INLAHEN 19

I Efisös Ang Pôl

1Ngaich hē Apôlös nö i Kòrin, ngaich lök i nup tulöng panam ang Pôl; ngaich yihtöre nö i Efisös, ngaich kôtökūö tö yik haroh tum tak mahaköp. 2Ngaich ngö ṙô anga-aṅ tö cha; Ngaich öi yī-ö teūngen tö ngam Töhet Fanöinylö, hē yīö ngaich ṙātö ellōnre? Ngaich ngö ṙô cha-a, tö ò, Hö-ö; öt rēhĕn in höng hang, yē ngam Töhet Fanöinylö nö kētu nö ngaich. 3Ngaich ngö ṙô anga-aṅ, Asuh apri vinôkö yīö? 4Ngaich ngö ṙô cha-a, Ngam tī Yôhan vinôkö. Ngaich ngö ṙô Pôl, Vōk ök Yôhan nö aṅtī tö ngam vinôkö invöötö ellōn; ngö ṙô anga-aṅ tö yik tarik, hōten cha nö ṙātö ellōnre nö in Ò, Öp mu-unôichrit ò, Ang Yēsū.

5Ngaich hē cha nö hāngö e, vōkö cha-a ngaich, nö i Mine-eny ngam Mā Yēsū. 6Ngaich hē Pôl nö ṙēptö eltīre nö i kui cha, teungtöre ngaich ngam Töhet Fanöinylö nö in cha; ngaich huveū-eu ṙô cha-a tö tahëng ëlô; ngaich ahānga. 7Lohten yik nö nët sīön taka nö ṙòkhöre.

8Kuhēthötre ngaich anga-aṅ nö el chūök vinë-eṅkūötēv, lūöi chumngëṅtö rô-òten nö ötpinheṅeṅvkūö ṙô nö ve-ekūö, ane inrē hōten cha nö haköp nup aṅ im pūlngö ngam Tēv. 9Hē yik rēvre pöri töt vane-ekūö, sōḵ inrē, chōchö ṙô tö ngam Talöökö nö i kūö yik tömaṙôngö; kiröönngöre ngaich anga-aṅ nö ṙāngen cha; ngaich haköhngen yik mahaköp; öt hĕng hang sumkam nö ve-ekūöre nö el iskūl Turanös. 10Nët samyeūheu angū-ö nö ngatī; ngaich nöng ṙòkhöre yik mī-iyöng Asī nö hang ngam ṙô ngam Mā Tēv, hĕnghöre Yahūti, Tahëng mihëṅṙö inrē.

Yik Kūön Sīvā

11Tī-iv ngam Tēv, nö lökten in Pôl, tö töt ha-eh minhôiṅyö; 12Lökten nö kē-ĕyö nö i yik tövahvö nuk kun hilā, hēk chanūt vang, nö ṙā-ang i alaha ò; ngaich nuk invah nö ṙāngen cha, kunyī-inyre inrē yik tötlöök sī-ö. 13Rēvre pöri yik Yahūti, töng mahavöt, ma-ahōngö sī-ö; kalahtenre cha-a nö ṙôtö Mine-eny ngam Mā Yēsū, nö i yik tö sī-u aṅ in, Yēsū ngam ahangkö Pôl. 14Sat tak yik kūön Sakēva, ök Yahūti, mākūö kūönṙô, töngatī.

15Ngaich ngam tötlöök sī-ö nö ngö ṙô, nö sapṙô cha. Akahakūö chin tö Yēsū akahkūö tö Pôl inrē; achīö öi yī-ö? 16Ngaich ök tarik ök tö īnu tö tötlöök sī-ö, nö tisòktöre nö in cha, ngaich mihôiṅ tö cha; lökten cha nö falnyöre nö ṙā-ang el patī, nöng öt hilāṙu, ngaich palā-aiṙen. 17Akahalōn ngaich nö ṙòkhöre yik Yahūti, Tahëng mihëṅṙö inrē, yik mī-iyöng Efisös; ngaich pa-ekūö cha-a nö ṙòkhöre, ngaich hapōilöngö ngam mine-eny ngam Mā Yēsū. 18Maṙôngö yik aṅ i yik ṙamātö ellōnre nö yihtöre nö ve-eny, ane inrē hameuktö nup la-en cha. 19Rēvre yik tömilūönö kamëtö nuk līpöre, ngaich föngngö u nö i kūö taròkhöre; ngaich kaheuk nuk ṙāi u cha-a, ngaich kôtökūö tö u nö taneui anāi köṅny rupīö. 20Yöng pinrātngö ngam ṙô ngam Mā Tēv, nö mihôiṅ.

Tinṙōlen Nö I Efisös

21Keuheūthëṙen anū-ö, ngaich Pôl nö halēnngö ellōnre nö hòṅ chuh Yerūsalem, hē ò nö ngaich nö lök Maketònī, Akayā inrē; nö ngö ṙô, Keuheūthëṙen chū-ö umuh, ngaich hòṅ chöhkö Rōma inrē. 22Ngaich nët tak tahīnngö anga-aṅ nö i Maketòni, tö aṅ i yik hamòlṙen ò, nā Timòti, nāṅ Erāstös. Höngngöh anga-aṅ nö Asī, nö rĕh ṙô-òten.

23Ngaich hē e, ök yöng tinṙōllen tökūö ngam Talöökö. 24Hĕng taka ök tarik, Tēmetriös minënyö, ramöm rupīö, vamī insā chūök Artēmis, töpōyen la-en tī tö yik töla-evṙen, 25Yik töhamūlö tö ò, tö yik töngatī la-en inrē; ngaich ngö ṙô, Mah! Akahlōn yin tö hī öi kôlò tökūö ngih la-en. 26Ngaich yih yī-ö meuk, hang inrē, öt höng i Efisös, tön öhten nö keuheūtngöre chūök nö i Asi ngòh Pôl nö hōten tarik, ane inrē maṙôngö havööngökūö, nö ngö ṙô, Rö-ö nun nö tēv, në vāhī tarik. 27Rö-ö an nöng ngih la-en hī tökôlò, tön ngam chūök ngam kikānö tēv hī inrē, Artēmis, nöng tö rö-övö; ngaich anga-aṅ mīnö nö kē-ĕyö inpōilö, ngam ha-öiny yip aṅ Asī, ngih panam nö ṙòkhöre inrē.

28Hē cha nö hāngö e, ngaich tööḵlö tö tanānyöre, ngaich hūḵa, nö ngö ṙô, Yöng ṙôkö Artēmsi aṅ Efisös. 29Ngaich ngam panam nö taṙōlaṙen; faltöre cha-a ngaich nö hĕngtum nö el ök patī chūök kumṙīöm; ngaich kē-ĕ Kai-ös, Aristākös inrē, nak tarik aṅ Maketòni, hol Pôl nö kiröönngöre. 30Ngaich hē Pôl nö hòṅ kuhēthötre nö i yik tömaṙôngö tarik, öt halöngtuṙen pöri tö yik mahaköp. 31Rēvre inrē yik mākūö panam i Asī, yik hol ò, tamīnngö vame-eṅkūö ò, sōten ò nö kuhēthötre nö ël ök patī chūök kumṙīöm. 32Höng kö ṙôre cha-a nö hūḵa, tahëngö ṙô yik inrē; pò yik tömaṙôngö nö ngaich nö kalūöichöre. Pōyen yik töng ötakahlōn töp lökten cha nö hamūlöre. 33Ngaich rēvre yik aṅ in cha nö halānyen Aleksantör, yik Yahūti tötī-iv tö ò nö lākūö. Halöinykö këlre anga-aṅ, nö hòṅ ṙô-òv nö i yik tömaṙôngö. 34Hē cha pöri nö akahalōn tö ò nö Yahūti, ṙòkhöre cha-a nö hĕng tum ṙô nö hūḵa, nët köṅny ṙô rô-òten, nö ngö ṙô, Yöng ṙôkö Arētmis, aṅ Efisös.

35Ngaich hē ök kamhôṅka nö hachēvngö yik tömaṙôngö; nö ngö ṙô, Yī-ö tarik aṅ Efisös; achīö öp tarik tötakahalōn tö ngih panam vē aṅ Efisös, nö amahtö ngam chūök ngam yöng Artēmis, ngam insā inrē tö suktöre nö ṙā-ang el halīöngö. 36Yē u nö tötmanahngen, hòṅ hachēvngenre yin; ui kësen. 37Pò yīö kētö vē tarik, vē töt rēhĕn nö mu-ulāingen nup töthet chūök, öt rēhĕn nö ötlamëkôre tö ngam kikānö tēv hī. 38Lökten yē Tēmĕtriös, yip töla-evṙen inrē hol ò, nö kumnyahaṅvlōn nö i tarik, sakāmu hē nun në kinṙôka, kamhôṅka inrē yip umuh. Hökngen cha yēḵ nö ve-eny fālen höö. 39Yē e pöri nö tahëng nö fālen, ngaich halöökö min angū-ö tö yip kamhôṅka. 40Pò hī ngaich ötkôlò öi hatönö min tö lāinyngen ngih tinṙōlen, ngih töng öt löknyu chööḵnyi. Ngaich ayī-ö mīnö öt huvē-eu ṙô ve-eny ngam tinṙōlen. 41Anū-ö ṙô ò; ngaich piyāingö yik tömaṙôngö.

Currently Selected:

INLAHEN 19: CANIBSI

Highlight

Copy