MARK 8
8
Jisu nou Mai Thedaiye Vaiyu
(Mt 15.32-39)
1Süthaisü phasho khaimoa kukhe maisou alao tave dzüpu khaire, alia maikhemai sü halia toure hakhaia Jisu nou puh rozümaitaoye puh hi kuveloua paoe, 2“E mai haitaoye zhuveasho loure, daiolouzü puletao nou Eye koa teithe asü bukoure ea chuo toure halia hare. 3Enou puletaoye halia vaipeimoa kilo seiva louzü, puletao sü ludu hinou houshulai, daiolouzü puletao kamaisü adoukounou ve-e.”
4Puh rozümaitao nou puh hi noue, “Rekou haihinou daikinou taho maisou haitaoye vailousü touso ngaoloulai?”
5Jisu nou noue, “Neletao hi raokhao pho daizhou buwe?”
Puletao nou chila peie, “Anai bue.”
6Puhnou maisouye deiphinou kou chobuloure donou kharochi peire. Süthaisü puh nou raokhao pho anaitao poloua Ramai hi kalo paowu-a sütaosü soukhore, alia sütaosü mai souhi zhihpeire donou puh rozümai taohi peire; alia rozümai taonou sütaosü maisouhi zhihpeire. 7Puletao hi khah-a daotou bue, alia Jisu nou sütao donou-a Ramai hi kalo paowu-a sütao-a maisouhi zhihpeikhaio tea rozümai taohi kharochi peire. 8Alia mai hrülainou touloua khralou khaire; alia tousho derai kouyutao hai puletao nou sülai anaiphou pokodzüloue. 9Sühi tave toulouyu taohai mai thedai phae. 10Alia Jisu nou puletaoye seitare ea thalasou puh rozümaitaoye koa sakhaohi louloure, alia Dalmanutha deizha hilo tare.
Phariseemai nou Shee Khoyu
(Mt 16.1-4)
11Phariseemai kamainou Jisu hi taveloua puhye veiva loure. Puletao nou puh mah phoupalou nüwe, südonou puletao nou puh hinou Ramai nou puhye ae-ao touwe touyu pongaore shee ali soungaokhaio tea khoe. 12Ana Jisu nou ssü liphou touloua paoe, “Daidonou maikha hainanou shee phousa? Chechenou Enou neletao hi paowe, maikha haina hisü sheelia peilai moe!”
13Alia puhnou puletaoye thaowu-a tare, alia sakhaohi taloupuloua zai polo dovahi tare.
Phariseemai ea Herod vei Kheih
(Mt 16.5-12)
14Chuo rozümaitaosü raokhao pfüngaire; alia puletao buh sakhao hisü raokhao pho alikhei bubaire. 15Jisu nou puletaoye tukha-a paoe, “Leikeilo, Phariseemai ea Herod vei kheih zhutoulo.”
16Alia puletao lah puletao hronou haibüa chipha-a paoe, “Puhnou haisü Eletao hi raokhao lia hayu donou paobaie.”
17Puletao nou pha-a buyu sü Jisu nou süloua puletao hi paoe, “Daisounou neletao raokhao lia hayu vanou chi phawe? Neletao chu koutea sümo-ngaomo hiwu? Neletao le khousho tarewu? 18Neletao nghithou bu-bua ngaomowu? Neletao nou pfü-pfüa choumowu? Alia neletao halia lilou mowu? 19Enou mai thengouye donou raokhao pho angou soukhoyuki neletao nou tousho derai kouyu sülai kizhou phou pokodzüloue?”
Puletao nou chila peie, “Kiahai.”
20Jisu nou noupukhaie, “Alia Enou mai thedaiye donou raokhao pho anai soukhoyuki, neletao nou tousho derai kouyu sülai kizhou phou pokodzüloue?”
Puletao nou chila peie, “Anai.”
21Alia puhnou puletao hi paoe, “Neletao chukoutea sümohiwu?”
Jisu nou Bethsaida hinou Nghichamai Aliye Souvei Peiyu
22Alia puletao sü Bethsaida hi velou loure ea sühinou mai kamainou nghi chayu mailiye Jisu hi saveloua puhye nou mai süna vahi deipeio tea khoe. 23Jisu nou mai sünaye bah hinou süthailoua nuh vakouhi satare. Alia puhnou mai süna nghithouhi taidzü sükhaiyu kisü puh bahnou mai süna vahi khailoua puh hi noue, “Ne hatalia ngaongaomoe?”
24Mai sünanou puh pah pfülaloua paoe, “Ovai, Enou maikhe maiye ngaowe, ana puletao sü süübenou takou takheyu büwe.”
25Süthaia Jisu nou puh bah hai mai süna nghithouhi pokhaipeie. Lüh haina hisü mai sünanou zhutei loure ea puh nghisü ngaoloua ha teitei sheesha-a ngaoloure. 26Süthaisü Jisu nou puh hi haibüa kharochi paia puh kihi seitare, “Nuh hi koutea talouso.”
Pitar nou Jisu vanou Dua Paopayu
(Mt 16.13-20; Lk 9.18-21)
27Süthaisü Jisu nou puh rozümaitaoye koa Kaisaria Philippi ngheikihi buyu nuhtaohi tare. Ludu hinou puhnou puh rozümai taohi noue, “Maikhe mainou Eye nou thaohwe tea paowe?”
28Alia puletao nou puh hi paoe, “Kamainou neye nou Johan Baptist tea paowe; kukhe mainou neye Elijah-e touwe, alia kukhenou ne hai rachi paolamaitao hronou alie touwe.”
29Puhnou puletao hi noue, “Ana neletaowo Eye nou thaohtouwe?”
Pitar nou puh hi chila peie, “Newo Khrista süe.”
30Süthaisü Jisu nou puletao hi kharochi peia paoe, “Maitalihia Avanou paokhaiso.”
Jisu nou Puhvei Veayu ea Athai vanou Paoyu
(Mt 16.21-28; Lk 9.22-27)
31Süthaisü Jisu nou puh rozümai taoye doupei tare: “Mai Nahpoutu hai alaosou vea vuzülai ea tsümaitao, napao adumaitao, alia razhai dou-apeimaitao nou puhye sü motoulai. Puhye sü southeawulai, ana teithe asü thaisü puh hai hrishulai.” 32Puhnou chipao haisü sheetoua puletao hi paopeie. Südonou Pitar nou puhye sakupaloua züshu tare. 33Ana Jisu nou reiveloua ea puh rozümaitaoye zhuloua Pitarye züa paoe, “Saitan, ne Ahinou tawo. Ne tsühai Ramai hinou vemoe ana emai hinou baie!”
34Süthaisü Jisu nou maisou ea puh rozümaitaoye puh hi kuveloua paoe, “Maitalinou Athai fünü louzü, puhlah puhye motoulo, alia puh kros pfüloua Athai fülo. 35Daiolouzü maitalinou lah puh hriraihai khailulou nülouzü süsü hawulai; alia maitalinou Eye donou ea ko avei donou puh hrirai hawulouzü süsü khailu loulai. 36Daiolouzü mailinou deiphao teitei zhiloukhaia lah puh hrirai hawulouzü sünanou puhye donou dai zhiyu bue? 37Moa emainou puh hrirai lyare donou dai peilousüe? 38Südonou maita linou chu khulou souyu ea mah souyu maikha haina hinou Avanou ea Achipao vanou ahrao louzü, Mai Nahpoutu-a sheeyu rakivamaitaoye koa Puo vei khouko ava hinou veyu kisü süna vanou ahraolai.”
Currently Selected:
MARK 8: POUMBSI
Highlight
Share
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
