THRÜNTAN 32

Jakobnü Esau Shorupü Thsakhamkhi

1Jumonü Jakob anihbuh limro ching yü, tüsho Thrünpuh yunirübonü api shoru. 2Küyimki Jakobnü arübo ngükheanü, apinü tha, “Ha Thrünpuh binkheampung ah.” Tüsho apinü ju dangpung mung Mahanaim de ji.

3Judüki Jakobnü Edom lomi, Seir lo ching akhiung Esau kilim api müngüh yunithsürübo yüshih. 4Tüsho apinü arü ki thiyukhüm jihde tha, “I tungpuh Esau ki ha thaang, ‘Nü yamlarü Jakobnü ha thachoh: “I Laban lung kheakü khiungde ju ching lakheah. 5I moshipungbo, donkibo, mihnu boto, tüsho athrürü le aliberü yamlarübo lah; tüsho nü miki I amuzho ngüshihpü inü I tungpuh ki thapü arüshihchoh.”’”

6Judüki yunithsürübo Jakob kilim alode arübah tha, “Isa nü khiung Esau kilim yükheah tüsho api lung mihtsürü 400 belah.” 7Jumonü Jakob khide tre tüsho lümthsünü; tüsho apinü anihbuh lung bekhi mihtsürü, tüsho mihnu le moshi boto, tüsho kemelbo bo mahne thsüde cham. 8Tüsho apinü tha, “Esaunü bo khülang kilim arübah zündosho, bo khülang a atsokhitbah.”

9Jakobnü tha, “O I pü Abraham Thrünpuh tüsho I buh Isak Thrünpuh, Atungpuh shepünü I ki tha, ‘Nü lomi tüsho nü buhtsührü kilim alode yüang, tüsho inü nü ki tsüde arhimobah’; 10nünü nü yamlarü ki amuzho tüsho thiyuro harü alala huhkhi I müthülün. I ha Jordan hochoki tso khülang lang alakheah, tüshe kheakü I bo mahne kamdo. 11Inü tamkhüntamnüchoh, I khiung Esau khah chingnü I bekhitang; tümüde inü api trelah, jude yungsho api arübah tüsho I le tsührübo tüsho berübo laksahbah. 12Tümüde nünü tha, ‘Tsükjide inü nü tsüde akümbah, tüsho nü tsühsoniusobo mükhekhambe keto loyi nangde hihde akamshihbah.’ ”

13Jumonü ju re apinü ju ching binkheam, tüsho api lung lakhi chingnü akhiung Esau khilim thsambah thsüpü mokhita lu; 14mihnu dre 200 tüsho mihnupung 200, namfimihnu dre 200 tüsho namfimihnu pung 20, 15kemel anunubo bede 30, moshi dre 40 tüsho moshi pung 10, tüsho donki dre 20 tüsho donki pung 10. 16Apinü shiwüh boto aban api yamlarünü akümshihpü jih tüsho ayamlabuh ki tha, “I müngühnü yüang, tüsho shiwüh boto dükeak anükhüh zahshang.” 17Tüsho apinü akhuhbuh ki thiyukhüm jihde tha, “Küyimki I khiung Esaunü nüsa shorubah akeoba, ‘Nü putungrü she a tüsho nüsa külim yücho? Nü müngüh harübo ha she yo a?’ 18Judüki nüsanü athabah, ‘Arübo nü yamlarü Jakob yo ah. Ha I tungpuh Esau kilim thsambah khülang ah; tüsho api she isa dunglim lah.’” 19Junangde apinü mahnepü, mahsampü, tüsho shiwüh boto yanrü alala ki tha, “Küyimki nüsanü api ngübanü Esau ki hanangde asukang; 20tüsho thaang, ‘Kheahang, nü yamlarü Jakob isa dunglim lah.’” Tümüde apinü lüm, “I müngüh yükhi thsambahnü inü api ki mungtsü thsübah, tüsho ju dunglim inü api miro shorubah; khükia apinü I leangkhibah.” 21Jumonü api müngühnü thsambah yü, tüshe api a ju re binkheampung ching bin.

Jakobnü Thrünpuh bede Shochihkhi

22Apinü ju re asürü tüsho aniube 2, ayamlarü 2, atsührü 11 bebah Jabbok ayung hode yü. 23Apinü arü bea lubah ayung hode yüshih, tüsho api lakhi alala yüshih. 24Judüki Jakob alangzü aninga lakheah; tüsho mihtsürü khülangnü ayinkhi khiungde api bede shochih. 25Küyimki apinü anihbuh mukukkhi ngükhea, apinü amutsuro kheak qiu; tüsho apinü mihtsürü lung shochihchoki amutsuro phülapkhit. 26Tüsho apinü anihbuh ki tha, “I tsoshang, tümüde ayinkhipü thsüchoh.” Tüshe apinü tha, “Nünü I mümüngühjihsho inü nü mutsoshih!” 27Jumonü apinü anihbuh ki tha, “Nü mung she a?” Tüsho apinü alo, “Jakob.” 28Tüsho apinü tha, “Nü mung kheaküa Jakob de müji, tüshe Israel;#Apinü Thrünpuh bede shochih. tümüde nünü Thrünpuh tüsho mihtsürübo bede shochih, tüsho kukdo.” 29Judüki Jakobnü api ki keokhi, “Muzhobah I ki nü mung thaang.” Tüsho apinü tha, “Nünü tümüde I mung keokhicho?” Tüsho apinü ju ching api müngühjih. 30Jakobnü ju dangpung mung Peniel#Thrünpuh miro de ji: “Tümüde inü mironü miro Thrünpuh ngüdo, tüshe I rhangdung aninga lah.” 31Api Peniel hobah ani akhiuk, tüsho anihbuh mutsuro mütsükhinü api akheangde alakheah. 32Jumonü Israelrünü khihni khiungde mutsuro kheak shihyin mütsühchoh, tümütüsho Jakob mutsuro ha yin kheak apinü qiu.

Currently Selected:

THRÜNTAN 32: YIMCBSI

Highlight

Copy