THRÜNTAN 34

Dina Thsümünimkhi

1Kheakü Leanü Jakob kilim zübejihkhi tsührübe Dinanü lomi liberübo kheahpü yü. 2Tüsho küyimki lomi yakzanshuhbuh Hivrü Hamor tsührü Shekemnü alibe ngükhea, apinü anihbe bea lubah amütsü thsü tüsho alibe thsümünim. 3Api menü Jakob tsührübe Dina khide mürüh, apinü anünübe muzho tüsho anihbe ki muzhode asuk. 4Jumonü Shekemnü abuh Hamor ki tha, “Ha anünübe I niube thsüpü lujang.” 5Tüsho apinü atsührü Dina thsümünimkhi Jakobnü mükheah. Kheakü api tsührübo akam-shiwühbo lung thulu ching lakheah; jumonü arü malungyikia Jakobnü tümü müthsü. 6Judüki Shekem abuh Hamornü Jakob kilim wukhiuk tüsho api ki asukachih. 7Tüsho Jakob tsührübonü ju sobah thulu chingnü alung; tüsho mihtsürübo khide mulong mütsüde la tüsho khide bukakhiuk, tümütüsho apinü Israel ching amürhimobe Jakob tsührübe thsümünimkhi hode mungchih rhimo.

8Tüshe Hamornü arü ki tha, “I tsührü Shekem menü nü tsührübe mürühlah. Muzhobah alibe ju api niube thsüpü jihang. 9Tüsho isa ki yamkhün kamang; nü tsührübebo isa kilim jihang, tüsho isa tsührübebo nüsa luang. 10Junangde nüsa ju isa lung labah, tüsho alo ju nüsa müngüh labah. Laang tüsho ju ching shothsümoloang, tüsho ju ching nüsa lakhit ngüa luang.” 11Judüki Shekemnü alibe abuh le keoniorübo ki tha, “I nüsa miki amuzho ngüanü, tüsho nüsanü I ki tümüpürü thabanü inü ajihbah. 12I ki adün tüsho thsambah hihde kheangang, tüsho nüsanü I ki thakhi yande inü nüsa kilim jihbah; tüshe anünübe I niube thsüpü jihang.”

13Tüshe Jakob tsührübonü Shekem le abuh Hamor ki alo, tüsho rüklimnü asuk, tümütüsho arünü arü niurü Dina thsümünim. 14Tüsho arünü arü ki tha, “Isanü isa niurü tsütamübahrü kilim müjihkhuk, tümüde ju isa kilim mungchih labah. 15Tüshe ha yakli hode isanü nüsa ki mülübah: nüsa ju isa nangde kamde, nüsa athrürü aban tsütabahsho, 16isanü isa tsührübebo nüsa kilim jihbah, tüsho isanü nüsa tsührübebo lubah; isanü nüsa lung labah, tüsho isabo mihtsürü khülang kambah. 17Tüshe nüsanü tsütabahpü malokhisho, isa niurü bebah isa atsobah.”

18Tüsho arü yubonü Hamor tüsho api tsührü Shekem asühshih. 19Jumonü athrününgtsüngbuhnü ju rhimopü mashu, tümütüsho apinü Jakob tsührübe kheak asüh. Api ju abuh yamkhün alala kheaknü wüntre jihkhi lakheah. 20Hamor le api tsührü Shekem anenü kiuto chipiripit ki arü, tüsho arü kiuto mihtsürübo ki tha: 21“Harü mihtsürübo isa lung mungtsü chingnü lah. Arübo lomi ching lashang tüsho ju ching shothsümoloshang. Tümüde arü thsungkheaknü alo tode lah. Isanü arü tsührübebo isa niuberü thsüpü luanü, tüsho isanü arü kilim isa tsührübebo jihanü. 22Tüshe arübo nangde isa athrürübo tsütabahsho lang mihtsürübo isa lung mihtsürü khülang thsüde alapü mulongbah. 23Arü akam-shiwühbo, arü lakhit, tüsho arü shiwüh lüpdükhi isa yo thsüpü yung de? Isanü lang arü ki anianü, tüsho arünü isa lung labah.” 24Tüsho kiuto chipiripit hode awukhiukrü alalanü Hamor tüsho api tsührü Shekem büne ki ani; kiuto chipiripit hode awukhiukrü athrürü aban tsütabah.

25Kheakü mahsam nipü, arü thsünü ching lachoki, Jakob tsührü mahne, Dina akhiung Simeon le Levi anenü abande nukshang lubah mulong tode kiuto ching arü tüsho athrürü alala laksah. 26Arünü Hamor le api tsührü Shekem nukshangnü laksah, tüsho Shekem yam chingnü Dina bea lubah wukhiuk. 27Jakob tsührübonü alaksahpung ching arü, tüsho kiuto yankhia lu, tümütüsho arü niurü thsümünima lakheah. 28Arünü arü kiuto tüsho thulu ching lakhi namfimihnubo, arü moshipungbo lu. 29Arünü arü lakhi tüsho aliberübo le azürübo, arü yambo ching lakhi lüpdükhi yankhia lu. 30Judüki Jakobnü Simeon le Levi ki tha, “Nükenü lomi ching larü Kananrü le Perizrü bolung I athraneanbe kamshihde I kheak küpkhuk hande arüdo; tümütüsho I wühkhe nüklah, arünü rukhüh mukhungbah I azhihbah tüsho I laksahbah.” 31Tüshe anenü alo, “Apinü isa niurü müzammüramrü nangde arhimobea de?”

Currently Selected:

THRÜNTAN 34: YIMCBSI

Highlight

Copy