Mateus 9
9
Marcos 2.1-12; Lucas 5.17-26
1Kanoã py Jesus oĩ vy yy rovaigua re oaxa. Ha'e vy guetã katy oo.
2Ha'e oĩa py oguerua peteĩ oguata e'ỹ va'e hupa reve. Ha'e kuery ojerovia etea Jesus oexa vy aipoe'i oguata e'ỹ va'e pe:
— Xera'y, ndepy'a guaxu ke. Rejejavyague omboguepaa ma — he'i.
3Ha'e ramo kuaxia re nhombo'e va'ety ikuai va'e aipoe'i ojeupe ae:
— Peva'e tu ijayvu vai — he'i okuapy.
4Ha'e rã Jesus ma ha'e kuery ojeupe ae ijayvua oikuaa vy aipoe'i:
— Mba'e re tu po rami ri pendeayvu pendepy'a py?
5Mba'e ayvu rupi tu ndaxyive xeayvu aguã: “Rejejavyague omboguepaa ma”, tyrã pa “Epu'ã, ha'e eguata” ha'e aguã?
6Ha'e rami teĩ peikuaa aguã Ava ra'y ojeapo va'ekue ko yvy re oiko teĩ joeko vaiague ombogue aguã voi ipo'aka va'ea —
Oguata e'ỹ va'e pe ju aipoe'i:
— Epu'ã ha'vy, eupi nderupa, ha'e tereo ndero py — he'i.#João 10.37,38
7Ha'e ramo opu'ã vy ngoo katy oo.
8Ha'e nunga heta va'e kuery oexa vy okyjepa reve ombojerovia okuapy Nhanderuete, ha'e rami aguã avakue ombopo'aka ramo.
Marcos 2.13,14; Lucas 5.27,28
9Jesus ha'e gui oo vy oexa peteĩ ava Mateus hery va'e, imposto opagaaty py oguapy oiny ramo. Ha'e va'e pe ijayvu vy
— Eju xerupive — he'i. Ha'e ramo opu'ã vy oo hupive.
Marcos 2.15-17; Lucas 5.29-32
10Ha'e gui oo py mesa py Jesus oĩ ramo heta ou imposto re nhombopaga va'ety ha'e heko vai va'e. Ha'e va'e kuery ma Jesus ha'e hemimbo'e kuery reve onhemboja avi okuapy.
11Ha'e nunga fariseu kuery oexa vy oporandu hemimbo'e kuery pe:
— Mba'e re tu penembo'ea okaru ri imposto re nhombopaga va'ety ha'e ojejavypa va'e kuery reve?
12Ha'e ramo Jesus oendu vy ombovai:
— Hexaĩ va'e kuery ma ndoipotai 'rã poropoanoa, imba'eaxy va'e anho 'rã oipota.
13Tapeo, peikuaa pota pova'e ayvu mba'e he'ia paa re: “Xevy pe mymba peme'ẽ 'rãgue py aipota teĩ penhomboaxy.” Mba'eta xee ma heko porã va'e aenoĩ aguã e'ỹ aju, ha'e rã heko vai va'e aenoĩ aguã [ojeko rerova aguã].#Oséias 6.6
Marcos 2.18-22; Lucas 5.33-39
14Ha'e rire João Batista remimbo'e kuery ou. Ha'e vy oporandu ixupe:
— Mba'e re tu ore kuery [mbovykue rei e'ỹ] rokaru e'ỹ re orekuai, fariseu kuery voi, ha'e rã neremimbo'e kuery ma ha'e rami e'ỹ ikuai?
15Jesus ombovai:
— Omendaa py ha'eve nda'u oenoĩ mbyre kuery iporiau aguã, ha'e kuery reve omenda va'e oĩ teria ja? Ha'e rami avi ovaẽ 'rã ha'e kuerya gui omenda va'e oipe'aa aguã ára. Ha'e va'e ára mae ma ha'e kuery ikuai 'rã okaru e'ỹ re.
16— Avave rei ao ymague re nombojai 'rã ajukue pyau ra'ykue, mba'eta ombojaague omboi 'rã ao gui. Ha'e ramo oxoroa tuvixave 'rã.
17Ha'e avave rei hyru ymague py nomboyrui 'rã vinho pyau, mba'eta ombovaipa 'rã hyru. Vinho onheẽmba 'rã, ha'e hyru voi ivaipa avi 'rã. Ha'e rami 'rãgue py vinho pyau rã hyru pyau py 'rã omoĩ, mokoĩve oĩ porã aguã.
Marcos 5.21-24a; Lucas 8.40-42a
18Ha'e nunga re ijayvu teri reve ou peteĩ huvixa. Onhemboja vy omboete. Ha'e vy aipoe'i:
— Xerajy omano ange'i. Ha'e rami teĩ eju, emoĩ ndepo hexe oikove ju aguã — he'i.
Marcos 5.24b-34; Lucas 8.42b-48
19Ha'e ramo Jesus opu'ã vy oo hexeve, hemimbo'e kuery voi.
20Oiko avi peteĩ kunha, doze ma'etỹ re ma gueko re riae oiko va'e. Ha'e va'e ma hakykue gui ou vy opoko ijao apy re,
21mba'eta ojeupe ae “Ijao apy re rive apoko teĩ akuera 'rã” he'i.
22Ha'e ramo Jesus ojere vy oexa. Ha'e vy aipoe'i:
— Xerajy, ndepy'a guaxu ke. Rejeroviaa ndereraa jepe — he'i. Ha'e ramove kunha va'e okuera.
Marcos 5.35-43; Lucas 8.49-56
23Huvixa ro py Jesus ovaẽ vy oexa mimby monhe'ẽa ha'e heta va'e kuery ojae'o rã. Ha'e vy aipoe'i:
24— Pejepe'a ke, mba'eta kunha'i nomanoi, oke rima — he'i. Ha'e ramo ojojai rei okuapy.
25Ha'e gui Jesus omoẽmba vy oike. Kunha'i va'e po re ojopy ramo opu'ã.
26Ha'e nungakue oendupaa ha'e va'e yvy ha'e javi rupi.
Mokoĩ ára revegua e'ỹ omongueraague
27Ha'e gui Jesus oo rã hakykue rupi ou mokoĩ ára revegua e'ỹ. Ojapukai jogueruvy:
— Davi ramymino, oremboaxy ke — he'i.
28Ha'e gui oo py Jesus oike jave hexe onhemboja jogueruvy ára revegua e'ỹ. Ha'e ramo oporandu ha'e kuery pe:
— Perovia pa pejerurea rami ajapo aguã xepo'aka va'ea?
Ha'e kuery ombovai:
— Tá, Senhor — he'i.
29Ha'e ramo ha'e kuery rexa re opoko vy aipoe'i:
— Toiko ha'vy pejeroviaa rami — he'i.
30Ha'e ramove hexa ojepe'a.
Ha'e gui Jesus aipoe'ive ju:
— Pejejoko ke avave rei pe pemombe'u e'ỹ aguã — he'i.
31Ha'e rami teĩ ha'e kuery oo vy ha'e va'e yvy ha'e javi rupi omombe'upa.
Peteĩ ava ijayvu e'ỹ va'e omonguera ramo fariseu kuery ijayvu reiague
32Ha'e kuery oje'oi rire oĩa py oguerua peteĩ ava anha onhemonde ramo nda'ijayvui va'e.
33Anha oipe'a rã ijayvu e'ỹ va'ekue ijayvu. Ha'e ramo heta va'e kuery onhemondyipa vy aipoe'i:
— Peva'e nunga jaexa va'e'ỹ teri Israel kuerya rupi — he'i.
34Ha'e rã fariseu kuery ma ijayvu rei okuapy:
— Anha ruvixa po'akaa rupi rima oipe'a anha.#Lucas 11.14-18
Opa rupi Jesus ojapo porã, ha'e omba'eapo va'e kuery re ombojojaague
35Ha'e gui Jesus ma tetã ha'e tekoa ikuai va'e rupi oguata oikovy, onhembo'eaty oĩ va'e rupi guive. Nhombo'e vy omombe'u oikovy Nhanderuete po'akaa, nhomonguera guive opa marãgua mba'eaxy gui.
36Heta va'e kuery oexa vy omboaxy, mba'eta vexa'i ija e'ỹ va'e rami ojexavai ha'e ikangy okuapy ramo.#Marcos 6.34
37Ha'e rami vy guemimbo'e kuery pe aipoe'i:
— Anhetẽ heta oĩ omono'õa aguã, ha'e rã omba'eapo va'e kuery ma mbovy'i.#Lucas 10.2
38Ha'e nunga rupi pejerure Senhor mba'ety ja va'e pe ombouve aguã imba'ety rupi omba'eapo va'erã.
Currently Selected:
Mateus 9: gunBible
Highlight
Share
Copy
Want to have your highlights saved across all your devices? Sign up or sign in
© 2004, Sociedade Bíblica do Brasil; © 2014, Wycliffe Bible Translators, Inc.
