THRÜNTAN 33

Jakobnü Esau Shorukhi

1Jakobnü abinkih-a kheah tüsho Esau arüde alakhi ngü, tüsho api lung mihtsürü 400 lakheah. Jumonü apinü azürübo ju Lea, Rachel, tüsho yamlaberü mahne bolung chammüzütjih. 2Apinü yamlaberübo le arü tsührübo mikhuh, Lea tüsho anihbe tsührübo ju khin yüshih, tüsho Rachel le Josep ashushih. 3Apinü arü alala hode yü tüsho akhiung api thüninde marüyi khiungde alo kheak thüne ki khukning.

4Tüshe Esaunü api shorupü alihde yübah kap, tüsho ahung kheak kapbah api müthsüp, tüsho arünü trip. 5Apinü abinkih-a kheahbah aliberübo le tsührübo ngü, tüsho tha, “Nü lung harü ha sherü a?” Apinü alo, “Thrünpuhnü nü yamlarü kilim muzhode ajihkhi tsührübo ah.” 6Judüki yamlarübo le arü tsührübo thüninde arü tüsho khukning. 7Lea she anihbe lung tsührübo bebah arü tüsho arünü khukning. Jushu Josep le Rachel thüninde arü, tüsho arünü khukning. 8Judüki Esaunü tha, “Inü ashorukhi boto alala ha amütsan tümü a?” Tüsho apinü alo, “Harü ha I tungpuh miki amuzho yimpü lah.” 9Tüshe Esaunü tha, “I suhdahde lah, I niurü, nü tümü lanü nü thsungkheak zoang.” 10Tüsho Jakobnü tha, “Yung, muzhobah, I nü miki amuzho ngüa lasho, I khah chingnü I thsambah leangkhiang; nü miro ngükhi inü Thrünpuh miro ngükhi nangde lah, tüsho nünü I ki asühdo. 11Muzhobah, nü kilim hande arükhi I müngühmühi luang, tümütüsho Thrünpuhnü I ki muzhode rhimodo, tüsho I suhdahde lah.” Apinü anihbuh ki thsungkih tüsho apinü ju lu.

12Judüki Esaunü tha, “Isanü tsahmusuanü; isa yüanü, tüsho I nüsa müngüh yübah.” 13Tüshe Jakobnü api ki alo, “Azürübo sühmüh müdüküng, tüsho mihnu le moshi boto anunu bede I lung belah de I tungpuhnü mükheahlah. Tüsho mihtsürübonü arübo nimung khülangnü müküpde besho, shiwüh alala ashebah. 14Muzhobah I tungpuh a nü yamlarü müngühnü yüang. Inü Seir ching I tungpuh ki marüyi khiungde, I müngüh shiwüh boto tüsho azürübo arünnü kitde arübah.”

15Tüsho Esaunü tha, “Kheakü I lung bekhi mihtsürü khürü nü lung zojihanü.” Tüshe apinü alo, “Tümü yihnüpü lale? Inü I tungpuh miki amuzho lang ngüshang.” 16Jumonü Esaunü ju nimung nihbuh limro ching Seir lim yülo. 17Tüsho Jakobnü hantsahde Sukkoth lim yübah api thsungkheak thüyam khülang tüsho shiwühbo thsungkheak yünshimbo thsü. Jumonü ju dangpung ki Sukkoth#Yünshimbo de jichoh.

18Tüsho Jakobnü api limro Paddan-aram chingnü Kanan lomi ching lakhi Shekem kiuto ching tsüde arü; tüsho apinü kiuto müngüh bin. 19Anihbuhnü khimyam thsüpung alo ju Shekem abuh Hamor tsührübo kheaknü apinü shotoyinchi nak 100nü thulo. 20Ju ching apinü kingaün sadam khülang thsü tüsho El Elohe Israel#Thrünpuh, Israel Thrünpuh. de ji.

Currently Selected:

THRÜNTAN 33: YIMCBSI

Highlight

Copy