡܲܪܥܘܼܝܹܐ ܝܗ݇ܘܵܘ ܥܪܝܼܩ ܠܗܘܿܢ ܘܐ݇ܙܝܼܠ ܠܗܘܿܢ ܠܡܕܝܼܢ݇ܬܵܐ ܘܗܘܼܩܹܐ ܠܗܘܿܢ ܒܘܼܬ ܟܠ ܡܸܢܕܝܼ ܕܗܘܹܐ ܠܹܗ، ܘܒܘܼܬ ܐܵܢܝܼ ܕܐܝܼܬ ܗ݇ܘܵܘ ܒܝܼܲܝܗܝ ܫܹܐܕܹ̈ܐ. 34ܘܦܠܝܼܛ ܠܗܘܿܢ ܟܠܲܝܗܝ ܐ݇ܢܵܫܹ̈ܐ ܕܡܕܝܼܢ݇ܬܵܐ ܠܐܘܼܪܚܵܐ ܕܝܼܫܘܿܥ، ܘܐܝܼܡܲܢ ܕܚܙܹܐ ܠܗܘܿܢ ܐܸܠܹܗ، ܛܠܝܼܒ ܠܗܘܿܢ ܡܸܢܹܗ ܕܐܵܙܹܠ ܡ̣ܢ ܬܚܘܼܡܲܝ̈ܗܝ.

Currently Selected:

ܡܬܝ 8: ABTAB

Highlight

Copy