INLAHEN 17

I Tösālônikē

1Ngaich hē cha nö lök Ampipòlis, Apôlòni inrē, yihtöre cha-a ngaich nö i Tösalònikē, i chūök ök chūök vinë-eṅkūötēv yik Yāhūti. 2Ngaich sāre, ang Pôl nö yihtöre nö in cha; ngaich lūöi töhet sakāmö rô-òten ò nö ve-ekūö cha, löknyö i mat nup töhet līpöre. 3Hameukhöti, ane inrē mikahtö elmat cha, tö Kristū nö tö hòṅ kihngen, ngaich chōholre hēk, nö ṙā-ang i yip tökapah. Anga-aṅ ön ngòh Yēsū nö Kristū, ngam ṙô chu ahangken yīö. 4Ngaich rēvre tö cha; yik ṙamātö ellōnre, ngaich hamūltöre nö in nā Pôl, nāṅ Sailes, yik tahëng mihëṅṙö töpa-ekūö tö ngam Mā Tēv, ane inrē yik tökôlò kikānö nö maṙôngö.

5Ngaich pöri yik Yahūti nö kunyahaṅlōn; ngaich ngôṅ yik tötlöök tarik, mī-i chūök mī-inyih; hamūlöre ngaich, ngaich tiṙōllen ngam panam. Yihtöre nö i patī Yāsön, ngaich lukkenre; nö hòṅ kēḵnyen cha nö i yik kamhôṅka. 6Ngaich hē cha nö öt kôtökūö tö cha, tūökö Yāsön cha-a, haroh tum tak yik tahëng inrē, nö i yik makūö panam; ngö ṙô nö hūḵa, 7Yih yip tarik nö ihih, yip tumṙōllen ngih panam, yip ahōḵo Yāsön. Ṙòkhöre yip nö harīkngö fālenre, tö chöngö Kaisöör; ngö ṙô, töp tahëng rācha, ang Yēsū. 8Ngaich yik tömaṙôngö, tö yik mākūö, nö harunlöng alaha tö cha; hē cha nö hāngö u. 9Ngaich hē Yāsön, tö yik tahëng mā inrē, nö acha-a töhōtu tö cha nö tö-akahalōn; ngaich hökiṙen cha-a nö kiröönngöre.

I Pīrīa

10Ngaich im hatööm yik mā nö tīnngen nā Pôl, nāṅ Sailes, nö i Pĕröiya. Chalô cha-a nö umuh; ngaich yihtöre nö el chūök vine-eṅkūötēv yik Yahūti, 11Töakaha yik cha-a tö yik aṅ Tösalònikē; pò cha nö lēnö ellōn nö hōḵo ngam ṙô, örhĕnghang sumkam nö ngëichkö mat līpöre, yē u anū-ö nö tökô-en. 12Lökten nö maṙôngö yik aṅ in cha nö ṙātö ellōnre; yik Tahëng Mihëṅṙö kikānö tökôlò, kikōnyö inrē nö pōyen. 13Ngaich hē yik Yahūti aṅ Tösalònikē, nö akahalōn tö aṅ Tösalònikē, nö akahalōn tö ngam ṙô ngam Mā Tēv nö ahangka tö Pôl nö i Pīrīa; yihtöre cha-a ngaich nö umuh, ngaich haruhlö alaha yik tömaṙôngö. 14Ilööṙen ngaich yik māṅ nö tīnngen Pôl nö tölngö kūö mai; ngaich höngngöh nāṅ Saīles, nāṅ Timòtī, nö umuh. 15Tölngö Aten pöri yik samöömngen Pôl; ngaich kilēḵngen cha ang Pôl, nö tölṙô nā Sailes, nāṅ Timòtī, nö ka-eūyen nö yihtöre nö in ò, ngaich kiröönngöre cha-a.

I Ĕtën/Aten

16Ngaich hē Pôl nö hökken cha nö i Ĕtën, ngaich halöinyöre ellōn anga-aṅ, hē ò nö meuk ngam panam nö tööḵlö tö insā tēv. 17Ve-ekūö yik Yahūti anga-aṅ, yik tö pa-ekūö inrē tö ngam Tēv, nö el chūök vine-eṅkūötēv; ör hĕnghang sumkam inrē nö el panam, nö ve-ekūö yik maheuṅkre tarik. 18Rēvre inrē yik Epikuri, Sato-iki inrē, yik töpōi haköp, nö kil ṙô ò. Rēvre yik tö ngö ṙô, Asuh ap tinkākö ṙô ngòh tarik? Rēvre yik tahëng, tö ngö ṙô, Sā ma-ahangkö tēv an tötohtöre; pò ò nö ahangken Yēsū, invanlö tökapah inrē. 19Ngaich cha-a nö kēḵ an, ngaich ngôṅten ò nö i kui ap rung Arĕs nö ngö ṙô, Kô-òren öi akahalōn tö ngih tumfömngöre inköphöti ngam ṙô meh? 20Tön rötlö elnang in tö në tötohtöre kum meh. Hòṅ akahalōn in lökten, tö manah u. 21Pòn ṙòkhöre yik aṅ Ĕten, yik aṅ tahëng inrē umuh, nö öt inrēṙu la-en, höng ve-eny, hēk hang, nup tufömngöre.

22Söklöre ngaich Pôl nö ellōn ap rung Arĕs, ngaich ngö ṙô, Yī-ö tarik aṅ Ĕten, i tökeuheūttöre chin meūkö yīö öi tököp tö kuire. 23Pò chu meuk nup ha-öiny yīö, hē chu lök hih; ngaich kôtömat inrē töp tahāklö, tö ngö kinūichö aṅ in, Tahāklö ngam Tötmikahkūö Tēv. Ngam ha-öiny yīö, öi i ötmikahre, Anga-aṅ An ahangkö chu in yīö. 24Ngam Mā Tēv, vamīlö ngih panam, nup taṙòkhöre inrē mi-in e; Anga-aṅ An Mā ngam halīöngö, panam inrē, öt iyöng el patī An në vahī-il tarik. 25Öt rēhĕn An nö hòṅ meūken tö tarik, nö sā tö hanāṅtuṙen; pòn Anga-aṅ kamëtö nômö taṙòkhöre, unhôṅmö, taṙòkhöre chehen inrē. 26Ngaich Anga-aṅ nö vīlö ngòh tarik nöng hĕng, nö iyöng kūö në taṙòkhöre panam; halöök ṙētak hē cha, nup tölngökūö elyöngö cha inrē. 27Vīten cha Anga-aṅ nö chöh Tēv yē cha nö hòṅ kôtökūö tö līöthen Ò, chöhan inrē. Rö-ö Anri nö marôvat tö hī nyöre. 28Pò hī höng in Ò öi aṅ, halöinyköre, ngaich öi tarik. Sā ṙô yik rēvre vamī tinkökö yīö, nö ngö ṙô, Ṙòkhöre in öi kūön Ò. 29Kūön ngam Tēv in; uh in ngö lōn tö ngam Tēv nö tö sā humlum, rupīö, ihong, nup tömilichngen vinī-i tö tarik, sā lōn cha. 30Hökiṙen an sin ngam ṙētak ötmikah, tö ngam Tēv; ngaich pöri Anga-aṅ töngamuh nö chönguvö tö tarik nö keuheūtngöre chūök nö havöötö ellōnre. 31Pòn sakāmu hē Anga-aṅ öp hē Ò min nö kahòkken ngih panam, im ötmichūṙen, lökten im tarik ngam vahīten Ò. Ngaich kētö minkahngö Anga-aṅ i taṙòkhöre tarik, i tī Ò nö hachohlen Ò nö ṙā-ang yip tökapah.

32Ngaich hē cha nö hang invanlö tö kapah, rēvre yik tö miyëḵṙô; ngö ṙô pöri yik tahëng, Hòṅ hang ṙô meh in īhö hēk, tö inlahen e. 33Ngaich Pôl nö kiröönngöre nö ṙāngen cha. 34Haroh tum tak pöri yik mahaköpngöre nö in ò, ngaich ṙātö ellōnre; hēḵ Tīōnīsiös, aṅ i yik kamhôṅka, hĕng tak ök kikānö, Tāmaris minënyö, tahëng inrē yik hol cha.

Currently Selected:

INLAHEN 17: CANIBSI

Highlight

Copy