Mark 16

Iesu dadi rae reyo

(Mt 28.1–8; Lk 24.1–12; Jn 20.1–10)

1Kamini Sabati meda koina niyori, Mary Magdalene, Mary, kaere bi James di nono, ma Salome bi Iesu di roaitari rausi regika sisika buni muramura voi reyadi. 2Ma ari uveyori, uriyaku gorogoro iniye, fura di ourena medari, mina rema vene bi guri vegi bogasa 3iniye iniye nikaiteyadi, “Kaere yaku guri di ida venari fore biri riyadi, mina uni moi kurevai rei etagae rigo?” 4Ye ne resi veyadi, bi mina fore bi sena moi kurevai rei etagae riyadi; mina fore bi tora iniye. 5Kamini guri sana ideri dui resi bi amiye ruaka varuka doba feyo akusi vana rama rofu amegamo, mina vesi tururu iniye iniye reyadi.

6Idu niyo, “Tururu ga refa, Iesu Nazareth amiye, kaere bi satauro ikoko reyadi, mina maina rededi. Ina bi dadi rae reyo! Bi minari de amedo. Ini aeyadi sana vefo. 7Idu bosi ini usi dina vene ma Peter nioteimafa, ‘Ina siko Galilee urana bodo. Bi mironari baku regedi, ini niyo kana.’ ”#Mt 26.32; Mk 14.28

8Ye mina rema vene bi roaita tururu resi#16.8 Bura bedakai ka evade nufa. ori dudu guri sanari gutuna raga resi disi bi amiye yokoi be de niyadi, ori reyadi dada.

Ago buni di ago metona yokoi#16.8 16.9-20 sina di ada Bura bedakai ma ago idana di fefa bi mina ago metona nufa de (nanaka 9-20).

Mk 16.9–20

Iesu bi Mary Magdalene rofu ogau niyo

(Mt 28.9–10; Jn 20.11–18)

[ 9Iesu gabi muyenari gutuna dadi rae reyori, fura di ourena meda uriyaku gorogoro, ina bi Mary Magdalene siko rofu ogau niyo, kaere bi vima no 7 nufa mina meki reyo. 10Ina yaku bosi Iesu sa vakoi dina vene, kaere bi isaka nigasa guruo amegamadi, mina oteimaro. 11Idu bi vegu niyo ma ina bi veyo, mina sina neidegasa mokena vari gira de aeyadi.

Iesu yaku ini usi dina vene remanu rofu ogau niyo

(Lk 24.13–35)

12Gabi rofu Iesu bi roaita idana dudu ini amiye remanu rofu ogau niyo, idau muro gaganiri negamadiri. 13Mina ago bosi nioteimaradi, idu mina ka mokena vari gira de aeyadi.

Iesu yaku ini usi dina vene 11 rofu ogau niyo

(Mt 28.16–20; Lk 24.36–49; Jn 20.19–23; Acts 1.6–8)

14Gabi rofu Iesu di amiye 11 iruku irigamadiri, bi ina rofu ogau niyo; ago gira maro mokena vari gira aeyaganedi. Ada gira regasa Iesu dadi rae reyo ma veyadi vene rofu mokena vari gira de aeyadi. 15Ma niyo, “Disi kono tora noibanuri, ago buni Sei yaku riyo vene tau gade rofu nirausi refa.#Acts 1.8 16Kaere amiye mokena vari gira aego ma babatiso rego, bi moi vegu rigo, idu kaere mokena vari gira de aego, ina bi nifafana rego. 17Kaere mokena vari gira aegedi, bi mina rebe dudu auta regedi: nai roka dudu vima no meki resi ago ruaka dudu ago nigedi; 18ini vana dudu aruma moisi yaumana no koru irigedi vonisi, ka esika esika de moigedi; ini vana gauka vene fafau aegedi, bi ina buni nigedi.”

Iesu bi omari boyo

(Lk 24.50–53; Acts 1.9–11)

19Kamini Iesu Varika amiye ina vene rofu ago nioteimaro, gabi rofu bi Sei yaku omari afei boyo ma Sei di vana ramari ameyo.#Acts 1.9–11 20Iesu di usi dina vene yaku disi gagani tauri ago buni nirausi reyadi, ma Varika amiye moimai regamo ina venesa ma ini ago rama aeyo ini rebe auta regamadiri.]#16.20 16.9-20 sina di ada Bura bedakai ma ago idana di bura bedakai ka mina metona ago tuma nufa (nanaka 9-10): [ 9 Rema vene yaku Peter ma ini asiyaka vene rofu disi nioteimaradi beika ina rofu niyo mina. 10 Gabi, Iesu iniye yaku ago kikifa ini usi dina vene di vanari meda dadido ma meda nedo eta rofu nifeideyo. Mina ago bi toga vegu moina di vegu ago.]

Currently Selected:

Mark 16: kqc

Highlight

Copy