Lukas 10

Lamtua Yesus nutus ima-ii at buk itu beas dua kas

1Hidi nam, Yesus huil nal ima-ii didang pait at buk itu beas dua.#10:1: In dula dais Yunanin teng dul noan, ‘ima-ii at 72’. Tenga las pait dul noan, ‘ima-ii at 70’. Mo in dula hmudin nias sam, mamo huil ‘72’ ka. Hidim Un bating oen at dua-dua, le oen lakos muna se mana-maan Un in le lako ngas. 2Un nutus oen noan, “Muik atuli mamo man banansila el ael in latu son na. Liis klapa lamtua ka tadu atuil in dake ngas le maa nul tuun. Tiata mi musti kohe-kanas le nodan Ama Lamtua Allah, tunang taplaeng Un atulin in dake ngas, halin tao nakbua atuli-atuil in le muid Au ngas. Undeng atuil in le muid Au ngas, mamo. Mo atuil in dake ngas suma bubuit sii.#Matius 9:37-38

3Mi bok lakom nol ni tia! Auk nutus mi le lakom se atuil hut mamo kas. Mo nangan ta, mi tuladang el lae-blai ana man dalen banan, lako se ngot huin man daat isi ngas hlala.#Matius 10:16

4Mi boel kil duit tam, tas in nisi kai-batu tam, kil nahan dui deng apa mes se lalan deken. Boel soleng oras le aa nol atuil didang se lalan deken.

5-8Eta mi taam lakom se ingu mesa lam, mi boel daad seda-seda se um didang deken. Eta atuli sium mi babanan se uma mesa lam, daad se um na tuun didiin mi haung bokam deng iung na. Eta mi taam lakom se uma mesa lam, mi musti nodan le Ama Lamtua Allah bel hangun se um na isin nas. Eta um lamtua ka sium mi nol babanan nam, taon elola ko Ama Lamtua tulu Un dalen banan na bel uma isin nas. Mo eta oen sium mi lo kam, nang le Ama Lamtua tulu Un dalen banan na bel mi siim tuun. Eta mi tamam se uma mesa, tam ingu mesa, le oen bel mi in kaa-ninu saa tuun kon, sium nol dael kolo. Ta toma eta oen bel mi ela, le seda mi lating nga.#Korintus mesa la 9:14; Timutius mesa la 5:18 9Tao banan oen atulin in heda ngas. Nol tekas noan, ‘Ama Lamtua Allah prenta la maa dadani son!’

10Mo muik ingu dehe man un atulin nas dai sium mi lo. Etan oen tao ela nol mia lam, laok dil se iung na lalan na, le tekas noan, 11‘Hii babanan! Kaim maam son le kil Ama Lamtua in Teka-teka ngas bel mia, mo mi tiu-hii bubuit lo kon. Tiata kaim sii soleng kota ni ahu las deng kaim iin nias, le daid tada noan, mam mi lepa-haal in naih tom mi ngas esan! Mo nangan bana-banan! Ta Ama Lamtua Allah in prenta ka maa dadani isi son!’ ”#Matius 10:7-14; Markus 6:8-11; Lukas 9:3-5; Dehet deng Aan in Nutus sas 13:51

12Yesus tekas pait noan, “Mi taan kota Sodom in daat isi ka son, ta loo? Auk tek mia le! Mam se leol Kiamat tia lam, hukung man Ama Lamtua in nahu bel atuli-atuil in hutun soleng mia ngas, ngele dui hihidi deng atuil Sodom mas.”#Dehet deng Apan-kloma ki in Dadi ka 19:24-28; Matius 10:15, 11:24

Atuli-atuil in sium Lamtua Yesus lo ngas

(Matius 11:20-24)

13Yesus aa taplaeng pait noan, “Mi in ne iung Korasin#10:13: In mo bango nia ki dul noan ‘Korasin’. Mo esa-esa ka, muid dais Yunanin nam, Χοραζίν ‘Choradzin’. nol iung Betsaida ngas, doha lo! Ta in daat ta nahi tom mia! Auk tao taad herang bili-ngala se mi sila-matan son, mo mi dai parsai se Ama Lamtua Allah lo. Molota, mi niam atuil Yahudi man hao le taan Una. Mo eta noan tada-taad herang man Auk in tao se mi ingu la ngas, daid se kota Tirus nol kota Sidon nam, taon elola ko nesang ngi eli son ta, atuli-atuil in se lua ngas pesang son, nol nang soleng oen in kula-kula ngas, le bali muid se Ama Lamtua. Nol taon elola ko oen pake kai-baut susa, hidim tao auh laok se oen bon nas, halin daid tada noan, oen sabail apan deng oen in kula-sala ngas. Molota atuil Tirus nol Sidon nias, atuil Yahudi lo, mo oen hao le taan Ama Lamtua.#Yesaya 23:1-18; Yeskial 26:1–28:26; Yoel 3:4-8; Amos 1:9-10; Sakarias 9:2-4 14Baktebes! Mi ngat esan tuun! Mam eta Ama Lamtua nutus totoang atuli li dasi las sam, atuli-atuil in se Tirus nol Sidon nas hukung nga kahan dui deng, mi hukung nga.

15Mi atuil in se kota Kapernaum mas doha lo! Nangan noan mam Ama Lamtua nikit sakeng mi lakom sorgam deken. Ta ela lo! Mam Ama Lamtua pasang tamang mi lakom se naraka lu dalem!#Yesaya 14:13-15

16Nangan bana-banan! Ta atuil in hii-ming mia ngas, oen kon hii-ming se Au. Nol atuil man dai hii-ming se mi lo ngas, oen kon hii-ming se Auk lo. Taplaeng pait, atuil man dai hii-ming se Auk lo ngas, oen dai hii-ming lo se Ama Lamtua Allah, man nutus Auk son le maang se apan-kloma kia ka.”#Matius 10:40; Markus 9:37; Lukas 9:48; Yuhanis 13:20

Atuil in nutus buk itu beas dua kas pait maas

17Dedeng atuil in nutus at buk itu beas dua kas pait maas sa,#10:17: In dula dais Yunanin tenga las dul noan, ‘ima-ii at 72’. Tenga las pait dul noan, ‘ima-ii at 70’. Mo in dula hmudin nias sam, mamo huil ‘72’ ka. oen dalen kolo isi. Hidim oen tek Yesus elia, “Idaah! Muun isi! Dedeng kaim pake Tuang ngala ka le nulut puting uikjale kas sa, uikjale kas ming kami, le lail putis deng atuli las meman. Ana lo!”

18Kon Yesus situs noan, “Baktebes! Oras mi in tao ela ka, Auk ngat net Ama Lamtua Allah pasang soleng uikjale kas nol oen tuang nga deng apan nua, banansila el bisain dait kliu-kanan se apan nua! 19Nangan ne! Uikjale kas laih tuan na, kit musu. Nol un kon muik in kuasa! Mo Auk bel mi kuasa son le tao tehen un in kuasa ka. Nol eta noan mi kida tom ul in muik lasong, tamlom hkulang kon mi sa-saa lo. Muik tahan in tao daat saol mia lo.#Buk in Naka-nahalit 91:13 20Mi dalen kolo, undeng uikjale kas ming mia. Banan kon, mo na dais ana tuun! Banan dui ka mi dalen kolo, undeng Ama Lamtua dul mi ngalan nas son, le daid Un nenan in taam sorga.”

Lamtua Yesus dalen kolo

(Matius 11:25-27, 13:16-17)

21Dedeng na, Ama Lamtua Koo Niu ka tao Yesus dalen kolo. Hidim Un naka Ama Lamtua noan, “Papa! Paap man daid Tuang Tene se apan-dapa kua nol apan-kloma kia. Auk nodan mamo-mamo, undeng Paap hep kele dais nias deng atuil man in tao apa ka noan tana, nol atuil in nikit-nikit apan na ngas. Mo Paap sai dais nias totoang bel tana-ana ngas, nol atuil in tao dalen deng dadale ngas. Baktebes Papa! Ta na man tao Paap dalen kolo!”

22Hidim Yesus tek atuil hut mamo kas noan, “Hii ke! Auk Amang in ne sorga ku bel Auk kuasa las totoang son. Man in taan baktetebes noan, Auk nia mo asii ka, suma Paap sii. Nol in taan baktetebes noan Paap na mo asii ka, suma Paap Ana ka sii, na Au. Nol Auk kon huil atuil didang le tek one, halin oen kon taan Papa.”#Yuhanis 3:35, 10:15

23Hidim Yesus bali saol Un ima-ii las le tek oen siis noan, “Mi ulat baktetebes, undeng mi net Ama Lamtua in kuasa ka esan son. 24Lahi-lahi, nol Ama Lamtua mee-baah hmuna-hmunan nuas, kom isi le net asa man mi in net son nias, mo oen netas lo. Oen kon kom isi le ming asa man mi in ming son nias, mo oen ming hapus lo.”

Atuil Samaria man dalen na lila

25Oe mesan na, atuil in taan hukung Yahudi mes le noan kiu nahu Yesus. Ta un hangu dil le ketan noan, “Paap Guru! Tulung tek auk le! Auk musti tao elola, le halin auk haup in nuli napiut leo-leo nol Ama Lamtua se sorgang nga?”

26Yesus situn noan, “Upung Musa in dul deng dais nia ki elola, nol ku in nangan tanan na elola la?”

27Atuling na situn noan, “Un dul elia:

‘Ku musti namnau Ama Lamtua Allah, ku Tuang nga, dui deng totoang.

Undeng na, ku musti nangan net Un tutungus,

daek mumuun le muid Un in koma ka,

nol nangan taan se Una.’

Muik in dula kon noan, ‘Ku musti namnau ku pali-kakam mas, el ku in namnau ku apam ma esa ka.’ ”#Atorang deng Tulu Agama las 19:18; Dehet Ulang deng Lalan in Nuli 6:5

28Yesus situn noan, “Toma! Eta ku tao muid ela lam, ku nuli napiut nol Ama Lamtua.”#Matius 22:35-40; Markus 12:28-34; Atorang deng Tulu Agama las 18:5

29Mo atuling na tao apa ka banansila el atuil in parsai isi ka. Hidim un keket Yesus noan, “Lam auk kaak-paling ngias mo asiis sa?”

30Kon Yesus siut noan, “Auk le bel kleta mesa. Ta mam ku tek Au, le ol man baktetebes ‘pail-kaka’ la. Un dehet ta elia: Muik atuil Yahudi mes bok deng kota Yerusalem, niu lako kota Yeriko. Mo nahkiut tuun nam, atuil in nako ngas maas diku-puang una. Oen diku-puang una, hidim nuhu-dau nal un duit tas, nol un kai-batu las totoang. Hidi nam oen pasang soleng un lako se lalan suut ta, le bok lakos nang soleng una. Atuling na naha-bubuit tam mate.

31Nesang lo kon, tulu agama Yahudi las mes niu maa lako deng lalan na. Mo nikit un ngat net atuling na nini batlenga nol apa ka papa si-sii se lalan suut ta, kon un tene le tulung atuling na lo. Mo un sisa lako lalan halin, le laok napiut. 32Nesang lom, muik atuli mes didang pait maa lako deng na. Un nam deng ngaal Lewi, man taom daek hulung se Ama Lamtua Allah Um in Kohe-kanas Tene ka. Nikit un ngat atuling na se lalan suut ta kon, un laok tinang dadani tuun, mo tulung atuling papa na lo. Hidim un sisa lako lalan halin, le laok napiut.

33-34Ti nesang lo kon, atuli mes deng dale Samaria maa lako deng na nol un keledai la. Atuil Yahudi las taom ngat maat halin tuun nol atuil Samaria las. Mo nikit atuling Samaria nga ngat net atuling man tom in nuhu-dau na kon, un dalen kasiang nolan. Ta un lako dadani le tulung atuling na. Un doan anggor le boe atuling na papa las, hidim un mutis nini mina nol nius babanan nini kitu, le nikit sakeng lako se un keledai la dapa. Hidi kon un kil nol atuling na lako lius se kota la. Tukun nam un nolan lako tahang se um in hani mesa, hidim un mana atuling na bana-banan.#Dehet deng Bangsa Israel nol Bangsa Yahuda lalis dua la 28:15

35Ola ka kon, atuling Samaria nga laok bel dopat duit muti dua#10:35: Dais Yunanin dul noan “dinari dua”, lam tatai nol atuli mes gaji lelo mesa. se um in hani ka lamtua ka, hidim un tekan noan, ‘Pake duit nias le urus bana-banan atuling papa na, didiin un banan. Eta nol lo kam, pake tahang ama duit. Ta eta auk pait maang ngam, auk bel seda ama duit tas totoang.’ ”

36Yesus in kleta ka pes ela. Hidim Un ketan atuling in taan hukung nga noan, “Muid ku lam, ol man baktetebes ‘pail-kaak’ taung atuling man tom in nuhu-dau ka la?”

37Kon nam atuling na siut noan, “Taon elola ko atuling in dalen kasiang nol una ka.”

Yesus tekan noan, “Toma kaka! Lako tia, le daek muid ela.”

Lamtua Yesus, Marta nol Maria

38-40Hidi na kon, Yesus nol Un ima-ii las laok napiut lakos bus el Yerusalem. Oen tuil se ingu mesa. Se la muik kaka-pali at dua, ngalans Marta nol Maria. Marta nodan le Yesus nol ima-ii las tuil se un uma. Kon nam oen daad tahang se las.#Yuhanis 11:1

Oras Yesus daad le tui atuli las sa, Marta sii man kukaum in mana kaa-ninu se dapur ra. Mo un palin Maria daad dadani se Yesus iin na, le hii Un in teka ngas. Nesang lo kon Marta taam maa le muhmemen se Yesus sila ka, hidim un tek noan, “Papa! Elol nia la! Auk kukamu ana lo nol mana-koet in kaa-ninu, mo auk paling ngi daad babanan tuun mo nia lam. Tulung le! Tadu un le hulung auk buit se dapur ru le!”

41Mo Lamtua Yesus siut noan, “Marta, Marta. Ku kukamu nol lii-tiud isi le nangan bili-ngala. 42Banan, mo muik dasi mes man banan dui. Daad le hii Auk in Teka-teka ngias sa, Maria huil tom banan dui nga son na. Atuli nuhu-dau nal in Teka-teka nas deng un lo.”

Currently Selected:

Lukas 10: heg

Highlight

Copy