Akt de Zapot 23
23
1Pol ti fikse bann manm konsey. I ti dir, “Mon bann frer! Dan mon lavi antye, mon'n viv avek en konsyans trankil devan Bondye, ziska ozordi.”
2Gran-Pret Ananyas#23.2 Ananyas ti Gran-Pret 47-59 apre Zezi-Kri. ti donn lord bann ki ti pre avek Pol pour kalot li lo son labous.
3Alor Pol ti dir li, “Bondye ki pou kalot ou, miray blansi! Ou pe asiz la pour ziz mwan dapre Lalwa. Me ou menm, ou kas Lalwa, ler ou donn lord kalot mwan.”
4Sa bann zonm ki ti pre avek Pol ti dir li, “Gran-Pret Bondye ki ou pe ensilte!”
5Pol ti reponn, “Mon bann frer! Mon pa ti konnen, si ti Gran-Pret. Annefe, Lekritir i dir: Ou pa devre mal koz lo sef ou pep#23.5 Egz 22.27..”
6Pol ti remarke ki dan konsey ti annan serten ki ti dan group Farizyen e serten ti Sadiseen. Alor, i ti kriye devan zot, “Mon bann frer! Mon en Farizyen e mon bann paran ti osi Farizyen#23.6 War 26.5; Flm 3.5.. Mon pe ganny zize la devan zot akoz mon espere ki bann mor pou resisite!”
7Koman Pol ti dir sa, bann Farizyen ek bann Sadiseen ti konmans argimante, e lasanble ti divize. 8Annefe, bann Sadiseen, i dir ki bann mor pa pou resisite e ki napa ni lanz, ni lespri; tandis ki bann Farizyen ti krwar dan tousala#23.8 War Mat 22.23; Mrk 12.18; Lk 20.27.. 9Alor, zot ti konmans kriy pli for e serten profeser Lalwa, manm group Farizyen ti debout e proteste byen for, “Nou pa war nanryen mal avek sa zonm. Ki i fer si en lanz oubyen en lespri in kekfwa koz avek li?”
10Dispit ti vin telman vyolan ki komandan Romen ti per ki zot ti ava desir Pol an morso. Alor, i ti donn lord son bann solda desann dan lasanble pour tir Pol parmi zot e retourn avek li dan fortres.
11Aswar, Senyer ti aparet avek Pol. I ti dir li, “Pran kouraz! Parey ou'n rann temwannyaz lo mwan isi dan Zerizalenm, i neseser ki ou al fer li osi Ronm.”
Konplo Kont Pol
12Lannmen bomaten, bann Zwif ti zwenn ansanm pour mont en konplo. Zot ti fer en serman ki zot pa pou ni manze, ni bwar, ziska ki zot in touy Pol. 13Dan sa konplo, ti annan plis ki 40 zot. 14Alor, zot ti al kot bann gran-pret ek bann ansyen e dir zot, “Nou'n fer en serman pour pa manz nanryen ziska ki nou'n touy Pol. 15Alor, la sa ki zot, avek konsey, zot annan pour fer: Demann komandan pour anmenn Pol kot zot, swadizan pour rod plis lenformasyon lo son ka. Nou, nou pare pour touy li avan ki i ariv isi.”
16Neve Pol, garson son ser, ti ganny nouvel sa konplo. Alor, i ti al dan fortres e rakont Pol. 17Pol ti apel en zofisye. I ti dir li, “Anmenn sa garson kot komandan, i annan keksoz pour dir li.”
18En zofisye ti anmenn li kot komandan. I ti dir li, “Prizonnyen Pol in apel mwan e demann mwan pour anmenn sa garson kot ou, akoz i annan keksoz pour li dir ou.”
19Komandan ti atrap lanmen sa garson e anmenn li akote tousel. I ti demann li, “Ki ou annan pour dir mwan?”
20I ti reponn, “Bann Zwif in fer en plan pour demann ou pour anmenn Pol devan zot konsey demen; swadizan ki konsey i oule ganny plis lenformasyon lo li. 21Fodre pa ekout zot, akoz i annan plis ki 40 zonm ki pou kasyet pour esper li. Zot in fer en serman pour pa ni manze ni bwar ziska ki zot in touy li. Zot in pare pour fer li, e zot pe esper ou desizyon.”
22Avan ki komandan ti ranvoy sa garson, i ti dir li, “Pa dir personn ki ou'n raport sa avek mwan.”
Pol Devan Gouverner Feliks
23Apre sa, komandan ti apel de son zofisye. I ti dir zot, “Rasanble 200 solda, avek 70 kavalye, ek 200 zonm arme avek lans. Zot devre pare 9 er diswar pour al Sezare.
24Prepar osi bann seval pour transport Pol e anmenn li sen e sof kot gouverner Feliks#23.24 Feliks ti gouverner Zide ant lannen 52 ek 59-60, avan Zezi-Kri..”
25Apre, i ti ekri sa let: 26Klod Lisyas i anvoy son konpliman a Son Ekselans Gouverner Feliks. 27Bann Zwif ti aret sa zonm e zot ti pou touy li. Mon ti tande ki i en sitwayen Romen. Alor, avek mon bann solda mon ti al sov li. 28Mon ti oule konnen ki lakizasyon zot annan kont li. Alor, mon ti anmenn li devan zot konsey.
29Mon ti dekouver ki i pa ti'n fer nanryen ki merit lanmor ouswa prizon. Lakizasyon kont li ti en zafer an rapor avek zot prop lalwa.
30Kan mon ti ganny lenformasyon ki serten Zwif ti pe fer en konplo kont li, mon ti deside anvoy li kot ou. Mon ti dir avek bann ki pe akiz li pour al fer zot konplent devan ou.
31Bann solda ti fer parey zot ti'n ganny ordonnen. Zot ti pran Pol e anmenn li pandan lannwit ziska Antipatris. 32Lannmen, bann solda apye ti retourn dan zot fortres e les bann kavalye kontiny vwayaz avek Pol.
33Koman zot ti ariv Sezare, zot ti delivre sa let avek gouverner e prezant li Pol. 34Gouverner ti lir sa let e demann Pol dan ki rezyon i sorti. Kan i ti aprann ki i ti sorti Silisi, 35i ti dir li, “Mon ava ekout sa zafer kan ou bann lakizater ava'n arive.”
I ti donn lord pour gard Pol dan pale Herod.
Currently Selected:
Akt de Zapot 23: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
